محتاج نصيحتكم ... ايهما افضل لانسر بومة و لا كيا سيراتو و لا النترا

[tamer.soliman8]

محتاج نصيحتكم ... ربنا يكرمكم :) ايهما افضل لانسر بومة و لا كيا سيراتو و لا النترا ولا نيسان سني 2010 انا محتاج عربية في حدود 80000 الي 100 الف حالة نضيفة جدا كاملة و كده يعني ...

ميولي للانسر بومة 2006 الي 2010 و بعديها الكيا سيراتو 2010 : 2012 عشان السعر بس مش عارف ممكن تقووليلي من واقع خبراتكم لان ناس صحابي ببقولوا كلاك كويس عن الباقيين ... انا محتار جدا و محتاج اقرر ممكن تساعدوني و تقولولي الاحسن و مزايا كل واحدة من وجهة نظركم

[محمود بهاء]

انا ركبت لانسر بومه 2006 مانيوال 1600
وركبت سيراتو 2011 كامله
وحاليا ندمان اشد الندم على الانسر
كلمه واحده هقولهالك مسمار اي عربيه ياباني انضف من كل العربيات الكوري
حاول تشتري لانسر او نيسان وهتدعيلي

[monamize4]

imo ,, لانسر بومة او سيراتو 6 سرعات

[tamer.soliman8]

انا اسمع ان النيسان تقفيل مصري ... و عايز اعرف رينك الانسر و الكيا كاملة

السيراتو 6 سرعات بكام ... و لو العربية مواصفات خليجي معناه انها احسن ؟؟؟

[tamer.soliman8]

كده خلاص محدش هيفيدنا اكتر من كده

[monamize4]

كده خلاص محدش هيفيدنا اكتر من كده

البومة انت بتقول 2006-2010
خلى بالك ان موديلات 2006-2009 ال 1600 كلها فتيس CVT
و دى اكتر موديلات مطلوبة ف البومة و بالذات كمان لو كانت كاملة (سوبر اكشن)
الموديلات دى بتتكلم من 90-100 الف ف الحالات الكويسه و فى حاجات باقل و فى حاجات بأكتر
اما موديل 2010 و انت طالع فا دا اللى نزل بالفتيس الستب ترونك و كذا واحد قال ان عفشتها من غير ميزان
خلفى و الله اعلم بصحة المعلومة دى البومة عامة قطع غيارها ماليه الدنيا و صيانتها سهله و ماسكة سعر جدا

السيراتو موديلات 2009-2010 و اوائل 2011 نزلت بالفتيس ال 4 سرعات
موديلات 2011 و انت طالع نزلت بالفتيس السرعات و دا طبعا افضل ف استهلاك البنزين
و صوت الموتور اهدى و دى اللى انصحك تدور عليها و طبعا فئات السيراتو كتيييييييير جداااااااااا
خصوصا الخليجى و بالتالى العربية ليها رنج اسعار كبير جدا بس اهم حاجة ان يكون فيها ايمبوليزر
و ماتكونش جنط 17 و قسم كيا هتلاقى فيه مواضيع كتييييييير بتشرح بالتفصيل كل حاجة عن السيراتو

الصنى قبل الاخيرة فعلا تقفيل مصرى و هى اسؤهم من وجهة نظرى بس اسعارها اقل منهم
الالنترا ال HD ممتازة ف السحب و استهلاك البنزين و قطع الغيار بس للاسف مافيهاش ايمبوليزر
و معظم الموجود منها ف السوق من غير Abs أو ايرباجز لكن ليها موديلات خليجى فيها الكلام دا كله
لكن للاسف هتلاقيها نادره ,, شوف الانسب بالنسبالك ياباشا و انا معاك ف اى استفسار

[tamer.soliman8]

طبعا بعد اللي سمعته من حضرتك ... زادت استفساراتي خصوصا اني مش ملم المام تام و عايز لما اشتري متدبسش

خلى بالك ان موديلات 2006-2009 ال 1600 كلها فتيس CVT
و دى اكتر موديلات مطلوبة ف البومة و بالذات كمان لو كانت كاملة (سوبر اكشن)

توضيح يعني ايه فتيس CVT و رايك ايه في موضوع السوبر اكشن او الفول سبورت و كده ... اعذر جهلي :)

ازاي اقدر تمن العربية و اتاكد ان الرقم المطلوب فيها مش مبالغ فيه

وانهي احسن اللي العربيات ال CVT ولا العربيات اللي بالفتيس الستب ترونك

بالنسبة للسيراتو ... ايه هو الايمبوليزر و ليه متكونش جنط 17 و رايك سيراتو بالموصفات اللي قولت عليها رينج 80:100 الف و لا هتبقي اكتر

و هي ولا اللانسر البومة

يعني ايه الالنترا ال HD ؟ ودي بكام كا رينج و ايه هو ال Abs

معلشي زهقتك بس صدقني انا بدات عيني تروح لحاجات مكنتش بفكر فيها و بدات استفسر اكتر عنها عشان افهم اهميتها و ساعتها مستخسرشي الفلوس ... بحد شكرا مقدما علي المجهود ... وشكرا للمنتدي المحترم المفيد جدا

[monamize4]

طبعا بعد اللي سمعته من حضرتك ... زادت استفساراتي خصوصا اني مش ملم المام تام و عايز لما اشتري متدبسش

خلى بالك ان موديلات 2006-2009 ال 1600 كلها فتيس CVT
و دى اكتر موديلات مطلوبة ف البومة و بالذات كمان لو كانت كاملة (سوبر اكشن)

