بنك فيصل الأسلامى فقط الى بيقسط بطريقه اسلاميه 100%

[dody_nany]

انا الحمد للة اشتريت عربية من بنك فيصل و البيع بيتم على حسب الشروط الى وضعها علماء فى التعاملات الاسلامية علشان نضمن ان عملية البيع بالاجل دة حلال 100%

اولا :
انت لازم تكون هتشترى عربية جديدة والبنك بيحسب ثمن العربية بعد عدد السنين الى هتكون فى القسط ويقسطهالك بسعر جديد هتقولى ازاى ؟
يعنى انا اشتريت النترا ب 110 الف دفعت 50 الف مقدم وهقسط على سنتين
البنك بيزود على ثمن العربية 7% على كل سنة يبقى هيبعللك العربية بكام ؟
124 الف تقريبا و بتكتب شيكات على نفسك بقيمة كل قسط انا كتبت 24 شيك ب 3500 جنيه وكل شهر بتسدد شيك من مرتبك لحد ما تخلص ثمن العربية باذن اللة كدة عملية البيع بالاجل حلال زى ما بتروح تشترى ثلاجة مثلا ويقوللك لو جبتها كاش هتاخدها ب 5000 و جبتها بالقسط هتبقى 6000 و دة اسمه بيع بالأجل
وبنك فيصل بيحرص على انة يشترى العربية بكامل ثمانها من التوكيل او المعرض اقبل ما يبعهاللك علشان عملية البيع لا يدخل فيها غير طرفين بس بائع و مشترى فقط

ثانيا :
1- بالنسبة لتأمين دة شيئ ضروروى جدا بس طبعا بشكل حلال هتقولى ازاى ؟
2- فى شركة تأمين جديدة اسمها بيت التامين التكافلى الاسلامى يعنى اية تكافلى اسلامى ؟

هقوللك الشركة دة مفروض اخر كل سنه بتشوف هية صرفت اد اية على حوادث العربيات عندها وبتخصم من الربح 40% مكسب وترجع الباقى للمشتركين فيها وهوة دة النظام الاسلامى وكدة تضمن ان شاء اللة ان لو عربيتك حصلها اى حاجة هتتصلح بمبلغ بتدفعة كل سنه فى حالتى انا كنت بدفع 3500 جنيه كل سنه و التامين ضرورى علشان لو العربية اتقلبت مثلا فى حادث وانت امتنعت عن الدفع شركة التامين تجبللك عربية جديدة او تصلحها وترجعهاللك زى الجديدة

لو فى اى استفسار ان تحت امركم ان شاء اللة ....

[أبو عبدالله]

أخي الكريم
بارك الله في حرصك
وبارك لك في سيارتك

ولكن اسمحلي ان اقول
ان عملية البيع لدى بنك فيصل ليست واقفه على ما قولته فقط
وانما اول ما يدخل في الحرمانية
هو انه يجعلك تمضي على الورق ويبدأ في مسألة البيع وهو لم يمتلك السيارة من اساسه
يعني انت بتتفق معاه
لازم يخليك تمضي على الورق الأول قبل ما ينزل يشتري العربيه او قبل ما يعطيك شيك بثمن العربية

وده لوحده يدخل في بيع ما لا يملك وهو حرام شرعا
وهناك المزيد ولكن ده كفاية

[mohamed_kta]

السلام عليكم
أ / dody_nany شكراً جزيلاً لك على النصيحهو لكن اريد أن اعرف منك سهولة الأجرات فى البنك و حكاية روح هات بطاقة ضربية أو صورة من الوكيل و عرض اسعار و مش عارف ايه ده روتينى ولا سريع .

و كمان موضوع تحويل المرتب من البنك اللى انتا تابع ليه ده سهل ؟

و شكراً

[adel1414]

الله يكون فى عوننا جميعا الواحد مبقاش مصدق كمية النصب والفهلوة اللى اصبحت فخر لاصحابها .

