ممكن مساعده حول قطر سماعات السويفت والزينون

[aymoonoo]

انا نازل الإمارات على اول الشهر الجاي وانشالله هجبلي حاجات من هناك بس عندي شوية استفسارات لذو الخبره انا عندي عربيه سويفت موديل 1993 وهجيبلها sound system بس انا مش عارف قياس السماعات الي قدام هما 13 ولا 14 ولا 15 ممكن حد يقلي وحاجه كمان انا ناوي اركب زينون اجيبو من بره ولا من هنا ؟!كلهم بيقولولي هناك انضف بس برضو مش عارف انا هوا المفروض نوع معين ؟ ولا لو جيت اي حاجه هتركب عشان مش عايز اجيب حاجه ومش تركب وعايز اعرف هوا في زينون درجات يعني ممكن تلاقي واحد يعمي الواحد لما تنورو وفي منهم عادي مش بيأثر هوا ده بيعتمد على ايه؟؟ يا ريت حد يفيدني وشكرا

[momo10000]

بالنسبة للزينون .. هات من هنا عشان يبقي الضمان جنبك ... كل اللي في الامارات برضة صيني بس نظيف شويه.

[aymoonoo]

اه بس انا موضوع الضمان مش مشكله انا بروح هنااك كتير بس معنديش اي فكره هناك صيني ولا لأ ,طيب هوا ايه الي بيخلي الزينون يبوز؟ معندكش اي فكره عن السماعات ؟

[magyver]

اللسي بيخلي الزينون يبوظ الترعيش الكتير

[aymoonoo]

فين يا جماعه هوا محدش يعرف حاجه عن الموضوع ده ولا ايه ؟ انا مش شايف غير اتنين ؟! ممم الي يعرف اي حاجه مفيده يقلها وشكرا للتعاون

[KoDaK_Gti]

لو اللمبة عندك فى الفانوس عالى وواطى يبقة هات زينون H4 وده مقاس اللمبة عندك
وتقدر تفكها اللمبة عند اى كهربائى وهو يقولك دى قعدتها مقاس ايه
وبالنسبة لقوة اضاءة الزينون مش هتحس باختلاف كله زى بعض تقريبا
وكله صينى حتى لو محفور عليه المانى بردو صينى
ومن الاسباب اللى بتخلى الزينون يبوظ :
انك تدور العربية وهو شغال
او ييجى مية على المكنة بتعته
او تمسك اللمبة بايدك ممكن تتحرق
او ترعش كتير كل ده بيبوظه
ولو هتجيب من بره اسأل على زينون الهيللا Hella ماركة محترمة فى الخليج
والاختلاف بيكون فى درجة اللون فقط وهتلاقى كل علبه مكتوب عليها 8000 كيلفن او 6000 او اكتر او اقل
ودى صورة توضيحية لدرجات الالوان


اما بالنسبة للسماعات الامامية للباب عندك اعتقد انها 10 سنتى ومش متأكد
قبل ماتشترى فك القديم وانت هتعرف طالما كده كده هتغيرهم

[MohaMed_Refaat]

حسام باشا كوداك هو موش الزينون Hid Plus كورى وليس صينى ؟؟

[KoDaK_Gti]

ايوة هو الوحيد الكورى والراجل عاوز يجيب زينون من الخليج
لو جابه من هنا هيكون احسنله بس هو مصمم ومعتقدش هيلاقى بلاس هناك

[Jato.33]

بص يا باشا
أولاً : تروح وترجع بالسلامة إن شاء الله
ثانياً : أنا معايا نفس العربية بتاعتك
فيها سماعتين صغيرين جداً راكبين في حتة وحشة أوي في التابلوة هتلاقي هوايتين كده جمب الباب السماعتين تحتهم لا يتعدى قطرهم 5 سم بالكتير وشكلهم وحش

بالنسبة لسماعتين ورا برده صغيرين جداً جداً وعشان تجيب سماعات كويسة ويكون الواط بتاعها عالي هتلاقيها يا إما بيضاوية وكده تحتاج تقطع في الصاج ورف خشب عشان تركبهم (وده ما يُنصح بيه) أو تستخدم علايات ودية شكلها مش حلو
أو لو عايز تجيب سماعات مدورة مش عارف هتلاقي نفس القطر بتاعهم ولا لأ وأعتقد لأ
لأن قطرهم صغير جداً لا يتعدى 10 سم
الخلاصة حاول تعرف بالظبط قطرهم كام خش على أي محل بتاع سماعات وخليه بس يبص عليهم وهوا هيقولك علطول
لو لاقيت بره سماعات في نفس المقاسات الصغيرة دية وقدرتهم كويسة وماركتهم محترمة يبقى تمام
بالنسبة للأسعار
أنصحك تشتري من هنا لأن الحاجة هنا في منها تايلاندي ولسه الصيني ما إنتشرش أوي وبالضمان وفروق الأسعار بين هنا وبره مفيش فرق كبير
متنساش كمان إنك معندكش سماعات في الأبواب ولو عندك متنساش تعمل حسابهم
وفي ناس قالتلي لوهتركب ورا سماعات يبقى لازم تفصل السماعتين قدام عشان ميعملوش صوت وحش مع بعض

