ضروري وهام وبسرعة - لخبراء شراء السيارة مستعمل

[me2sense]

السلام عليكم

انا دلوقتي هشتري عربية مستعملة ان شاء الله
بس طبعا ده من اعلان على النت والشخص ما اعرفهوش

دلوقتي هو بيقولي انه هو ثالث توكيل
يعني معاه 3 توكيلات على حد ما فهمت منه وهو التوكيل التالت

والمفروض يبيعلي ، والرخصة هتنتهي لسة قادم كام شهر ، وانا عرفت ان حدود التوكيلات هو 3 توكيلات بس !

عاوز استفسر عن :

1. هل يقدر هو يجدد الرخصة قبل معاد انتهائها ولازم يجدد ؟ ولا ممكن يعملي توكيل رابع ؟
ولا نستنى لغاية معاد تجديد الرخصة ؟ ولا يكون التصرف في الحالة دي ازاي ؟

2. لو العربية مخبوطة في الجمب وفتح الاير باج بس ما رشتش دواخل خالص هل ده ممكن ياثر تاثير جوهري في العربية وادائها ؟؟ وهل ده يعيب العربية عيب جوهري جدا يعطلها ويخلي مصاريفها كتير بعد كدة ؟؟ ولا عادي ؟؟

3. هل لو العربية مركبة عفشة جديدة ده يعيبها عيب جوهري ياثر على ادائها ولا لا ؟

4. هل عدد الكيلو متر الكبير مع الحالة الكويسة ممكن ياثر على ادائها ومصاريفها عموما بعد الشراء ولا ممكن عربية تمشي كتير وحالتها كويسة وتبقى بردو كويسة في الاداء والمصاريف بتاعتها والصيانات وكدة ؟؟؟

5. بعد ما اكشف عليها في التوكيل اقدر اعرف ازاي الحالة المناسبة والحالة الوحشة اللي تخليني اصرف عليها كتير في الصيانات كل شوية ؟؟

ياريت يا جماعة اللي عنده خبرة في المواضيع دي يفيدني في اسرع وقت ممكن ...

[tarekmomo]

ما فيش حاجة اسمها 3 توكيلات اقصى حاجة توكيلين ولازم بعديها يتعمل عقد مسجل

[me2sense]

يعني دلوقتي عشان نعمل عقد مسجل لازم تكون العربية متسجلة باسم مالكها وينفع يجدد الرخصة قبل معادها ويسجلها باسمه بعدين يبيعهالي ؟؟ ولا الاجراءات تبقى ازاي ؟

[hesham fawzy h]

متابع

[eng محمد]

1. هل يقدر هو يجدد الرخصة قبل معاد انتهائها ولازم يجدد ؟ ولا ممكن يعملي توكيل رابع ؟
الأضمن انه يعملك نقل ملكية علطلول وسيبك من موضوع التوكيلات دا لانها كدا فيها توكيلات كتير .

ولا نستنى لغاية معاد تجديد الرخصة ؟ ولا يكون التصرف في الحالة دي ازاي ؟
لا متستناش مش مهم المدة دى المهم انك تضمن فلوسك فلوس الترخيص او نقل الملكية اهون من خسارتك فلوسك لو طلع الورق فيه لعب او فيه مشكلة والكلام دا عن تجربة

2. لو العربية مخبوطة في الجمب وفتح الاير باج بس ما رشتش دواخل خالص هل ده ممكن ياثر تاثير جوهري في العربية وادائها ؟؟ وهل ده يعيب العربية عيب جوهري جدا يعطلها ويخلي مصاريفها كتير بعد كدة ؟؟ ولا عادي ؟؟
فتح الإيرباج بيكون عيب طبعا ولكن حسب السوق وآراء الناس فيه ناس تقولك عادى وفى ناس تقولك عيب وينفقص من سعرها ورأى انا الشخصى لو مكانك هنقص من سعرها لانه عيب ودا الاضمن لإعادة البيع .
لكنه مش عيب جوهرى طالما الخبطة بعيدة عن اساسيات العربية وطبعا لازم تكون انت عارف ايه هى الاساسيات وازاى تكون سليمة .


3. هل لو العربية مركبة عفشة جديدة ده يعيبها عيب جوهري ياثر على ادائها ولا لا ؟
لا ميأثرش طالما عفشة كويسة والقطع اللى راكبه تكون جديدة كلها واللى مركبها يكون صنايعيى صح وبيفهم .

4. هل عدد الكيلو متر الكبير مع الحالة الكويسة ممكن ياثر على ادائها ومصاريفها عموما بعد الشراء ولا ممكن عربية تمشي كتير وحالتها كويسة وتبقى بردو كويسة في الاداء والمصاريف بتاعتها والصيانات وكدة ؟؟؟
ممكن تمشى كتير وتكون حالتها كويسة طبعا لانه حسب الاستخدام .. ممكن تعمل كيلوات قليلة بس تكون مطحونة وممكن تعمل كيلوات كتيرة بس تكون مجرد من البيت للشغل بس .


5. بعد ما اكشف عليها في التوكيل اقدر اعرف ازاي الحالة المناسبة والحالة الوحشة اللي تخليني اصرف عليها كتير في الصيانات كل شوية ؟؟
التوكيل اللى يحددلك حالة العربية وهيقولك هى محتاجه ايه وهيكلمك كام .

وبالتوفيق ان شاء الله
تحيااااتى

[me2sense]

الف شكر ليك يا باش مهندس محمد .. كفيت ووفيت ^_^ بارك الله فيك
وكل سنة وانتوا طيبين جميعا وعيد سعيد عليكم يااا رب

[kantofanto]

طيب و ليه حضرتك تشترى عربية فيها العيوب دى كلها و توجع دماغط طالما متعرفوش ، وف لك حاجة تانية احسن تكون حالتها و ظروفها حسن من كدا و ربنا يوفقك و كل سنة و حضرتك طيب.

[eng محمد]

الف شكر ليك يا باش مهندس محمد .. كفيت ووفيت ^_^ بارك الله فيك
وكل سنة وانتوا طيبين جميعا وعيد سعيد عليكم يااا رب

اللهم آمين وانت بألف خير

[drcobra]

للاسف المستعمل زى البطيخة انت وحظك
وللاسف تانى مبقاش فى امان ولا صدق فى التعامل
عايز تشترى مستعمل اكشف عليها اكتر من مرة