كمبروسر صغير للعربية !!

[خالد]

عاوز أشترى كمبروسر صغير للعربية من اللى بيشتغل على الولاعة وعلى البطارية
وياسلام بقى لو بيشتغل كهربا كمان !
ياريت ياجماعة اللى عنده يقولنا أشتراه بكام ومنين
أو أى حد يعرف بيتباع فين يقولنا على المكان
وله الأجر والثواب عند الله

[msafa]

هتلاقيه في كارفور و في شارع دمشق عند محل اسمه المدينة امام بنزية التعاون.

سعره ما بين 45 ب 85 و تقريبا كله زي بعض بس هتلاقي كشلف و حاجات كده.

عشان يكون سريع لازم ترفع العربية بالكوريك والا هيكون بطيء حبتين.

[ابوهاشم]

انا سمعت انه فى التوفيقيه وصل 35جنيه
وفعلا لازم ترفع بالكوريك وانت بتستعمله
علشان يكون العمل به سهل

[msafa]

انا سمعت انه فى التوفيقيه وصل 35جنيه
وفعلا لازم ترفع بالكوريك وانت بتستعمله
علشان يكون العمل به سهل

فاتني موضوع التوفيقية ده
واضح اني بقيت من شباب كارفور

[خالد]

ربنا يباركلكم ياشباب
بس ياريت لو حد جربه يقولنا أخباره أيه ؟
لأنى سمعت أنه مش عملى وبطئ جداً تقريباً 10 ق لنفخ العجلة الواحدة!
فكنت بسأل على واحد أقوى من اللى فى التوفيقية وعملى أكتر وأسرع
حتى لو أغلى حبتين مفيش مشكلة بس منين؟
أنا شفت اللى فى التوفيقية قبل كده وحسيت أنه مش عملى بالأضافة لرأى بعض الأصدقاء
ياريت لو حد يعرف واحد أحسن وجربه يقولنا عليه

[eino666]

متابع باهتمام بالغ
................*
محمود عينو

[a_tharwat]

مش حتلاقي حاجة عملية اقوى من كده, لانه اخره 180 ولا 200 وات اللي يقدر يسحبهم من الولاعة.

[Elsayed]

الموجود ده بستم واحد
انا اعرف واحد قال لى ان فيه 2 بستم هاشوف كده وارد عليكم

[Hany A Fattah]

انا اشتريت واحد بعد لف وعناء وبينفخ العجله فى دقيقه ونص من غير كوريك ولاحاجه وكمان العجله الاماميه بس كان ب200 جنيه من عند ابو الجوخ وهو شبه الكمبروسر العادى بس على صغير

[elshinawy80]

يا جماعه انا اشتريت واحد تويوتا يابانى من توكيل تويوتا سعره 320 جنيه قوى جدا و ينفخ الكاوتش فى ثوانى و نفخت مرة الكاوتش بيه و كان على الجنط من غير لا رفع بكوريك و لا اى معانه فى ثوانى بجد هو غالى شوية بس قوى جدا و احسن من الحاجات الصينى المجهولة مليون مرة

[ابوهاشم]

320جنيه كتير بالنسبه للمطلوب منه
هو المفروض ان استخدامه مؤقت فى الازامات بس
لحين الوصول لبتاع كاوتش بدل مانغير الاستبن

[Elsayed]

انا شايف انه من تويوتا بس هاتلاقيه صينى برده لانها هيه اللى بتنتج الحاجات دى بس هايكون جوده عاليه وانا شايف انه سعره معقول لانك ممكن تستخدمه فى حاجات كتير زى الرحلات والمصيف الى اخره
بس ممكن تقول لنا العنوان ايه بالضبط لتويوتا

[خالد]

انا اشتريت واحد بعد لف وعناء وبينفخ العجله فى دقيقه ونص من غير كوريك ولاحاجه وكمان العجله الاماميه بس كان ب200 جنيه من عند ابو الجوخ وهو شبه الكمبروسر العادى بس على صغير

أيوة هوة ده اللى بدور عليه !
ياريت صورة ليه وياترى صينى ولا بلده أيه ؟


والأخ / الشناوى برضه وياريت صورة والعنوان أيه بالظبط ؟
وعلى فكرة ياجماعة الكمبريسور ده مهم جداً ومش غالى ولا حاجة
وزى ما الأخوة قاللوا هاينفع فى حاجات كتييييييرة قوى زى الرحلات والكور وعجل العيال
بالأضافة أنى مش بحب أتعامل مع أى صنايعى ألا فى أضيق الحدود بتخنق وبكرهم جداً
جنب منى 3-4 بتوع كاوتش ولاد تييييييييييييييت
بيرموا مسامير قدام المحل ، وبيخبى مسامير فى أيده يخرملك بيه العجلة وأنت بتزود هواء ، ده غير المسامير اللى راميها فى البانيو من تحت ومش باينة من عكارة المياه ، تروحله بخرم واحد تتفاجئ بيقولك دى فيها خمسة يابيه !!
علشان كده مش عاوز أقرب ناحيتهم فى أى حاجة ألا الشديد القوى
وعلى فكرة لو فيه كمبريسور صغير بيشتغل بالكهرباء بالأضافة للبطارية يبقى تمام قوى ، أنا عندى جراج خاص ممكن أوصل الكهرباء منه

[م/مصطفى محمود]

ياريت فعلا الصور يا شباب ، وهل ممكن يشتغل ك blower يعنى أنفخ بية تراب مثلا ولا لأ (وياسلام لو حد يجيبلنا المواصفات نفسها اللى بتبقى على الكمبريسور نفسة)

[elshinawy80]

الجهاز من أقرب توكيل تويوتا ليك
انا وصيت عليه فى مركز خدمة معتمد جنبى فى المنصورة و هما جبهولى
الجهاز يابانى
و ان شاء الله هرفعلكوا صوره