حد شاف اعلانات العربيات المستعمله المرفوعه

[ahmed76]

لدواعى السفر المفاجىء والمستعجل: ( ايه يا جماعة هى البلد كلها مسافرة فى وقت واحد ما تخدونا معاكم وطبعا يفضل يعلن 6 شهور عن العربية مش عارف بقى مفاجىء ومستعجل ازاى )
النوع :.....
سنه الصنع :حاجة وتمانين او وسبعين
مرفوعة من سنه : نفس سنه الصنع ( اشتراها ورفعها ما لمستش الارض )
حالة الخوارج :فابريكه بويه مصنع( واروح اتفرج يقوللى ما عدا السقف والرفرفين والاكصدامات والبابين اللى ورا )
الدواخل :فابريكة ( وتروح تتفرج يقولك ما عدا الحوض والقوايم ومغيره تلات اربع )
الكاوتش : زى الفل ( مشى 200 الف بس )
العداد : 15 ألف ( طبعا العداد قالب لما شبع قلب -يعنى من سنه سبعين 15 ألف ماشى - ده الواحد ممكن يمشى على رجله اكتر من كده و هو بيتعلم المشى )
رخصه ساريه : فيها قد ايه يا عم يقولك 15 يوم وانا مش تاجر ولا حاجة )
استعمال طبيب : (بس طبيب فى سيدى برانى بتروح الصحراء الغربية كل يومين وترجع )

حد شاف اعلان زى ده:

[khaled02001]

جامد يا مان

[human]

انا اكتر جاجه بتفقعنى هى استعمال طبيب ديه

[MohabSaeed]

فعلا اكتر حاجه مش مفهومه موضوع " استعمال طبيب " , " استعمال سيده "
يعنى شئ مش مفهوم بجد . هل مثلا الطبيب حيسوق العربيه بطريقه غير المهندس غير المدرس ؟؟؟ و هل السيده بتحافظ على العربيه عن الراجل !!! و بعدين الفئتين المذكورين برضه بيمشو فى شوارع مصر يعنى مطبات و بلاعات و عربياتهم متجرحه و متخبطه بسبب الركنه فى الشارع ........ الحقيقه شئ غريب فعلا .

لا و فى مقوله تانيه غريبه " السياره بحاله شاذه " ! بجد حاجه تضحك الناس دول بيجيبو الافكار ديه منين و ليه ؟

[hossam_chixo]

انا برضو بتنرفز اوى لما اشوف اعلانات كتير جدا جدا بيقول استعمال طبيب بيحسسنى ان الدكتور بيشيل العربية و هو ماشى او بيروح يعملها شيك اب فى العيادة كل اسبوع مثلا...

[eg_falcon]

اكتر حاجة تغيظ فعلا حكاية مرفوعة كذا سنة دي انا لسه شايف حد بيقول ان عربيته مرفوعة 13 سنة و طب صابر على كده ليه طب ما كنت بعتها من 5-6 سنين

[human]

كان فيه واحد عايز يبيع عربيه 323 مازدا بيقول مرفوعه 15 سنه (مش عارف ايه حكايه 15 ديه ) ب 38 الف جنيه!!!!
شوف عقل الانسان لما يزينله حاجه زى ديه!!

الكلام ده من 4 سنين بقوله ليه بيقولى دى مازدا بشوكها!!!

[ToYoTa]

انا برضو بتنرفز اوى لما اشوف اعلانات كتير جدا جدا بيقول استعمال طبيب بيحسسنى ان الدكتور بيشيل العربية و هو ماشى او بيروح يعملها شيك اب فى العيادة كل اسبوع مثلا...

يا سيدي ببساطة
نقطة استعمال طبيب تعني ان العربية
ما تعملش بيها خمسات ومقصات وغرز مثلا
او ما كانتش بتعدي 180 كم/س
ما كنش بيسلفها لصحابه وجيرانه
ما كنتش بيتلعب بيها في مواكب الافراح
هذا هو المقصود من استعمال طبيب
وبالفعل ما حدش بيضايق من الكلمة دي الا اللي عندهم عقد نقص بدون توجيه الكلام لاي شخص بذاته

[A.Saad]

انا مرة فى سوق الجمعة لقيت عربية
البائع : العربية جديدة والكتالوج لسه معاها ومرفوعة ........سنة

