محتاج رأيكوا بخصوص شراء جنوط مستعملة

[Moe86]

نصيحة الموضوع بعد ما كتبته لاقيت فيه تفاصيل ماتهمش كل الناس, أول ما تزهق خش على الجزء الأخير على طول!

عندى فيات بونتو , أول ما اشترتها من 3 سنين ركبتلها جنوط صينى (كنت فاكرها اندونيسى) مقاس 15
بس ما أخدتش بالى من حاجة مهمة اسمها الأوفست و ان الرقم المثالى لعربيتى 33

الأوفست offset دة رقم محفور على الجنط من جوة (رمزه ET) و وحدته المللى , لو الرقم أزيد من جنط العربية الأصلى بكتير الجنط هيبقى داخل لجوة بزيادة و ممكن يخبط فى أجزاء العربية الداخلية
انما لو الرقم أقل بكتير من الجنط الأصلى, الجنط هيبقى طالع لبرة و ممكن يحك فى الرفرف مع المطبات أو لما تبقى العربية متحملة أوزان تقيلة

فى حالتى الجنوط الصينى الأوفست بتاعها كان 25, و كانت بتحك فى "شفة" طالعة من الرفرف الخلفى مع مطبات الهواء, واحد سمكرى تنى الشفة دى و بعديها بقى نادرا لما الجنط يحك تانى

خبطت العربية فى الرصيف و واحد من الجنوط اتفرتك و احتجت أجيب طقم جديد كامل

حاليا مركب جنوط 16 تايلندى كنت شاريهم من عند أشرفكوا من أقل من سنة و عليهم كاوتش low profile مقاسه 195/45 علشان كبرت الجنط بوصة, و بعد كدة ركبت يايات كونى علشان أهبط العربية حوالى 4 سنتى (هعمل موضوع مفصل عليهم قريب ان شاء الله)
بعد ما جبت الجنوط قابلتى مشكلتين:
الأولى ان الأوفست offset بتاعهم مش مناسب لعربيتى و ما اتعلمتش من المرة اللى فاتت , بس المرة دى حصل العكس, لما ألف العربية بسرعة و تميل قوى على جنبها , الجنط بيحك من جوة فى مسمار أملس كدة طالع من المساعد الخلفى


فأنا عملت اية , فصلت فلانشات عمولة عند خراط من الألومنيوم سمكها 10 مللى علشان تبعد الجنط لبرة (شوف الصور) و عملت فى الفلانشات دى جزء بارز يدخل جوة الجنط زى ما باين فى الصورة دى علشان وزن العربية مايبقاش متحمل على المسامير بس و كلفونى 200 جنيه بالمصنعية



تانى مشكلة قابلتنى ان الكاوتش ال low profile مش بيمتص الصدمات تماما لأن الهواء جوة العجلة بقى أقل بكتير, فى مرة لبست حفرة جامدة و طلعلى بالونة من عجلة و غيرتها , بعد كدة الخبطات الجامدة المتكررة دى أثرت على الجنوط و بقى فيها "رفة" أو "عوجة" بتبان على السرعات , و اللى بيزود الشعور بالرجرجة دى الفلانشات كمان لأن ال 4 فلانشات مش زى بعض بالمللى لأنهم مش طالعين من مصنع
فى أجهزة فى الحرفيين بتستعدل الجنط و ترجعه لأصله بالمللى بس مش عايز أعمل الحوار دة كل كام شهر
أنا مش بعيب فى الجنوط نفسها لأنها أمتن 10 مرات من الصينى (الجنوط صينى قبل كدة 2 منهم اتشرخوا عادى جدا و لحمتهم !)


بقالى شهور بدور على جنوط يكون الأوفست بتاعها مظبوط على عربيتى و كمان متينة بزيادة علشان تستحمل الكاوتش low profile فى شوارع بلدنا
حاليا فى طقمين جنوط مستعملين قدامى ممكن يركبوا عندى حاليا أبعادهم و الأوفست بتاعهم مناسب

كل واحد فيهم فيه مميزات و عيوب:

الأول بتاع بيجو 307 أعتقد الموديل sw استيراد و دة شكله:




مميزاته انه متين طبعا (لاقيت محفور عليه made in italy !!) و شكله لذيذ برضو مش وحش تماما
و تانى ميزه ان حالته كويسة جدا بالنسبة لجنط مستعمل, قول مثلا 95% يعنى فيه خرابيش بسيطة
بس هحتاج أغير ال center cap "الصرة" بتاعته علشان بيجو (بهزر يا وحوش البيجو)


و التانى O.Z ultraleggera
برضو ايطالى و محترم جدا بس مشكلته ان اللى قدامى لونه رمادى (زى أول صورة تحت) و غالبا مش هايليق على عربيتى الزرقا (بينزل منه مقاسات و ألوان فضى و رمادى و أسود و أبيض) فلو خدته بفكر أدهنه أبيض (ايه رأيكوا فى الفكرة دى؟)
كمان حالته أقل من جنط البيجو (85% مثلا)
و فى اعتقادى انه أقل متانة من بتاع البيجو لأنى شوفت طقم تانى و كان بنفس الحالة
و الأوفست بتاعه 25 يعنى زى الجنوط الصينى اللى كنت مركبها و كانوا نادرا بيحكوا فى الرفرف الخلفى
الميزه الجامدة بقى ان وزنه أخف من جنوط البيجو بكتيييير لأنه معمول للتعديل الرياضى, و دة معناه عبىء أقل على عفشة العربية و أداء أفضل للعربية كسرعة و رشاقة فى الغرز






