Armorall

[tayson54]

دلوقتي الأسفنجه اللي اسمها original protectant sponge من منتجات ARMORALL ... مكتوب استخدمها علي الفينيل، مطاط، بلاستيك وهي بتحمي من الأشعه المضره وبتزيل الأوساخ والغبار وبتدي لمعه جميله ..
وبعدين مكتوب تحذير انك لا تسخدمها on or near clear plastic surfaces
يا تري ايه المقصود بالعباره دي لاني مش عارف هو يقصد انهي حتت في العربيه بالظبط بالجمله دي ؟


تاني حاجه لقيت ازازه سائل لونها صفرا تقريبا (بيترش بيها)وهي من منتجات ARMORALL برده وهي برده ليها نفس استخدامات الأسفنجه دي ..حد خبره في الحجات دي يعرف ايه الفرق بالتحديد بين الأتنين ؟

والف شكر

[Ahmed Selim]

بص يت تايسون باشا

فى بعض التابلوهات بيبقى فيها حتت بلاستيك صافى زى الحتة اللى فى نص تابلوه الميجان كده ( الصورة فى المرفقات بس صغيرة شوية )
الحتت دى لا ينصح بتلميعها بالملمعات دى عشان ممكن تؤدى الى تشقق البلاستيك

وبالنسبة للمنتجين هما زى بعض الفرق أنك فى حالة السبراى المفروض ترش كمية حسب أستعمالك على فوطة نضيفة وتستعملها فى التلميع أما الأسفنجة فهى جاهزة للأستخدام على طول
مفيش فرق بين الأتنين

خلى بالك أعتقد فى حالة الأسبراى مكتوب على العلبة أنك مترشش الأسبراى على التابلوه على طول........ترش على فوطة وتستخدم الفوطة بعد كده

وكمان متستخدمش الأتنين لو راكن العربية فى الشمس سواء قبل الأستخدام أو بعده على طول......يعنى لازم التابلوه يكون بارد ساعة التلميع و لحد ما يمتص السائل

[tayson54]

والمواطن العادي يا استاذ احمد المفروض يفرق ازاي بين البلاستيك الصافي والبلاستيك المطعم بمواد تانيه ...انا رأيي ان الواحد يقصر استخدامه بالحجات دي علي المطاط زي التابلوه واي مطاط في الأبواب مثلا ولا ايه رأيك ؟
يعني انا مثلا معايا اوبترا ...اعرف ازاي البلاستيك الصافي من غيره ؟؟؟

[Ahmed Selim]

بص يا باشا لو التابلوه بتاعك زى اللى فى الصورة يبقى الحتة اللى متحددة باللون الأحمر بلاستيك والتابلوه من فوق عادى ( يعنى ممكن تستخدم السبراى عليه من فوق )

[tayson54]

الف شكر يا استاذ احمد جزاك الله خير لكن برده مش واضح جدا ايه الفرق بين البلاستيك المسموح استعمال المنتج ده عليه وبين البلاستيك الغير مسموح لان فيه مناطق تانيه في العربيه فيها بلاستيك برده زي في الأبواب مثلا والبلاستيك العريض اللي تحت احزمه الأمان فمش واضح جدا ايه الفرق بين انواع البلاستيك ...عموما اعتقد من الأمان نستخدمه علي المطاط بس وانضف البلاستكات اللي في العربيه كلها بفوطه مرطبه شويه وبعدين انشفها كويس ...مش دي طريقه كويسه ؟

[tayson54]

انا النهارده المغرب كده كنت استخدمت الأسفنجه دي علي التابلوه وانا دايما بستخدمها عليه ومبستخدمهاش علي البلاستيك اللي حوالين الكاسيت ده فعلا لكن اول مره النهارده استخدمها علي الأبواب ودول فيهم حجات بلاستيك لكن معرفش بقه دول من المحظور استخدام الأسفنجه دول عليهم ولا لأ ...عموما بعد كده مش هستخدم عليهم لكن تفتكر ممكن المره دي تشقق البلاستيك ده ولا حاجه ؟

[MohabSaeed]

انا عندى الارمور اول.. الى هو بيترش وفوق الممتاز و العبوه بقالها معايا حوالى سنتين ..

المهم هو المقصود بال on or near clear plastic surfaces

يعنى زى البلاستك بتاع العدادات الشفاف لانه بيعمل زى تجير للبلاستك الشفاف .

