العازل الحرارى

[wghazi]

يا جماعه وانا ببص على مواضيع الاعضاء والمشاركات لقيت ان معظم الناس بتتكلم عن موضوع الفاميه واننا كلنا عايزيين نركبه كل واحد عشان حاجه معينه بس اللى الكل متفق عليه انه عايز سركبه عشان موضوع الحراره

وكمان قررت انى ابص على المواضيع القديمه شويه فى المنتدى واللى لقيتها تقريبا محدش بيبص عليها وفى المواضيع القديمه اللى هنا لقيت موضوع شدنى شخصيا فقلت ليه لا انى احاول اجدده تانى عشان لو حد مهتم يقدر يستفيد منه

انا مش ح اعمل حاجه غير انى بس ح انزل الموضوع زى ما هو بس ح احاول اختصره شويه لان الموضوع كان فى 28 صفحه وتقريبا كل صفحه فيها حاجه جديده وانا عن نفسى تعبت لحد ما قريته كله فقلت انى احاول ابسط الموضوع شويه عشان الناس ما تزهقش من طول وفى نفس الوقت يكون تقريبا فيه كل المعلومات

مره تانيه الموضوع للامانه منقول مش موضوع خاص بى

اول حاجه طبعا لازم استأذن صاحب الموضوع الاصلى فى ده بعد اذن [OVERLINE]الدكتور امير اللى هو صاحب الموضوع[/OVERLINE]
الدكتور امير كان كاتب الموضوع وهو ببساطه عن حل لعزل الحرارة القادمة من الشمس إلي داخل السيارات وكان باسم الحلول المختارة في عزل الحرارة داخل السيارة
وده الينك بتاع الموضوعhttp://www.nilemotors.net/Nile/76066-a.html

خلينا نبتدى
دى اول المعلومات اللى وصلها الدكتور امير عن الفيلم 3m اللى بيتركب ويعزل الحراره

شباب جه الفرج اخيرا و بقي عندي الاسعار

الاستاذ سامر كلمني و وضحلي العرض بتاعه لنايل موتورز الموضوع ببساطه انه بيحسبها بنفس طريقه حساب التركيب لنوافذ المباني, و علشان بيكون في اهدار في خلال التركيب علشان زجاج العربيات بيكون واخد انحنائات و اطوال مختلفه فالموضوع بيفرق انه بيستخدم عرض الرول في مناطق و طوله في اخري علشان يركبه والعربيات في المتوسط بتاخد 5 متر بالاهدار بصو بقي و ركزو شويه
الاسعار:
للنوع 6868 وده مش في الكتالوج اللي عامله سكان بيكلف 1600 جنيه ودرجه حجب الشمس 63%
النوع m70 بيكلف 2000 جنيه و ده صورته و بياناته موجوده في الكتالوج
و ان شاء الله الاستاذ سامر يشارك في الموضوع ده قريب جدا
0127744609- 0173355230
ودي نمره لو حد يحب يكلمه في اي حاجه بخصوص العازل ده وبخصوص الاسعار دي فشامله الخصم لنايل موتورز اللي هو 300 جنيه وممكن يكون في خصم تاني لو العدد زاد بس هيكون 5% فقط يعني اللي عايز يركبه دلوقتي يتوكل علي الله وانا كلمته بخصوص المرور و قلت ان عايزين شهاده فقالي انه كجهه خاصه ملوش انه ياخد حاجه زي كده من المرور بس ممكن يدينا شهاده بمواصفات العازل انه غير حاجب للرؤيه و مضاد لأشعه الشمس و كده اظن ان حاجه زي كده هتكون كويسه برضو
و ربنا يوفق

الاستاذ سامر هو الشخص المسئول فى الشركه
الفيلم ده بيتركب على الزجاج بس من جوه العربيه مش من بره زى الفاميه وبيتركب على زجاج العربيه كله بما فيه الزجاج الامامى كمان
وده رد من عضو كلم الاستاذ سامر وكان بيستفسر منه على شويه حاجات

اتصلت بالمهندس سامر بصراحة الراجل ذوق جدا

قالى ان ال 6868 و ال 70 مش هيعملوا مشاكل مع المرور و مش ملحوظين قوى الاول بيدى شوية بسيطة على دهبى و التانى بيدى على اخضر بس شعرة بسيطة .
النوع الاول 63% و التانى 70% .
السعر شامل التركيب و الضمان لمدة 10 سنوات و الفيلم صناعة امريكية و مختوم علية ، و التركيب بيبقى من جوة الازاز مش من برة .

