محتار أدوّر على أنهي عربية فيهم !!!

[reallistic]

أنا احتمال يتوفر معايا مبلغ في الخمسين ألف
و نفسي في عربية تكون قوية (جري و ثبات و أداء)
تكون أمان لا قدر الله في حالة الحوادث
قطع غيارها متوفرة حتى لو سعر عالي مش مشكلة
لأني مقتنع أن قطع غيار السيارات المحترمة عالية لكن بتعيش

فكرت في بعض الاختيارات

هوندا سيفيك موديلات 92-95

أوبل فيكترا بي b موديلات أواخر 1990 و أول 2000

رينو ميجان 2005 و إللي زيها
الهاتش باك بتاعتها شيك جداااااااااااً و برضه السيدان حلوة
إنما الهاتش باك شبابية آخر حاجة

لانشيا ديدرا تسعينات (أنا عارف أن سعرها مش في الـ 50 ألف و أنه في الـ 30 و يمكن أقل)
إنما أنا بأحترم اللانشيا جداً و أهو أكون وفرت قرشين

كريسلر نيون أواخر 1990 و أول 2000 دي بأعشقها جداً

سيتروين c4
بأحب الكوبيه بتاعتها جداً أو ممكن الـ 4 باب برضه شبابية
و كمان علشان بأقلق من الزجاج الخلفي بتاع الكوبيه
بأحس أنه ممكن يتكسر من أي و أقل حاجة !

أنتم إيه رأيكم في حاجة من دول ولاّ ممكن فيه حاجة تانية أفضل
منتظر مشاركات كتير و شكراً مقدماً ...

[taimor1777r]

الاوبل بى 2000سى سى اتوماتيك افضل اختيار لك وانا مجربها عربية رائعة بس اهم حاجة تكشف عليها كويس وتكون حالة نظيفة بس تكاليف صيانتها غالية شوية بس امام الاداء لا تعتبر مصاريف

[momo44]

الاوووووووبل ثم الهوندا
ومفكرتش ليه فى المتسوبيشى ؟

[reallistic]

الميتسوبيشي عربية محترمة طبعاً
بس لو هانتكلم في الموديل يبقى مافيش غير لانسر في حدود رنج السعر إللي بأتكلم عليه و هايبقى آخري كريستالة
و مقارنة بالأوبل فيكترا بي الأوبل تكسب بالنسبة لي أنا و كمان السيفيك
و أنا فعلاً نفسي رايحة للأوبل المهم ربنا يسهل الأول و الفلوس تجهز و بعدها ألاقي أوبل بحالة تستاهل

[mo3tazanas]

a4 99

[koshary]

هوندا si هتديك اللى انت عاوزه وزياااااااااااده لو لقيت منها المانيوال ماشاء الله عليها بجد حلوه ومفيهاش مشاكل الاوبل اللى هيا السخونه وقطع غيارها اققل من الاوبل

[Land_Cruiser]

اعتقد السيفيك برضه هتبقى اختيار كويس فى الرينج ده او ممكن تخليك فى حاجه من الحاجات المنتشره فى الشوارع لو عايز موديل أحدث شويه زى الفيرنا و اللانوس. قطع غيارها ببلاش و ممكن تبيعها بسهوله لو حبيت و ما تخسرش فيها و طبعا النصيحه طالما بتفكر فى مستعمل لازم تكشف كويس جدا علشان المقالب كتيره

[reallistic]

@ mo3tazanas

تصدق نسيتها خالص دي
عربية مالهاش حل بس أقلق من صيانتها ة قطع غيارها
و هل سعرها في رنج الخمسينات فقط ؟؟؟

@ koshary

أنا نسيت أقول أني تعبت من المانيوال في بدلنا الجميلة :)
و عاوز ابقى أوتوماتيك علشان أستريح شوية في السواقة
لما بأبقى راجع البيت آخر النهار الطريق بيبقى أأأأأأأع
و طبعاً السيفيك في منها أوتوماتيك
بس أنا شايف أن الأوبل 2000 أفخم
بالنسبة لموضوع السخونية هل الأوبل كلها كده
ولاّ إللي مش مظبوطة بس إنما لو مظبوطة تمام مابتسخنش ؟؟؟

@ Land_Cruiser

لا لا لا فيرنا مين و لانوس مين (مع احترامي الكامل لمالكيها)
أنا عاوز حاجة قوة و ثبات و جري و فخامة
كمان حاجة أنا مش فارق معايا سعر قطع غيار أو إعادة البيع
لأني بأدور على حاجة أقتنيها و هاتقعد معايا مدة كبيرة إن شاء الله

ألف شكر لكم يا جماعة و في إنتظار مزيد من المشاركات و الإفادة ...

[Mohab.Nabil]

ميجان او سى فور احسن اختيار

عربيات حديثة و لو حالتها كويسة تقف قصاد اى عربية دلوقتى فى رينج الـ 150 الف و مش هتقل عنها حاجة

[reallistic]

@ Mohab.Nabil

كلام معقول جداً و أنا من أشد المعجبين بالفرنساوي
خصوصاً الميجان و السي فور

و أنا لاقيت عربية لانشيا ديدرا رايح أشوفها بكره
المفروض حالتها ممتازة من الوصف إللي سمعته
و ربنا يقدم ما فيه الخير ...

[khalid_adel]

فكر في الالفا 156 موديل 2001 مثلا
وصدقني حتلاقي فيها كل اللي انت عايزه ان شاء الله وخاصه انك ساكن في الهرم فمتقلقش من موضوع قطع الغيار خالص

[besso33]

انا هقترح عليك النوبيرا جربها هتلاقيها ممتازة جدا والله

[reallistic]

@ khalid_adel

ازيك يا خالد باشا ، فاكرني ؟
هي طبعاً الألفا أي كان إيه الموديل بتاعها عربية محترمة جداً جداً
و الـ 156 هاتبقى عالية عليا شوية

@ besso33

عربية جميلة جداً بس أنا ماليش في الكوري (موديل حديث ماشي بس معاييش فلوسه)

أنا أوروبي ، ياباني و كان نفسي في أمريكاني قبلهم بس أنا مش قدها


و الميزانية شكلها هاتقل شوية و النهارده رحت اتفرجت على فيكترا a
احتمال كبير يكون لي نصيب فيها بس لسه هاشوف