أرجو المشورة

[alim]

أرجو الرأي والتوجيه من أهل الخبرة ، فأنا أعمل بالخارج وأريد شراءسيارة ببمصر وأبحث عن سيارة عائلية واسعه وقوية وتتحمل السفر والرحلات العائلية وتكون سيارة عملية وتسد في المواقف الاجتماعية . فكرت في البيجو 505 ستيشن فوجدت أسعارها مبالغ فيها وحتى شكلها مرتبط بسيارت الأجره ، بافكر في خيارات عديدة مختلفه كيا كارنفال ، تويوتا بريفيا ، فولفو 240 أو 740 ، جيب شروكي . مرسيدس . أرجو النصح والتوجيه من أصحاب الخبرة الأفاضل .

[memo_hefnawy]

ترجع بالسلامة إن شاء الله :)

مبدأيا ياريت تحدد رينج الفلوس إللى ممكن تدفعها فى العربية يعنى المواصفات حضرتك حددتها لكن يتبقى الميزانية

[alim]

شكراً لسرعة الرد ، أما بالنسبة للفلوس فبالأمكان في حدود لغاية 100ألف والمهم تكون العربية تستاهل ثمنها وحتى لو زادت بالنسبة لبعض الماركات .

[goodwave]

أما بالنسبة للفلوس فبالأمكان في حدود لغاية 100ألف والمهم تكون العربية تستاهل ثمنها

أرشح لحضرتك الاسكودا أوكتافيا A4 سيارة متينة وصناعة اوروبية وشنطة واسعة جدا وممكن تلاقي حاجة كسر زيرو بالسع دة او زيادة شوية...... اعتقد من عيوبها غلو قطع الغيار ولكنها معمرة واعتقد إن هذة الفئة سهلة في إعادة البيع.

في رأيي إبعد عن الاستيشن واجن علشان دي عربيات مفيش غقبال كبير عليها وبتبقى تقيلة في إعادة البيع.......... بالتوفيق

[hazem_khidr]

في رأيي إبعد عن الاستيشن واجن علشان دي عربيات مفيش غقبال كبير عليها وبتبقى تقيلة في إعادة البيع.......... بالتوفيق

+1
في رايي لو تزود شويه و تجيب مرسيدس موديل فوق ال 85 اللي بيسموها زلموكه يبقي كده انت كسبت عربيه عائليه و الماني و محترمه و من مرسيدس و شكلها برضه مش وحش

[مدحت منيب]

لوحاترجع تسافر تانى و تركنها تبقى وقفت فلوسك المدة اللى ها تقعدها برة + 150 جنية جراج فى الشهر ادى كمان 1800 جنية فى السنة , ولو مش زيرو , هاتدفع 1350 للعربيات ال 1300 سى سى والمحركات الاكبر شرايحها اكبر , دى رسوم تسجيل الملكية ف الشهر العقارى , + 400 جنية بطارية جديدة السنة الجاية لما ترجع بالسلامة , + حوالى 5000 جنية فى السنة هانخسرهم كمهن نتيجة تجنيب مبلغ السيارة عن دورة راس المال العامل ( متوسط واقعى للتاجر , ليس كما تفترض الضرايب ) اذن جملة تكلفة الفكرة دى فى ادنى الحدود 8550 جنية ... ها تقعد اجازة كام مثلا؟ لو شهرين يبقى الشر كلفك اربعة الاف و مايتين و جمسة و سبعون جنية , فى بند انتقالات بس ..!! لو عودة نهاأية ليها حسبة تانية , ارشح لك بنا على تحدبدك الدقيق الواضح لمتطلباتك .. و بنا على دراستى للسوق الحالى هنا السيارة هيونداى ماتريكس مو 2008 اوتوماتيك ع الزيرو( اقتنيها ايضا ) ... وربنا يوفقك و تيجى باف سلامة يا حاج على...المخلص .. مدحت منيب

[alim]

الإخوة الأفاضل لكم جزيل الشكروالتقدير على آرائكم وآسف لعدم التواصل معكم الأيام الماضية ولسه راجع اليوم للرياض بعد أداء عمرة رمضان ولله الحمد ، نسأل الله أن يتقبل وأن يكتبها لكم ولمن تحبون ، وعلى كل اود منكم مشكورين إلقاء الضوء عن مميزات وعيوب السيارات التي ذكرتها في بداية طرحي لعلنا نقرب وجهات النظر مع الوضع في الاعتبار سعة السيارة أو زيادة عدد المقاعد حتى لفت نظري ذات مرة إعلان عن بيع مرسيدس سبع مقاعد ولا أذكر الموديل بالضبط وأرسلت رسالة استفسار عن السعر لكن معبرنيش ، أما بالنسبة للجراش ومصاريف النقل والبطارية يعني مقدور عليها خصوصاً الجراش وانت عارف سكان الأقاليم غير القاهره يعني جنب البيت أو مكان في بيت العيله يعني تتدبر وهي على كل حال متى وجدت لن تتوقف طويلاً وعلى الأقل كل أسبوع هتقوم بواجبات معينة ، فأرجو توجيهاتكم ، أخوكم علي مصطفى

