عمل فتحه سقف

[H_A_T_Em]

كنت عايز اعمل فتحه سقف في اللانسر اللي معايا هي كلاسيك فايه رايكو في الفكره دي و هل لو عملتها ممكن يبقي فيه مشاكل او متطلعش حلوه او اواجه اي مشكله يا ريت لو حد عاملها في لانسر يقولي و هل ممكن اعملها كهربه بردو ولا ايه و بتتعمل فين و الف شكر مقدما

[smax]

شوف عند بتوع قطع الغيار المستعملة سقف كامل فية فتحة سقف علشان تاخد منة الزجاج, الفرش الداخلي و طبعا الزراير و كل الاجزاء لاو عملت كدة يبقي كل الي هتعملة انك تقص السقف و تعمل وصلات الكهرباء.

[mr_sameh]

هيكون السقف عرضه للبرومه

[ghost1900]

نصيحه متعملهاش هتخلى سقف العربية عرضه للبرومه وهتقلل من تمنها فى البيع وكمان لازم تتعمل باحترافيه شديده والا سقف العربيه ممكن يبوظ (وما أدراك بصنايعيه مصر).

[Eng.Sameh]

لو فتحة السقف مش معمولة في المصنع .. يبقى قلتها احسن .. عمرها ما هتطلع زي المصنع وكمان مش هتكون محكومة صح !

[H_A_T_Em]

انتو خوفتوني بصراحه و انا كنت فاكر ان الموضوع اسهل من كده لان انا بشوف عربيات من غير فتحه سقف و بيبقي فيها زي الاوبترا و ال 128 و كتير بس انا شكلي كده هصرف نظر بس هل حد يعرف حد جرب الموضوع ده و واجه مشاكل يا ريت لو حد يعرف يقولي و لو حد يعرف واحد مختص في الموضوع ده

[gemy215]

بتهئلي بلاش فعلا انا رأيي من رأي الاخوه
لانو مش هتطلع مظبوطه دا اول حاجه وفكرت انك تقص السقف علشان تجيب غيره وتركبه ممكن ميتعملش كويس وهتكون بهدلت العربيه علي الفاضي
وممكن شغل الكهربا ميظبوطش وهتدخل نفس في حوارات كتير انتا في غنا عنها

[Sameh]

انا كمان شايف انها هتعك منك ومافيش صنايعى هيعرف يظبطها ، فحرام تبوظ عربيتك بإيدك
لو ضرورى ضرورى دخل عربيتك فى واحدة بسقف وشوف الفرق هيبقا كام

[Haitham10]

رغم متعة وميزة فتحة السقف بس عندي انك تغير العربيه احسن ما تيجي ناحية سقفها الفابريكة

دة اغلى حاجه بيتعملها حساب فى البيع في بلدنا الجميله :)

[m7mda7md]

انا رأيي لو هتمشي في الموضوع يبقي الحل الاسلم هو السقف الكامل
انما تقطع في الصاج ولا كلام ده مش مضمونه اوي

[MohamedGafar]

الوحيد اللى ممكن يعملهالك زي مالكتاب بيقول هو آرابكوم وسعرها عنده 3800 جنيه وأنا كنت عايز أعملها بس الإخوة هنا حذروني منها.

تحياتي.

[Ralliart]

انا شايف انها ملهاش لازمه لان انا كان حلم عمري اركب عربيه بفتحة سقف وبعد ما جبتها فرحت بيها شويه وبعد كده معبرتهاش ومبفتحهاش كتير
انما لو ضروري يبقى الحل الامثل انك تشوف واحده نضيفه بفتحة سقف فابريكه (ومفيش في مصر اكتر من اللانسر سبورت) وبيع عربيتك وهاتها

[egyptweed1]

يا جماعة ارابكوم بيعمل فتحة السقف دى احلى من الفابريكة واحد صحبى عملها عندو ب 2500 باين بس بصراحة ما شاء الله ملهاش حل

[MohamedGafar]

يا جماعة ارابكوم بيعمل فتحة السقف دى احلى من الفابريكة واحد صحبى عملها عندو ب 2500 باين بس بصراحة ما شاء الله ملهاش حل

2500؟؟؟؟ ده قاللي 3800!!! يمكن قاللي على الكهرباء.

تحياتي.

[H_A_T_Em]

يا جماعة ارابكوم بيعمل فتحة السقف دى احلى من الفابريكة واحد صحبى عملها عندو ب 2500 باين بس بصراحة ما شاء الله ملهاش حل

طيب يا باشا يا ريت لو تقولي هو عاملها في عربيه ايه و ايه نظامها و هل واجه اي مشاكل او باين انها معموله و هي كهرباء ولا ال و فيها امكانيه انك تميلها لفوق كده معلش هتقل عليك