مناقشة لتعديل مازدا 929 مو 1979

[DrOsama]

السلااام عليكم اعضاء نايل موتورز

انا دخلت الموقع بناء على السمعة الروعة اللي سمعتها من اصحابي عليه
دي اول مشاركة واتمنى اكون عضو مفيد ليكم بعد كده
وارجو الافادة لي كمان

عندي عربية
Mazda 929 Model 1979



دي عربية الوالد ومركونة بقالها 3 او 4 سنين تقريبا
قررت اعملها عملية بناء من اول وجديد
واعدلها لو امكن

ومحتاج اعرف رايكم
اعمل الحاجات دي فين
وتكلفتها تقريبا كام لكل جزء
وارجو ان محدش يبخل عليا بالنصيحة
ويكون بالكم طويل عليا :)

انا عايز اعمل تعديلات كلية وجذرية في العربية بما فيها تعديل في الشكل امامي وخلفي

نبدأ بالجزء الداخلي

1 - فرش جلد بالكامل بما فيها الدواخل سقف وابواب
2 - تركيب كونسول في الوسط
3 - زجاج ومرايات كهرباء
4 - فتحة سقف كهرباء او يدوي
5 - تابلوه مستورد يكون شكله نضيف ويكون موديل حديث ونغير في الاضاءة الخاصة بالعدادات
6 - دركسيون رياضي أو دركسيون رياضي Multi Function
7 - تكييف
8 - شنطة وتنك البنزين كهرباء زي العادي ( موجودين فعلا بس عطلانين )
9 - شاشة عرض
10- شماسات للزجاج
11- طقم كاسيت وسماعات نضيف
12- تنجيد للفرش وتظبيطه بشكل رياضي
13- عزل الكابينة لتقليل درجة الصوت الخارجي لاقصى درجة ممكنة
14- انذار وسنتر


الجزء الميكانيكي

1 - الموتور 1800 سي سي 4 غيار
انا عايز اخليه 5 غيار
وبافكر لو لقيت حالته مش قوي اغيره
ياترى سعر الموتور 1800 ويكون 5 غيار في حدود كام؟؟

2 - تظبيط العفشة بحيث يتم زيادة الثبات على السرعات العالية
3 - جنوط 17 رياضي ( رسمة نجمة ) كاوتش عريض

الجزء الخاص بتعديل الشكل

يعتبر من اهم الاجزاء ومحتاج خبرتكم فيها بجد

زي ماشوفتوش شكل العربية ... العربية طويلة ودي حاجة عاجباني فيها
اللي عايز اعمله اني اعدل في شكل الفوانيس
اقلل ارتفاع الفوانيس من قدام وتعديل الشكل امامي وخلفي
فوانيس واكصدامات
زي الصورة دي كده كشكل تقريبي


يعني محتاج اعمل تعديل في الوش اكتر من الضهر

مع تركيب عتب Car Kit وسبويلر رياضي شكله حلو

والصورة الأصلية اهي








طبعا انا حطيت الصور عشان يبقى في تصور كامل عن وضعية الشاسيه والموتور والشكل امامي وخلفي

اعتقد ان العربية كده هيتركبلها عربية جديدة بس النهاية هتبقى عربية قوية وكويسة

رأيكم ايه والأسعار المتوقعة لحاجة زي دي في حدود كام ؟

شكراً جزيلا شباب :)

[ggaamm]

أطلع ياريس على الحرفيين هاتلك أكصدامين على عتبتين ... ونفخ الرفارف حتى ولو فايبر .. وعدل الفوانيس تعديل محترم كده
وبعد كده تخش على الموتور تظبط فيه دنيتك كلها سواء هتعمل عمرة أو هتغير المكنة كلها

وبعدين تديها لون محترم كده وماتنساش تسمكرها كويس طبعاً وتعملك حبة شغل عالكبوت وهى ماشاء الله كبوتها طويييييييييييل ويشيل

