الى اصحاب الخبرة فى البيع والشراء - قصة حقيقية

[egyplan]

الى اصحاب الخبرة فى البيع والشراء الى اصحاب الفراسة والخبرة فى التعامل مع الناس
بمناسبة شهر رمضان اسرد لكم قصة حقيقية ومنتظر منكم التعليق والتحليل كى اتعلم منكم
-------------------------------------------------------------------------------------------------------
شفت اعلان فى مواقع بيع السيارات عن سيارة اوبل كورسا المكان فى القاهرة
السيارة كانت معروضة بسعر كويس فى احد المواقع 48 الف
ودورت فى موقع اخر وجدت نفس السيارة معروضة ب 50 الف
المهم اتصلت برقم البائع وذهبت لمعاينة السيارة وكان ذلك قبل الساعة الخامسة عصرا حسب ما اتشرط الشخص اللى رد على الرقم واسمه خالد
خالد الذى قابلنى فى الشارع فى مكان السيارة ليس المالك ولكنه ذهب الى احد العقارات وجاء بمفتاح السيارة وقال ان السيارة ملك لسيدة زوجها صاحب شركة وهو يعمل بها
بعد قليل جاء زوج صاحبة السيارة (اسمه احمد) وفتح شنطة السيارة واخرج منها مضارب التنس لانه ذاهب الى النادى واعطى المفتاح الى خالد وقال لى ان خالد مكانه وهو مسؤل عن السيارة وعن تحديد مبلغ البيع وانه فى مشغوليات ومش فاضى وان زوجته تريد بيع السياره لشراء سيارة احدث والسيارة كانت مرفوعه 3 سنوات لانها كانت بامريكا وهى مقيمة بالاسكندرية وهى عملت خبطة بسيطة بالسيارة فى الاكصدام والكابوت وطبعا متسمكرة ومرشوشة كابوت واكصدام امامى فقط.
واستأذن وانصرف وقال لخالد انه يحضر له السيارة فى النادى اخر اليوم

المهم اتفرجت على السيارة كشكل وكعداد وشنطة فالسيارة فى مجملها كويسة والسعر مناسب ويعتبر لقطة خاصة ان العداد كان عامل 60 الف كيلو فقط
والسيارة من الداخل نظيفة فعلا وبعد قليل جاء شخص اخر (تقريبا تاجر) يعاين السيارة وبعد قليل جاء شخص ثالث

المهم وجدت بعض ترشيح الزيت على الموتور فطلبت ان يتم الكشف على السيارة
فكان واقف بالقرب من السيارة رجل كبير فى السن من اهل المنطقة على مايبدو فتدخل فى الموضوع وقال انه يوجد ميكانيكى فى اخر هذ الشارع
ركبنا نحن الثلاثة وذهبنا للميكانيكى فنظر وقال ده عادى تعريق زيت ولم ياخذ اى مال لانه معرفة للحاج الكبير ده
والحاج الكبير ده قعد يقول السيارة دى لقطة وحلوه وممتازة
المهم رجعنا الى مكان السيارة الاصلى مرة اخرى والمشترين مازالوا واقفين ينتظرون دورهم للفرجة على السيارة
سالت البائع السيارة بكام قال ب 50 الف ف قلتله انا شوفتها ب 48 الف على الموقع
قال انه واحد الاشخاص الاخرين وضعوا الاعلان وهو غلط وحط الرقم 48 الف
انا قلتله ان الرقم 48 هو المناسب
فاتصل بزوج صاحبة السيارة (احمد) وفى الاخر الرجل وافق على بيع السيارة ب 48 الف
المهم الشاب قال انه ليه سمسرة 500 جنية واما هيبعها لشخص اخر - فوافقت على دفع السمسرة فى حال شراء السيارة
المهم اعطية مبلغ 250 ربط كلام (اللى كانوا فى جيبى) عشان الناس اللى كانت واقفة يتلم الحوار وميبقاش فى كلام كتير
وطلبت من خالد ايصال بالمبلغ فمرضيش يكتب وصل بيهم
وتدخل الراجل الكبير وقعد يقول وصل ايه وبتاع ايه؟
اللى عرفت اهده منه صورة البطاقة وصورة رخصة السيارة
وعرفت ابص على رقم الشاسية وطلع مظبوط ورقم موتور الكورسا مش عارف هو فين؟

بعدها بقليل لقيت الراجل الى واقف فى الشارع الكبير بيقول لخالد هتعملوا ايه بقى ؟
فخالد شكلة مش عارف اجراءات البيع فهو قال انى اعطي احمد غدا المبلغ الا خمس او 3 الاف جنية لحين عمل توكيل للسيارة ثم يسلمنى السيارة والتوكيل
انا قلتله التوكيل والفلوس فى نفس الوقت ولابد من احضار شهادة المخالفات والبيانات
فحدثت مشادة بسيطة مع خالد والراجل وقلتلهم على العموم انا هسال ازاى الاجراءا لانهم طبعا مش اصحاب السيارة والكلام مع المالك للسيارة
وفهمت من مجمل الحوار انه غالبا زوج السيدة هيسافر الاسكندرية وهيعملوا التوكيل من هناك !!!

