هيونداي ماتركس

[ahmed hamada]

يا جماعه انا ف حيره مش عارف اختار بحاول اشوف عربيه زيرو ف حدود 85000

او مستعمله موديل عالي بعد 2010

الزيرو مفيش غير لوجان او فيرنا او اي حاجه صيني

المستعمل انا ميال ...:
هيونداي ماتركس اوتو من اول 2010 لحد 2012

وحاجات تانيه بس الماتركس كبيرة وعاليه عن الارض علما اني طويل وتخين شويتين

هل ال 3 سنين دول فيه اي اختلافات بينهم ولا الموديلات واحده وايه هي عيوبها وقطع غيارها موجوده وهل سعرها متوسط ولا غاليه وايه هي الكماليات وسعرها لو عربيه نضيفة ومش عايز ادخل بيها الحرفيين سنتين كده ولا حاجه


ياريت اي حد معاه العربيه يقولي رأيه فيها

[ahmed hamada]

متابع

[ahmed hamada]

ياشباب انا تصفحت ف المنتدى ولقيت ان الخليجي احسن بكتير وهي انتاج كوري لحد 2007
وبعد كده الاخ غبور بدأ يستوردها بعد كده من اسواق خارجيه عن الكوري
فهل اشتريها 2006 او 2007 خليجي ولا 2011 واستفاد بفرق السنين ده

[ahmed hamada]

وده كان راي عضو ف المنتدي

انا معايا الحمد لله ماتريكس 2006 خليجي كاملة اوتوماتيك ..

مبدأيا الخليجي : فتحة سقف _ سبويلر خلفي _ مساحة خلفية _ تكييف خليجي جباااااااااااار جدا

ماشاء الله " و انسى اي حد يقولك ما تكييف المصري معايا حلو اهو " _ كرسي السائق بمخدع

و 2 بكره هيدروليكي لتغيير وضعية الكرسي _ دراع في جنب ضهر كرسي السائق لنفخه او تفريغه

من الاسفنج حسب ارتياح نهاية عمودك الفقري _ مخدع خلفي في الكنبة به 2 حامل كوباية _ ريموت

اصلي كوري مختلف عن المصري و به فصل كهرباء السيارة و سمعت انه فصل طرمبة البنزين و ده اقوى اكيد في الامان منعا من سرقتها و لو بالمفتاح الاصلي من غير ما يفتح الريموت اولا _

و جود اباجورة امامية مع زراير فتحة السقف مقسمة لاضائتين تفتح كل جنب لوحده _ بعد نزع المفتاح

من الكونتاك تظل كهرباء في السيارة لقفل الزجاج المفتوح بها ان نسيت _ مع فتح السيارة بالريموت

يضاء الصالون بالكامل بالاضافة لدائرة خضراء حول الكونتاك لتراه في الظلام _ اذا بطلت السيارة من غير ما تقفل دراع النور فبمجرد فتح باب السائق اوتوماتيكيا السيارة تغلق نور التابلوه _ ماكنة الخليجي غير تماما عن غبور المصري حيث ان غبور اعتمد ماكنة الفيرنا والماتريكس واحده !!!!!!!!

عند نزولك من السيارة و ان كان الموتور ما زال ساخنا لا تنطفيء مروحة التبريد الا بعد تبريد المحرك

كما يحدث في الاسكودا و الالماني !!!!! و ده طبعا مش موجود في الكوري او الياباني !!!!!!!

بص انا مش عارف احصر ايه كمان بس ده اللي فاكره و و الله بتعامل معاها كاني معايا موبايل جديد

و كل يوم بكتشف اوبشن جديد مع نفسي ... طب استنى افتكرت حاجة كمان :

السنتر بتاعها بيقفل اتوماتيك بعد ال 45 من السرعة و استحالة لو العربية معدية السرعه دي

حد من العيال يعرف يفتح الباب او السنتر يعني !!!!!!!!!!!!!!!!!

