سبراى جليتر

[م/محمد صلاح]

يا جماعه انا بدور على سبراى جليتر فضى من بتاع الهدايا والافراح بس حاجه تكون بتترش على العربيه ويكون بتتشال بسهوله بالغسيل او التينر
مش عارف فهمتونى ولا لأ بس اللى فهمنى ويعرف اجيبه منين ياريت يفيدنى
وجزاكم الله خير

[_Ahmed_casper_]

متهيألى لو حضرتك روحت لواحد من اللى بيزوقو عربيات الافراح هيقولك لأنهم عفاريت فى الحاجات دى او ممكن بتوع الهدايا لأنى و انا بلف هديه مره كان بيلفلى هديه و رش اسبراى و بعدها كان معاه جليتر بودره و بيرشه زى الملح
تقريبا الاسبراى هو اللى بيثبت بس مش عارف هينفع للعربيه ولا لأ

[Salamonti]

حبيب قلبي..

أنا عملت الموضوع ده مرة في زفة واحد صاحبي..

ابعد عن اي سبراي على العربية وهاقوللك على طريقة سهلة خالص فوق مما تتخيل..

انزل عن اي حد بتاع هدايا وهات علب جليتور عادي من اللي بيترش لوحده ده
ومن الصيدلية هاتجيب فازلين طبي

امسح الفازلين عالعربية بقطنة أو بحتة قماش هايعمل طبقة لزجة وشفافة في نفس الوقت
رش عليها الجليتور هايروح لازق في الفازلين.. وألف ألف مبروك

ومش محتاج اكتر من حتة قماش تمسح بيه يبقا اتشال من عالعربية بكل بساطة وبدون أي خساير

بالإضافة لإمكانية رسم أشكال مختلفة أو عمل كتابة عالعربية بالجليتور..
هاترسم الشكل أو الكلمة بالفازلين وترش الجليتور وبعدين تنفخ نفخة جامدة
الجليتور الزيادة هايطير ويتفضل اللي لازق في الفازلين حسب الشكل اللي انت رسمته..

[م/محمد صلاح]

سلامونتى حبيب قلبى

بس كده يا باشا اى حد هايسند على العربيه او حتى يلمسها هايشيل كل حاجه من عليها
انا عايز اعمل العربيه كلهاااااااااا

[Salamonti]

مش هاقوللك غير كلمة واحدة بس..

اللي هايسند عالعربية مرة هايحرم يسند على عربيات بقية عمره

هههههههههههههههههه

[م/محمد صلاح]

مانا عارف يا كبير بس انا عايز حاجه تلزق على العربيه ... ينفع صمغ او ورنيش؟
وهو مافيش سبراى خالص؟

[Salamonti]

ممكن بقا انت تجرب صمغ أو ورنيش أو أوهو أو كلة أو حتى أنبوبة أمير
بس ابقا فرجني هاتطلعه ازاي من عالعربية يا رايق

[م/محمد صلاح]

طيب فى عربيات وميكروباصات بتبقى متشحمه ولما تحط ايدك تحس انه زى الغرا او الورنيش كده بس ناشفه وفى نفس الوقت بتطلع بالغسيل
ايه رأيك؟

[medo12]

السلام عليكم يا بشمهندس الاسبراي ده موجود عند بتاع الدهان بس مسالة انو بيطلع بالغسيل ده ما اعرفهاش وسعر العبوه تقريبا 8 جنيه موجود منه في الدول العربيه لو ليك حد هناك رخيص وده انا متاكده انو بيطلع بالغسيل لاني استخدمته للسياره بتعتي وطلع اول ما غسلته

[م/محمد صلاح]

ميدو باشا انا حبايبى واصحابى كتير فى الكويت بس اقولهم يجيبوه منين؟ انا سألتهم وماحدش عرف طريقه

[م/محمد صلاح]

يا جماعه حد يفيدنى ارجوكو .... اخوكو مزنووووووووووق
حد يقولى الاسبراى الجليتر بيتباع فين فى مصر او بره مصر
او حد يقوللى ادهن العربيه جليتر ازاى بس بشرط انه ينفع يتشال بالغسيل
طب الغرا الابيض او الورنيش بيطلع من على العربيه بالغسيل؟

[medo12]

لا والله حضرتك موجود عند اي حد متخصص في اكسسوار السيارات ومشهور جدا لان الشباب بتستخدمه هناك كتير واصلا اي سياره جديده بره بيجي معاها الاسبراي ده بلونها علشان لو اتخدشت او حصل فيها حاجه اسال بس وخليهم يدوروا كويس

[noga28]

انا لما بحب اكون حطة مونيكير سوارية بجيب مقوى ضوافر شفاف وبروح محل اللى بيبع الزراير والكلف بتاع لبس البنات وبجيب منه جليتر فضى او دهبى واحطه فى زجاجة المقوى الشفاف واحط منه بالفرشة على ضوافرى ممكن تعمل كده وبيتشال بالاسيتون عادى بس معرفش هياثر على دهان العربية ولا لا

[noga28]

على فكرة المقوى ممكن يتقشر بسهولة جدا جدا جدا لانه لما بينشف بيبقى كانه بلاستيك ملزوق على الضفر فجرب على ضفر او ورقة وشوف المنظر بنفسك مقوى الاظافر هتجيبه من اى محل مكياج او هدايا عادى هو ازازة مونيكير شفافة لون الماء والجليتر الوقيه منه بنص جنيه اللى بنحطه على شعرنا فى الحفلات او على الجسم بس ازازة المقوى صغيرة بس مش غاليه ب2 جنيه اخرها

[م/محمد صلاح]

على فكرة المقوى ممكن يتقشر بسهولة جدا جدا جدا لانه لما بينشف بيبقى كانه بلاستيك ملزوق على الضفر فجرب على ضفر او ورقة وشوف المنظر بنفسك مقوى الاظافر هتجيبه من اى محل مكياج او هدايا عادى هو ازازة مونيكير شفافة لون الماء والجليتر الوقيه منه بنص جنيه اللى بنحطه على شعرنا فى الحفلات او على الجسم بس ازازة المقوى صغيرة بس مش غاليه ب2 جنيه اخرها

شكرا لردك بس انا كده هاجيب ولا 500 قزازه مقوى ... انا عايز اعمل العربيه كلها
الفكره المطلوبه ان يكون فى دهان ندهن بيه العربيه وقبل ماينشف نرش عليه بودرة الجليتر دى ونسيبه ينشف
مع العلم ان الدهان ده يكون بيطلع بسهوله بالغسيل
لغاية دلوقتى انا ماتوصلتش لحاجه
ياريت اللى يعرف حاجه كده يقولنا عليها