[مدحت منيب]

الف حمدا للة على السلامة وتقبل اللة عمرتك فى الصالحين امين ..طبعا يبقى زى ما حضرتى مرتبهم باظبط : كيا كارنيفال ( مستعمل ما بتقلش عن مية و خمسين ) .. يليها تويوتا بريفيا . او كريزلر تاون &كنترى( او جراند فوايجار ) ..دى الحاجات العايلية بحق و حقيقى

[Adham]

ايوة بس الكيا كارنيفال و كريزلر دول عربيات مالهاش صيانة غير في التوكيل و قطع غيارهم مش موجودة في السوق
يعني الموضوع مكلف جدا ومش سهل

فكر في حاجة متينة و ماتتعبكش و لا تكلفك جامد في مصاريف صيانتها

[عاشق الفولفو]

حسب مافهمت من حضرتك انك عاوز عربية فيها اكبر عدد من الكراسي والمساحة
ممكن لاند كروزر من 94او95 او باسات من 99الي 2003 او ممكن فرونتيرا (استاذ ادهم حيفيدك في معلومات عنها) او هيونداي سوناتا من 2001 الي 2003 او باراتي (زيرو)

بالنسبة للفولفو كويسة وممكن تجيب ال 240 gl ستيشن سعرها معقول و سوقها علي ما اعتقد مشي شوية (بس متهايلي حتلاقي فيها اكبر مساحة)

[Adham]

فعلا الفرونتيرا ممكن تنفع مع حضرتك و ممكن كمان الباجيرو ولو انها اغلى كتير و قطع غيارها اعتقد اغلى بكتير

الشيروكي مش حاترتاح فيها في السفر لأن عفشتها ناشفة قوي :(

ولو الليبرتي الثبات بتاعها مش حلو عالطريق(العربية كنزة قوي و عالية قوي) :?


و الشيروكي القديم في التسعينات تكييفة وحش قوي و بيسخن دة غير خشونة الموتور و نشوفية العفشة :|

الباجيرو من 98 و طالع استاذة بس سعرها من 180 و طالع

الباجيرو و الفرونتيرا عربيات أنعم بكتير و عفشة مريحه و تكييفات قوية و الكنبة اللي ورا واسعه قوي و ممكن تزود كنبة صغير لو عاوز تقعد اطفال في الشنطة

بس مانصحكش بموضوع الكنبة دة في شنطة الشيروكي بالذات ل، ارضية شنطة الشيروكي ضعيفة قوي, و باب الشنطة فايبر و بيفتح بالكامل, ف مش أمان بالذات لو في سفر :|

[ahmed1981]

Re: أرجو المشورة

بافكر في خيارات عديدة مختلفه كيا كارنفال ، تويوتا بريفيا ، فولفو 240 أو 740 ، جيب شروكي . مرسيدس

أما بالنسبة للفلوس فبالأمكان في حدود لغاية 100ألف والمهم تكون العربية تستاهل ثمنها وحتى لو زادت بالنسبة لبعض الماركات

لو المطلوب سيارة زيرو من اللي قلتهم يبقى زود عن ال 100 ألف أضعاف
الأسعار هتلاقيها في الموقع ده:

http://www.contactcars.com/NewCars.asp

لكن لو الحدود النهائية 100 ألف يبقى عندك الكرولا واللانسر والألنترا والسيراتو والأوبترا وهي فئة عائلية سيدان لكن الأكبر من ذلك معدي الحدود السعرية جامد

[alim]

الأخوة الأفاضل ، لكم جزيل الشكر والتقدير على اهتمامكم ومعلوماتكم القيمة وقد خلصت إلى أن أركز بحثي في ثلاث ماركات هي الفولفو 240 أو 740 ، جيب شروكي ، مرسيدس بعد ال85 وطبعا من ناحية المبدأ ببحث عن مستعمل وحسب ظني هذه الماركات في المستعمل بتكون مصانه فياريت لو حد عنده إي فكره عن عرض بيع مناسب أن يبلغني وله جزيل الشكر وإيميلي alim@arabsat.com تقبلوا تحياتي جميعاً .