معقولة سعر السيارة دي كدة؟؟؟

[Mido80]

وانا باتصفح موقع car100100 اليوم شوفت السيارة الحلوة دي (مرسيدس عيون E200 - موديل 96) بس اتجننت لما شفت سعرها. نفسي اعرف لية اسعار السيارات اللي فوق 1600 سي سي غالية كدة؟

عارفين السيارة دي سعرها هنا في قطر كام؟ 25 الف ريال قطري ما تزيد درهم واحد (يعني حوالي 38 الف جنية مصري). لية بقي سعرها ربع مليون جنية في مصر؟

انا في يوم طقت في دماغي اركب BMW بالصدفة قابلت واحد صاحبي اردني وقلت لة عاوز بي ام، قالي عندي واحدة و رحت عندة البيت وراني BMW الفئة السابعة موديل 2004 صاروخ...تخيلوا قالي عاوز فيها كام؟ قالي هي بتاعة واحد صاحبة وهو بيبيعهالة وطالب فيها 75 الف ريال (125 الف جنية مصري) كلام فارغ يعني. فياريت الوضع بتاعنا يغير من الدول دي ويعملوا زيها

http://car100100.com/car_details.php?car=6395

[mixd99999]

اقوولك على حاجة من الاخر
هما مش بيقولو ان مصر ام الدنيا
يبقى لازم ام الدنيا تكون غير كل الدنيا

ده اللي اقدر اقولهولك
وحسبي الله ونعم الوكيل في كل ظالم

[dr_abooody]

اكيد في ناس كتير زيك مش عارفين لحد دلوقتي

الواحد هنا في مصر لما يشتري عربية 1600 سي سي بتنصب علية في 61 % من تمن العربية جمارك
لما تكون 2000 بيتضحك علية في 235 % جمارك

و اللي راكب زلموكة دة يبقى جامد اوي
امال اية دة مرسيدس يابا
و يبيع العربية اللي بقالها 20 سنة و بقت كهنة ب 120 الف و هو صاحبها اصلا كان شاريها ب 50 الف

[tutankhamoun]

و الله أحوال مصر الاقتصادية لا تسمح بالنزول بأسعار السيارات و إنتشارها كما في دول الخليج صغيرة السكان الكبيرة في شبكات الطرق و الغنية بالبترول

و إن كنت أعتب على الحكومة عتاب كبيـــــــــــــــــــــــــــــــــــــــــــــــ ــــــــــــــــر
لعدم إهتمامها بالمواصلات العامة و تحسين حالة الطرق و تبسيط حياة الناس

إنما سيارات كثيرة :
1 زحام شديد في طرق غير مصممة لإستيعاب هذا العدد من السيارات كما يحدث الآن و السيارات غالية ( طيب لو رخصت أيه اللي هايحصل ؟؟؟؟؟ )
2 إستهلاك عالي جد لموارد البلد من البترول و البنزين ( اللي أحنا أصلا بنستورده من دول الجوار ) بسبب عدم كفاية حصتنا من الإنتاج المحلي !!!!
3 تدمير البيئة ( تلوث رهيب للبيئة ) و تغير مناخ الأرض و طبعا عارفين ان الولايات المتحدة الصهيونية Zionist USA مسئولة مسئولية كبيرة جدا عن التلوث نظرا لرفاهية الشعب الصهيوني هناك The Zionists of America .
و طبعا لو كل الشعوب حذت حذو الشعب الصهيوني الأمريكي Zionists of America هانلاقي أن القطب الشمالي و الجنوبي هايذوبوا بطريقة أسرع و تختفي الدلتا المصرية و ما بها من مدن و أحتمال كبير أن القاهرة كمان تختفي لأن مصر دولة مسطحة و لا يوجد بها جبال و هضاب و نحن قريبون جدا من مستوى سطح البحر .

دي بقى الأخطار الناتجة عن التلوث اللي السيارات مسئولة عنه بنسبة تزيد عن 80 % نظرا للعوادم الرهيبة و ثاني أكسيد الكربون الخارج من عوادمها !!!!

