استفسار بالنسبه لمحلات الاستيكرات

[nour2019]

السلام عليكم يا شباب
ده اول استفسار ليا هنا و اتمنى اني اكون عضو فعال في المنتدى الجميل بتاعكم ده
المهم
انا معايا فيات 132 بيضا 1600 و كان عليها استكير سبورت ريس جاي من المانيا من 12سنه و مش عارف الاقيه في اي حته عشان اتحرق من عليها بس كنت عايز اركب حاجه جامده تاكل معاها و تخلي شكلها حلو بس مش عارف محلات استيكرات كويسه و كل ما انزل التوفيقيه مش بلاقي حاجه عدله و كله شغل نص نقل و ميكروباص و الحاجات الستايل الكويس بتطلع محلات جمله بس فكنت عايز منكم يا جماعه اي حد يعرف محل استيكرات بس يكون جامد و مفرتك يقولي عليه و مكانه فين و اروحله ازاي و لو يديني فكره عن اسعاره يبقى كتير خيره عشان الشباب كلها مقشفره اليومين دول و شكراً مقدماً يا شباب

[nour2019]

معلش يا جماعه انا اتلخبطت و حطيته في قسم التعديل بدل قسم الاكسسوارات ... لو حد من المشرفين يتكرم و ينقله يبقى متشكرين اوي و معلش على اللخبطه

[bmw323]

عندك بيسو للكماليات دا فى العمرانية جمب مسجد خاتم المرسلين
عندة تشكيلة حلوة وممكن تطلب منة استيكر عمولة أى شكل انتا عاوزة

[theking2690]

مكتبة ابراهيم اللى فى شارع دمشق ده اشهر واحد فى الموضوع ده

[Haitham10]

سؤال ياجماعة هي الاستيكرات باي شكل وحجم واي كان مكانها بقت ممنوعة اكتر من الاول بكتير؟

[zocor742]

ممكن حضرتك تختار التصميم والشكل الى انت عيزة وتروح لحد يسحبة على اسكانر ويعملهولك زى ما انت عايز وبالخامة الى تختارها وفى ناس كتير شغالة فى المجال دة بس معرفش حد فى القاهرة عشان انا من الاسكندرية

[nour2019]

الف شكر يا شباب على الردود و ياريت لو اي حد عارف اي حاجه يقولنا عليها و اهي فايده لينا كلنا

[bmw323]

أنت لو تعرف ترسم شكل الأستيكر دا كويس ممكن تعمل زية عمولة بسهولة جدا