[dody_nany]

الى الاستاذ ابو عبد الله انا جبت مفردات مرتب وعرض سعر و راح معايه مندوب من بنك فيصل الى التوكيل وقام بشراء العربيه امامى بشيك من بنك فيصل نفسه مش منى واشترى العربيه بالمواصافات الى انا طلبتها وبعد كده رجعنا البنك مضيت على الشيكات بس انا لازم اكتب اقرار على نفسى انى هشترى العربيه ده من البنك وانا كنت مستعجلة على الشراء وطلبت من المندوب انى امضى الشيكات اقبل ما نروح المعرض المندوب رفض وقالى مينفعش لان ده هو الى بيحصل فى البنوك العاديه وده هوه الحرام

[dody_nany]

بنك فيصل الى فى شارع الثوره ناس محترمه جدا جدا والأجرات بسيطه وشرحتها فى الرد السابق

[dody_nany]

و علشان قلبك يكون مرتاح لتعامل مع بنك فيصل الاسلامى ده فتوى من
الأستاذ الدكتور عبد الحميد الغزالي
أستاذ الاقتصاد الإسلامي – كلية الاقتصاد والعلوم السياسية – جامعة القاهرة
وخبير وعضو لجنة الفقه الإسلامي المقارن – المجلس الأعلى للشئون الإسلامية.
على التعامل مع البنوك الاسلامية

هل يجوز شراء سيارة عن طريق البنك الإسلامي ومن ثم بيعها بعد تملكها للحصول على مبلغ نقدي للحاجة الماسة له؟

بالطبع اذا ما تم شراء السيارة عن طريق البنك الإسلامي مرابحة مثلا فهي مرابحة صحيحة بمعنى ان يمتلك البنك السيارة قبل بيعها لكم ثم بعد ذلك عند انتقالها لكم وتملكها بعد سداد ثمنها للبنك وبما في ذلك مرابحة البنك يصبح حق التصرف فيما تملك ولكن قبل ذلك لا يجوز للإنسان ان يبيع ما لا يملك

[Qamar]

شكرا للافادة و لكن لي تعليق و ملاحظة:
التعليق: لقظ الجلالة ينبغي ان يكتب بالهاء المربوطة لا بالتاء المربوطة (استخدم الهاء العادية و هي هاتتربط لوحدها)
الملاحظة: هي الناس دايما بتشكر في فرع معين من فيصل دونا عن الآخر ليه؟ (سبق أن قرأت ترشيح لفرع عباس العقاد باعتباره الأقرب للشريعة) هو كل فرع له لائحة لوحده؟

[batool2008]

و علشان قلبك يكون مرتاح لتعامل مع بنك فيصل الاسلامى ده فتوى من
الأستاذ الدكتور عبد الحميد الغزالي
أستاذ الاقتصاد الإسلامي – كلية الاقتصاد والعلوم السياسية – جامعة القاهرة
وخبير وعضو لجنة الفقه الإسلامي المقارن – المجلس الأعلى للشئون الإسلامية.
على التعامل مع البنوك الاسلامية

هل يجوز شراء سيارة عن طريق البنك الإسلامي ومن ثم بيعها بعد تملكها للحصول على مبلغ نقدي للحاجة الماسة له؟

بالطبع اذا ما تم شراء السيارة عن طريق البنك الإسلامي مرابحة مثلا فهي مرابحة صحيحة بمعنى ان يمتلك البنك السيارة قبل بيعها لكم ثم بعد ذلك عند انتقالها لكم وتملكها بعد سداد ثمنها للبنك وبما في ذلك مرابحة البنك يصبح حق التصرف فيما تملك ولكن قبل ذلك لا يجوز للإنسان ان يبيع ما لا يملك

طب هو الحد الادنى للمقدم كام
و كمان أقصى عدد لسنوات التقسيط كام؟
و بشتروا جديد و مستعمل؟
و جزاك الله خيرا

[nasr-eldeen]

الى الاستاذ ابو عبد الله انا جبت مفردات مرتب وعرض سعر و راح معايه مندوب من بنك فيصل الى التوكيل وقام بشراء العربيه امامى بشيك من بنك فيصل نفسه مش منى واشترى العربيه بالمواصافات الى انا طلبتها وبعد كده رجعنا البنك مضيت على الشيكات بس انا لازم اكتب اقرار على نفسى انى هشترى العربيه ده من البنك وانا كنت مستعجلة على الشراء وطلبت من المندوب انى امضى الشيكات اقبل ما نروح المعرض المندوب رفض وقالى مينفعش لان ده هو الى بيحصل فى البنوك العاديه وده هوه الحرام