يلا ......... الحكومة تنزل أسعار العربيات و الشعب كله يركب عربيات 2000 سي سي علشان نتمتع بالسرعات العالية و نغرق كوكب الأرض و نغرق مصر في مياة البحر المتوسط لتزحف حدود و شواطئ البحر المتوسط إلى القاهرة
و بدلا من أن نذهب إلى الأسكندرية للتصييف .......... نطلع طلعة صغيرة كام كيلومتر ......... و ناخد كام غطس في البحر و نرجع الشغل تاني من غير ما نسافر 220 كم ..!!!

للآسف هي دي الحقيقة اللي الحكومة الأمريكية الصهيونية Zionist American Government تحاول الهروب منها بغض النظر عن تحذريات رجال الطقس حول العالم و حتى رجال ناسا ووكالة الفضاء يحذرون من ذلك .

و طبعا الصهاينة Zionists ودن من طين وودن من عجين زي حالهم في فلسطين بالظبط Zionists of Palestine 1948

[Samir Elshahawy]

يلا ......... الحكومة تنزل أسعار العربيات و الشعب كله يركب عربيات 2000 سي سي علشان نتمتع بالسرعات العالية و نغرق كوكب الأرض و نغرق مصر في مياة البحر المتوسط لتزحف حدود و شواطئ البحر المتوسط إلى القاهرة

قول أمين , من بقك للسما

[ringoo84]

الغريبه فعلا ان الجمارك كثير جداااا على العربيات في مصر والاغرب انك مبتلاقيش ده ظاهر في اقتصاد الدوله نفسها ده غير الضرائب والرسوم على اي حاجه المواطن بيعملها واخرها هيأجرولك بيتك حاجه تحفه .................. ربنا يسترها

[magyver]

حسبي الله ونعم الوكيل

[Terrible_DaRsH]

فى حوار بين مسئول امريكى ومسئول عربى
المسئول الامريكى :-
احنا فى اميركا بندى المواطن 10 الاف دولار فى الشهر كحد ادنى
وبناخد منه 500 دولار ضرائب وفواتير كهرباء وميه وخلافه
ومابنسألوش بيودى الباقى فين
رد عليه المسئول العربى
احنا بقى احسن منكم
احنا بندى للمواطن 200 دولار فى الشهر
وبناخد منه 500 دولار ضرائب وفواتير
ومابنسألوش بيجيب الباقى منين

[احمد عبدالله]

حسبي الله ونعم الوكيل

[tutankhamoun]

فى حوار بين مسئول امريكى ومسئول عربى
المسئول الامريكى :-
احنا فى اميركا بندى المواطن 10 الاف دولار فى الشهر كحد ادنى
وبناخد منه 500 دولار ضرائب وفواتير كهرباء وميه وخلافه
ومابنسألوش بيودى الباقى فين
رد عليه المسئول العربى
احنا بقى احسن منكم
احنا بندى للمواطن 200 دولار فى الشهر
وبناخد منه 500 دولار ضرائب وفواتير
ومابنسألوش بيجيب الباقى منين

أنت بتتكلم جد ؟؟؟ و لا الموضوع هزار ؟؟؟

لأن أنا أعرف مفيش حد في أمريكا بيأخد المبلغ ده غير فئة قليلة جدا
و أغلب المرتبات في أمريكا بتتراوح ما بين 900 دولار إلى 2000 دولار في الشهر و الضرائب هناك مرتفعة جدا جدا جدا جدا جدا
يعني الضرائب الللي أحنا بندفعها هنا في مصر ....مقارنة بدول أوروبا و أمريكا ....... قليلة


