حمى البيع واستطلاع هل الاسعار هترخص

[ibrahimsaad]

اخوانى انا شايف فيه عدوى انتشرت بين الجميع والكل عاوز يبيع عربيته

وانا فى اعتقادى ان التفسير لهذه الظاهره هو مااشيع عن ان اسعار الزيرو هترخص وانا شايف ان ده مش هيحصل وان حصل هيكون نسبه بسيطه فقط مش كثير

ايضا اللى عنده مستعمل عاوز يبيع دلوقت علشان يشترى زيرو لما يرخص وهو فاكر كده

لكن المشكله انه ممكن يلاقى نفسه خسران لما يبيع رخيص دلوقت على امل ان الزيرو هيرخص

طيب بفرض ان الزيرو مانزلش يبقى هو خسر عربيته وكمان مش هيعرف يعوضها بزيرو

كمان حكايه الازمه العالميه خوفت الناس فالكل عاوز يبيع وفاكر انه لو ماباعش دلوقت مش هيعرف يبيع بعدين وخصوصا ان الكل مترقب الازمه الماليه

لذلك انا كتبت هذا الموضوع وارجوا مساهمه الجميع فيه برأيه

[elassar2010]

احنا داخلين فى نفق مظلم محدش عارف حاجة الكل بيتخبط ماحدش عارف كمان ساعة ممكن يحصل اية علشان كدة تلاقى الناس فريقين
الفريق الاول...متفرج وبيراقب وبيشوف ولا بيبيع ولا بيشترى مكفى نفسة بالى عندة
الفريق الثانى...حاسس انة هيخسر فبيفكر انة يبيع دلوقتى على امل انة هيكون هو الكسبان
وطبعا محدش يعرف اى من الفريقين صح

[abou_ruqi]

آحسن خللي الناس تبيع فالعرض يكون آكبر من الطلب فتنهار آسعار المستعمل
لآن الناس كانت بتستعبط في الآسعار و كانت العربيات السبعينات كهنة ولا لها سعر و يطلبولك ٣٠ و٤٠ الف وهي متساويش وزنها حديد
وفي وقت وصلت فيه الـ١٢٨ لـ الف٢٤ يبقي ده سوق ؟؟؟؟

[casper2010]

اللي مهتم بالبيع غالبا واخدها تجارة
اما اللي مستفيد بعربيتة و مقضي بيها حياتة و شغلة و اسرتة زي حالتنا ما تفرقش معاه _ ممكن يقعد بالعربية 10 سنين و اكتر _ و اللي يرخص يرخص و اللي يغلي يغلي ما هياش فارقة معاه - (مع العلم ان رخص الأسعار في مصلحة الكل - تلوث اقل - شوارع ماشية من غير اعطال و لا عربيات بايظة توقف الشارع - رخص قطع الغيار - لو عاوز عربية لابنك او مراتك المتبهدلين هتقدر تجيب)
لكن المضاربين و الفهلوية اللي ملوا البلد هما اللي بيخافوا من الغلو او الرخص- و ربنا يجعله عامر

[ouba2]

علشان خايف من الازمه الماليه جداااااااااااااااا

[elmadawy]

أنا شايف من وجهه نظري أن السبب في ذلك الازمه الماليه العالميه هي السبب وراء حمي البيع وذلك لتصور الناس ان أسعار العربيات الجديد حتنزل وبالتالي أسعار القديم سوف ينهار ويكون ليس له اي سعر مثل ما كان في السابق

[khaladsaef]

;)انا شايف ان احنا فاههمين غلط، لان اسعار الجديد هتغلي وده بعد ما اعلنت VW و BMW و Opel خفض الانتاج لاكتر من ٣٠ % وبالتالي حتبقي عايزه تعوض الفرق ده علشان متبقاش الخسارة كبيرة ومتضرش تفصل عمال فيها.

[FASTER]

اللي غلي مابيرخصش تاني وانا من اكتر من عشر سنوات قبل ماشتري اول عربية في حياتي وانا الكل كان بيقولي استني علشان اتفاقية الجات هاترخص العربيات واديني اهو سلملي عالجات ممكن تكون جات ومشيت ههههه

[human]

كل حاجه هترخص بالعافيه
بس المشكله مش هيبقى فيه فلوس تشترى
الموضوع شرحه طويل
بس النتيجه واحده

[mazgangy]

انا بنبيع عربيتين اكسنت بتاعتى والانترا الشكل الجديد بتاعت والدى وده علشان ربنا كرمنا بارض فى اكتوبر وبنبنى ومحتاجين فلوس وعاوزين نبنى قبل انتهاء المده وكمان فرصه الحديد رخص

[flymido]

السوء عرض وطلب وربنا يعدى الايام الجايه على خير

[hafez35]

يا اخى كلمة السوء ليست بهذا السوء وتكتب هكذا السوق
شكرا

[zizophone]

اللي غلي مابيرخصش تاني

[mokhtar]

آحسن خللي الناس تبيع فالعرض يكون آكبر من الطلب فتنهار آسعار المستعمل
لآن الناس كانت بتستعبط في الآسعار و كانت العربيات السبعينات كهنة ولا لها سعر و يطلبولك ٣٠ و٤٠ الف وهي متساويش وزنها حديد
وفي وقت وصلت فيه الـ١٢٨ لـ الف٢٤ يبقي ده سوق ؟؟؟؟

كلامك مضبوط فعلا فى اسعار مستعمل تجنن تلاقى الفيات131 موديل78 يعنى قفلت التلاتين سنه وعايز فيها 35000 ..لييييييييييييه..والبيجو ال504 برضه سبعينات بتعدى 40000 ولا ال128 دى اللى حكايتها حكايه موديل التمانينات بتاعها بيعدى ال25000 وتلاقيها مغيره موتور و رشه20 مره واتنفخت من جديد والناس عليها زى النمل
بجد حاجه تغيظ ده لو مثلا البيجو 504 دى فى الخليج ممكن تدخلها راس براس مع علبه سجايروتدفع الفرق



..mokhtar..

[bassemali]

أنا قرأت في جريدة الحياه هنا في السعوديه من حوالي 5 أيام ان أسعار السيارات هتنزل 20% وده كان خبر مؤكد نظرا لتطورات الأزمه الماليه العالميه بس الله أعلم في مصر العجيبه أيه اللي هيحصل .