يارب يخليكم عاوز شقة إيجار !

[خالد]

عاوز شقة إيجار جديد أو قديم ومش مهم المساحة
وياريت تكون فى ألف مسكن أو الزيتون أو النزهة أو مصر الجديدة أو أى مكان بشرط منطقة هادية جداً وماتكنش شارع رئيسى أنا بحب الشوارع الجانبية علشان الهدوء لحسن خلاص أتعقدت من الدوشة

[beshomilan]

كان نفسى اساعدك بس انا من شبرا

[خالد]

كان نفسى اساعدك بس انا من شبرا

ماهى المشكلة جاية من شبرا !!!
أنا أصلاً متربى فى شبرا فى شارع روض الفرج وبموت فيها لغاية الآن ومازال والدى عايش هناك ، ولما أتجوزت رحت عزبة النخل بيت بناه والدى ليا ولأخواتى كلهم وكلنا ساكنين مع بعض فى نفس البيت مفيش سكان معانا ، وليا فيه شقتين واحدة فى الدور الثانى ووواحدة فى الرابع وعندى جراج خاص !! ولكن .... وآه من لكن !! المنطقة شعبية جداً طبعاً وجنب منى قهوة ريحة الشيشة والفحم طالعة علينا الـــ 24 ساعة وكمان كبابجى ، وكمان الدوشة فظيعة من المحلات اللى بتشغل الكاسيت على طول وياما كلمتهم ومفيش فايدة وكله كوم والتوك توك والموتسيكلات كوم تانى لغاية الساعة 2 بالليل دايرين فى الشوارع بصوت فظيع للكاسيت وكمان الأولاد فى المدرسة بدأوا يلقطوا ألفاظ بشعة من زمايلهم ، والجيران فى المسجد والشارع وطريقة تعاملهم مش لطيفة خااالص !!!
ولو شبرا برضه يبقى كويس ، أنا شغلى فى مصر الجديدة علشان كده كنت بفكر فى المناطق القريبة ، بس المهم الشارع هادى وطبعاً الإيجار حنين
مع خالص تحياتى

[wawamoha]

منطقه هاديه و ايجار حنين
عليك بالشروق ة استمتع بالحياه في المدن الجديده

[خالد]

منطقه هاديه و ايجار حنين
عليك بالشروق ة استمتع بالحياه في المدن الجديده

فعلاً المدن الجديدة رائعة ولكن لها عيوبها برضه خاصة الشروق زى المشوار البعيد واللى هتوفره فى الإيجار هتدفعه فى البنزين وإستهلاك العربية وعطلة الطريق عند موقف العاشر ، وكمان عدم الأمان الكامل بنسبة 100*100 ، وأنا مستعد للإيجار المتوسط مش الحنين قوى يعنى لغاية 1000 ج مثلاً
وشكراً لحضرتك جداً

[beshomilan]

انت عايز فى شبرا ايجار قديم خلو كام وايجار لحد كام؟؟

[خالد]

انت عايز فى شبرا ايجار قديم خلو كام وايجار لحد كام؟؟

والله مش عارف
بس نشوف المتوفر أيه وبعدها نقرر ، بس المهم المنطقة كويسة وهادية
وتقبل تحياتى

[beshomilan]

لازم تحدد عشان اقولك هينفع هنا ولا لا
متقلقش انا مش سمسار :d
انا خاطب وبدور على شقه فشبرا الايام دى فعشان كده سئلتك عشان اساعدك
انا بدور فى حدود 70 الف وايجار اقصاه 300 واهو لسه بلف

[خالد]

لأ والله مش قلقان من حاجة أنا عارف من زمان أن كل الناس فى المنتدى محترمين
بس فعلاً أنا مش عارف والحقيقة إمكانياتى 40 ألف والإيجار ممكن 600 جنيه
أو لو إيجار جديد ممكن لغاية 1000 ج
وتقبل خالص تحياتى

[Karim_Monir]

الف جنيه ايجار
شيل النزهة ومصر الجديدة من حساباتك نهائي
الزيتون برضه بصعوبة
الف مسكن خليك في منطقتك معملتش حاجة
ممكن اخر جسر السويس تقسيم عمر ابن الخطاب بس هاتكسر ال الف بحاجة بسيطة في شوارع هادية بس ابعد عن جمال عبد الناصر نهائي

[mfs3570]

ان عندي شقة في ارض اللواء تبعد عن ميدان لبنان المهندسين دقيقة واحة بالسيارة 3 دقائق متروجل بس مطلوب 35000 و500 ايجار قديم بس ال35000 رايحين هيا حوالي 100 او90 متر معقولة تبعد عن الدائري دقائق للمتابعة mfs3570@yahoo.com علي فكرة انا الساكن اللي فيها

[خالد]

بصراحة أرض اللواء بعيدة عليا أنا شغلى فى مصر الجديدة ، متشكر جداً جداً لحضرتك
وأنا مع رأى الأستاذ كريم منير فعلاً 1000 ج مش هتنفع خالص مع مصر الجديدة أو النزهة !!
بس ممكن فى الألف مسكن أنا شايف فيها شوارع هادية جداً وقريبة من ميدان الألف مسكن هنزل أدور فيها وأشوف النظام أيه
أنا زميلى واخد فى التجمع الثالث إسكان الشباب شقة 70 متر إيجار جديد بــ 600 جنيه لمدة سنتين ، بس أنا شايف أن المشوار بعيد شوية والأمان برضه مش كامل والدنيا هناك تلج مووووووووت فى الشتا
ياريت لو حد عنده حاجة تانى ياريت يعرفنا
وتقبلوا جميعاً تحياتى وأحترامى وتقديرى

[beshomilan]

فيه فى شبرا فحتت كويسه ايجار جديد ب 800 و900 و 1000
انما ال 40000 قانون قديم هتكون صعبه
لو وصلوا ل 70000 ممكن الدنيا تتظبط اكتر

[خالد]

طيب ياريت تدينى العناوين أو أسماء الشوارع فين بالظبط فى شبرا
وشاكر لحضرتك جداً جداً

[wawamoha]

الف جنيه ايجار
شيل النزهة ومصر الجديدة من حساباتك نهائي
الزيتون برضه بصعوبة
الف مسكن خليك في منطقتك معملتش حاجة
ممكن اخر جسر السويس تقسيم عمر ابن الخطاب بس هاتكسر ال الف بحاجة بسيطة في شوارع هادية بس ابعد عن جمال عبد الناصر نهائي

انا قلت كده برضه
ربنا يعينك
علان كده بنصحك بالشروق هاتلاقي بالمبلغ ده و كمان هيا مش وحشه خالص