فكرة قبل شــراء السيــارة

[alyyassin]

طبعا الواحد قبل ما يشترى عربية بيسأل و يهتم بشوية حاجات كتير جدا ...و غالبا ما الواحد بينسى حاجة مهمة جدا و هي ( الصيانة في التوكيل ) في الموضع ده علشان أخد رأيكوا في حاجة خطرت في بالى ..ممكن تكون محرجة شوية ليا و لبعض الناس بس انا شايفها لو حصلت ممكن الواحد يعرف فعلا موضوع الصيانة في توكيل أي عربية كويس و لا لأ و في نفس الوقت بطريقة واقعية جدا و تشوف بعينك خدمة ما بعد البيع ...

و هي عبارة عن ان انت لما تستقر على نوع العربية الى انت ناويت تجبها ( قبل ما تشترى طبعا ) تخطف رجلك لحد أكبر مكان للصيانة و يكون تبع التوكيل مباشرة و تسأل المنتظرين لصيانة سيارتهم و تعرف منهم ايه الأخبار .....
-الناس فاهمة و لا لأ ؟؟؟
- اسعار قطع الغيار الي هما غيروها فعلا ؟؟؟
- اسعار الصيانات الدورية للعربية ؟؟؟؟
- الناس متعاونين و لآ مكبرين دماغهم ؟؟؟؟؟

و خلى بالك أوعى تسأل حد من رجال البيع للعربية عن خدمة ما بعد البيع أو اي حد من رجال الصيانة ..... طبعا كلوا بيحلى بضاعته و مجرد ما تشترى تبقى قابلنى ..و أسهل رد عند بتوع الصيانة هى العربية نازلة فيها العيب ده ...

انا لما استقر فعلا ..هعمل كدة إن شاء الله

المهم رأيكم أيه ؟؟؟

[M.Nabil]

انا فعلا عملت الموضوع ده , وبجد مفيهوش اي نوع من الاحراج, بالعكس الشعب المصري متفهم جدا وبسيط, سالت اتنين واحد كان معاه جين تو 2007 وواحد معاه واجا وبصراحة كانوا ذوق جدا وافادوني.

[formoza]

انا معملتش كده, هو انا كده أروح النار؟؟؟؟
بس اى حد بيسئلنى بصراحه بقوله كل اللى عندى حلو او وحش عشان ابقى راضيت ضميرى

[mrghost]

فعلا فكره كويسه لان اللى هيفيدك اللى مجرب وليس السمع فقط

[tutankhamoun]

فكرة ممتازة طبعا و لا أعتقد أن ممكن حد يعترض على كلامك
لأن كلام مظبوط 100 %
و أنا عاقول رأيي في توكيل عز العرب حالا
أنا طبعا قبل ما أشتري عملت بحث على خدمة ما بعد البيع عن طريق الناس اللي أشترت قبلي و عن طريق مهندس سابق في التوكيل
يعني مكنش في عز العرب وقت ما سألته .
طبعا كل الأنطباع اللي خرجت به الآتي
الخدمة ممكن كويسة لما مايكونش فيه زحمة ......... و الخدمة بتقل في الجودة لما بيكون فيه زحمة
و طبعا أغلب توكيلات مصر ينطبق عليها نفس الكلام ما عدا كام توكيل ليهم سمعة كويسة في خدمة ما بعد البيع .

