Tweet
رجالة نايل موتورز ,, اخباركم ؟؟
اكيد معظمنا ركب عدد صوت قبل كدة في عربيته , سواء كان مركب صبات , بوازيك او حتى جي امات للسماعات
لكن هل حد فكر قبل كدة مدى اهمية السلوك والوصلات اللى بتستخدم للتركيب ؟
هل حد فكر ان مجرد تغيير السلوك والوصلات بوصلات انضف ممكن يضاعف الصوت لاكتر من اربع اضعاف !!! ؟؟
ده اللى انا جاي اتكلم معاكم فيه النهارده بالصور وبالفيديو لعدة الصوت في عربيتي قبل وبعد تغيير السلوك والوصلات
الوصلات اللى مستخدمة في تركيب عدد الصوت تتكون من التالي :
1- سلك باور : وده بيوصل الجي ام بموجب بطارية العربية
2- سلك ارضي : وده بياخد كهرباء ارضي من اي مسمار في العربية
3- RCA : ودي وصلة بتبعت الاشارة من الكاسيت للجي ام
4- سلك Remote : وده بيوصل الكاسيت بالجي ام بحيث ان الجي ام يبقى مربوط انه يشتغل ويطفي مع الكاسيت
5- سلك سماعات : وده بيوصل الجي ام بالكويل بتاع الصب او البازوكا
انا زيي زي اي حد بدأ في مجال الصوتيات بالوصلة الحقيرة دي
ادريان وغيره من المحلات بيبعها ب 120 جنيه وبعد مدة اكتشفت انها بتتباع بالفيوز ب 35 جنيه في التوفيقية !!
الوصلة دي فيها 5 متر سلك باور لونه احمر ومترين سلك ارضي لونه اخضر ووصلة ريموت لونها ازرق و RCA لونه ازرق
الوصلة دي انا كنت مركبها في عربيتي لحد ماركبت صب جديد Type r على جي ام بنش P400X1 ولقيت ان الجي ام مش قادر يقوم الصباية نهائيا !!!! وكنت مستغرب جدا لان الموديل اللى معايا موديل صبات Mono Block
كلمت مينا ( معانا هنا في نايل موتورز وتبعته معايا في الحوار ده جامد جدا ) حكتله على اللى حصل خصوصا انه معاه اخت الصباية اللى معايا قالي تعالي انا عندي جي ام سيمفوني قديم 600 وات وكان مقوم الصباية اللى عندي
تعالى نجربه ونشوف المشكلة فين !! رحتله وهو اللى اشار عليا باهمية السلوك وقالي ان السلوك اللى عندي تعبانة جدا
ومن هنا بدات رحلة البحث عن السلوك
نمسكهم سلك سلك كدة بالصور وبالاسعار واماكن الشراء
سلك الباور : اهم حاجة في سلك الباور انه يكون على الاقل 3 مل فيما فوق !! ويستحسن لو يكون 6 مل عشان تشتري دماغك
دور على نوع سلوك اسمه السويدي 6 مل شعر ,, انا جبته من محل في شارع نجيب الريحاني (جمب شارع التوفيقية عند سينما كوزمو) المحل اسمه Alpha هو صعب تلاقيه لانه بيتباع باللفة
هيقولك تشتري لفة كاملة 100 متر بس دور يمكن تلاقي محل عنده لفة مفتوحة يديلك منها
ده شكل السلك
زي ماحضراتكم شايفين اهم حاجة تاخد بالك من مقاس السلك اللى مكتوب 6mm
وده مقارنة السلك الجديد بالقديم (اللى هو موجود في الوصلة اللى قلت لحضراتكم عليها )
!!!!! ؟؟ اول كومنت هيجي في دماغك ؟ ياعم انت هتشتلغنا ؟ القديم الاحمر اكبر اهو واتخن ؟؟ يعني انت هتشيل التخين وتجيب الرفيع !! ؟؟؟
وده اللى معظمنا للاسف مش بياخد باله منها !!
