عاوز اركب زجاج كهرباء بأيدى

[khaled_sabry]

السلام عليكم و رحمة الله فى الاول
باختصار الموضوع كده انى بحب اعمل كل تعديلات العربيه بأيدي
و كنت بفكر كده انى اركب فى عربيتي ازاز كهربا
عربيتي (ماحدش يدحك ) تيوتا كورولا 78 ... و علشان ماحدش يقولى ماينفعشى يركب عليها فانا بالفعل شوفت عربيه نفس الموديل راكب عليها زجاج كهرباء
فياريت حد يقولى حتتكلف كام الموضوع ده بالتفصيل و اشترى الحجات منين

[khaled_sabry]

ايه ده هو سؤالى غبى للدرجه دى و لا ماحدش عملها قبل كده ؟؟؟؟؟ اقصد ان يركب بايده ,كله بيستسهل و يروح للكهربائى ؟؟

[iBiZa]

باختصار الموضوع كده انى بحب اعمل كل تعديلات العربيه بأيدي

احسن ناس.

و كنت بفكر كده انى اركب فى عربيتي ازاز كهربا

حاجة عادية جدا.

عربيتي (ماحدش يدحك ) تيوتا كورولا 78 ...

و نضحك لية ؟؟ عربيتك و شايلاك و عايزها تدلعك شوية ... مش عيب.

و علشان ماحدش يقولى ماينفعشى يركب عليها فانا بالفعل شوفت عربيه نفس الموديل راكب عليها زجاج كهرباء

محدش يقدر يقول ما ينفعش, كل حاجة تنفع.

فياريت حد يقولى حتتكلف كام الموضوع ده بالتفصيل و اشترى الحجات منين

هنتكلم على 2 زجاج كهرباء للبابين اللى قدام, هتحتاج الاتى:

• 2 مكنة زجاج = من 250 الى 400 جنية (جديد من التوفيقية او استيراد)
• 2 زرار للتحكم = 20 الى 50 جنية (جديد من التوفيقية او استيراد)
• حوالى 10 متر سلك لونين = من 10 الى 20 جنية (جديد من التوفيقية)
• فيوز 15 بالقاعدة بتاعتة = من 10 الى 15 جنية (جديد من التوفيقية)
• شنيور (من عندك انت دة)
• طقم عدة عشان فك الباب و فك الموتور العادة و تركيب الكهرباء (من عندك انت بردة)

ايه ده هو سؤالى غبى للدرجه دى و لا ماحدش عملها قبل كده ؟؟؟؟؟

مش غبى, بس محدش غالبا عملها بايدة قبل كدة.

كله بيستسهل و يروح للكهربائى ؟؟

دة اكيد طبعا

[khaled_sabry]

يا باشا الف شكر
IbiZA العضو الوحيد اللى عبرنى اخيرااااااااااااا
المهم
بالنسبه لمكن الزجاج هو انا سمعت ان فيه نوعين من المكن
نوع اسمه مقصات
و التانينى بسير يتهيألى
فالمكن ده بيجي بعدته بكل حاجه و لا لازم اجيب مكنه على حسب نوع المكنه اللى عندى فى الباب (مقص و لا سيور) ؟؟؟
وهو ايه الفرق بين المكن اللى قدام عن اللى ورا ؟؟
يتهيألى كله نفس الموضوع
و 250 دى سعر المكنه الواحده و لا الاتنين ؟؟؟

وفيه اعتراض صغير بس على التوقيع بتاعك .... احنا عرب قبل ما نكون مصرين ... لكن الجزائر هى اللى مش تبع العرب دول فرنسيين

[iBiZa]

بالنسبه لمكن الزجاج هو انا سمعت ان فيه نوعين من المكن
نوع اسمه مقصات
و التانينى بسير يتهيألى

اللى بتكلم علية ابو سير.

فالمكن ده بيجي بعدته بكل حاجه و لا لازم اجيب مكنه على حسب نوع المكنه اللى عندى فى الباب (مقص و لا سيور) ؟؟؟

هى بتبقى مكنة كاملة و طالع منها سلكتين.

و بتشيل اللى عندك فى الباب خالص.

وهو ايه الفرق بين المكن اللى قدام عن اللى ورا ؟؟
يتهيألى كله نفس الموضوع

الابعاد بس عشان غالبا اللى ورا بيبقى اصغر سنة من اللى قدام عشان دواير العجل بتبقى واخدة جزء من الباب, و عموما اتكلمت عن اتنين عشان غالبا اللى بيركب بيبقى فى البابين اللى قدام.

و 250 دى سعر المكنه الواحده و لا الاتنين ؟؟؟

الاتنين صينى جديد و دة اولهم و طالع معاك فية يابانى و المانى استيراد.

وفيه اعتراض صغير بس على التوقيع بتاعك .... احنا عرب قبل ما نكون مصرين ...

لأ, فى التاريخ احنا اصلنا مصريين قبل ما نبقى عرب.

لكن الجزائر هى اللى مش تبع العرب دول فرنسيين

انا محددتش بلد بعينها عشان البلاوى اللى عايشين فيها كتير و يا ريت جت على الجزاير و بس.

خلى الواحد ساكت الله يخليك.

[khaled_sabry]

اللى بتكلم علية ابو سير.



هى بتبقى مكنة كاملة و طالع منها سلكتين.

و بتشيل اللى عندك فى الباب خالص.


الابعاد بس عشان غالبا اللى ورا بيبقى اصغر سنة من اللى قدام عشان دواير العجل بتبقى واخدة جزء من الباب, و عموما اتكلمت عن اتنين عشان غالبا اللى بيركب بيبقى فى البابين اللى قدام.



الاتنين صينى جديد و دة اولهم و طالع معاك فية يابانى و المانى استيراد.



لأ, فى التاريخ احنا اصلنا مصريين قبل ما نبقى عرب.



انا محددتش بلد بعينها عشان البلاوى اللى عايشين فيها كتير و يا ريت جت على الجزاير و بس.

خلى الواحد ساكت الله يخليك.

طيب مافيش وسيله انى استفيد بالمكنه المانوال اللى فى الباب ... يعنى حد يشتريهم مثلا و يشتريهم بكام لو وجد
و بالنسبه لموضوع الجنسيه المصريه و لا العربيه... فمع احترامى الشديد ليك
انا مثلا جدودى بالتأكيد كانو فى مرحله زمنيه كفره يعنى لا مسلمين و لا مسيحين ... ده لو كانو جدودنا مصريين اصلا (انا عارف ان جدى رقم 4 و ماقبله ماكانوش عرب اساسا)
فهل معنى كده انى اقول دلوقتى انى كافر (استغفر الله العظيم )او انى اقول انى مش مصرى ...
لا انا مصرى و مسلم
نفس الموضوع مصر كانت زمان دوله غير عربيه ... بس بقيت دوله عربيه بعد الفتح الاسلامى و بالتالى احنا دوله عربيه دلوقتى قبل ما نكون مصريين
وكون ان فيه بعض الدول العربيه مش عجباك مش معنى كده اننا نتخلى عن هويتنا العربيه ... عندك مثلا فى مصر لو 6 او 7 محافظات بعتو بلطجيه على محافظتك وكسروها خالص معنى كده انك تقول انك مش مصرى ؟؟؟ ... فكر فيها و حتلاقيها نفس العلاقات