و حاجة كمان : اذا اتحركت بالسيارة و فرامل اليد مش نازلة لاخرها كويس و لو لمبتها في التابلوه مطفية فهتلاقي جرس شبيه بأن الباب مفتوح اشتغل و ساعتها تتمم على فرامل اليد " حصلت معايا :)) "

و حاجة كمان : في حالة حدوث صدمة قوية نوعا ما من الامام و حبيت تشغل السيارة لن تعمل الا بالضغط على زرار في الماكينة مقابل الدركسيون و هو مطاطي و يسمح بضخ البنزين مرة اخرى و يدور المحرك ... و هذا المنع خوفا من نشوب حريق لا قدر الله ساعة الاصطدام ..

طبعا دراع المساحات الامامية في المصري سرعتين فقط و من غير مساحة خلفية .. اما في الخليجي فهو تقريبا 4 سرعات بالاضافة لبكرة مدمجة داخل الدراع الاساسي للمساحات لتزويد او تقليل عدد الثواني المناسب لزخات المطر ساعة نزولها !!!!!! يعني بتحدد سرعة المساحة الامامية كما تحب :))

طبعا من اكتر الاشياء الملحوظة ان اللي راكب الماتريكس المصري تحس انه طاير في سقف العربية و كأن غبور عاوز يرغمه على احساس الجيب فحطله اسفنج بالعبيييييط و مع حجم الزجاج الجانبي للسيارة بنعرف لون البنطلون اللي لابسه السائق ههههههههههههههه " مش قصدي تريقة طبعا " بس دي الحقيقة لان والدتي معاها المصري ..
اما الخليجي فمديلك احساس الصالون و انت قاعد من غير ما يكون وسطك مقابل لزجاج الباب بطريقة تخنق ... فتصميم كراسي الخليجي اروع و اتقن من مواصفات غبور :((


اممممممم مش فاكر ايه كمان ؟؟؟ بس لما افتكر و اكتشف اكيد هضيفها هنا ان شاء الله ..

و ربنا يبارك للجميع فيما يملك و يرضّيه :))

[ahmed hamada]

يا جماعه حاولوا تشاركوني مينفعش مشاهدات من غير مشاركه

[ahmed hamada]

43 مشاهدة ومستني مشاركة
هو فين منسق القسم ولا كله نايم ولا ايه

[mhamad ghany]

لو لقيت حاجة بالسعر ده ابقى عرفني
عامة انا رايي ماتدفعش المبلغ ده في صيني
ورايي الفيرنا ماتستاهلش
اللوجان ماعنديش فكرة عنها
حط اللانسر في خساباتك اوتوماتيك 1600 2006-2008

[ahmed hamada]

لو لقيت حاجة بالسعر ده ابقى عرفني
عامة انا رايي ماتدفعش المبلغ ده في صيني
ورايي الفيرنا ماتستاهلش
اللوجان ماعنديش فكرة عنها
حط اللانسر في خساباتك اوتوماتيك 1600 2006-2008

عملت بنصيحتك واستقريت على عربيتين

لانسر 2008 اوتو 1600
اوبترا 2010 اوتو 1600

انت بقى رأيك ايه

[sfahmy6]

انت كنت بتدور على ماتريكس. .... و مالاقيتهاش


فقررت تغير لدول ولا ماكانتش قدامك اصلا

[ahmed hamada]

كل الماتريكس المعروض 2002 لحد 2004 وكله بلح رايح فيها

[mhamad ghany]

عملت بنصيحتك واستقريت على عربيتين

لانسر 2008 اوتو 1600
اوبترا 2010 اوتو 1600

انت بقى رأيك ايه

احسنت الاختيار العربيتين جيدتين رايي المهم الحالة بتاع العربية لو الاتني متساويتي افضل اللانسر لان لها مميزات لا خلاف عليها في الثبات والامان وعشان كدة دي عربية لها قيمتها في السوق يعني تعرف تبيعها
بقولك ماتشركني معاك يمك اا كمان اشتري واحدة مهم لو ات ماخدتهاش
شوف الموضوع بتاعي ده http://www.nilemotors.net/Nile/45666...post3875876706