طلبت من خالد رقم موبيل احمد (زوج صاحبة السيارة) ولكنه رفض وقالى هيديله رقمى وهو هيبقى يكلمنى
انتظرت بعدها بيوم كامل (الثلاثاء) بعدها ومحدش اتصل

انتظرت يوم كامل ولم اتلقى اى اتصال من زوج صاحبة السيارة (احمد) فقلت لا اتصل بهم كى لا يحسوا انى ملهوف على السيارة

فى اليوم التالى (الاربعاء مساءا الساعة 11) تلقيت اتصال من خالد وهو المسؤل عن بيع السيارة وقال لى ان الاستاذ احمد (زوج صاحبة السيارة) يريد الان بياناتك عشان يعمل توكيل السيارة لانه الان بالاسكندرية.

رديت عليه وقلتله ازاى هيعملوا التوكيل وانا لم ارى صاحبة السيارة وهو اساسا لم يتسلم الفلوس؟!

فقلت له هات رقمه اتصل بيه. فاعطانى رقمه واتصلت باستاذ احمد وقلتله
انى كنت فى انتظار مكالمتك وان استاذ خالد مكنش عاوز يدينى رقمك فقال لى انه سوف يقوم بعمل التوكيل
وان الفلوس مضمونه وتزيد.

وانى اريد شهادة المخالفات والبيانات للسيارة من مرور الاسكندرية
فقال لى انه يريد ان يبيع السيارة بسرعة لانه فى استعجال عشان زوجته تريد شراء السيارة الجديدة
وانه قادم للقاهرة صبح الغد فليس لدية وقت لعمل تلك الاجراءات
وان السيارة لسا مرخصة من شهر وانه سوف يكتب تعهد لو ظهرت مخالفات سيقوم بدفعها
وقال لى ان هناك جار له كان يريد شراء السيارة ولكنه قال له ان شخص اخر دفع العربون (250 جنية)

فقلت له موضوع شهاد المخالفات ده مش مشكلة وايضا شهادة البيانات
ولكنى ولو انت كنت اتصلت بى امس كنت جيت معاك الاسكندرية

فقلت له انى اريد رفع السيارة فى البنزينه عشان اكشف على رقم الموتور لانى لم استطع ان ارى السيارة بوضوح لان وقت المعاينه كان قبل الفطاروبعدها نعمل الاجراءات
فقل لى انه سوف ياتى الى القاهرة على ظهر الخميس وسيترك المفتاح مع خالد فى المكتب وانى استطيع ان اكشف على السيارة فى اى بنزينه ولكنه يحتاج السيارة الى يوم الجمعة مساءا لانه معزوم على الفطار

فالميعاد المناسب لعمل التوكيل للسيارة سيكون يوم السبت فى نادى الجزيرة وستكون زوجته معه

فقلت له انى ساذهب غدا الى البنك لاقوم بسحب المبلغ

وشكرته واغلقت التليفون معه وكلمت خالد فخالد لقيته عرف المكالمه وانى ساذهب معه اليوم الخميس للبنزينه وقالى لى متقعدش تشد مع الناس دى عشان خلقهم ضيق وان العربية زى الفل ولقطة والعربية عدادها 60 الف كيلو ومرفوعة 3 سنوات واوبل كورسا موديل 2005 لقطة بملبغ 48 الف

المهم تانى يوم الصبح صحيت قعدت ادور على المحفظة ولم اجدها فى المنزل واندهشت لاختفاء المحفظة من المنزل بصورة غريبة رغم ان كل يوم بتكون موضوعه على المكتب

وفى الاخر وجدت المحفظة فى مكان غريب فاستغربت
المهم رحت البنك واخذت المبلغ وطبعا اخذت اذن من الشغل ووضعت المبلغ فى المنزل وانتظرت مكالمه خالد
اتصل خالد الساعة 11:30 ظهرا
سالنى انت عامل ايه قلتله كويس
قالى : مش عارف اقولك ايه يا استاذ محمد بس المدام امبارح كانت ماشية بالسيارة وخبطتها فاللاسف مش هيبيعوا السيارة
قلتله : مش مشكلة ابص على الخبطة لو صغيرة مش مشكلة اشتري السيارة