بس على كده فل قوى وده كله مايعملش حركة 5 ألاف بالسمكرة والدوكو والموتور والفايبر

[DrOsama]

الف شكر عالاهتمام ...
بس هل في حد معين انت ترشحه في الشغل ده ؟
انا ما نزلتش الحرفيين الا مرتين مع واحد صاحبي وما اعرفش حد معين هناك

هو اهم حاجة تعديل الفوانيس امامي وخلفي هو اللي هيخلي العربية تنطق مع الاكصدامات والفايبر
لو تعرف حد معين وكويس ياريت تدلني عليه وابقى شاكر ليك جدا :)

[gaaz]

انت عايزلك ميزانية على الاقل عشرين الف جنية بالكلام اللي انت عايزه
ولو تحب احسبهالك حيطلعو اكتر كمان من عشرين الف :)

[waelfarid]

منصحكش تزود عن 120كم في الساعة دي اخرها كدة وحمارة شغل لو لم تتخطي السرعة دي لو زودت عن كدة حتبقي كأنك بتعاملها علي انها حقن ومش حتفهمك وحتختلفو مع بعض والعربية حتزعل منك وحتزعلك واصلا حاجتها مش رخيصة ومش سهل تلاقيها وبالتوفيق ان شاء الله

[keko]

اولا احب الفت نظرك لان ال 929 قطع غيارها مش سهلة ومش رخيصة فلو العربية دى بالذات غزيزة عليك ماشى انما لو علشان احسن من ركنتها يبقى ركنتها احسن ودا ميمنعش انها ممتازة بس قدمت

نبدأ بالجزء الداخلي


1 - فرش جلد بالكامل بما فيها الدواخل سقف وابواب
2 - تركيب كونسول في الوسط

بالنسبة للسمكرة والدوكو والسروجى كل تجارب اصدقائى تثيت ان الشغل فى الارياف زى دمنهور والبحيرة وكفر الدوار الخ انضف وارخص مليون مرة شوف حد فى مدينة من دول يظبطلك صنايعية وخلى السمكرى يشتغل شغل سمكرية مش حدادين يعنى مش كل حاجة يقلك غير رفرف وغير كبوت وغير عتب وشوية يقولك غير العربية لا فيه ناس بتجيب الصاج وتشكله صح على اماكن الحتت اللى فيها بارومة او خبطات اكنه بيصنعه يدوى ويقص ويلحم وفى النهاية النتيجة نستاهل اما بتاع الدوكو تخليه يقلل قوى قوى من المعجون واسمع ان فيه ناس فى فوه بتشتغل من غير معجون زى بوهية الفابريقة
سمكرة ودوكو من 1000 ل 3000 حسب الشغل عندك
والسروجى لو هتعمل شغل جامد قول 1000 خامات ومصنعيات

3 - زجاج ومرايات كهرباء
طقم الزجاج الكهرباء يعمل من 600 ل 1000 جنيه ومعرفش مصنعيته كام والمرايات صعب قوى تلاقى مراية كهرباء تليق عليها لان العربية دى كلاسيك

4 - فتحة سقف كهرباء او يدوي

فكك منها هتوجع دماغك على الفاضى

5 - تابلوه مستورد يكون شكله نضيف ويكون موديل حديث ونغير في الاضاءة الخاصة بالعدادات

ممكن تشد التابلوه عندك جلد 2 لون والاضائة بتاعت العدادات فكها بس وانا اظبطك بملاليم