وده ردمن الاستاذ سامر وبيشرح الموضوع بنفسه

أنا سامر سمير و بأطمن الناس ان أرماشيلد مصر الوكيل الوحيد لشركة 3m و هي الشركة المصنفة الأولى عالميا في هذا المجال و المعروفة عبر العالم و الخليج العربي بأن أسعارنا في متناول الجميع بالنسبة الى الجودة الفائقة التي تقدمها 3m الأمريكية و تضمنها شركة ارماشيلد مصر لمدة عشر سنوات من تاريخ التركيب ضد العيوب أما بالنسبة لدرجة الون فهي شبه شفافة و هو غير ملحوظ تماما بعد التركيب كما أنه لا يعيق الرؤية علما بأن سيارتي الأوبل هي في الأصل زجاجها غامق(ملون) و مع ذلك الفيلم غير ملحوظ تماما خصوصا بانه تم تركيبة منذ أكثر من 11 سنة كما أن هذه النوعية من الأفلام حققت نتائج مذهلة في تخفيض الحرارة كما أنها أيضا تحقق عنصر الأمان في الزجاج خصوصا في حالات الحوادث أو كسر الزجاج لأي سبب من الأسباب (لاقدر الله)بالنسبة الى الفيلم 3m كريستالاين70 فتكلفة السيارة اليموزين المعتادة( لانسر - كورولا- باسات- بورا -اوبل-سيراتو -ماتريكس-الينترا) هو 2000 جنيه مصري للسيارة شاملة التركيب و الضمان لمدة 10 سنوات و اما عن النوع الثاني من 3m 6m6m و هو اقل بدرجة طفيفة من الكريستالاين في تخفيض الحرارة فتكلفة السيارة هي 1600 جنيه مصري شاملة التركيب و الضمان و قد تحددت هذه الاسعار بعد دراسة من المسئولين عن شركة أرماشيلد(نظرا لوجود هالك كبير في عملية تركيب السيارات) وذلك بعد منح هذا المنتدي الرائع خصم 30%

كما ان شركة أرماشيلد مصر وكيلا لأكثر من شركة أمريكية في هذا المجال والتي لديها منتجات أقل في الجودة و السعر من شركة 3m
لأي استفسار يرجي الاتصال بي شخصيا في اي وقت(لأن المعرفة حق للجميع)عل تليفون 0127744609-0173355230
مع خالص الشكر و القدير لهذا المنتدي الرائع و الذى شرفت بأن أكون أحد أعضائه لأستفيد من المزيد من الخبرات في عالم السيارات.

وده اول عضو من الاعضاء يركب الفيلم فى عربيته وبيقول ملاحظات مبدئيه عنه

احب اقول يا جماعة ان العزل الحراري رائع جدا

العربية بتاعتي سودة و سبتها منقوعة في الشمس ركبتها طبعا مش هابالغ و اقول مفيش سخونة خالص بس مش سخونة عربية سودة منقوعة في الشمس و التكييف في دقيقتين كان مظبط المسائل
رائع جدا

وده عضو بيسال عن تاثير الفيلم ده على حراره العربيه فى الشتاء

سؤال تانى معلش

هل بيكون فى تأثير معاكس فى الشتاء بمعنى العربية فى الشتاء بتكون من الداخل ابر د من الخارج ولانشغل التكيف ؟؟؟

وده الرد عليه

عزيزي أستاذ عمر خضر

بالنسبة للشتاء فليس للفيلم تأثير عكسي لان الفيلم بيعمل على تخفيض الحرارة النافذة الى السيارة من الزجاج (sun control window film) و ليس غير ذلك فلا يمكن بل و يستحيل أن يحدث أن في الشتاء تكون درجة حرارة السيارة أكثر انخفاضا من درجة حرارة الجو بسبب الفيلم

