معطر السيارة

[MoMohsen]

انا يا جماعة من الناس اللى بحب عربيتى تكون نضيفة زى اغلب الناس هنا.وكنت من فترة رحت عملتها كار كير و الراجل كان حطلى معطر على الفرش فضلت ريحتة فى العربية حوالى شهر و كانت عجبانى اوى الحكاية دة لانى كل لما اجيب معطر مبحسش بية او يطلع خفيف اوى.
فلو حد عندة فكرة عن نوع المعطر دة او فكرة تخلى ريحة العربية حلوة لفترة طويلة يقولى عليها.

[HeMa_LanCeR]

هات المعطر اللي علي شكل شجره بس يكون الامريكي هو في حدود 8 جنيه وسيب العربيه في مكان ضل يوووم بحالو واقفل العربيه كويس جدا
وانت هتدعيلي

[kimo]

هات فوحة من عند بتاع العطور ويملاها زيت العطور دة بيخلى العربية ريحتها كويسة لمدة شهر بعشرة جينة

[sup_zero401]

انا محمد فاتح محل كماليات سيارات وبنصحك فعلا بالمعطر الجرة لاانه من احسن انواع المعطرات الموجودة فى مصر
والمركب كمان معطر كويس
والمعطر ده ب6 جنيه بس مش بعشرة

[tatu_181]

الشجرة أجمد حاجة...و الذوق فى النوع اللى تختاره....أنصحك بالبلاك آيس

[Karim_Monir]

المعطر اللي بيترش في الكار كير غاللي حبتين واللتر بيوصل ل 40 جنية تقريبا خام
وبيتخفف بمية عادية
ويتحط في بخاخ ويترش على الارضية والفرش
وتقدر تشترية منهم نفسهم
انا مرة ماللي ازازة ب 10 جنية
ازازة صغير
وفعلا بتقعد كتير جدا

[MoMohsen]

طب يا كريم انا مستعد اشترى لتر منة بس الفكرة اعرف هو بيتباع فين لانة بجد فارق عن اى حاجة تانية جربتها.و انا فعلا جربت اشترية من كار كير كنت نضفت عنة بس مرديش اكنة يعنى سر حربى.

[MoToRiZeR]

هو مرضيش عشان تجيله تاني

[Karim_Monir]

بالظبط كدة
ممكن كمان كام يوم اعيدلك على البنزينة اجيبلك اسمه
هو من شركة مواد كيماوية في مدينة بدر على ما اذكر

[MoMohsen]

الف شكر يا كريم باشا .نخدمك فى حاجة تانية ات شاء الله قريب

[MaGiC]

بص انا في حاجه بعملها هو اختراع وحلوه جدا روح عند بتاع عطور اشتري عطر فواحه بيبقه زيت بس خد اي حاجه لونها شفاف في فواكه وفي حاجات جامده والازازه الصغيره ب 3 جنيه ونقط منها تحت الكرسي وتحت الدوسات وفي اي مكان مستخبي كده بين الكراسي وبسس وبيعد لمده شهر انا عن نفسي كل اسبوعين بعملها والازازه تكفي لمرتين

[MoMohsen]

هى فعلا فكرة حلوة يا MaGiC و إن شاء الله هجربها فى اقرب وقت.

[medomada]

أنا أسف حسأل سؤال بعيد شويه
يعنى أيه كار كير و بيعملوا أيه فى العربيه بالظبط و بيكون فين و بيتكلف كام ؟

[KoDaK_Gti]

اللى اعرفه هو الكار كيت لكن مسمعتش عن كار كير دى خالص
والكاركيت ده بيبقة موبايل جوة العربية وبتجيب شريحة تانى بنفس رقمك وبتحطها جواه
وبتتكلم منه وانت سايق
وفيه منه نوع عباره عن قعدة بتحط فيها موبايلك و بيبقة منه مايك بيركب فى السقف وبتسمع الصوت من السماعات بتاعة العربية

[MoMohsen]

الكار كير Car Care هو مكان لتنظيف العربية زى البنزينة بس المفروض بيبقوا افضل بكتير و عندهم ادوات خاصة و منظفات خاصة و هى السبب فى ان العربية بترجع زى الزيرو بالظبط .وهما بيغسلوا و ينضفوا كل حاجة ممكن تتخيلها فى العربية و فعلا بتحس بفرق كبير بعد التنضيف.