* ملحوظه انا بلمع كل البلاستيكات و المطاط الى فى العربيه ب ارمور اول . و النتيجه بجد رهيبه يعنى حتى الاجزاء الى اسفل التبلوه او فى الابواب بلمعها بيه و النتيجه بتبقى ممتازه .

لكن لازم ناخد بالنا من حاجه ارمور اول "ملمع " مش " منظف " ...يعنى لو فى وساخه جامده مثلا مش بيطلعها ... لازم سائل تنظيف الاول " فى سائل تنظيف متعدد الاستخدامات اسمه 100 % وهو مصرى ... ممكن ننظف بيه اى امكان فيها اتساخات جامده على التابلوه او جوانب الباب .... بعد كده نستخدم ال ارمور اول .

النتيجه النهائيه بتكون " قمه النظافه "

[farahat]

سيدي الفاضل .. المقصود ب- clear plastic يعني بلاستيك شفاف ، يعني ببساطة لا تستعمل هذا الملمع على الجزاء الشفافة في التابلوه لأن بيعمل فيها "smearing" ، يعني هتلاقيها لو استعملت عليها أصبحت مغبشة و الشفافية بتاعتها هتبوظ ، عشان كدة هما بيحذروك قبل ما تستعملها.

تحياتي

[tayson54]

جزاكم الله كل الخير يا جماعه انا كده فهمت ايه الفرق ...فعلا النتيجه بتبقي هايله جدا علي التابلوه ما شاء الله لكن دي اول مره استخدمه علي بلاستيكات في العربيه لسه هشوف اخبارها ايه بكره ان شاء الله .
استاذ فرحات فعلا مكتوب الكلمه دي بالتحدي علي الكيس "smearing" تمام كده فهمت ايه المقصود منها الف شكر
استاذ مهاب سائل التنظيف ده اسمه "100%" ؟؟ ده حضرتك بتشتريه منين ؟

الله يطمنكم ده انا كنت قاعد قلقان لاكون عكيت الدنيا

[tayson54]

انا عندي سؤال تاني يا شباب بما اننا فتحنا موضوع النضافه ده ...انا عندي المرايات من لون العربيه لكن متركبه علي جزء اسود بلاستيك جامد كده ...المهم الجزء البلاستيك ده عايز انضفه كويس وارجعه الي لونه الأصلي تاني لانه قرب يبقي رمادي من كتر التراب وخلافه ولما بغسله بيرجع باهت تاني لما الميه اللي عليه تنشف (انا قادر اوضح؟)...
وكمان الأطارات السمرا حوالين الشبابيك عايز المعها وارجع لها لونها الطبيعي تاني لان فيها نفس الموضوع ...يا تري فيه اي منتجات بتستخدم في الحتت دي ولا ممكن ارموراول اللي بيترش ده يفي بالغرض ؟؟؟
انا استخدمته مره علي التابلوه بصراحه يهبل بس كنت خايف استخدمه علي البلاستيك ساعتها .

[MohabSaeed]

استاذ مهاب سائل التنظيف ده اسمه "100%" ؟؟ ده حضرتك بتشتريه منين ؟

الله يطمنكم ده انا كنت قاعد قلقان لاكون عكيت الدنيا

انا اشتريته من هايبر 1 .. و اعتقد متوافر فى كارفور والسوبر ماركت الكبيره . عموما فى انواع تانيه غير 100% و ممكن تكون ارخص ... وبيبقى متعدد الاغراض يعنى ممكن تنظف بيه فرش العربيه و الموكيت و البلاستيكات .... انا حاسس ان شامبو ومخفف وبيضحكو علينا :) بس فعلا للامانه هو طلع كل الاتساخات الى كانت لازقه على الدركسيون فى ثوانى بعد ما فقدت الامل انها تطلع .