قالى : بس للاسف السيارة اتباعت لقريب المدام وبصراحة م احمد فالى وانا محرج منك جدا وخاصة انى كنت هاخد 500 جنية مصلحة من السيارة
وقالى شوف هتيجى امتى العجوزة تاخد ال 250 جنية لانهم معايا

قلتله : طب انا هكلم ا احمد افهم منه

اتصلت باستاذ احمد من رقم موبيلى فلم يرد
اتصلت بيه بعدها بعشر دقائق من رقم اخر فرد عليا

وقلتله انا اللى كنت هشترى السيارة الكورسا قالى للاسف امس احد اقرباء المدام اشترى السيارة خلاص وحتى اشتراها اقل من تمنها ب 2000 جنية (يعنى ب 46 الف) وانه باعها ليه لانه كان عاوز يشتريها من فترة وانه مش فاضى لوجع الدماغ؟!!!

فقلتله هو انا عملت ايه يضايق حضرتك؟

قالى مش قصدة هو عاوز يبيع السيارة بسرعة وان قريبهم ده عارف السيارة واشترى السيارة على طول

وقالى ان بيع وشراء السيارات نصيب وعتذر لى
قلتله ده انا رحت البنك واتاذنت من الشغل واخذت الفلوس

قالى على العموم السيارة اتباعت واعتذر لى

شكرته وقفلت معاه

واتصلت بخالد عشان اعدى عليه اليوم الرابعة عصرا فى العجوزة اخذ ال 250 جنية
وقتله تخيل ان ا احمد باع السيارة اقل من الرقم اللى كنت هشتريها بيه ب 2000 جنية يعنى ب 46 الف
فقالى الناس دى مبتفرقش معاها الفلوس قوى قد ما تفرق معاها وجع الدماغ والمشاوير
فقالى تلاقى واحد معرفته قاله هيشتريها وقتى ودفع الفلوس واشترى بلا وجع دماغ لانه رجل بيزنس مان ومش فاضى لوجع الدماغ

-------------------------------------------------------------------------------------------------------
ودى كانت قصة محاولة شراء سيارة اوبل

ياريت تحاولوا توضحولى ايه الغلط فى اللى بيحصل ده
وهل انا غلطان فى شئ؟

[unl0veable]

لا انت غلطان ولا هوا غلطان

انت مش غلطان في اي حاجة الصراحة بس حاول مش يتبن انك مدلوق اللي خلقها خلق مليون غيرها

وهوا بردوا انا شايف انوا مش غلطان لان ساعات بتحصل مواقف كدا بالضبط والحمد لله انه اعتذرلك

[egyplan]

لا انت غلطان ولا هوا غلطان

انت مش غلطان في اي حاجة الصراحة بس حاول مش يتبن انك مدلوق اللي خلقها خلق مليون غيرها

وهوا بردوا انا شايف انوا مش غلطان لان ساعات بتحصل مواقف كدا بالضبط والحمد لله انه اعتذرلك

معلش ممكن تقرء الموضوع بتمعن شويه....
الحكايه بتدور اني كنت هدفع مبلغ السيارة واستلم توكيل في القاهرة يوم الخميس مساء معمول في الاسكندريه عن طريق شخص يقول انه زوج صاحبه السيارة.....
وطبعا مش هتقدر تتاكد من صحه هذا التوكيل الا يوم السبت حاصه انك مشغتش صاحبه السيارة او التوكيل وهو بيتعمل..... هل المفروض اقبل بهذا بحجه انه بيزنس مان ومش فاضي لوجع الدماغ؟ ياريت الناس تقرء القصه وتحاول تسننتج ماوراء السطور3

[hugan]

بص مضارب تنس وحركات وعامل فيها بك
خلي بالك
احترس من النصابين

[فتح الباب]

ههههههههههه هو اكتشف انك هاتروح ترفعها فى البنزينه وتبص عليها انما هو بيدور على واحد يشترى من غير ما يرفعها كى لا يكتشف العيب الموجود بها ده انت خرجت من النصبايه باعجوبه من عند ربنا احمد ربنا ٠

[دكتور خالد]

الكثير من الحوارات الغير مريحة اطلاقا - اعتقد ان كان فى نصباية كبيرة
اولا- متروحش تكشف فى بنزينة او ميكانيكى طرف البائع ابدا اكشف يا عند حد تبعك او مكان محايد
ثانيا- متشتريش غير من مالك العربية و تكون شايفه و شايف بطاقته
ثالثا- متشتريش عربية صاحبها يقولك فيها عيب بسيط و هيتصلح ب 5 جنيه لانه لو كده كان صلحه هوه
رابع- ادفع عربون بعقد ابتدائى واكتب فيه العربون اللى اتدفع و بالكتير 1000 جنيه و خد صورة بطاقة صاحب العربية و صورة الرخصة و استعلم عنها فى المرور بتاعها و بعدين تروح مع صاحب العربية يعملك التوكيل و يستلم فلوسه فى نفس الوقت
بالتوفيق ان شاء الله