و بعد زيارات عديدة للتوكيل بعد ما أشتريت العربية أكتشفت الآتي
لو عربيتك مفيهاش مشكلة ...... يبقى التوكيل بالنسبالك .... أحلى مكان ممكن تتعامل معاه
لو عندك مشكلة ظهرت في العربية و متحلتش ...... طبعا هايبقى التوكيل بالنسبة لك زبالة ووحش
و كل واحد هاتبقى وجهة نظره مظبوطة نظرا لتجربته
بس علشان شهادة الحق
من فترة كان ظهر شوية شكوى من خدمة التوكيل و قررت أني أحاول أشوف حل للناس بما أني من أكتر الناس اللي بتشجع على شراء الجين 2
يبقى لازم أتحمل المسئولية الأدبية بمساعدة الناس اللي أنا اديتها النصيحة لشراء السيارة .
ذهبت للمهندس آمر الكوافي و هو مدير خدمة ما بعد البيع و الصيانة
و الراجل كان في قمة الذوق و الأدب و الأخلاق و أظهار كل علامات التعاون على حل مشاكل أصحاب سيارات بروتون عموما و الجين 2 خصوصا بما أنها الأكثر مبيعا و الأكثر ظهورا لبعض مشاكل التقفيل .
طيعا لقيت التوكيل عامل تحسينات كتيرة و بيبنوا ورشة تانية و بيزودوا عدد الروافع لصيانة السيارت و تقسيم الورشة في الرئيسي إلى قسمين
قسم يختص بالصيانات التي يكون فيها فك و تركيب للعفشة و الموتور
و قسم أخر للصيانات السريعة مثل تغيير الزيت و تغيير فلاتر و تغيير فرامل مثلا
و المهندس آمر قال أنهم بيعملوا كدا علشان الناس اللي هاتعمل صيانات خفيفة يمشي على طول وما يطعطلش أدام صيانته مش محتاج وقت كبير
و تم تقسيم عدد الروافع إلى 6 لكل قسم
كان في الأساس موجود 6 روافع و تم أضافة او سيتم اضافة 6 روافع في القريب العاجل بصراحة مش متأكد من هذه المعلومة في الوقت الحالي و لكني متابع مع المهندس آمر و سأطلعكم على الصورة كاملة في القريب العاجل
و أيضا قام الوفد الماليزي لشركة بروتون بزيارة التوكيل في نهاية نوفمبر تقريبا و قاموا بتدريب العمال و قابلت بعضهم و أكدوا أيضا أنهم يعملون مع التوكيل لرفع كفاءة الخدمة لتحسين رضاء العملاء .
و فيه كمان ورشة تانية بيتم بنائها خلف القرية الذكية و أيضا مركز فحص السيارات قبل بيعها حتى يتفادوا مشاكل التقفيل و فحص السيارة فحصا كاملا شاملا حتى تخرج السيارة بدون مشاكل أو على الأقل تقليل المشاكل قدر الأمكان .

و في التوكيل في الوقت الراهن فعلا زحمة و ده بيأثر على مستوى الخدمة و لكن يجب أن ننتظر وعود التوكيل و ننتظر بناء المركز الجديد للحكم على الكلام الصادر من التوكيل .

يعني ممكن نقول أن توكيل عز العرب من متوسط إلى جيد حسب سيارتك و تجربتك معاه
و السلام عليكم

[ringoo84]

فكره جميله واكيد هتكون فالاخر فكره صح

[TeMoON]

على فكرة الموضوع دا جامد بس فى حاجة يا شباب انا بصراحة ماعدتش بحب اعترف بالتوكيلات وانتو هتقولو عليا مجنون بس بصراحة انا ان شاء الله ناوى اجيب عربية جديدة قريب وقررت انى ما ادخلش التوكيل غير فىالضرورة القصوى لانى هجيب العربية خليجى مش مصرى لان التوكيلات فى مصر بيستعتبطو فى اسعار العربيات والكماليات اقل والسعر اغلى وخدمة م بعد البيع اغلبها زى الزفت وبما انى رجل لى خبرة بسيطة فى الحرفيين قررت انى اضم نفسى لنادى الحرفيين والتصليح هناك ولو علىظبط جهاز الكمبيوتر متوفر ان شاء الله فى الحرفين ولا توكيل ولا وجع دماغ ولا فلوس تندفع زيادة على الفاضى وبما ان طبعا ان العربية ان شاء الله لسة هتكون جديدة مش محتاجة فك وربط وتصليح وربنا يستر