هذا الاقرار يمثل التزام منك بشراء السيارة ( الوعد بالشراء ) ويستطيع البنك ان يعود عليك بالشرط الجزائي في حالة عدم اتمام البيع .
اذن البنك في هذه الحالة يعتبر باع السيارة دون ان يمتلكها .
بالنسبة لموضوع التوقيع على الشيكات قبل أو بعد لا يوجد فرق لأن هناك التزام بشراء هذه السيارة بمواصفتها بتحديد ثمنها قبل ان يتملكها البائع نفسه ( البنك ) .
واعتقد ان البنوك وشركات التأمين اخذت تتمسح في لقب إسلامي لجذب تعاطف العملاء زي الخدمة اللي حصل في بنك مصر ( هناك نوع من التعامل البنكي اطلقوا عليه اسلامي ) بس وده لما لقوا موضة الفرح الإسلامي وملابس البحر الإسلامية واشياء من هذ القبيل لها صدى عند الناس
لكن اعتقد ان الاصح لو ان البنك يمتلك المعرض في الاصل أو هو الذي يشتري السيارة بدون تدخل مني ومن اي مكان يشاء وبأي سعر مادام سيوفر لي السيارة المطلوبة دون تدخل من المشتري دة بالنسبة للسيارة
هناك بعض الاسئلة
هل البنك يأخذ شيك عن كل قسط فقط أم يأخذ شيك آخر بإجمالي الدين ؟
هل يتم عمل توكيل عام للبنك ام توكيل عن السيارة فقط ولماذا ؟
هل يأخذ البنك نسخة من المفتاح ؟
هل يجب اخذ موافقة من البنك عند كل تجديد للترخيص ( حظر بيع ) ولماذا ؟
هل يجبرك البنك على التأمين الشامل لدى شركة معينة ولماذا ؟

[Qamar]

الأسئلة كترت يا حاج dody nany و عشمانين في الرد . انت فين؟

[dody_nany]

هناك بعض الاسئلة
هل البنك يأخذ شيك عن كل قسط فقط أم يأخذ شيك آخر بإجمالي الدين ؟
الرد : الاثنين
هل يتم عمل توكيل عام للبنك ام توكيل عن السيارة فقط ولماذا ؟
الرد : مش فاكر حاجه زى كدة انا اصلا معملتش توكيل لعام ولا خاص للبنك
هل يأخذ البنك نسخة من المفتاح ؟
الرد : لا انا النسختين معايه
هل يجب اخذ موافقة من البنك عند كل تجديد للترخيص ( حظر بيع ) ولماذا ؟
الرد : انا العربيه عليها حظر بيع ومعاد الترخيص كمان اسبوع بس البنك مطلبش منى انى ارجعلله ساعة الترخيص ومعرفش هيحصل اية سعتها
هل يجبرك البنك على التأمين الشامل لدى شركة معينة ولماذا ؟
التامين كان اجبارى بس مع الشركة الى انت تستريحلها وده حاجه انت تتحاسب عليها لان التامين التكافلى الاسلامى اغلى من العادى يعنى النسبة بتاعت التامين الاسلامى كانت 3.5% لكن الشركات العاديه 2.7% وكل واحد عارف قدراته فصعب انه يجبرك على شركه معينه وبنك فيصل قبل ما يكون فى تامين اسلامى كان مش بيجبر حد على التامين لكن بعد ما ظهر التامين التكافلى الاسلامى فرض التامين علشان يضمن انك لو عملت حادث والعربيه اتكسرت خالص و انت معكش تصلحها الشركة تصلحهالك بطريقه حلال 100%

انا هعرض عليك رد الشيخ حامد العطار وفيه رد على جزئية الاقرار دة مفيش اى شبه عليه لانه ده معناه انى بوكل البنك يشتري ليه العربيه على وعد منى بشرائها بعد ذللك منه وانا نقلت الرد بكل امانه


بس اقبل ما اعرض الرد حبيت اديك نبذه عن هذا الشيخ :
حاصل على العالية في الدراسات الإسلامية والعربية من جامعة الأزهر سنة 1999.
يعمل مستشارا شرعيا لشركة الوفاء للمرابحات.
عضو الاتحاد العالمي لعلماء المسلمين.
له عدة دراسات شرعية واقتصادية.. منها:
خصم الأوراق التجارية صورة من الربا الحرام.
مفهوم البدعة بين المضيقين والموسعين .
بيع الأمانة ....صورته وتطبيقاته المعاصرة.
الضوابط الشرعية للتعامل في البورصة
دراسة حول حكم البيع على البيع وتطبيقاته المعاصرة.

