عندى دايو لانوس و عايز اظبطها...ارجو الافاده!!

[Eldairoty]

السلام عليكم ورحمه الله وبركاته
انا عندى عربيه لانوس 2007 لون لبنى سماوى و عايز اظبطها شويه حاجات (اروشها يعنى) و محتاج اعرف التكلفه هتبقى كام و اقدر اعمل الحاجات دى فين؟!!

انا عايز اركب جنوط كويسه و اعمل فرش جلد نضيف
و عايز اركب كاسيت سى دى احسن نوع
و عايز اركب طقم صوت حلو
و عايز اظبط العربيه من جوه من حيث الشكل
و اعمل نور مختلف للامبير غير النور الاصفر اللى موجود
و عايز اعرف سعر اكصدام امامى عشان اللى عندى مش مظبط
و اعمل رسم على هيكل العربيه..بس رسم بسيط مش كتير
لو فى حاجات تانيه تتعمل يارت تقولولى عليها...انا من اسكندريه
انا اسف انى طولت عليكوا..السلام عليكم

[mody1221]

السلام عليكم بص ياباشا انت تجيب فرش جلد من عزبة سعد ودة حيبدأ من 270 على ما افتكر كنت جايبة من 3 سنين بالسعر دة وبالنسبة للكاسيت البايونير سى دى و يو اس بى شغااااال وسعرة كويس جدا ويتحمل شغل وحتجيب ليد ازرق للمبة الصالون مع ستايرجانبية للخلف 3 قطع وطبعا سماعتين اكسبلود 400 جامدين جدا ومانصحكش تلعب فى النور بتاع التابلوة وبالنسبة للشكل الخارجى تفك الفانوسين الامامى وترشهم سموكين ودة بيليق جدا على اللانوس مع ليدات بدل لمبات الاشارة من قدام وورا وبلاش تغير جنوط لانها بتأثر على العفشة مع شوية دلع بالاستيكرات على اصاج وكدة تبقا عروسة

[ahmedaglan]

بص يامعالي الباشا الي هقولك علية دة لو اتعمل ف عربيتك بالحرف هتدعيلي بس الكلام دة لو الميزانية مفتوحة
اولا من جوة
1- فرش جلد تفصيل ودة طبعا عند جينز كار الي في مدينة نصر ودة هيكلفك 1200 جنية
2-طقم ستاير 4 قطعة ودة هتلاقية في شارع دمشق مصر الجديدة وتمنة 150 جنية وشكلة تحفة واجدع من مليون فامية
3- كاسيت بايونير او سونى دابل وتشيل الدرج الي تحت الكاسيت الاصلي وهيبقي واخد المساحة كلها وهيبقي جامد اخر حاجة وشكلو شيك جدا وهيدى فخامة للتبلوة مع سمعتين كينوود 500او بايونير 500 مع جى ام كينوود 350وات 2 تشانيل
ودول تمنهم الكاسيت+السماعات+الجى ام = 1550 جنية
4- نور ليدات للصالون ودى تمنها 25 جنية تقريبا
ثانيا من برة
1- طقم جنوط سبور 15 تايوانى او تايلاندى او اندونيسي علي كاوتش بيردجيستون يابانى 195/50
ودول تمنهم الجنوط +الكاوتش=3750
2-طقم زينون فيليبس اصلي المانى h4ودة علشان انت العالي والواطى في لمبة واحدة ودة تمنة 1300 جنية
3- تفيم الوانيس الي ورا ب 10 جنية
4- ودة اختيارى ليك طبعا تعمل السقف كاربون فايبر ودة طبعا عند رمزى اوبشن الي في احمد سعيد وتكلفتة 150 جنية
بكدا التكلفة العامة بالتركيب بكلة
8500جنية بس انا عايزك تتخيل عربيتك بعد تركيب الي انا قولت علية
اما بخصوص الاكصدام فأنا اسف مش هقدر افيدك ف سعرة
وبالتوفيق ياباشا

[shaddadfalcon1]

الله يكرمك اعمل اللي انت عايزه بس بلاش دوول:

بلاش زينون من غير عدسات عشان الناس متدعيش عليك
بلاش تركب ليدات بدل الاشارات عشان مش بيتبان خالص في النهار
بلاش تفيم الفوانيس اللي ورا عشان مش بيبين نور الأشارات والفرامل والمارشدير لا في ليل ولا نهار

كل دي حاجات بتاذيك وتاذي غيرك وتعرض حياتك وحيات الغير للخطر

[ahmedaglan]

الله يكرمك اعمل اللي انت عايزه بس بلاش دوول:

بلاش زينون من غير عدسات عشان الناس متدعيش عليك
انا لما قولت زينون فيليبس كنت اقصد الي اعنية كويس لييية علشان المبة الفيليبس مش بتشتت الضوء زى الزينون الصينى وبيبقي متسلط علي الارض في طريق مستقيم ومبيئذيش حد حتى لو مش مركب عدسات
بلاش تركب ليدات بدل الاشارات عشان مش بيتبان خالص في النهار
انا مقصدتش ليدات للفوانيس انا قولت ليدات لنور الصالون فقط
بلاش تفيم الفوانيس اللي ورا عشان مش بيبين نور الأشارات والفرامل والمارشدير لا في ليل ولا نهار
وللعلم ان في فامية المانى مخصوص لتفييم الفوانيس وكل الاضائة بتبقي ظاهرة وواضحة سواء في الليل ولا النهار
وانا مقصدش الفامية الغبي الي بيخلي الفانوس دارك ومش ظاهر منة ولا حاجة
كل دي حاجات بتاذيك وتاذي غيرك وتعرض حياتك وحيات الغير للخطر

كل الي انا قولت علية مفيش منة ضرر لانها حاجة غالية ومضمونة ومنها منظر شيك للعربية ومنها ميضرش نفسة ولا يضر حد
وعلي فكرة ياباشا انا مقولتش ان صاحب الموضوع يروح يركب فرش تركيب الي مش هيستمر معاة اكتر من 6 شهور ولا قولتة يبركب زينون صينى من ابو 250
ولا ليدات في الاشارات الي انا مش مقتنع بيها وعلشان كدا مجبتش سيرتها
وعلي العموم حصل خير ودى وجهات نظر