مفيش حد بيأخد 10 الاف دولار في الشهر و لا حتى الدكاترة !!!
اللي أعرفه أن الأطباء هناك مرتباتهم بتتحسب كالتالي من 30 إلى 50 ألف دولار في العام
مبرمجي الكمبيوتر المحترفين من 25 إلى 50 ألف دولار في العام
المحاسبين .... من 30 إلى 60 ألف دولار في العام
المحامون ( دخل و ليس مرتب ) حسب شطارة المحامي و كفائته
مش زي ما الناس متصورة هنا ....
و الضرائب هناك مرتفعة جدا يا جماعة و الله
بس الفرق أن الحكومة هناك بتأخد الضرائب و تنضف بيها البلد

[Busquets]

هو انا اللى اعرفه ان فى انجلترا لان خالى هناك بيأخد مرتب شهرى له و لمراته و لـ اولاده!! مش عارف المرتب كام بس اكيد حاجة حلوة!!

يعنى اكيد انضف من هنا مليون مرة

[tutankhamoun]

هو انا اللى اعرفه ان فى انجلترا لان خالى هناك بيأخد مرتب شهرى له و لمراته و لـ اولاده!! مش عارف المرتب كام بس اكيد حاجة حلوة!!

يعنى اكيد انضف من هنا مليون مرة

تقصد اعانة بطالة
مفيش حاجة أسمها مرتب شهري لواحد مش بيشتغل
طبعا أنا هنا لا أقصد خالك
أنا بتكلم عن الناس اللي مش بتشتغل
إنما لو شغال
المرتبات في أنجلترا كالتالي
أطباء من 20 إلى 60 ألف جنيه أسترليني في العام حسب سن و كفاءة الطبيب
محاسبين مثل الأطباء
كادر الممرضين ......... من 15 إلى 30 ألف في العام
المبرمجين من 20 إلى 40 ألف
المهندسين من 15 إلى 40 ألف

و أغلب الشعب عايش على مرتب لا يتجاوز 1500 جنيه أسترليني في الشهر
و طبعا مفيش راجل يقدر يفتح بيت بالمبلغ ده
كدا ييجي يشحت عندنا في ميدان السيدة احسن له !!!
طيب ليه !!
لأن الضرائب هناك هاتخد نصف المرتب مع الفواتير و مصاريف العربية أو المواصلات
ضرائب الحي للملاك ( من 100 إلى 200 أسترليني في المتوسط )
مصاريف تأمين ( أغلب الناس مأمنين علشان هناك التصليح مكلف جدا ) مش هاتقل عن 100 جنيه أسترليني في الشهر و طبعا في أزيد من كدا بكتير
مصاريف سيارة على الأقل 500 جنيه شهريا ( بنزين - تأمين - ضرائب - ركن !!! مفيش هناك ركن ببلاش - تصليح و صيانة .... الخ )
نيجي للفواتير
كهرباء مش أقل من 50 جنيه أسترليني شهريا
غاز من 50 إلى 100 حسب الموسم ( شتاء غير الصيف )
تليفون و أنترنت و محمول ......... 40 على الأقل

صحيح هناك الحياة نظيفة ..... منظمة
ده الفرق بينا و بينهم
مش أكتر من كدا
النظافة و النظام
إنما الحياة هناك غالية جدا جدا و مكلفة
لذلك تجد أن الناس كلها لازم تشتغل ( أب - أم - أبناء )
علشان يقدرو يسدوا على مصاريف الحياة و يحوشوا حاجة علشان أخر السنة يطلع فسحة برة البلد

و كمان نسيت أقول 800 جنيه ....يا إما قسط للبيت أو أيجار
و طبعا الايجار ممكن يقل عن كدا خارج منطقة لندن و المدن الكبرى زي مانشتر ... ليفربول ... ادنبره ...جلاسكو ...
إنما داخل المدن دي
الايجار يبدأ من 800 إلى 1500 جنيه

يعني من الأخر
مينفعش واحد لوحده يفتح بيت إلا لو كان جراح ....أو حاجة مرتبها ميقلش عن 50 ألف جنيه أسترليني في العام


