تجربة شراء obd من الصين

[Ramy_2R]

السلام عليكم
كنت قريت من فتره هنا على المنتدى عن موضوع ال Obd و ان في انواع منه بتشتغل على بلوتوث الموبيل

لو حد ميعرفوش حيلاقي معلومات عنه هنا
On-board diagnostics - Wikipedia, the free encyclopedia

الموضوع نسيته لحد ما شوفت إعلان على الفيسبوك بيبعة بمبلغ يبدأ من 300 جنية تقريبا
حسيت السعر غالي عليه
لقيته على سوق بحدود 150 جنية تقريبا
حسيته غالي عليه برضه

دورت على ملجئي في الحالات دي
و هو المواقع الصينية

لقيت انواع كتير على aliexpress.com
أعجبت بواحد فيه زرار بلوتوث و حجمة صغير و تقيماته كويسة على المواقع الأجنبية


سعره كان حدود 45 جنية مصري
و الشحن مجاني



كان مع الشحنة رقم تتبع و ممكن تتبعها عن طريق موقع البيدهولك البايع او كذا موقع تانين أشهرهم

17track.net
track-chinapost.com

شحنته و وصل في حدود شهر و يعبر أتأخر لأن راس السنه الصينية كان في النص

و زي ما حنلاحظ في الصورة البريد المصري معلم عليها و فتحها عشان يشوف الجواها


تكلفة الجمارك و المصاريف حدود 25 جنية
هي المفروض تكون أقل من كده بس اتعودنا من الجمارك على التقدير الجزافي ف الحمد لله جت على كده رحمه بالنسبة لتعاوير تانية لبستها :D

يعني التكلفة الاجمالية حدود 70 جنية

مميزات الموضوع :
سعر أرخص بكتير
تجربة لذيذه يعني انك تتبع الشحنه و لهفة تلقيها و إثارة الخوف من تقدير الجمارك
التعامل بيكون مع المواقع دي أمن

العيوب :
ممكن تلبس في الجمارك
ممكن تطلع مش شغاله بس حتسترد فلوسك إن شاء الله
لازم يكون معاك كارت نت للشراء
طول مدة الانتظار

بالنسبة لل OBD :
هو أختراع ظريف و ببين حاجات مش باينه في العداد بس متتوقعش منه الكثير
عموما انا لسه بجربة يعني

[aymanshebl]

مبروك

[Anaslbda]

تجربة جميلة,
مكن تفاصيل اكتر بخصوص عملية الشرا نفسها؟ منين كرت النت ده؟ المعظم مبيشحنش لمصر اتصرّفت ازاي؟

[shake]

متا بع

[Mostafa Hessen]

ياريت تقييم عن الجهاز

[Fawzy.Abdelnour]

هى المشكله لو العربيه متقبلوش.
انا جبت واحد بس مرضيش يشتغل على اللانسر 2006.
بس تمام على بقيت العربيات.

[matrix_it]

انا اشتريت جراب موبايل من علي اكسبريس و لحد دلوقتي موصلش و مفيش جديد من 8 فبراير الشهرين قربوا يخلصوا و الجراب متحركش من مكانه و ابعت للبائع و شركة الشحن يحدفوني لبعض معلش انا طلعت عن الموضوع بس ممكن تساعدني ؟

[Ramy_2R]

مبروك

الله يبارك فيك

تجربة جميلة,
مكن تفاصيل اكتر بخصوص عملية الشرا نفسها؟ منين كرت النت ده؟ المعظم مبيشحنش لمصر اتصرّفت ازاي؟

في بنوك كتير بتوفر الكارت منها بنك مصر بيعمله ب 10 او 20 جنية تقريبا و بتودع فيه مبلغ زي ما تحب
بس اان شغال عن طريق ال atm بتاعة البنك الأهلي
روحتلعم فعلت عليها الشراء عن طريق النت و شغاله لوز

بس اتاكد من المواقع ال بتشتري منها و من الجهاز ال بتشتري منه ميكونش متهكر عشان متتسرقش

انا في الواقع لقيت المعظم بيشحن لمصر خصوصا في المواقع الصينية
و اان بعمل بحث اصلا بيكون هو محدد البدل المشحون ليها مصر فبيظهرلي الحاجات ال بتتشحن لمصر
و لو غلبت في أي خطوه انا معاك

[Ramy_2R]

ياريت تقييم عن الجهاز

هو الجهاز مفيهوش جديدي يعني
بيعرضلك بعض قرائات الحساسات ال مش بتشوفها في التابلوه
زي فولت البطاريه و الماف و الحرارة بالظبط و غيره حسب عربيتك بتدعم ايه
و المفروض يعرض أكواد المشاكل
لكن ده لسه مجربتوش لاني معنديش اكواد مشاكل ظهرت

[carrier]

تمام يا باشا

[akmm]

شكرا لنقل التجربه ........................

[enayat]

اشتريت جراب تابلت ملقتوش في مصر من علي اكسبريس والدنيا تمام وشحن مجاني كان سعره ٩ دولار والبائع حب يخدمني من غير ما اكلمه كتب ان سعره ٥ دولار تخيل الجمارك حسبت جمارك كام؟
٦٧ جنيه ليه ؟ بناء علي ليه ؟ مش عارفه

[Ramy_2R]

هى المشكله لو العربيه متقبلوش.
انا جبت واحد بس مرضيش يشتغل على اللانسر 2006.
بس تمام على بقيت العربيات.

هو اعتقد لازم تعمل بحث قبليها على نوع ال obd ال يشتغل على عربيتك
و اديه ينفع لو جبت عربية جديدة :D

[Ramy_2R]

انا اشتريت جراب موبايل من علي اكسبريس و لحد دلوقتي موصلش و مفيش جديد من 8 فبراير الشهرين قربوا يخلصوا و الجراب متحركش من مكانه و ابعت للبائع و شركة الشحن يحدفوني لبعض معلش انا طلعت عن الموضوع بس ممكن تساعدني ؟

بص في الحالة دي افتح شكوى
حتلاقيها هنا


حصل معايا حاجاة برضه مكنتش راضي عن السلعة و طلبت استرجاع نص التمن و المفروض بيرجع

[Ramy_2R]

شكرا لنقل التجربه ........................

العفو يا كبير

اشتريت جراب تابلت ملقتوش في مصر من علي اكسبريس والدنيا تمام وشحن مجاني كان سعره ٩ دولار والبائع حب يخدمني من غير ما اكلمه كتب ان سعره ٥ دولار تخيل الجمارك حسبت جمارك كام؟
٦٧ جنيه ليه ؟ بناء علي ليه ؟ مش عارفه

وده العادي من الجمارك
الراجل مش بيقتنع ب مبلغ المكتوب فبيفدر هو المبلغ ال يعجبه
حصل معايا موقف مشابه كنت جايب جراب و معاه قلم تاتش و سكرينه
تمنهم حدود 120 جنية جايين من المانيا
دفعوني 80 جنية جمارك

و مره جبت حاجة ب نص دولا حسبولي جمارك حدود 30 جنية تقريبا
دي مستلمتهاش :d

ف الموضوع مجازفه إلى حد ما يعني