طلب استفسار عاااااااااااااااااااااجل من خبراء الجنوط

[mr_vampire]

انا حابب استفسر عن حاجة من خبراء الجنوط ياشباب . ادامي جنط 15 oz استيراد وهو عليه من ورا علامة متيسوبيشي ومنحوتة عليه ( وده مستودر من امريكا من واحد بتاع قطع غيار استيراد فحابب اعرف تمامه كام في السعر وهل ليه اضرار لو ركبته علي مكوة ( لان جنطها 14 ) لاني سمعت انه غلط علي العفشة فحبيت استفسر من الشباب هنا وارجو الافادة بسرررررررررررررررررررعة لو سمحتو

[magyver]

بالنسبة للعفشة فماافيش مشااكل
طيب حالة الجنط عاملة اية يعني هايحتاج يترش ولا هو تمااام
وهو قاالك السعر كااام

[haimaN]

خلى بالك من المسامير
علشان من اول ال 15 بيبقول 5 مسامير مش اربعة

[mr_vampire]

شكرا ياشباب علي المتابعة والاهتمام بالرد . اولا من ناحية الحالة فهو حالته تعتبر كويسة جدا بالنسبة لجنط مستعمل يعني خرابيشه عادية من اثر الرصيف وكدة لان لونه سلفر مطفي فمش بيبان في اي حاجة بسهولة وبالنسبة للسعر هو بيقول اااااااااااااااااخره 1200 بس لو نويت اخلص انا ليا اخر تاني وهو اننا ننزل 50 جنيه في كل فردة ويقف علي 1000 وبالنسبة للمسامير هي ملاحظة حلوة بس اكيد ده اول حاجة هبوص عليها ياصاحبي فانا اصلا كنت بفكر اشيل بتاعي واجربه اشوفه عامل ازاي ومقاسه بالنسبة للرفارف عامل ازي وهيبقي بارز برا كتير ولا ايه بس معلش ياشباب تاني سمعت انه بياثر علي الاسكترا والبارات فده حقيقي ولا ايه النظام وهيبقي الثبات كويس ولا مش هيفرق كتير وشكرا كمان مرة ليكو يارجالة

[bayooo]

طيب هو حضرك الراجل اللي هاتشتري منه دا تاجر

أصل كنت عاوز جنوط 15 ويكون عليها علامة الفولكس

ولو هو تاجر ممكن ضرتك تدينا العنوان او التيفون بتاعة وشكراً



كنت عاوز انبه حضرتك لحاجة انت عربيتك سبووور اصلا يعني المفروض جنتها يبقى 16 او 17 كمان وعلى فكرة كمان 15 مش الجنط الكبير اوي يعني دا دا المفروض انه مقاس عادي فا متقلقش وربنا يباركلك

[mr_vampire]

شكرا ياصاحبي علي الرد والاهتمام. اولا بالنسبة للراجل هو مش تاجر جنوط هو تاجر قطع غيار استيراد وخصوووووووووووصا او متخصص في اللانسر بس والجنط اللي عنده ده كان راكب في عربية ميتسوبيشي جياله متقطعة من امريكا وعليه علامة الميتسوبيشي من ورا. ثانيا ازاي عربيتي اسبور اصلا انا عربيتي لانسر مكوة عادية جدا وجنطها 14 حتي انا مغيره بجنط اسبور برده 14 بس صيني فعشان كدة حابب اغيره بماركة نضيفة عشان حاسس انه خفيف علي السرعات فمقلق من جنط 15 لاني سمعت ان الجنط لو كبر عن المقاس اللي نازلة بيه العربية هياثر عليا وعلي عفشتها وثباتها ( والا لو كان ينفع ليه ميتسوبيشي نفسها منزلتهاش بجنط كبير عشان تعلي مواصفات عربيتها في الثبات ). ارجو التوضيح واخيرا شكرا لاهتمامك

[engahmedsamy]

سعرة كويس 1000

[mr_vampire]