وده كلام من تانى عضو ركب الفيلم فى عربيته وبيقول رايه وتجربته

الاخوه الاعضاء اليوم انا رحت ركبت فى الشركه بالطبع بعد تحديد موعد للتركيب

عاما انا قبل ما بشترى اى حاجه لازم اكون فاهم الى حد ما الموضوع وده عن طريق تجميع معلومات و بحث على النت
قبل ما اعرف اسم و عنوان الشركه انا كنت باتفق مع واحد قريبى انه يجيب لى 5 متر من ال Vcool من السعوديه
و بدون تركيب كان احسن سعر وصلت له 1200 ريال بدون تركيب
كان السبب فى البحث عن نوع زى ال vcool اول شىء الحفاظ على الفرش الجلد الطبيعى اللى فى عربيتى تانى حاجه انا بسافر بالعربيه كتير طبعا موضوع الحراره الواحد بيتغلب عليه بالتكيف وفتح الزجاج شويه فى الاول لكن لما بتتعرض للشمس كتير بيحدث حرقان فى العين و صداع ود ناتج عن التعرض لاشعه تحت الحمرء لفترات طويله و ايضا تغير لون البشره و خاصه فى الوجه والايد الشمال زى اى سواق تاكسى
لما عرفت ان 3M بتعمل افلام عازله للحراره قرأت كتير و قارنت بينه و بين ال VCool وخاصه النوع ال crystalline 70
ومن المقارنات الفيلم ده افضل بمراحل من ال VCOOL
نرجع لموضوع التركيب لديهم مهندس تركيبات فوق الممتاز اسمه م/بيتر و التركيب ابتدء الساعه 2 و خلصنا الساعه 6 يعنى 4 ساعات كامله للسياره الواحده الفيلم بيبان انه غامق شويه قبل التركيب و بعد التركيب كأن الزجاج واخد تنت خفيف زى الزجاج المخضر خفيف من الفبريقه طبعا انا عندى فتحه سقف زجاج اسود فبريقه وطلبت انه يتلزق وتم تلبيه طلبى
ولازم نعرف ياجماعه حاجه طالما اننا عندنا كل حاجه زى بعضها (you get what you pay for) يعنى اللى هتدفعه هو اللى هاتخده دفعت رخيص هاتاخد حاجه رخيصه و المثل اللى بصدقه جدا الرخيص غالى و الغالى رخيص
ودى صور انا صورتها اثناء التركيب
1 قبل التركيب وباب الجراج كان مفتوح على الاخر وهتلاحظوا ان علامه موبيل وان موجوده



2 بعد التركيب و علامه موبيل مش موجوده و للعلم باب الجراج مقفول نص علشان الهواء ما يدخلش تراب وقت التركيب


3 بعد التركيب وقفنا بره للاختبار وده القراءه بره العربيه

4 القراءه داخل العربيه بنفس الزاويه للشمس من خلف الزجاج الخلفى



طبعا الساعه 6.30 ماتقدرش تحكم على الحراره لكن اقدر اقول لكم فى فرق كبير و الرؤيه ممتازه من الزجاج الامامى و الخلفى و الساعه 10.30 باليل انا سوقت العربيه و لاتوجد مشكله بالرؤيه
طبعا الايام اللى جايه ها اقول لكم على رأى بكره انا مسافر مشوار طويل شويه 350 كم رايح جاى من الساعه 7 و لغايه 5 مساء
و يوم الخميس مسافر شرم الشيخ اسبوع وطبعا كل دى هتبقى اختبارات قاسيه
نقطه الضعف الوحيده لدى ارم شيلد و انا قلت لهم عليها هما عندهم حوالى 14 واحد للتركيبات لزجاج المبانى لكن المتخصص فى السيارات واحد بس و اظن ده مش كفايه مع الاخد فى الاعتبار الوقت اللى بيتاخد لعربيه واحده فلو 20 واحد حبوا يركبوا ياخدو بالتفرغ 2 عربيه فى اليوم يبقى 10 ايام و أ/سامر قالى انهم بالفعل بيدربوا ناس جديده للتركيب

ودى تجربه من عضو تالت

[overline][/overline]