بالمناسبة اعانةالبطالة
يادوبك تأكلك بصل و توم
تقريبا بتكون في حدود 250 إلى 500 جنيه شهريا لكل الأسرة
بس بشروط
لازم يكون المنتفع من النظام من غير الملاك لأي شئ ( اي شئ و لا حتى عربية )
لازم تكون على الحديدة علشان يدوك أعانة بطالة
و طبعا 500 جنيه ......... يدوبك ... تأكل بيهم عيش حاف

فيه بقى نظام تاني للأخوة اللي أتصابوا اصابة عمل
دول بيأخدوا اعانات شهرية لتمكينهم من الكمال حياتهم على أساس أنهم معندهومش المقدرة على العمل

[Busquets]

بصراحة انا مش بسألو فى تفاصيل الحياة اوى كدا

يعنى انا عارف انه عنده محلات اكل هناك بتعمل برجر

و المفروض انها محلات مشهورة

بس مش بسألو بتاخد كام فى الشهر ولا بتكسب اد ايه لان كدا تعتبر سفاله منى :)

بس اللى متأكد منه انه الى جانب الشغل بيأخذ مرتب من الحكومة شهريا

[goofy_in_love]

استاذ توت مع احترامي ليك و لارائك طبعا بس انت فاهم الموضوع برا غلط شويه انا مش عارف حضرتك جبت ارقام المرتبات دي منين بس انا بحكم اني شغال في السياحه و سافرت اكتر من دوله اوربيه فاقدر اقولك لحضرتك علي الارقام الحقيقيه اولا احنا لازم نتفق ان الضرائب و الكلام دا هناك غالي جدا بس لو جيت قارنته بالضرايب اللي هنا هتلاقيها ارخص من هنا بالمقارنه بدخل الفرد هناك و دخل الفرد هنا علشان كدا في جاااااااب مش ممكن تتخيلها و كمان احنا الحاجات اللي بتدفع في مصر كدا كلنا طبعا عارفين بتروح فين برا بقي الموضوع مختلف خالص بيقدروا يستثمروا الفلوس دي بجد و يخلوها تخدم المواطن مش مجرد فلوس محدش عارف هيا راحه فين في الاخر


المرتبات برا غير اللي حضرتك قلت عليه دا خالص و في نفس الوقت المصاريف هناك مش بالحجم اللي حضرتك وضحته و اكبر دليل علي كدا لما كنت في اسبانيا و هيا احدي دول الاتحاد الاوربي بجد انا انبهرت باللي بيحصل هناك من قوانين حازمه و بتطبق بكل شده و مش بيفرق بقي الوسايط و الكلام اللي هنا دا المهم دا مش موضوعنا يعني

كان في دكتور هناك مصري كان زميلي في الجامعه ما شاء الله يعني بياخد في الشهر مايقرب من 3000 يورو بالاضافه الي 800 يورو بدل سكن لانه طبعا مغترب اظن دا مبلغ حلو جداااااااا مش وحش و بعدين دا مرتبه من المستشفي اللي هوا شغال فيها بس و كان بيدور علي شغل مع اي دكتور من الدكاتره الكبار اللي في المستشفي في عيادته الخاصه اعتقد انه بردو هيدخله دخل تاني مناسب و اللهم لا حسد و الوضع مشابه في انجلترا تقريبا لاني لما رحت هناك مش قعدت كتير يعني بس الناس بجد هناك عايشه حلو قوي مش زينا البلد بتتفنن انها تظبطهم و لنا الله
اسف طولت عليكم بس بجد ارجو ان حضرتك متكنش مقتنع ان هنا زي هناك

[marshall]

أنا بس هعلق على مرتبات الدكاترة في أمريكا
الدكتور في أمريكا بعد التخرج مباشرة بياخد نيابة (residency) وبياخد مرتب من42.000 ل50.000
وبعد ما يخلص النيابة ويشتغل المرتبات لا تقل بأي حال من الأحوال عن 120.000 دولار في السنة وبتوصل ل 400.000 حسب التخصص