امكانية تركيب حساس الركن

[امجد مروان 454]

السلام عليكم
كنت عايز أعرف ايه اللی يحدد ان العربية ينفع يتركبلها سنسور بارك وكاميرا خلفية او ﻷ؟
اقصد لازم العربية تكون مجهزة لتركيب الحاجات ده ولا حسب سنة الصنع.اصل انا عندی عقدة فی الركن بالنسبة للجزء الخلفی للسيارة ودايما مبعرفش اقدر المسافات الخليفة اما اسيب مسافة كبيرة او اخبط.
وبناء عليه هل ينفع يتركب للانوس او ياريس 2007 او ماتربكس 2007 كذلك ؟

[ahmedkasem]

ينفع يركب لاي عربية
بس لو العربية لسه في الضمان يبقى تسأل في التوكيل الاول لانك بتحتاج تخرم في الاكصدام عشان تركب الكاميرا والحساسات وده ممكن يخرج العربية من الضمان

[امجد مروان 454]

ينفع يركب لاي عربية
بس لو العربية لسه في الضمان يبقى تسأل في التوكيل الاول لانك بتحتاج تخرم في الاكصدام عشان تركب الكاميرا والحساسات وده ممكن يخرج العربية من الضمان

مش مهم الضمان بس فعلا ينفع؟وافضل مكان للتركيب فين والسعر فی حدود كام؟

[baherhassan30]

هتكلم عن الحساسات
بتركب لاي عربية حتى ولو 128
ولو انت فاهم شوية ممكن تركبها بنفسك
الموضوع غاية في البساطة
كل الحكاية هتخرم الاكصدام بالشنيور .. وبيجي مع الحساسات القطعة اللي بتخرم بيها
او التوصيل
بتركب الجهاز داخل فرش الشنطة وبياخد كهرباء من لمبة المارشدير - على اساس انك اول ما تجيب المارشدير الحساسات تشتغل .
وفيه سماعة بتركبها عند السماعات الخلفية
وفيه اجهزة حساسات بيكون فيها شاشة .. بتوصل سلكها لغاية التابلوه الامامي .. وبس كده
وللمعلومية : اي كهربائي شاطر يركبها
افضل الاجهزة :
انا قريت ان اجهزة سباي واي كويسة جدااا .. ناس كتير بتشكر فيها
بصراحة لسة مجربتهاش ولكن ناوي اركبها عندي ان شاء الله

[Abo_Mazen]

هي بتركب للسوزوكي فان ..عارفها ..السوزوكي فان اللي مفيهاش غير محرك وكراسي وشاسيه ..بيتعملها سنسور بارك وكاميرا خلفية

[امجد مروان 454]

جزاكم الله خيرا علی الافادة

[pepo2011]

طبعا بتركب في اي عربية وهي انواع واسعار كتير وممكن اي كهربائي يركبها