6 - دركسيون رياضي أو دركسيون رياضي Multi Function
الطارة السبور مش هتليق هات طارة شكلها شيك زى بتاعت المرسيدس مثلا وحوار الملتى فنكشن كدا حضرتك بتهزر
7 - تكييف
مش عارف
8 - شنطة وتنك البنزين كهرباء زي العادي ( موجودين فعلا بس عطلانين )
رخيص مش هيكمل 100 ج
9 - شاشة عرض
من 200 وطالع
10- شماسات للزجاج
مش فاهمك
11- طقم كاسيت وسماعات نضيف
مفتووووووووحة
12- تنجيد للفرش وتظبيطه بشكل رياضي
تم الرد سابقا
13- عزل الكابينة لتقليل درجة الصوت الخارجي لاقصى درجة ممكنة
باتظبط الكاوتش بتاع الببان والكبوت والزجاج وتركب عزل صوت وحرارة الفضى ده فى الارضية والببان
14- انذار وسنتر
250 وطالع


الجزء الميكانيكي

1 - الموتور 1800 سي سي 4 غيار
انا عايز اخليه 5 غيار
وبافكر لو لقيت حالته مش قوي اغيره
ياترى سعر الموتور 1800 ويكون 5 غيار في حدود كام؟؟
مواتير المازدا لو مش معاك ميكانيكى استاااااذ غيره احسن واوفر وخليك فى بورسعيد كبيره 3 او 4 بواكى والفتيس غالبا هيكون رخيص لان فتيسات المازدا مرطرطة علشان مش بتبوظ
2 - تظبيط العفشة بحيث يتم زيادة الثبات على السرعات العالية
ممكن تظبط العفشة الفابريكة او تركب عفشة سبور
3 - جنوط 17 رياضي ( رسمة نجمة ) كاوتش عريض
حوالى 2000 جنيه طقم الجنوط
الجزء الخاص بتعديل الشكل

يعتبر من اهم الاجزاء ومحتاج خبرتكم فيها بجد

زي ماشوفتوش شكل العربية ... العربية طويلة ودي حاجة عاجباني فيها
اللي عايز اعمله اني اعدل في شكل الفوانيس
فيه فوانيس كريستال بتاعت الشيفروليه الدبابة تركب عندك او ممكن تعمل فوانيس عمولة والخلفية تقدر تعدل ليدات انوى بس وانا اظبطك بملاليم وافكار جميلة
اقلل ارتفاع الفوانيس من قدام وتعديل الشكل امامي وخلفي
فوانيس واكصدامات
زي الصورة دي كده كشكل تقريبي
شغل الفيبر حسب المكان بس لازم واحد نضيف لانه بيطلع يا اما تحفة يا اما زبالة مفيش وسط

[ggaamm]

أنت تأمر يامعلم .. بس فعلاً الشغل اللى أنت عاوزه ده كتير خالص وهيكلف كتير
أعمل اللى بقلك عليه حبة فايبر على رشة نضيفة وفرش محترم وعمرة للمكنة لو محتاجة وفل قوى كده
وبعد كده واحدة واحدة تظبط فوانيس والكماليات زى الكاسيت والأنذار وشوية الهمبكة اللى جوة دول وممكن بعدين تسقط وتجيب كراسى سبور وهكذا

بس الأول أبدأ بالمهم شكل العربية وموتورها هم الأساس
والباقى ساهل ويجى واحدة واحدة

[DrOsama]

بجد الف شكر ليكم عالاهتمام ده

gaaz
انا عملت حسبة برمة مع واحد صاحبي لقيتها ممكن تتراوح من 8000 لحد 15000 حسب كمية التعديلات اللي هتتعمل بس الرقم النهائي مش هيتحدد الا لما ابدأ اشتغل فيها فعليا

waelfarid
العربية ياريس قبل ما تتركن كانت بتجيب 150 وثابتة وزي الفل :D انا عياز ازود السرعة شوية مع الثبات عشان هاسافر بيها مسافات طويلة
يعني اقل مشوار عندي هيبدأ من 200 كيلو تقريباً