توضيح يعني ايه فتيس CVT و رايك ايه في موضوع السوبر اكشن او الفول سبورت و كده ... اعذر جهلي :)

ازاي اقدر تمن العربية و اتاكد ان الرقم المطلوب فيها مش مبالغ فيه

وانهي احسن اللي العربيات ال CVT ولا العربيات اللي بالفتيس الستب ترونك

بالنسبة للسيراتو ... ايه هو الايمبوليزر و ليه متكونش جنط 17 و رايك سيراتو بالموصفات اللي قولت عليها رينج 80:100 الف و لا هتبقي اكتر

و هي ولا اللانسر البومة

يعني ايه الالنترا ال HD ؟ ودي بكام كا رينج و ايه هو ال Abs

معلشي زهقتك بس صدقني انا بدات عيني تروح لحاجات مكنتش بفكر فيها و بدات استفسر اكتر عنها عشان افهم اهميتها و ساعتها مستخسرشي الفلوس ... بحد شكرا مقدما علي المجهود ... وشكرا للمنتدي المحترم المفيد جدا

- الفتيس ال CVT دا نوع من الفتيسات الاوتوماتك مابيبقاش فيه تروس زى الفتيسات الاوتوماتك العادية
و بالتالى مفهوش غيارات و بالتالى الفتيس دا بيبقى سلس جدا ف السواقه و دا بينزل ف مصر ف
موديلات زى الكورولا الجديدة و الفلونس الجديدة و الاتراج و دا شرح لطريقة عمله

http://www.nilemotors.net/Nile/443474-a.html#post3875776029

و الفتيس دا احسن من الفتيس الستيب ترونك اللى نزل من اول 2010 و هو اللى مطلوبة اكتر ف السوق

- السوبر اكشن هى اعلى موديل ف البومة من ناحية الكماليات و طبعا بيكون ف الموديلات ال 1600
و دا بيبقى فيه فتحة سقف و سبويلر و جنوط و جلد طبيعى ف الطارة و الفتيس

- احسن واحد يسعر العربيات هو استاذ شريف http://www.nilemotors.net/Nile/418709-a.html

- الايمبوليزر هو المفتاح المشفر بمعنى ان العربية ماتشتغلش الا بمفتاحها الاصلى
و ال abs هو مانع انغلاق الفرامل و دا بيساعدك انك تلف الدريكسيون حتى و انت كابس فرامل
عموما ماتشتريش ابدا عربية مافيهاش ايموبليزر و abs و airbags

- ماتشتريش سيراتو بالجنط ال 17 لان عفشتها بتكون ناشفة اوى و الكاوتش هيطلع بلالين
و المبلغ اللى معاك يجيب سيراتو بمواصفات كويسه

- النترا HD دى اللى هى موديل الالنترا من 2007 لحد 2011

- سيراتو و لا بومة ؟!!!!!! دى حاجة تقررها انت ياباشا
البومة قطع غيارها منتشرة جداااااا و صيانتها سهلة و سوقها قوى جدااااا و عفشتها احسن
السيراتو شكلها احدث و فيها اوبشنز اكتر و تصميمها من جوه اشيك بكتير

[tamer.soliman8]

والله ياباشا ... مش عارف اقولك ايه ... انت فهمتني حاجات انا مستحيل افكر فيها ... بجد ربنا يباركلك ... بس بحكم خبرتك لو انت مكاني تشتري انهي كيا و لا لانسر و هل الاتنين مش هيعدوا ال100 الف و الاتنين ثابتين و كده ... بص انا ماليش خالص في الموضوع ده و عايز اختار صح عندي ميول للاتنين بس في الاخر بتحكمني فلوس و جودة عربية عن التانية ... فريحني و قوللي انهي واحدة بحكم خبرتك ... بشكرك جدا

[M.ABDOU]

رايى افضلهم الالنترا بشرط تكون فيها ايموبلايزر وفرامل abs

اعتقد ده مش موجود الا فى الخليجى

من الاخر كده مترمييش فلوسك وتحطها على المحك بأنك تشترى اى عربيه مفيهاش ايموبلايزر

خد بالاسباب وتوكل على الله

[monamize4]

والله ياباشا ... مش عارف اقولك ايه ... انت فهمتني حاجات انا مستحيل افكر فيها ... بجد ربنا يباركلك ... بس بحكم خبرتك لو انت مكاني تشتري انهي كيا و لا لانسر و هل الاتنين مش هيعدوا ال100 الف و الاتنين ثابتين و كده ... بص انا ماليش خالص في الموضوع ده و عايز اختار صح عندي ميول للاتنين بس في الاخر بتحكمني فلوس و جودة عربية عن التانية ... فريحني و قوللي انهي واحدة بحكم خبرتك ... بشكرك جدا

المبلغ اللى معاك ياباش كافى انه يشترى لانسر او سيراتو حالتهم كويسه
اختار ياباشا اللى انت مرتاحلها اكتر و اللى حالتها تكون احسن ,, حسب المتاح قدامك

لو قدامى لانسر و سيراتو و ال2 حالتهم زى بعض و بختار لنفسى ,,
هختار لانسر لانى بحب العربيه اللى بتفضل محتفظة بقيمتها ف السوق
و اللى تكون صيانتها سهلة و بسيطة و لان عفشتها احسن ,, لكن طبعا كل واحد بيختار حسب احتياجاته

و معاك ياباشا ف اى استفسار ,,

[A7medelfe2y]

لو شكل البومه الكلاسيكي مش هيبقي مشكله بالنسبه لحضرتك يبقي متفكرش بس دور علي سوبر اكشن وتكون حاله