استيراد سيارة باسمي من الخارج

[teefa_10]

يا جماعة بما ان مفيش عربيات في السوق و لو فيه بيكون حجز مدة طويلة او اوفر كتير بيصل ل20 و 40 الف جنيه

دلوقتي انا لو عايز اشتري عربية من خارج مصر و اسدد تمنها حد يعرف الاجراءات و الخطوات و الوقت و خلافه

مع العلم ان العربيتين اللي انا عاوزهم اوروبي

Suzuki SX4 or Peugeot 2008

[hagrasco1989]

أنا كمان مهتم بالموضوع
ياريت حد يقدر يفيدك و يفيدنا

[sherif1988]

مفيش حد عارف ولا اية
انا كمان عايز اعرف

[gamal_sharaf]

انا قمت بتجربة استيراد سيارة من كوريا
الاجراءات كانت كالتالى :
1- البحث على النت لحد ما تحدد السيارة اللى انت عايزها بالضبظ
2- مراسلة البائع ( الشركة ، المعرض ) لمحاولة التفاوض فى السعر ثم إرسال عرض سعر بها موضح به رقم الشاسية كاملا ، وموضح به بيانات البنك الذى سيتم التحويل عليه
3- التأكيد على البائع ان التحويل لن يتم 100% ، وإنما يتم 50% مقدم ، 50% بعد ارسال صورة من بوليصة الشحن
4- تحويل نسبة 50% عن طريق البنك إلى البائع
5- إرسال صورة التحويل الاول إلى البائع للبدء فى إجراءات شحن السيارة
6- استلام صورة بوليصة الشحن
7- ارسال 50% الباقية إلى البائع
8- متابعة البائع فى ارسال مستندات الشحنة وهى ( عدد 3 أصل بوليصة الشحن ، عدد 3 صورة بوليصة الشحن ، أصل الفاتورة ، عدد 3 صورة فاتورة ، 3 باكينج ليست )
9- بوليصة الشحن يوضح بها اسم الشركة الشاحنة ، بيانات السيارة ، اسم المشحون إليه السيارة ، اسم المركب الحاملة للسيارة ، تاريخ الإبحار ، ميناء الابحار ، ميناء الوصول
10- متابعة وصول المركب إلى ميناء الوصول
11- التنسيق مع احد مخلصى الجمارك للتخليص على السيارة وتسليمة مستندات الشحنة
12- دفع الجمارك المطلوبة طبقاً لسعر السيارة والامكانيات المتوفرة بها
13- الافراج عن السيارة من الجمارك
14- متابعة وصول اصل الافراج الجمركى إلى مرور رابعة العدوية
15- تحويل الاصلى إلى المرور الرئيس فى المحافظة اللى انت تابع ليها
16- تقديم طلب تحويل منك إلى المرور اللى انت تابع ليه
17- الذهاب إلى المرور بالسيارة لعمل فحص فنى ، ومطابقة البيانات مع بيانات المرور ، وترخيصها
18- الف مبروك عليك السيارة

[teefa_10]

ممكن تفاصيل اكتر بالبيانات و الارقام معلش اللي حضرتك ذكرته ده خطوات استيراد اي حاجة لمصر ارجو توضيح الاتي :

1- حضرتك عملت الموضوع ده سنة كام لان القوانين و الاجراءات بتختلف
2- حضرتك جبت العربية علي ميناء ايه لان كل ميناء ليها نظام
3- نوع العربية ايه لان في ناس بتقول ان مينفعش نستورد عربية ليها وكيل في مصر لو خاطبت المصنع هيقولك ارجع للوكيل
4- ممكن الدفع بالفيزا و تجنب البنك لان تحويل العملة من البنوك اصبح شيئ في منتهي الصعوبة للشركات ما بالك بالافراد
5- العربية كانت بكام و دفعت عليها مصاريف ايه و كام ووقعت عليك بكام

الخلاصة هل الموضوع مستاهل و لا وجع دماغ غلي الفاضيي

[gamal_sharaf]

1- انا استوردت السيارة سنة 2015 واتشحنت العربية فى نهاية شهر مارس ، ووصلت في اول شهر مايو
2-ميناء بور سعيد
3-هيونداى النترا
4-ممكن في حالة ان الشركة تقبل التحويل بالفيزا ، ويكون رصيدك فيه عمله كافيه ( دولار ) لانه مش حيقبل الجنيه المصرى
5- سعر العربية حيختلف من عربية إلى أخرى ، ومن شركة إلى أخرى ،

حاول تبحث كتيير وتجيب العربية المناسبة ليك
شكراً

[Mohamed Fathy]

بس انت كده لما تدفع 50% ايه الضامن انه يكمل الإجراءات

[memo_p910]

انا اعرف ان المانيا مثلا لو حاولت تشتري عربيه زيرو من الوكاله هناك تقولك ارجع لوكيلك في بلدك وده نوع من انواع حماية الوكلاء
فيه بيقولوا ان فيه طريقه تانيه لو سافرت سياحه وتاخد ترخيص مؤقت لقيادة السياره في المانيا وبعد كده تشحنها بنفسك
الحقيقه مش عارف فين

[gamal_sharaf]

بوليصة الشحن هي الضامن الأساسي انه يكمل الإجراءات
عشان كده انا طلبت منه يبعت لى صورة بوليصة الشحن

[just4cadbury]