اريد ان اشتري سيارة عن طريق الوكالة وثمن السيارة بتسليم المبلغ كاش يساوي 10000 ريال وحين اريد شراؤها بالاقساط على مدى 5 اشهر فان ثمنها يزيد الى 120000
وذلك بعد اعتبار نسبة الفائدة لصالح الوكالة
فهل هذا ربا؟
هل يجوز لي شراؤها بالتقسيط مع العلم انا لا املك المبلغ كاش؟
واعرف ان شركات التمويل ايضا تأخذ نسبة فائدة على عدد السنوات
ومكتوب عقد قرض وليس بيع؟

السؤال بسم الله ، والحمد لله ، والصلاة والسلام على رسول الله ، وبعد :-

1- لو كانت الوكالة هي التي ستتولى البيع مقسطا لك فلا مانع، ولتأخذ ما شاءت من زيادة متى تراضيتما عليها.

2- لو توسط بنك أو شركة تمويل ، فينبغي أن تعلم أن البنوك التي تتوسط في بيع السيارات من الممكن أن يأخذ توسطها هذا صورتين :-

الصورة الأولى :-أن يقوم البنك بإقراض من يريد شراء السيارة ثمن السيارة بضمان السيارة ذاتها أو بأي ضمان آخر مقابل فائدة ربوية ، ويتم تحويل هذا القرض للجهة صاحبة السيارة- للمعارض مثلا-فهذا ربا لا يجوز ، وهذا ما تقوم به البنوك الربوية العادية . وقد تسقط فيه بعض البنوك الإسلامية، بسبب استسهال موظفيها!!

الصورة الثانية : أن يقوم البنك بامتلاك السيارة ، ثم يقوم ببيع السيارة لمن يريد بالتقسيط ، وهذه الصورة لاشيء فيها لو فرضنا أنها موجودة ، والبنوك التي تتعامل بهذه الصورة هي البنوك الإسلامية .
وينبغي التأكد من أن البنك يشتري السيارات فعلا، كما ينبغي التأكد أن البنك لا يبيع إلا بعد التملك الفعلي.

ولا بد من تسجيل السيارة باسم البنك قبل بيعها للمشتري، واكتفى بعض العلماء بكتابة عقد ابتدائي بين صاحب السيارة وبين البنك دون الحاجة إلى التسجيل، لكن التسجيل أولى خروجا من الخلاف.

وعلى أية حال، فيجب نقل ملكية السيارة إلى البنك، ونقل كافة مستنداتها إلى البنك قبل أن يقوم ببيعها. ولا يقوم بهذا إلا البنوك الإسلامية عادة.

والبنوك غير الإسلامية في مثل هذه الحالات لا تشتري السيارة، ولكنها تقرض من يريد شراء السيارة ثمن شرائها، وتدفع قيمة القرض لمالك السيارة بضمان السيارة، وتأخذ زيادة ربوية في مقابل هذا الإقراض، فيكون المعرض قد باع السيارة للعميل بمبلغ نقدا، إلا أن العميل لا يستطيع توفير هذا المبلغ نقدا، فيقرضه البنك هذا المبلغ، ويتم تحويل هذا المبلغ من البنك للمعرض مباشرة دون أن يتسلمه العميل، ويكون البنك هنا مجرد ممول ، ويتلقى فائدة ربوية مقابل هذا القرض وهذا ربا حرام.
وهذا ينطبق على الصورة التي عرضتها في سؤالك، فعلى ذلك فلا يجوز.