انا عندي سؤال تاني يا شباب بما اننا فتحنا موضوع النضافه ده ...انا عندي المرايات من لون العربيه لكن متركبه علي جزء اسود بلاستيك جامد كده ...المهم الجزء البلاستيك ده عايز انضفه كويس وارجعه الي لونه الأصلي تاني لانه قرب يبقي رمادي من كتر التراب وخلافه ولما بغسله بيرجع باهت تاني لما الميه اللي عليه تنشف (انا قادر اوضح؟)...
وكمان الأطارات السمرا حوالين الشبابيك عايز المعها وارجع لها لونها الطبيعي تاني لان فيها نفس الموضوع ...يا تري فيه اي منتجات بتستخدم في الحتت دي ولا ممكن ارموراول اللي بيترش ده يفي بالغرض ؟؟؟
انا استخدمته مره علي التابلوه بصراحه يهبل بس كنت خايف استخدمه علي البلاستيك ساعتها .

ارمور اول يقوم بالمهمه ديه بنجاح . لانه بينفع فى اى حاجه " بتاع كلو :) "
.... اساسا انا كان عندى الباب بتاع الواجا بيزيق مع المطبات .... رشيته على جلد الباب بالكامل .......... والنتيجه كانت سحر ... خيال .... مافيش اصوات مافيش زقزقه

:) بأمانه انا عاجبنى اوى المنتج ده , ولو ب 50 جنيه حلال فيه الفلوس ...

* فى حاجه تانى ممكن تنفع فى موضوع المرايات والاجزاء السودا.. الفوم بتاع العجل بس انا مجربتوش بنفسى + انه اغلى من المنظف التابلوه الارمور اول ...........و اخونا كربتونكس كان كاتب ممكن البيبى اويل .... او الزيوت المخصصه لبشره الطفال :):).

* حرجع تانى لتلميع التابلوه :- لاحسن نتيجه فى تلميه التبلوه .. استعمل فوطه قطنيه... اهم حاجه تكون ناعمه ويكون حجمها كثيف نوعا ما .. بتفرق عن الفوطا الصفرا العاديه لانها بتكون انعم .

[tayson54]

الف شكر انا هدور عليه واجيبه لاني عندي كام حته كده متسخه كده عايز اطلعهم ...
انا برده معاك ان المنتج ده حلال فيه الفلوس فعلا رائع ما شاء الله وانا بحترم جدا كل منتج بيعمل كل اللي مكتوب علي الكيس بمنتهي الصرامه والتحديد بيبقي شئ موثوق فيه اوي الحقيقه ...
بالنسبه لتلميع الحتت البلاستيك الخارجيه بالفوم بتاع الأطارات انا كمان عمري ما جربتها لكن الفوم ده بيدي نتيجه هايله علي الأطارات فعلا لكن افضل نخلينا في المنتج اللي مكتوب عليه انه بتاع بلاستيك لا يكون الفوم ده له تاثير سئ في المستقبل ولا حاجه.
وانا هجرب ارمراول اللي بيترش علي البلاستيك الخارجي وهقول لكم علي النتيجه لكن بعد كام يوم لما ادرس تأثيره فتره بحيث كلما نستفيد من تجربه عمليه

وبالنسبه لتلميع التابلوه بعد الرش انا بستخدم فوطه فيبر بحس انها حتي انعم من القطن وهي كمان مخصوصه للتلميع يا تري جربتها قبل كده ؟

[MohabSaeed]

الفوطه الفايبر انا جبتها فعلا و جبت الفوطه التركى بتاعت الازاز" الى ليها ملمس فوطه جلد الغزال ... , بس مستعملتش الفوطه الفايبرعلى التابلوه الحقيقه ... انا مخلي الفوطه الفايبر ديه لتنظيف العربيه من الخارج بس .

**سؤال بره الموضوع . محدش يعرف التوكيل بتاع ارمور اول فى القاهره .... او مكان بيبيع كل منتجات ارمور اول ؟؟

علاشان عاوز اجيب فوم كاوتش و ملمع تابلوه و واكس و منظف فرش ...من الماركه ديه تحديداً . كارفور فيه واكس بس , و الملمع لقيته فى بنزينه امارات مصر
فى كمان اكياس فيها مناديل لتنظييف الايدين " برده من ارمور اول " عاوز اجيبها .............. انا شكلى كده حفتح كار كير فى العربيه

[tayson54]

اصل الفوطه الفايبر اللي عندي -جبتها من كارفور- فيها حته كبيره بستخدمها للعربيه من بره وحته تانيه نصها كده بستخدمها للتابلوه .

لا الحقيقه معنديش اي خلفيه مين الوكيل هنا لكنه سؤال مهم جدا لكل محبي المنتجات دي ..نستنا ونشوف يمكن حد عند فكره