[overline]
يا دكتور انت صاحب فضل علينا انت اللى سألت ومشيت الموضوع
نرجع لموضوع التقييم
اولا الرؤيه واضحه جدا حتى اوضح من الامس بعد الزجاج ما اتغسل و اتمسح من جوه و كان فى ابخره خفيفه بين الفيلم والزجاج وزى ما أ/ سامر قالى انه يوم ولا اتنين فى الشمس و هيروح نهائى و بالفعل قل كتير لان الفيلم مسامى اى يسمح بانتقال بخار الماء و لا يحجزه اليوم انا رحت الى طنطا و عديت على لجان كتير و رادار و محدش علق او اتكلم مع انى مركب فى العربيه ستائر متحركه على الابواب الاربعه لكن قافل استائر الخلفيه فقط و الى بتكون كأنك مفيم الباب فده حظ لكن قبل ما اركب الفيلم حتى ماحدش كان بيسالنى
ناتيا الحراره اثناء السير مع التكيف و هى اكثر من رائعه و التكيف مريح و كنت ضابط التكيف على 22 درجه حتى 12 ظهرا و المروحه متوسطه السرعه و قبل كده كنت باضبط التكيف على17 درجه و المروحه على الاخر وكده يبقى فيه فرق فى تشغيل التكيف اثناء القياده كان بيبقى فى لسعه من الشمس على كف اليد وانت سايق و كنت ببدل بين اليدين و اليوم لم احس بها
ثالثا ركن العربيه فى الشمس انا سبت العربيه فى عز الظهر 12الى 2 ظهرا فى الشمس و شفت العربيه اول لما تفتح الباب فى حراره موجوده و لكن اقل بنسبه 40 % تقريبا عن قبل كده و ده جابلى احباط لانى افتكرت انى هلاقى العربيه ثلاجه لكن الفرق الحقيقى ان الكراسى الجلد الدركسيون و التابلوه الحراره فيه اقل بكتير عن الاول بنسبه تصل ل 70 % يعنى بتقدر تمسك الدركسيون و تقعد على الكرسى مستريح من غير ما تتلسع من الحراره وده اللى بيخلى التكيف يعمل تاثير اول لما تشغله قبل كده كنت بافتح الشباك شويه و اشغل التكييف و بعدين اركب العربيه و برضه الواحد كان بيتشوى يبقى نستنتج ان الهواء المحبوس فى العربيه بيبقى اسخن من درجه الحراره بره بحوالى 5 درجات لكن الفرش مش بيمص حراره زى ما الواحد كان بيحس قبل كده يجى 25 درجه يعنى لو الجو 35 كان الدركسيون و الكراسى ماتعرفش تمسكهم يعنى حوالى 70 درجه فى مكان اخر سبت العربيه 1 ساعه فى الشمس مع ترك فتحه السقف مفتوحه بميل و كانت الحراره داخل العربيه زى الفل ماكنش فى حراره زياد يمكن درجه او اتنين
ده تقيمى للفيلم الحرارى و لكم الشكر انكم استحملتم الاطاله فى التقييم
[/overline]

وده رد على احد الاعضاء كان بيسأل عن امكانيه تركيب الفيلم على الزجاج الاامامى بس

السادة الأعزاء

سعر ال620 للزجاج الأمامي خاص ب 3m كرستالاين 70 الي تكلفة السيارة بالكامل منه 2000 جنيه أما عن تكلفة 3m6868 للزجاج الأمامي فقط فهو 496 و ما زلت لا أنصح بتركيب الزجاج الأمامي فقط و ذلك لأنه لن يحدث تأثير ملحوظ(فلوس في الأرض)

دى تقريبا كا المعلومات المهم اللى فى الموضوع ويارب يكون الموضوع ده مفيد ليكم

مره تانيه الموضوع للامانه منقول من موضوع كتبه الدكتور امير

حاجه اخيره كانت اخر مشاركات فى الموضوع ده فى شهر 7 - 2009 يعنى المفروض ان الخصم للاعضاء لسه شغال عشان اللى قريته انه سنه

كمان اعتقد ان الاسعار دى ممكن تكون نزلت شويه بحكم مرور سنه على الموضوع والله اعلم

[kimoboy]

Check this site
Their prices are cheaper than others

Solar Trap

[khaled65]

كيف حال هذا الفيلم مع جهاز gps و هل يمنع الأرسال أم لا حيث أنا أعرف أن بعض الأفلام التي يدخل في صناعتها الحديد تمنع نفاذ أرسال ال gps يرجى الأفادة

[mohamedfg]

