عاوز اجيب غطاء للعربيه

[mo_x5]

عاوز اجيب غطاء للعربيه و مش عارف اجيبه قماش و لا وتربروف و لا ايه بالظبط
انا كنت جايب وتربروف بس بيشقق من الشمس بسرعه و بيبقى بدون فايده بعد كده

عاوز اعرف رأى حضراتكم و هل فيه ماركه معينه معمره ؟

[midooo_119]

القماش ارخص لكن هيلم تراب و هيقرفك الوتر بروف بيمنع التراب انه يوصل للعربية و اغلى

[هيثم]

القماش

[wardet]

القماش احسن
تقريباًَ السبتيه هتلاقى فيها بالهبل
وفيه واحد بيقف عند طلعة الدائري وانت جاى من ميدان لبنان وواحد بيقف قدام دريم لاند على طريق الواحات
وفيه برضه على الاسكندرية الزراعى وانت جاى من القاهرة بعد قليوب

[Neat]

فى غطا أسمو "قلع مركب" خامتو عامله زى القماش كده بس هو مش قماش. هو بيلم تراب بس بيأدى نفس وظيفة الوتربروف. وطبعا مش بيتشقق ويتقطع زي الوتربوف.

[abdulhafeez]

في واحد بيفصل غطيان للعربيات بس شغله حلو
موجود في شارع البحر الاعظم ... الوتر بروف كان ب 120 ج بس كانت اسبيرانزا 620 ( يعني حجمها كبير قوي )
والقماش كان ب 70 ج
ولو مش عنده ممكن يفصل للعربية مخصوص

[mo_x5]

فى غطا أسمو "قلع مركب" خامتو عامله زى القماش كده بس هو مش قماش. هو بيلم تراب بس بيأدى نفس وظيفة الوتربروف. وطبعا مش بيتشقق ويتقطع زي الوتربوف.

و ده ممكن الاقيه فين و سعره كام

[Neat]

و ده ممكن الاقيه فين و سعره كام

حضرتك منين؟

[mo_x5]

انا ساكن فى الشيخ زايد

[CaptaiN-AhmeD]

بصراحه مش بقتنع باقتناء الوتر بروف غير في المدن الساحليه وخاصة اسكندريه في الشتاء
وفي القاهره والمدن الحاره صيف وشتا القماش خصوصاً لو بتركن عربيتك في الشارع (في نظري بيمنع الاحتكاك لحداً ما ولو بسيط وحصلت معايا مره نازل من العماره هركب عربيتي ببص لقيت بنت بتحاول تركن ورايا حكت ف عربيتي من الجنب شلت الغطا ملقتش ولا خربوش ولا تجريح ولا الصاج دخل لجوه والحمد لله علماً بأن لو عجله حكت في اي جنب للعربيه انت عارف هيحصل فيها ايه لو مفيش غطا قماش )

[CaptaiN-AhmeD]

لكن لو جبته وانت من سكان المدن الي مش ساحليه (القاهره وغيرها)
مش بحس ان الووتر بروف ليه اي تلاتين لزمه غير انه بيتشقق من الشمس ياأما بيتسرق وكده كده بردو العربيه بتتمسح بالزفرا موضوع التراب دا مش معضله يعني

[mesaharaty]

يوم الجمعة الماضى نزلت أشترى غطاء قماش فلقيت كل اللى فى السوق نظام سوقى تعبان جدا وخفيف زى الشاش (لقيته بـ 75 جنيه قبل الفصال) طبعا كبرت فى دماغى وماشتريتوش وصممت إنى أعمل واحد عمولة تفصيل فنزلت اشتريت القماش اللى على مزاجى (12 متر بسعر 12 جنيه للمتر) وفيه راجل أنا عارفه بيشتغل فى الخيام والتند جه خد المقاس على العربية وحيفصل لى الغطا والإستلام بكرة إن شاء الله .
طبعا كده الغطا حيخش فى 200 جنيه مثلا بس طبعا انت اخترت القماش واللون والعمولة عمولة .
يارب بقى يطلع حلو ومايحتاجش تعديل .

[shakota]

اسمه ايه الل ف البحر الاعظم

في واحد بيفصل غطيان للعربيات بس شغله حلو
موجود في شارع البحر الاعظم ... الوتر بروف كان ب 120 ج بس كانت اسبيرانزا 620 ( يعني حجمها كبير قوي )
والقماش كان ب 70 ج
ولو مش عنده ممكن يفصل للعربية مخصوص

اسمه ايه الل ف البحر الاعظم

[Neat]

انا ساكن فى الشيخ زايد

أنا كنت جايبو من المنصورة. كان عامل فى حدود 160. ممكن تسأل حد بتاع اكسسورات واديك عرفتو اسمو "قلع مركب"

[mesaharaty]

الحمد لله الغطا القماش طلع تحفة وكأنه بدلة تفصيل (هو كان واخد المقاس على العربية نفسها) والراجل عمل له من تحت بعرض العربية حزام بعروة علشان يبقى محكم ومافيش هوا يوقعه طبعا ده غير الحزام التحتانى اللى ماشى بداير العربية ومكان للمرايات.

التكلفة الكلية (وأنا مبسوط ) 185 جنيه بس يضرب السوقى على قفاه .