استاذ جمال متكتب موضوع كامل بكل التفاصيل وتكتب فيها التجربة الشخصية بشكل مبسط اكتر من الي حضرتك ذاكره يعني مثلا
دخلت علي موقع .......
واختارت عربية .......
واتشحنت علي شركة شحن ....
وحولت فلوس علي بنك .......
والعربية اخدت وقت شحن .......
ووصلت الميناء......
واتعاملت مع شركة تخليص جمركي اسمها......
وكانت عمولتها......
.......الخ
وتكتب المشاكل وحلها والمميزات والعيوب
معلش تقلت عليك في الكلام بس صدقني ده سبب وجود المنتديات افادة الكل وسرد تجارب شخصية مفيدة
وشكرا علي تعبك

[mk3]

فين شهاده المنشأ

[M.Elwan]

image hosting


image hosting

ده مخلص جمركى ليه صفحة علي الفيسبوك

بس انا رايي انك تسافر تشترى العربية وتخلص الاجراءات كلها وتشحنها بنفسك وبعدين تيجي مصر تشوف مخلص جمركي يخلص باقي اجراءات الجمارك
ويفضل تكلم امخلص جمركى من الاول يشرحلك الاجراءات ايه

[M.Elwan]

image hosting

[gamal_sharaf]

التجربة كاملة
انا قمت بتجربة استيراد سيارة هيونداى النترا موديل 2004 من كوريا الجنوبية
الاجراءات كانت كالتالى :
1- البحث على النت لحد ما تحدد السيارة اللى انت عايزها بالضبظ يوجد مواقع كثيرة مثل autotrader
2- مراسلة البائع ( الشركة ، المعرض ) لمحاولة التفاوض فى السعر ثم إرسال عرض سعر بها موضح به رقم الشاسية كاملا ، وموضح به بيانات البنك الذى سيتم التحويل عليه
3- التأكيد على البائع ان التحويل لن يتم 100% ، وإنما يتم 50% مقدم ، 50% بعد ارسال صورة من بوليصة الشحن
4- تحويل نسبة 50% عن طريق البنك إلى البائع ، أى بنك يكون ليك حساب فيه بشرط ان الايداع يكون فى حدود 10000 دولار
5- إرسال صورة التحويل الاول إلى البائع للبدء فى إجراءات شحن السيارة عن طريق الميل
6- استلام صورة بوليصة الشحن عن طريق الميل
7- ارسال 50% الباقية إلى البائع وإرسال ما يفيد التحويل عن طريق الميل
8- متابعة البائع فى ارسال مستندات الشحنة وهى ( عدد 3 أصل بوليصة الشحن ، عدد 3 صورة بوليصة الشحن ، أصل الفاتورة ، عدد 3 صورة فاتورة ، 3 باكينج ليست ) وفى حالة استيراد سيارة معاقين بتكون بوليصة الشحن وحدها كافية

البائع هو اللى بيحدد شركة الشحن إلا لو كان عندك شركة بتتعامل معاها بتبعت له يسلم العربية إلى شركة الشحن بتاعتك
طبعاً انا مكنتش اعرف اسم شركة الشحن اللى شحن عليها أو اسم الخط الملاحى ، او اسم وكيل شركة الشحن فى فرع بورسعيد ، لكن كل ده بتعرفه وقته من البائع

9- بوليصة الشحن يوضح بها اسم الشركة الشاحنة ، بيانات السيارة ، اسم المشحون إليه السيارة ، اسم المركب الحاملة للسيارة ، تاريخ الإبحار ، ميناء الابحار ، ميناء الوصول
10- متابعة وصول المركب إلى ميناء الوصول وهو ميناء بورسعيد ، واستغرق الرحلة من جنوب كوريا إلى ميناء بورسعيد 34 يوم
11- التنسيق مع احد مخلصى الجمارك للتخليص على السيارة وتسليمة مستندات الشحنة ، اى مستخلص جمركى يمكن التعامل معه بس يكون عارف الاجراءات وله خبره فيه ، عشان انا غلط غلطة فى الموضوع ده انا جبت مستخلص ارخص فى التكلفة ، لكن فى الاخر كان اكثر تكلفة واطول مده وانا اللى خسرت ، لكن المستخلص اللى عنده خبرة بيكون ارخص فى الاخر واسرع
12- دفع الجمارك المطلوبة طبقاً لسعر السيارة والامكانيات المتوفرة بها ، لانه بيقدر رسوم الشراء والاعفاء على اصل السيارة ثم يقوم بعمل المعاينة على السيارة واثبات الكماليات المضافة ويقوم بحساب جمرك اخر لكل إضافى فى السيارة مثل التكييف ، زجاج كهرباء ، مرايات ضم
13- الافراج عن السيارة من الجمارك ويجب حضور المستورد بشخصة والتوقيع على استلام السيارة فى الجمرك وعند الخروج من بوابة الجمرك يقوم بالتوقيع والبصمة
14- متابعة وصول اصل الافراج الجمركى إلى مرور رابعة العدوية
15- تحويل الافراج الاصلى إلى المرور الرئيس فى المحافظة اللى انت تابع ليها
16- تقديم طلب تحويل منك إلى المرور اللى انت تابع ليه
17- الذهاب إلى المرور بالسيارة لعمل فحص فنى ، ومطابقة البيانات مع بيانات المرور ، وترخيصها
18- الف مبروك عليك السيارة

[just4cadbury]

يا سلام علي ذوقك واهتمامك بجد ربنا يكرمك علي كل التفاصيل دي
ربنا يباركلك فيها ويكفيك شرها

رايك الواحد يكرر الي حضرتك عملته ولا الفرق مش كبير
يعني فرقت معاك فلوس
ولا فرقت حالة عربية وكماليات