اوعى البارومة بيييب بيييييب

[gaaz]

يا جماعة انا عندي شوية شروخ كده في بوية العربية وخايف يجيلها بارومة بعيد عنكم وعن اولادكم ان شاء الله
مفيش اي حل مش مكلف للقصة دي ؟ يعني مش عايز اسمكر دلوقتي وارش
عايز حل كده ولو مؤقت
وادي الصور


Uploaded with ImageShack.us

[ggaamm]

هى دى برومة !!؟؟
أنا شايف انها صدا عادى مكان الصاج بسبب تقشير البويا
أعتقد دى عادى لو هى صدا مايعملش حاجة
بس سنفرها كويس وطبقة معجونة خفيفة هتبقى زى الفل
ويريت بقى تلقطها بالمرة نفس لون العربية

أما لو فعلاً بارومة وواكلة فى الصاج يبقى على حد علمى لازم تترقع وتتجلخ وتتمعجن وتترش

[Salamonti]

زي ما قال الزميل في المشاركة السابقة..

ده صدأ خفيف مش بارومة

أرخص حل هو ورقتين صنفرة واحدة ناعمة وواحدة خشنة
هاتبدأ بالخشنة وبعدين بالناعمة لحد ما تشيل الصدأ كله وتبقا على الصاج
تغسل مكانه كويس لإزالة أي بودرة متبقية من آثار الصنفرة لأن البودرة دي هايكون فيها بقايا صدأ وممكن تؤدي للإصابة بالصدأ مرة تانية
بعدين تسيبها تنشف كويس أوي في الشمس
وتجيب 1/8 كيلو عازل من عند الموان اسمه برايمر وتلقط بيه مكان الصنفرة على خفيف كده
وده بيعمل طبعة عازلة تعزل الصاج عن الهوا لمنع الصدأ
وبعدين لما ربنا يفرجها عليك وتيجي ترش العربية يبقا البوهيجي يصنفر البرايمر ده قبل ما يرش..

ده حل اقتصادي وسهل وبسيط مش هايكلفك أكتر من 10 جنيهات والخامات هاتفيض منك كمان..

لو الأمور متيسرة شوية فالحل بتاع زميلي في المشاركة السابقة هايكون أفضل وهو المعجون...
لكن هاتتكلف أكتر شوية لسببين، أولا المعجون مش رخيص ولو جبت علبة وخزنت بقيتها هاتنشف ومش هاتنفع تستخدمها تاني
+ انك مش هاتعرف تعملها بنفسك لازم تروح عند حد يعملهالك... لأن لو عملتها بنفسك وطلع المعجون مش مظبوط يبقا مستقبلا لما تيجي تعمل سمركة لازم مكانها يتحرق بالنار عشان يطلع المعجون البايظ ده ودي طبعا هاتبقا تكلفة إضافية عليك

[gaaz]

الله ينور يا رجالة بارك الله فيكم

[ggaamm]

الله ينور يا رجالة بارك الله فيكم

تأمر ياباشا .. وأنا شايف أنك لو معجنت ورشيت هيبقى أفضل مع أنه هيبقى أغلى شوية لكن مش كتير
وفعلاً زى مالأخ الكريم سلامونتى قالك أكيد هيبقى فيه فرق فى التكلفة وماتنساش أن تعبك وشغلك مش هتاخد عليه فلوس بعكس الصنايعى اللى حتى ولو معملش حاجة تستاهل هياخد فلوس بارضو ..


وعلى فكرة أى تلقيط فى العربية عمره مابيزيد عن 50 - 70 جنيه بالكتير

أنا والله معجنت رفرف كامل ورشيته ب 40 جنيه !!!
بس الراجل بتاعمل معاه وكده فكرمنى
ومرة تانى رشيت الطاسات بس دفعت 35 !!
فهى تساهيل مش أكتر
هههههههههههههههه

بص انت لو عملت الحتة اللى مضايقاك دى ب20 جنيه يبقى رضى قوى
بس المشكلة ان بتاع الدوكو مش هيرضى يرشلك الحتة دى بس وهيقلك ناخد ربع الرفرف !!
لو انت معاك رقم اللون وهيطلع نفس اللى موجود توكل على الله وصدقنى مش هتزيد عن 40 جنيه
25 مونة و 15 صنايعى وده بالزيادة .. وأنت ممكن تقاول الصنايعى قبل متبدأ عشان تعرف الدنيا رايحة فين ومايزودش عليك بعد ما يخلص

وتحت أمرك ياباشا