[hamaza81]

باشا الحوارات مافيش اكتر منها
معلش انت بتشتري عربية بتوكيل، يعني مش بعقد مسجل
ابسط شيء انك تتعامل مع المالك مباشرة
او حد معاه التوكيل وتشوف التوكيل بنفسك، وتشوف رخصة العربية

أنا عن نفسي في جميع الاحوال بروح الشهر العقاري وبشوف البائع وهو بيوقع على التوكيل او عقد البيع

الحمد لله عدت على خير، وربنا يوفقك في عربية احسن منها

[M.FOUAD]

ممكن تكون نصب بس الاغلب لا انا لو مكان صاحب العربية هعمل كدة اية اللي يخليني اوجع دماغي و اروح مع اللي عايز يشتري ارفع العربية و صنايعية يعملوا فيها جابوا الديب من ديلة و في الاخر يا تاخدها يا ما تاخدهاش و انا قدامي بيعة سهلة حتى لو اقل 2000 جنية اللي عايز يتفرج عالعربية يتفرج عليها تحت البيت و اللي معاة فلوسة يكتب عقد ابتدائي مع صاحب العربية شخصيا و يبقى فلوس يروح صاحب العربية يعمل التوكيل و المخالفات ما دام الرخصة سارية و مش تصريح

[egyplan]

انا اليوم رحت الى الشارع اللى كانت فيه العربية واستنين خالد وجاء واعطانى العربون وكان زعلان ان السيارة لم اشتريها وضاعت السمسرة بتاعته
وانا شكرته بس وقع بلسانه فى الحوار وعرفت الفولة
وعرفت ليه البيعة باظت

غلط ورمى كلمه وقال العربية مغيرة موتور!!!!!!!!!!!!!!
طبعا لما قال كده قلتله وايه المشكلة مش كان يقول ان العربية مغيرة موتور طالما الموتور مثبت على الرخصة.

تخيل ان الموضوع كله كان نصب والحمد لله بفضل الله اولا وبفضل نصائحكم فى المنتدى انى لما قلت ل احمد ارفع العربية عشان اتاكد من رقم الموتور فوافق وتانى يوم قالوا ان العربية اتباعت

الحمد لله رب العالمين

انا كنت شاكك ازاى عربية ماشية 60 الف وكانت مرفوعة والموتور معرق زيت زى ماتكون عربية قديمة

الف شكر ليكم فعلا نصائحكم كانت مفيدة جدا
ولازم الناس لا تنخدع بالمظاهر او بشكل العربية الزيرو
الحمد لله رب العالمين

[amr011111]

هوه الحوار كله نصب والله اعلم وفيه عك كتير
وكده وﻻ كده ملكش نصيب فيها
وازاى هى عربية المدام وهوه هيحتاجها لمشوار يوم الجمعه المفروض يبقى معاه عربيته الخاصة بيه طالما نادى الجزيره وحوارات

[فتح الباب]

وغالبا العربيه لسه ما اتباعتش وبعدين مين اللى هيريح دماغه بناقص الفين جنيه

[sfahmy6]

أحمد ربنا اللى نجاك من النصبايه دى

[sfahmy6]

انا لما روحت اشترى عربيه مدفعتش مليم إلا لما اتفحصت في التوكيل. .........


واى فلوس قبل الورق مش مضمونة. .......والله أعلم

[mohamedzaki74]

نصباية
لما شافك زبون حريص و هترفع العربية
و هتعملواصداع خلع

[ahmzd]

أنا علشان كده أفضّل شراء الزيرو مهما كان غالي..
أولا: الواحد يبعد عن النصب والنصابين سواء كان الغش في الورق أو في حالة العربية.
ثانيا: الواحد يبعد عن السماسرة تماما، لأن كتير منهم - للأسف - أهم حاجة عندهم البيعة تتم وخلاص!
ثالثا: الواحد يركب عربية هو أول مالك ومستخدم ليها ويكتب تاريخها بنفسه ويستمتع بيها وهي لسه جديدة.
رابعا: الواحد يتعامل مع التوكيل ولو على الأقل أول فترة من استخدامه للعربية لحد ما يتطمن أن مفيهاش عيوب صناعة.
ومع احترامي بوجهة النظر اللي بتقول المستعمل على قد الإيد، فأنا عن نفسي بأجيب زيرو على قد فلوسي برضه، وأهم حاجة بركة ربنا.
هذا رأيي، والله أعلم.