شكرا يابشمهندس احمد علي الرد انا برده بقول انه تمام اوي عليه 1000 بس حصلت تغييرات في الخطة باخد راي واحد صاحبي في الحوار قلقني جامد اعد يقولي انتا متضمنش ظروفه ازاي ممكن تكون فيه فرده مش مظبوطة وبعد مايتركب في العربية متعرفش هيبقي عامل ازاي واكيد اكيد ليه تاثير مادام 15 فقالي جيت جديد ( تايواني ) هيزيد 200 او 300 جنيه بس وعلي الاقل هيبقي جديد ومن كرتونته و كمان هيبقي 14 يعني نفس بتاع العربية والميزة الاخيرة انك مش هتحتاج تغير العجل هتشيل من الجنط القديم تركب علي الجديد فايه رايكو ياشباب في التغير اللي حصل ده وشكرا للجميع علي مشاركتي الحوار

[hanhon]

ممتاز ربنا يباركلك فيه

[mr_vampire]

طيب معلش بالنسبة لرد الاخ hanhon هو ايه اللي ممتاز عشان افهم بس الجنط ال oz 15 ولا لو جبت واحد جديد ويكون تايواني ولو سمحو ياشباب لو حد يعرف او مركب جنط تايواني كويس ومحمل وتقيل ولا زي الصيني وهرجع اقول ياريتك يابوزيد ماغزيت ويطلع الصيني زي التايواني واحد زي عيونهم الضيقة اللي متعرفش تفرقهم من بعض

[ramyworm]

انا على حسب معلوماتي انا الجنط كل ما يبقى خفيف يبقى احسن للعربية ومش عارف انت ليه بتدور على الاتقل
دا انا مستني الاقي حاجة اوريجينال زي o.z او momo عشان بيبقى وزنهم اخف من الصيني والتايواني كتير لان الوزن التقيل هو اللي بيبهدل العفشة مش مقاس الجنط .
ده اللي انا اعرفه بصراحة ولو حد عنده معلومات تانية ياريت يفيدنا .

[mr_vampire]

اولا شكرا يارامي علي ردك. ثانيا علي مااعتقد ان كل مايبقي الجنط ( محمل ) مش قصدي تقيل اللي هو التقل الجامد يعني محمل يعني مرسي العربية وبالذات علي السرعات العالية لانها بيرسيها علي الارض مثال مثلا الاسبويلر الرياضي ( الرياضي الرياضي يعني مش المنظر ) بيكون محمل وده عشان يعمل ضغط علي العربية مع السرعات (علي حد علمي ) فالاولي بقي ان عجل العربية ( الاربع رجول بتاعتها ) يكونو راسيين علي الارض وماسكنها في الارض وهي بتجري. واخر حاجة علي فكرة كل ماخف وزن الجنك هتلاقي رعشة في الدريكسيون ( غير الترصيص لانها معايا والترصيص تمام وده لاني مجنط جنوط صيني فوزنها خفيف ( والله اعلي واعلم ). ولو في حد من الشباب عندكو راي نحب نسمعو برده ممكن نكون غلطانين في فهم شيء معين

[ramyworm]

انا مش عارف بس انا كان ليا واحد قريبي كان عنده جنوط صيني في عربيته كانت مبهدله العفشة والدركسيون كان تقيل جدا بسبب وزنها كانت لازقة في الارض والدركسيون مش بيرضى يلف من كتر التقل وراح غيرهم بجنوط O.Z اصلي محفور عليهم made in italy وهما وزنهم اخف بكتير من الصيني وظبطوا العربية جامد والدركسيون بقى خفيف و كان عنده رعشة في الدركسيون راحت وكله بقى تمام ودي التجربة اللي شوفتها قدامي غير كدة الصراحة انا ماعنديش خبرة كبيرة في الموضوع ده

[ramyworm]

وعلى فكرة مش الجنوط هيا اللي تعتبر رجول العربية وبترسيها
اللي بيعتبر فعلا رجول العربية اليايات وجواها طبعا المساعدين ودي اهم حاجة حاجة في ثبات العربية ويجي الباقي بعدها في الاهمية .

[mr_vampire]

شكرا ياصاحبي علي التجربة وردك انا والله شكلي كدة هعمل حوار الجديد التايواني ده لاني قلقت من المستعمل بجد. فلو حد من الشباب يقدر يفيدنا ياريت يشرفنا