دى بقى صور أنا عاملها ببرنامج paint المعوق بتاع الويندوز علشان يبقى فى تخيل لشكل الجنوط قبل و بعد التركيب, طبعا أول صورة هى الجنوط اللى راكبه حاليا

[AkramArafa]

بسم الله الرحمن الرحيم
انا رأيي الشخصي جنوط ال او زي
نوع محترم وشكل احسن ووزن اخف و اداء رياضي
وعلي فكره جت في بالي ان حضرتك تلونها ابيض برضوا اول ما قريت ان لونهم مش عاجبك
و علي فكره ان اللون الرمادي شكله حلو برضه مع الازرق
و ربنا يوفقك

[Moe86]

شكرا لرد, أنا محتار علشان دة هايبقى تالت جنط أشتريه و بتأكد انه اختيار سليم

[Moe86]

فى أخبار وحشة بالنسبالى, الجنط طلع مش 4x100
أنا افترضت كدة فى الأول علشان مش مكتوب عليه خالص, و علشان شوفته راكب على عربيات فيات برة مصر
تقريبا الجنط طلع 4x108 و الفرق بسيط قوى بالعين المجردة
بعد ما جهزت الفلوس و رحت أركبه بانت المشكلة
ان شاء الله ألاقى جنط أحسن منه قريب

[eldell]

بجد انا شايف ان الoz او momoهما دول احسن اشكال وخصوصا الoz بس المشكله ان الناس بتطلب كتير وياريت حضرتك تقولى على المكان الى فى الحرفيين عشان عايز اشوف جنوط 16 ومفق باذن الله

[tawfeek]

ياريت تقولى ازاى وطيت العربية عشان عايز أعمل كدة فى ابيزا 94

[Moe86]

بجد انا شايف ان الoz او momoهما دول احسن اشكال وخصوصا الoz بس المشكله ان الناس بتطلب كتير وياريت حضرتك تقولى على المكان الى فى الحرفيين عشان عايز اشوف جنوط 16 ومفق باذن الله

معرفش فين فى الحرفيين و الله, أنا كنت هشتريه من تاجر كبير فى طنطا بتاع عربيات استيراد, شغال فى كل الماركات و ليه أكتر من شونة أو مخزن

ياريت تقولى ازاى وطيت العربية عشان عايز أعمل كدة فى ابيزا 94

أنا وطيتها بإنى غيرت اليايات (السوست) بنوع سبور ماركة كونى, مشكلة الموضوع دة انه مكلف علشان تمنها 1200 جنيه جديدة (فى أنواع تانية أرخص أو أغلى)و كمان بعد فترة مساعدين العربية بيبوظوا لأنهم مش مصممين للإرتفاع و الاستخدام دة , لازم تشترى مساعدين سبور كمان ان أجلا أو عاجلا تمنهم من 1400 ل 2400 جنيه حسب النوع
فى ناس بتقص جزء من اليايات, فبتحصل مشكلة اضافية ان اليايات نفسها بتبوظ على طول

[bisoolover]

ايه كمية الخرااااااااااااااااب ده
ملحووظة الواد اللى متصوور جمب الجنط ده باين عليه اتخنق منك من كتر الصووووووووور اديلو جنيه وابقى ادييهوولك ههههههههههههه

[eldell]

طيب حضرتك متعرفش الجنط الozالى فى العربيه السماوى الى وراها يخت مقاس 16 يعمل كام ومعلشى هتعبك معايا اصلى سمعت ففيه اسعار مستهبله 4200

[Moe86]

ايه كمية الخرااااااااااااااااب ده
ملحووظة الواد اللى متصوور جمب الجنط ده باين عليه اتخنق منك من كتر الصووووووووور اديلو جنيه وابقى ادييهوولك ههههههههههههه

حواراتى مع العربية كتير قوى !
بالنسبة للواد بيتهيألى ملحش يتخنق لأنها كانت صورة واحدة بس, و هو اللى فك الجنط و ركبه تانى فى العربية و اديته فلوس طبعا, و معايا الحمد لله تشكر يا باشا

طيب حضرتك متعرفش الجنط الozالى فى العربيه السماوى الى وراها يخت مقاس 16 يعمل كام ومعلشى هتعبك معايا اصلى سمعت ففيه اسعار مستهبله 4200

الجنط الأسود اللى فى البونتو دة 17 مش 16, و هو سعره جديد فعلا 4200 و أحيانا أكتر بكتير فى موديلات تانية سواء ايطالى أو يابانى و سعرها قريب من كدة برضو برة مصر
الحل بقى فى الجنوط النظيفة دى تتجاب استعمال من الخارج , الجنط ال OZ ال 16 مثلا كنت هشتريه ب1400 بعد الفصال

[mrmedo]

ممكن سؤال على الفلانشات دى عملتها فين انا من القا هرة وديخ على حد عدل كل غالى الى يقولى 400 جنية والى يقول 200 جنية وانا عايز فلانشتين بس اصلا حديد مش المونيوم ياريت لو تعرف حد انا نا زل طنطا النهاردة لو تعرف حد ابقى قولى لو تكرمت او رن عليا معلش هتعبك بس الموضوع الى انا فية رخم حاطط جنطين ورا راكبين والى قادام مش عايزين يركبة عشان بيحكو فى المساعد فعيزين فلنشتين حديد وشكرا جزيلا واسف على الاطالة محمد ابراهيم 0104948481