ده بالنسبة للصوت

بالنسبة للزينون
أنا مفهمش فيه أوي بس أصلاً خد بالك إن ميركبش عندك غير على العالي لأن معندكش لمبة واطي في الفانوس الأمامي الكبير والفانوس الجانبي صغير أوي ومش هينفع تركب فيه عدسات طبعاً يبقى كفاية عليه لمبة تلجي هتخلي شكله حلو
وكمان لو ركبته عالي هيضايق جداً الناس إلي قدامك لأن الفانوس الأمامي للسويفت عريض وسطحه واسع عشان كده هينشر الضوء بصورة مبالغ فيها جداً
يبقى إنتا محتاج فوانيس أمامية جديدة جاهزة بعدسات للواطي والعالي عشان لما تركب عليها زينون تبقى تحفة
هنا في مصر ممكن تودي الفانوس يتعدل عند ناس معينة تعملك الشغل ده بس هياخدوا كتير
لو لاقيت فوانيس هناك ممكن تركب على السويفت بعدسات هاتلك طقمين تلاته وما أعتقدتش هتلاقي لأنهم أصلاً ميعرفوش السويفت القديم
لو عايز تجيبلك تارة سبور بس تتأكد إنها تركب عندك يبقى 100%
أو تشوفلك فلتر هواء سبور ماركة نضيفة يركب على الكاربراتير يبقى تمام عشان الأنواع النضيفة في مصر شغاله إنجيكشن بس مش عارف هتعرف تجيب جنوط ولا لأ
ممكن كمان تجيبلك شوية أكسيسوريز خفيفة تتعلق في العربية أو عدادات أو مقبض للفتيس تحفة إنتا وذوقك بأه
عموماً ربنا يوفقك ويجيبك بالسلامة

[aymoonoo]

تسلمو واللهي تعليقا علىkodak هوا يعني في قياسات لزينون اصلو انا كنت فاكر اجيب اي حاجه وتركب كويس انك قلتلي وبعدين تعليقا علىjota 33 انا عندي سماعات بيضاوي صاحب العربيه القديم كان عاملهم فانا هشيل القديم وحط جديد وعن السماعتين الي قدام انا عندي وحده شغاله ممتاز بس التانيه ضعيفه وبالنسبه لللإكسسوارات انتا ايه رايك ايه ممكن اجيب انا مش عارف ايه صغير ممكن يتجاب ورخيص وعلى فكره المبه الي عندنا فالعربيه هيا واطي وعالي مع بعض عشان الزينون لما بيركب عالواطي والعالي قصدو هوا الفانوس الكبير الدرجه العاديه والعاليه ملهمش فالدرجه البسيطه انا ده الي فهمتو من الناس ذو الخبره المفروض وبعدين يا kodak انا مش مصر اني اجيب من هناك دي حاجه واقعيه انه هناك حاجات نضيفه ونفس سعر هنا اوو ارخص بحبه بسيطه وبعدين الضمان مش يفرق يعني قوي انا عندي ناس هناك ابعتهم لو حصل اي حاجه
بس ما قلتوليش اجيب سماعات نوع ايه والكاسيت ايه فيدوني بخبرتكم وشكرا ليكون كولوكو

[KoDaK_Gti]

بردو اتأكد من مقاس اللمبة عندك علشان انا مش متأكد
وبالنسبة للسى دى هات بايوينر 6050ub ده هنا تقريبا فى حدود 1200 جنيه
والسماعات للأبواب هات بايونير ولو هتجيب خلفى هات كينوود او بايونير 460 وات بيضاوى

[Jato.33]

أي طارة من دول تقابلك هاتلك منها 2 علطول
واحدة ليك وواحدة ليا

بس متزدش عن 500 جنية







وكمان فلتر الهواء زي ده كده أقصد مش نفس النوع أنا بس عايز أعرفك شكله
لو لاقيت منه K&N هات منه 2 برضه زي إلي فات



ولو مقبض فتيس شيك زي إلي في الصورة الأخرنية كده يبقى تمام

وطبعاً إعمل حسابك على جي إم كينوود كمان أو زي ما يقول حسام باشا
ولو لاقيت سماعات بيضاوي أكبر من 500 وات هات

متنشاس تسأل على الأسعار قبل ما تسافر ليكونوا هنا أرخص بعدين تندم وبالتوفيق وألف سلامة

[aymoonoo]

واللهي مش عارف يا جماعه ا قولوكو ايه انا اكيد انا نزلة التوفيقيه يوم الحد عشان كنت فاضي وبعد معلقة فالزحمه والقرف اكتشفت انهم اجازه هلاقي يوم تاني انزل عشان ا سال على حوار الزينون والأسعال والساعات عشان لو هنا نفس السعر ونفس الماركات هجيب من هنا وخلاص ليه الغلبه دي كلها والف شكر يا جماعه تسلمولي وشكرا على المساعده دي

[aymoonoo]

هوا ده البايونير الكاسيت ايه نزامو dvd ولا VCD ولا ايه انا محتار اجيب DVD ولا لأ اصلو بقول ملوش عازه غالي عالفاضي انا اخري MP3 واغاني وكده ممكن بعدين لو حبيت اشغل افلام بس ممكن ميكونش على العربيه دي عشان كده محتار انتو ايه رأيكو؟وعالسماعات هوا البايونير الياباني اخرهم حسب مانا سالت واتذكر والله اعلم كانو اخرهم 480wat وكان الكنود ماليزي في منهم 500 WAT ده لما جبت للجماعه في شهر 9 انا هجيب اعلى حاجه ويمكن لو عرفت اجيب صب هجيب معايه بس المشكله الحجات دي ثقيله ههههههههههه فالطياره هع هع هع هشوف ربنا يسهل وتسلمولي بجد

[aymoonoo]

طيب سؤال يا jato هوا انتا جبت كام فعربيتك انا جبت 140 بس مش قادر اجيب اكتر عشان انا عايزلي وزن وضبط زوايه وسؤال تاني انتا عندك مكانيكي شاطر وبتاع عفشه و كهرباءي والحوارات دي بيفهم للعربيه ؟؟بس انا مضايق اوي عشان لما ركب معايه واحد من صحابي العربيه يدوبك جابت ال100 وبس عشان الطريق كان مايل لتحت عرفت اطلع لل120 يا ترا ليه كده؟