[overline]
أول تعليق لى فى هذا المنتدى الجميل دفعنى له ما قرأته من تحمس معظم الأعضاء هنا لتركيب هذا الفيلم لزجاج السياره لا أريد و الله أن أخيب آمالهم فى هذا العازل الحرارى المفيد و قصدى فقط أن أعرض تجربتى بإختصار .
أنا ركبت هذا العازل فى سيارتى منذ ثلاث سنوات و كان نوع v-cool و إخترته على درجة 70 و هو غامق قليلا لكنه لم يجعل السياره سوداء و لا أثر على الإطلاق فى جعلها واضحه لأى شخص يراها من الخارج حيث أنه سيرى السياره من الداخل بكل وضوح و دفعت مبلغ محترم زاد قليلا عن 2000 جنيه و الحقيقه لا أنكر تأثيره المفيد فهو فعلا يقلل كثيرا من لسعة الشمس .. عندما تركب سيارتك و هى مركونه فتره طويله فى الشمس ستشعر قطعا بالسياره فى أجواء حاره لكنها ليست بنفس الإحساس الخانق الذى تشعر به و السياره بدون هذا العازل .. طارة الدركسيون دافئه و ليست ساخنه لا يمكنك مسكها .. التكييف سريع التأثير لا يستغرق وقتا فى ظل هذه الحمايه .. أنا هنا لا أعدد المميزات لكنى أريد أن أصل إلى المضمون و هو أن على الشركات التى تبيع هذا العازل أن تسعى للحصول على ترخيص من المرور بجواز تركيبه و السماح به فهو ليس للمنظره و الفشخره فى ضوء الآثار الضاره لأشعة الشمس و التى نعرفها جميعا خاصة أن ثمنه غالى و ليس رخيص و هو ليس قطعة فيميه سعرها خمسين أو ستين جنيه .
أنا لم أصادف لجنة مرور على مدى سنتين يلفت نظرها هذا العازل لكن عند ترخيص السياره و أنا فى الإسكندريه و جدت مهندس المرور الهمام يحوم حول السياره و يطلب فتح الباب و يمرر سن القلم الجاف على الزجاج الجانبى و يصدر الفرمان الأعظم بأن هناك فيميه على الزجاج .. لن أطيل عليكم فى المناقشه العنيفه التى حدثت و وقوف ضابط المرور فى الوحده إلى جانب المهندس فى أن هذا الشئ ملصقات يجب إزالتها طبقا للقانون و لا يهمهم و لا يبالون بالهدف من تركيبها و لا نوعيتها فالمهم هو إزالتها و إلا فلا تجديد للرخصه .
و لكم أن تتخيلوا كم خيبة الأمل و أنا أنزع العازل .. الثمن الذى دفعته .. جهنم الحمراء داخل السياره تعود مره أخرى و الأشعه الحمرا و البنفسجيه و البمبه كمان تقتحم السياره من كل النواحى بتعليمات و مباركة مسئولى المرور فوجودك داخل سياره تعزل بعض الحراره الداخله إليها من الخطايا العظمى و يجب عليك أن تقاسى و تعانى و تختنق حتى تكون فى السليم .
هناك سيارات زجاجها إسود تماما لا ترى ما بداخلها و تدخل البلد و تسير و مثبت فى رخصتها ذلك يعنى القانون يصرح لها و حيث أن هناك إستثناءات و موضوعات قابله للمناقشه فيجب على المستوردين لهذا العازل الحصول على ترخيص من المرور بتركيبه فنحن ندفع الكثير فيه و أنا لا أقتنع بأن العازل الشفاف لن يراه أحد ..لماذا أسير بسيارتى و أنا مهدد و لماذا أضع نفسى فى موقف سخيف و أنا أرى مهندس المرور يقترب من زجاج السياره الجانبى و فى يده قلم جاف سيكون فى نظرك كالمدفع الذى سينسف نقودك و راحتك .
و يا أيها الساده أصحاب توكيلات هذا العازل تحركوا من فضلكم للحصول على تصريح بإستخدامه على السيارات فأنتم تطلبون ثمنا كبيرا فيه و نحن ندفعه عن طيب خاطر .. لا تتركوا أشاوس المرور يفترسوننا .
[/overline]

[FunnyMickey]

Check this site
Their prices are cheaper than others

Solar Trap

2000 l.e
بيمنع الحراره 90 %

3000 l.e
بيمنع الحراره 99 %

مش ارخص ولا حاجه
مش عارف والله الواحد يروح فين
يعني ادفع 2000 جنيه وساعه الترخيص تلاقي واحد تنح يشيله ساعتها الواحد يعمل ايه
يموته

[3ateef]

2000 l.e
يعني ادفع 2000 جنيه وساعه الترخيص تلاقي واحد تنح يشيله ساعتها الواحد يعمل ايه
يموته