عملت ارضيه جلد لعربيتى

[mrghost]

السلام عليكم ورحمة الله وبركاته
بقالى فتره عاوز اعمل الارضيه جلد لان الاصليه طبعا موكيت ومبهدلانى فى التنظيف عاوزه مكنسه وبرضه بتتبهدل بسرعه
المهم وانا راجع من الشغل امبارح لقيت محل سروجى لسه بيفتح جديد فى المنطقه
(حتى مكنش لسه جاب بقيه الادوات بتاعته )
المهم انا كنت سألت قبل كده عند اتنين مختلفين
قالولى فى نوعيه ب 180 ونوعيه ب 250
المهم سالت الراجلا ده قالى علشانك ب 200 جنيه لانى لسه متجوز وفاتح المحل جديد وعاوز زباين والكلام ده
صعب عليا قولتله طيب روح هات الجلد عقبال ما اجيب العربيه واجيلك
بدأنا شغل الساعه 3 العصر
فكينا الكراسى والارضيه الاصلى طلعتها بره العربيه ونظفتها بنفسى بالمكنسه كويس ونظفت الارضيه الصاج بتاعة العربيه
وركبناها تانى وخد مقاساته واشتغل هو يركب وانا اقفل وراه الكراسى والكونصوله والكلام ده
العربيه خلصت ع الساعه 7 ونصف لانه كان بيرغى اكتر ما بيشتغل
النتيجه الحمد لله ارضيه تمام واخد الكرفات اللى فى العربيه
وهحاول اصورها النهارده وارفع الصور ع المنتدى

[Elawany13]

ألف مبروووووووك
طيب مستغلتش الفرصة ليه وحطيت لباد وعازل حرارى
علشان تزود عزل الصوت والحرارة

[alemam2005]

الف مبروك
الفرش الجلد جميل و بيخلي نظافه العربيه سهله

[zadgo]

الف مبروك وشكلك كده هتشجعنى اعمله عندى انا كمان

[mrghost]

ألف مبروووووووك
طيب مستغلتش الفرصة ليه وحطيت لباد وعازل حرارى
علشان تزود عزل الصوت والحرارة

الله يبارك فيك ياباشا
ودى تفوتنى ياباشا حطيت عازل طبعا بس بصراحه مفرقش كتير ههههههههههه

[mrghost]

الف مبروك
الفرش الجلد جميل و بيخلي نظافه العربيه سهله

الله يبارك فيك
فعلا انا كنت بكره العربيه بسبب نظافه الموكيت

[mrghost]

الف مبروك وشكلك كده هتشجعنى اعمله عندى انا كمان

الله يبارك فيك
هو بصراحه بيفرق فى النظافه اوى

[moh19227]

ياباشا الف مبروووووووك وفي انتظار صور الشغل

[Shade]

الف مبروك وفى انتظار الصور الموضوع دة بردو انا رايح اعملة

[Sehsss]

مبروك يا باشا

[mrghost]

الله يبارك فيكوا ياجماعه

[Khaled Lanos]

ألف مبروك على الأرضية ياباشا

أنا بفكر أعمل كده من زمان عندي في اللانوس لأني بصراحة كرهت تنظيف العربية بسبب الموكيت ده,

بيبقى متعب أوي في تنظيفه,

المشكلة كمان اننا دلوقتي عندي تراب وشوية بقع في الموكيت مش راضية تتطلع خالص بالمكنسة

هضطر أفك الكراسي وأطلع الموكيت برا وأغسله بنفسي وأمري لله.

تقبل تحياتي.

[mrghost]

ألف مبروك على الأرضية ياباشا

أنا بفكر أعمل كده من زمان عندي في اللانوس لأني بصراحة كرهت تنظيف العربية بسبب الموكيت ده,

بيبقى متعب أوي في تنظيفه,

المشكلة كمان اننا دلوقتي عندي تراب وشوية بقع في الموكيت مش راضية تتطلع خالص بالمكنسة

هضطر أفك الكراسي وأطلع الموكيت برا وأغسله بنفسي وأمري لله.

تقبل تحياتي.

لو ناوى تركب ارضيه جلد يبقى استنى وساعة التركيب ابقى فك الموكيت واغسله ونظفه براحتك بدل ما تفكه مرتين

[LORD.ADeL]

مبروك يا هندسه كلام دة ع شاهين ولا ماروتى
وان كان مبروك يا محمد باشاا والى مزيد ان شاء الله
+
حوار عداد ماروتى موضوع نام ليه كدة ((: مفيش جديد

[mrghost]

مبروك يا هندسه كلام دة ع شاهين ولا ماروتى
وان كان مبروك يا محمد باشاا والى مزيد ان شاء الله
+
حوار عداد ماروتى موضوع نام ليه كدة ((: مفيش جديد

للشاهين ياباشا
بالنسبة للعدادات انا بصراحه مش متابع
مشغول اليومين دول فى الشغل شويه