انا : دى عاملة 70000 كم مرفوعة ازاى
البائع : لا هى مش مرفوعة على حجر يعنى
ما هو كل يوم بندورها حوالين البيت بتاع 20 او 30 كم يعنى
تقولش ساكن فى الاستاد

[human]

يا سيدي ببساطة
نقطة استعمال طبيب تعني ان العربية
ما تعملش بيها خمسات ومقصات وغرز مثلا
او ما كانتش بتعدي 180 كم/س
ما كنش بيسلفها لصحابه وجيرانه
ما كنتش بيتلعب بيها في مواكب الافراح
هذا هو المقصود من استعمال طبيب
وبالفعل ما حدش بيضايق من الكلمة دي الا اللي عندهم عقد نقص بدون توجيه الكلام لاي شخص بذاته

انت مصدق الكلام ده؟؟
و ايه علاقه دكتور ولا ممرضه ولا تمرجى حتى بالكلام ده؟
و محدش يصدق الكلام ده الا اللى عنده نقص بدون برضه توجيه الكلام لاى حد بذاته

[human]

انا مرة فى سوق الجمعة لقيت عربية
البائع : العربية جديدة والكتالوج لسه معاها ومرفوعة ........سنة

انا : دى عاملة 70000 كم مرفوعة ازاى
البائع : لا هى مش مرفوعة على حجر يعنى
ما هو كل يوم بندورها حوالين البيت بتاع 20 او 30 كم يعنى
تقولش ساكن فى الاستاد

انا بضجك بجد
مالهاش حل مرفوعه و عامله 70 الف
بتلف كل يوم حوالين البيت 30 كيلوا!!
عشان تحافظ على اللياقه بتاعتها
مسخره بجد حكايه مش مرفوعه على حجر :)

الله يخليك بجد بضحك

[MohabSaeed]

يا سيدي ببساطة
نقطة استعمال طبيب تعني ان العربية
ما تعملش بيها خمسات ومقصات وغرز مثلا
او ما كانتش بتعدي 180 كم/س
ما كنش بيسلفها لصحابه وجيرانه
ما كنتش بيتلعب بيها في مواكب الافراح
هذا هو المقصود من استعمال طبيب
وبالفعل ما حدش بيضايق من الكلمة دي الا اللي عندهم عقد نقص بدون توجيه الكلام لاي شخص بذاته

استاذى الفاضل ... كل الكلام الى بتقوله حضرتك ده ينطبق على المدرس الى جايب العربيه بالقسط و بيحسس عليها , الموظف الى حط تحويشة عمره فى عربيه و بيخاف عليها زى عياله
و نفس الكلام ينطبق على المحاسب و المحامى و المهندس ...الخ

ايه العلاقه ان دكتور يبقى لازم يكون بيحافظ على العربيه و مش بيخمس بيها و يغرز مع اصحابه يوم الخميس بليل و عمل بيها 100 حادثه !!

مع كامل احترامى , بس حقيقى الى بيكتب الكلام بتاع استعمال طبيب او استعمال راقى الخ , هو الى عنده مشكله و بيحاول يثبت حاجه مش موجوده .

مقياس العقلانيه و الاحترام و التحضر " الى بيئدى الى الحفاظ على السياره " , مش مرتبط بوظيفه

لان لو على كده ممكن الى يبيع العربيه يقول استعمال شيخ مثلا .

انا مره شوفت اعلان مكتوب استعمال قبطان !!!!!!!!!!
على اساس ان القبطان بيسوق العربيه فى البحر مثلا ؟ ولا بيفرد الشراع و بيمشى من غير الموتور؟

الانسان الطبيعى الى بيبيع سلعه
بيكتب كل مايخص السلعه الى بيبيعها من مميزات و عيوب ....... او حتى على الاقل يكتفى بالمميزات و توضيح كافه التفاصيل .و وظيفه او نوع صاحب الاعلان مش من المميزات " ده المنطق الى بيقول كده " .

[MohabSaeed]

*ملحوظه :- انا حابب اسجل انى باستفز من جملة استعمال طبيب " و كتير من الجمل الاخرى المستفزه " .
و ده مايخلنيش كشخص عندى نقص .و اعتقد فى غيرى كتير بيفكرو بنفس المنطق .

[mada121977]

غالبا كل اللى بيكتب العبارات او المصطلحات دى بيبقى تاجر .. لجر رجل الزبون

[Nader]

العربية مرفوعة 5 ولا 6 سنين يعني الباروما فطرت واتعشت بيها!!