يا استاذ ركز احنا يهمنا النحاس من جوة مالناش دعوة بسمك السلك الخارجي
نبص بصة كدة بقى على النحاس اللى موجود في داخل كل سلك
!! ؟؟ طبعا الصورة بتتكلم ؟؟ السلك الاسود (السويدي ال 6mm ) يكاد يكون اربع اضعاف السلك الاحمر ( اللي بيتباع في الوصلة )
ومش بس السمك بتاع السلك !! لا ده كمان جودة النحاس احسن وانضف
السلك السويدي ده صعب تلاقيه بس لو دورتو في شارع نجيب الريحاني هتلاقوه
هو بس مشكلته انه بيتباع باللفة بس فيه محلات بيبقى احيانا عندها لفة مفتوحة ممكن تاخد منها
سعر المتر : 6 جنيه
في حالة لو مالقتش السويدي دور على اي حاجة محملة تكون 6mm وتتاكد انه مكتوب على السلك من برة 6mm وتتاكد برضوا من النحاس الداخلي للسلك ومالكش دعوة بالسمك الخارجي
ده هتحتاج منه في حدود 8 او 7.5 متر هتستخدم حوالي 5 متر او 5 متر ونص للكهرباء والباقي للارضي
نيجي لتاني حاجة وهي وصلة ال RCA :
ودي تتجاب من راديو شاك ده شكلها
اسمها Gold Plated وسعرها 85 جنيه وطبعا دي بتفرق في انها بتضمنلك عدم وجود زنة وان ال preamp output بتاع الكاسيت (بالفولت) يروح كامل للجي ام بدون هدر في الطاقة
نيجي لتالت حاجة ودي مهمة جدا جدا جدا وهي السلك اللى بتوصل بيه الصبات من الداخل
او السلك اللى بيوصل من الجي ام للصب او البازوكا
95% من المحلات بيبوعو السلوك بتاعة السماعات العادية للصبات !! طبعا ارمي في الزبالة ولا هتنفع مع الصبات الشديدة نهائيا
هتنزل يا باشا شارع باب اللوق وهتدور في المحلات اللى هناك على سلك سماعات يكون 2.5 مل لكل فردة
ده شكله
اللى بالاحمر ده الجديد واللى جمبه القديم
انا استخدم الجديد اللى هو 2.5mm للفردة مجوز للصب !! فبقى كل كويل واخد الشكل التالي
وده شكل الصب بالتوصيل من جوة
السلك ده انا جبته المتر ب 8.5 جنيه , هو غالي حبتين بس انت كدة كدة مش محتاج منه الا 4 متر ولا حاجة ويمكن اقل كمان على حسب هتستخدمه مجوز ولا مفرد
فيه انواع اتخن كمان ,, انا لقيت نوع اتخن من كدة وكان المتر ب 14 جنيه بس للاسف الراجل مارضيش انه يبيع فرط !! قالي ببيع باللفة
اخيرا وصلة ال Remote :: دي مافيش فيها مشكلة اي سلك 1 مل هيفي بالغرض
كدة تقريبا اتكلمنا على انواع السلوك والاماكن اللى ممكن تشتريها منه
نيجي بقى للمهم والتجربة الفعلية خير دليل
ده فيديو للصب اللى معايا بالسلوك القديمة ( الوصلة ام 35 جنيه )
https://www.youtube.com/watch?v=rmCVF49bkOU
!! ؟؟ واضح ان الصباية اصلا بتتحرك بالعافية ومش مطلعة صوت
طيب نشوف بقى فيديو لنفس الصباية على نفس الجي ام في نفس العربية على نفس الكاسيت !!! مجرد تغيير السلوك فقط اللى اتغير
https://www.youtube.com/watch?v=T5foUO_Fnrk
يااااه ؟؟ معقول سلوك بس تعمل الفرق ده !! ؟؟ ايوة واكتر كمان
وكل ماكانت عدة الصوت عندك محترمة وقوية كل ماكنت محتاج سلوك اقوى واكبر عشان تقدر تاخد الاداء كاااامل
Off topic : لازم نرفع القبعة احتراما للجي ام البنش اللى بيخرج 400rms فقط !! وبيعمل كدة في صباية زي ال Type r !!!!! هو اه طبعا ده مش اخر الصب بس بالنسبة لانه جي ام 400rms فقط !! فيعتبر اداء ممتاز جدا مع الاخذ بالاعتبار
اني مش عايز اعلي الجي ام على الاخر عشان مايتحرقش ,, وموطي ال Frequency على الاخر خالص !! يعني الجي ام لسه فيه كمان
انا عايز اقول اني الدقيقة اللى وقفت اصور فيها الفيديو ده الجيران نزلت عملت معايا الصح فيهم
وعلى فكرة الصوت نقي جدا جدا بس هو الميك بتاع الموبايل مش بيوضح نقاء الصوت
وفي النهاية انا حابب اشكر مينا
على تعبه معايا في الموضوع ده وهو اللى اشار عليا باهمية السلوك والاماكن اللى ممكن اشتري منها
الموضوع مهم يا جماعة وبيفرق كتير زي ماشفتم في الفيديو ياريت كلنا نهتم بالسلوك والوصلات
ولو فيه اي استفسار على اي حاجة تحت امركم
تم تثبيت الموضوع لأهمبته
مشرف 5ب
كماليات واكسسوار
Comment