فإذا أراد أي بنك أن يبيع لك سيارة عن طريق ببيع المرابحة، فلهذا البيع خطوات لا بد أن تمر من خلالها حتى تكون الصورة مشروعة، وإلا كانت مجرد تمويل ربوي.
وإليك هذه الخطوات :-

أ-طلب من العميل يقدمه للمصرف لشراء سلعة موصوفة.

ب-قبول من المصرف لشراء السلعة الموصوفة.

ج-وعد من العميل لشراء السلعة الموصوفة من المصرف بعد تملك المصرف لها.

د-وعد من المصرف ببيع السلعة الموصوفة للعميل .

هـ-شراء المصرف للسلعة الموصوفة نقداًَ.
( لاحظ المصرف هو الذي يقوم بالشراء لنفسه دون تدخل من العميل، ويقوم بحيازتها، وبعض العلماء يجيز هنا أن يوكل البنك العميل في عملية الشراء هذه، أي أن يحصل العميل على عقد وكالة من البنك له بمقتضاه يشتري العميل السيارة من صاحبها للبنك وليس لنفسه، ولكن مجمع الفقه كره هذه الوكالة لما فيها من معنى الصورية)

و-بيع المصرف للسلعة الموصوفة بعد شرائها، وحيازتها للعميل بأجل مع زيادة ربح متفق عليها بين المصرف والعميل.

فإذا قبل البنك بأن يبيع لك السيارة مرورا بهذه الخطوات، فلا مانع من ذلك شرعا، إسلاميا كان البنك أو غيره.

والذي نحب أن نبينه لك الآتي:-

أولا: أن هذه الخطوات لا بد أن تكون مرتبة، وليس شرطا أن تتم من خلال عقود مكتوبة، فلا مانع من المرور بها شفويا، على أن تكون الخطوة الأخيرة هي بيع السيارة بعد أن يتملكها البنك بالفعل.
فإذا أعطاك البنك المال بيدك على أن تشتري به السيارة التي تريد فهذا لا يجوز، ويكون صورة ربوية، سواء أكان القرض باسمك أو باسم السيارة.

ثانيا:-يجب أن تكون هذه الأرباح المئوية غير منصوص عليها بالعقد مفصولة عن الربح، ولكن لا مانع من أن تتفاهم مع مندوب البنك بهذه الطريقة دون أن يسجل ذلك في العقد، أعني أن حساب الربح بالنسبة المئوية لا شيء فيه شرعا، بشرط أن يتفق البنك والبائع على مدة زمنية معينة للتقسيط عند التعاقد، ولا يتركا ذلك للمشيئة والظروف بعد العقد.

فإذا قال لك البنك : أريد أن أربح في الشهر كذا، واقض كيف شئت فعليك أن تختار من هذه اللحظة المدة الزمنية، ولا يجوز تعديلها بعد العقد، وإلا كان الأمر مجرد صورة ربوية .

[mhoss]

السلام عليكم،،،
ده فعلاً اللى الشيخ على السالوس دكتور الأقتصاد الأسلامى بيوصى بيه ان بنك فيصل فرع مدينة نصر هو الحل الأسلامى لتقسيط السيارات و لله الحمد و المنة...

[dody_nany]

شكرا للافادة و لكن لي تعليق و ملاحظة:
التعليق: لقظ الجلالة ينبغي ان يكتب بالهاء المربوطة لا بالتاء المربوطة (استخدم الهاء العادية و هي هاتتربط لوحدها)
الملاحظة: هي الناس دايما بتشكر في فرع معين من فيصل دونا عن الآخر ليه؟ (سبق أن قرأت ترشيح لفرع عباس العقاد باعتباره الأقرب للشريعة) هو كل فرع له لائحة لوحده؟

جزاكم الله خيرا و ان شاء الله هاخد بالى بعد كده بس التعديل مش مفتوح ليه دلوقتى ومش عارف اعدلها
بالنسبه لسؤال حضرتك انا مفرضتش على حد فرع معين انا كتبت تجربتى مع الفرع الى اتعاملت معاه القوانين و الاجرائات فى الفروع كلها واحده بس معاملة الناس فى كل بنك اكيد مختلفه وده بس كان قصدى

[abou_ruqi]

التامين التكافلى الاسلامى !!!!
ده فين ده ؟