keko
بجد الف شكر انت ادتني حسبة مبدأية ... بس سعر الفايبر والتعديل مهم بالنسبة ليا عايز اعرف ممكن يتراوح من كام واقصى مبلغ في التعديل كام
وانا سمعت عن سمكري من واحد صاحبي قريب مني في الشرقية في بلد اسمها العلاقمة بيروحله من مدينة نصر وكذا واحد شكرلي فيه
بالنسبة لفوانيس شيفروليه انا شوفتها وشكلها حلو بس هاعدل تعديلات اقل وهاركز عالاكصدام عشان ينطق شكل العربية
اديني افكارك بس انا هابدا اتحرك فيها من الاسبوع الجاي باذن الله

ggaamm
هو من ناحية هيكلف هيكلف فعلا .. بس انا ناوي على العربية دي لاسباب انها اول عربية للعيلة واحنا المستخدمين الوحيدين ليها ( ليس لدينا افرع اخرى )
واسباب المتانة والقوة في الجسم بتاعها والطول والحجم وكده
والتالتة اني هارمي مبلغ 30 الف مثلا هيجيبلي ايه ؟؟
لكن لو صرفته على العربية صح هيطلع عربية محترمة في الاداء

ادوني افكاركم بس ولو في ترشيحات لناس في الشغل سواء سمكرة او دهانات او اكسسوارات او سروحي
اي حد عنده اقتراح لمحل معين حتى لو اسوان قولولي ... بالتوك توك اجيبه صد رد :D

[abo_hosni]

فكر في التكييف بحوالي 3000 من الألف للياء و هيفرق معاك في السفر و غير السفر

[DrOsama]

ما اعتقدش التكييف يوصل للمبلغ ده .. في ناس صحابي قالولي من 1000 وانت طالع وفي اقل من كده كمان لو عايز بس هيبقى نص اداء

[saadelden]

بص يا باشا انا هكلمك ع الميكانيكا بتاعه العربيه دي

الماتور معروف انه بتاع سفر و مستريح بس انت مشكلتك الفتيس 4 غيار ف لو جبت 5 غيار هيفرق معاك جامد
و العربيه دي فيها تكيف و تلاجه بجد بس اما بيبقى مظبوط ممكن تجيبه استيراد لو مش عندك

العربيه دي ثابته ع الطريق جدا جدا جدا لانها تقيله و راسيه و كانت في الخليج بيحبوها جدا زي العربيات الامريكاني
و كانو بيرموها لانها ماكانتش بتتعب مهما عملو فيها عشان يجيبو عربيات جديده

طبعا في السفر هتجيب معاك العداد كله عادي بس هات الفتيس 5 غيارات و اكشف علي الكرونه و عمود الكردان و طقم الدبرياج
و شيك ع الماتور لو فيه اي مشاكل ظبطها

كدا انت معاك وحش ع الطريق

التعديلات الداخليه و الخارجيه دي اذواق ممكن تعجبني حاجه و ماتعجبكش ف شوف الي انت عايزه و هتلاقي الي يعملهولك

[Gelgel2004]

السلام عليكم
الحقيقه الموديل ده فى المازدا لو نظيف و ماحلى كده زى الصور يبقى لازم تتوضب صح

التكييف - الانذار - السنتر - تصليح كهرباء التنك و الشنطه يبقى عند المهندس ايمن عبد الجواد 26202455 - كول اير - جسر السويس
البويه و السمكره عند احمد قدوره بالحرفيين
عزل لزجاج يبقى افلام لومار جسر السويس.
عزل الابواب و السقف و الارضيه - راجع موضوع عزل شامل فى المنتدى كان عامله احد الاعضاء.
الفرش و التنجيد - جينز كار - م احمد مشعل .
تعديل الشكل مرففففففففففففففففففففففففففففففففففففففففففففوض
العربيه دى قيمتها فى شكلها و ان كل حاجه تبقى شغاله بحاله الاصلى ( معلش انا من المدرسه القديمه ) .
تعديل الفتيس خلى الموتور زى ماهو و هات فتيس 5 نقله من بورسعيد.
متنساش التنجيد بتاع الابواب و السقف خليه احمر قطيفه - طبعا حسب لون العربيه .

الف مبروك مقدما و دمت بود