مرايا بلوتووث وباركينج سينسور

[Ahmed Sharaf]

ركبت امبارح باركينج سينسور وعايز اقولكم علية :
لانى لغاية دلوقت مش عارف اركن العربية كويس واللى يشوفنى وانا باركن يقول دة بيتعلم جديد وانا اساسا بسوق بقالى 24 سنة وكويس الحمد لله علشان كدة اشتريت المراية دى ( بلوتوث ) وركبت كاميرا فى الاكصدام ومميزات المرايا كالآتى :
1- تشوف الصورة حية خلف العربية وانت بتركن .
2- الشاشة 7 بوصة وواضحة جداً.
3- ممكن تتحكم عن طريق الشاشة - تتش - أو الريموت بتاعها فى درجة نقاء الصورة أو الالوان .
4- ممكن تتوصل بكاسيت دى فى دى .
5- بتشتغل بالبلوتوث على الموبايل يعنى لو حد كلمك بتدى نغمة وبيظهر رقم الطالب وبتسمع صوتة فى سماعة المراية وراكب فيها مايك زى الصورة وكمان بتبين الميسد كول.
6- كمراية هى واضحة جداً ومايلة للغمقان شوية لكن تحفة لو حد منور اضاءة عالية او زينون وراك ( كأن حد منور بطارية ).

انا جبتها من سبير كار وكان سعر المراية والكاميرا بالتركيب 540 جم.

[أبو إياد]

الف مبروك وفعلا هى عمليه وشيك

[islamnabil]

ممكن حضرتك تقولنا ايه اخبار الريسوليوشن بتاع الكاميرا
يعني الصورة يتبقى واضحة ولا ايه النظام ؟
وشكرا

[zocor742]

طيب عندى كام استفسار كدة هيا المراية دى بتكون مراية عادية لو مش مشغل الباركين سينسور ولا وانت ماشى الكاميرا بتبقى شغالة وبتصور الطريق خلفك وبتنقلها على الشاشة ولا الشاشة بتشتغل فقط وانت بتركن
ارجو من حضرتك التوضيع واكون شاكر لحضرتك

[Ahmed Sharaf]

ممكن حضرتك تقولنا ايه اخبار الريسوليوشن بتاع الكاميرا
يعني الصورة يتبقى واضحة ولا ايه النظام ؟
وشكرا

الصورة واضحة بنسبة 100% صباحاً وبنسبة 85% مساء

[Imhotep]

السعر ايه و منين يا باشا.......

[Ahmed Sharaf]

طيب عندى كام استفسار كدة هيا المراية دى بتكون مراية عادية لو مش مشغل الباركين سينسور ولا وانت ماشى الكاميرا بتبقى شغالة وبتصور الطريق خلفك وبتنقلها على الشاشة ولا الشاشة بتشتغل فقط وانت بتركن
ارجو من حضرتك التوضيع واكون شاكر لحضرتك

المراية عادية جداً لكن اول ما تنقل الفتيس ريفيرس تشتغل الكاميرا وتنقل الصورة فى المراية , واول ما ترجع الفتيس فى اى وضع تانى ترجع تشتغل مراية عادى.

[Ahmed Sharaf]

السعر ايه و منين يا باشا.......

540 جم بالتركيب ( تقريبا التركيب بياخد فى حدود ساعة ) وجبتها من سبير كار فى باب اللوق.

[dr_darsh]

ألف مبروك ياباشا
ماشاء الله جميله وبسعر جميل

[zocor742]

المراية عادية جداً لكن اول ما تنقل الفتيس ريفيرس تشتغل الكاميرا وتنقل الصورة فى المراية , واول ما ترجع الفتيس فى اى وضع تانى ترجع تشتغل مراية عادى

شكرا على التوضيح يا باشا اعتقد انها سهلت عملية الركن بنسبة كبيرة
ياترى فية منها اشكال مختلفة وانواع مختلفة والاسعار تتراوح من كام واعلى نوع كان فية مميزات اكتر ولا كلة امكانيات واحدة

[Ahmed Sharaf]

المراية عادية جداً لكن اول ما تنقل الفتيس ريفيرس تشتغل الكاميرا وتنقل الصورة فى المراية , واول ما ترجع الفتيس فى اى وضع تانى ترجع تشتغل مراية عادى

شكرا على التوضيح يا باشا اعتقد انها سهلت عملية الركن بنسبة كبيرة
هى فعلا سهلت فى الركن بس هتاخد وقت على ما تتعود عليها , اول ماجيت استخدمها حسيت ان العربية اللى ورايا بقت خلاص على الكنبة ورايا
ياترى فية منها اشكال مختلفة وانواع مختلفة والاسعار تتراوح من كام واعلى نوع كان فية مميزات اكتر ولا كلة امكانيات واحدة

فية شكلين بس , والنوع التانى كان بـ 800 جم المراية فقط ولما سالتة لية غالية قاللى علشان فيها بلوتوث , قلتلة دى كمان فيها بلوتوث طلع انة مكنش يعرف مع انة مكتوب على العلبة وكمان الكتالوج مكتوب فية
الشكل التانى كان شبة دى

[bmw323]

طيب حضرتك مفيش مراية فى ألى فى الشكل الثانى كاركيت بلوتوث بس من غير سينسور ياريت لو حضرتك تقولنا على سعرها
لأنى شوفتها عند واحد صديق مركبها وكانت زى الشكل الثانى بالظبط بس من غير سينسور بلوتوث فقط ولما حد بيتصل بتنطق الرقم

[Ahmed Sharaf]

طيب حضرتك مفيش مراية فى ألى فى الشكل الثانى كاركيت بلوتوث بس من غير سينسور ياريت لو حضرتك تقولنا على سعرها
لأنى شوفتها عند واحد صديق مركبها وكانت زى الشكل الثانى بالظبط بس من غير سينسور بلوتوث فقط ولما حد بيتصل بتنطق الرقم

هى فعلا من غير سينسور لان الكاميرا دى اوبشن , بس انا دلوقت مروح من الشغل هعديلك عليهم واسأل واقولك ان شاء الله.

[bmw323]

هى فعلا من غير سينسور لان الكاميرا دى اوبشن , بس انا دلوقت مروح من الشغل هعديلك عليهم واسأل واقولك ان شاء الله.

شكراا يافندم على اهتمامك معلش هتعب حضرتك معايا

[Ahmed Sharaf]

شكراا يافندم على اهتمامك معلش هتعب حضرتك معايا

مفيش تعب او حاجة , سألت لحضرتك امبارح , وطلع انها بـ 890 جم وعليها خصم 20% وانها عبارة عن مراية + كاميرا للباركينج وبلوتوث وإظهار رقم الطالب لكن للأسف مفيهاش خاصية سماع رقم الطالب , حتى قولتلة كل المواصفات دى عندى بـ 500 جم قاللى ان الفرق الوحيد ان اللى بـ 800 جم عليها ضمان ( طبعا كلهم صينى ) ارجو اكون قدرت افيدك.
تقبل تحياتى