تجربة كاملة سيئة لتعديل فوانيس خلفية

[Karim_Monir]

السلام عليكم ورحمه الله
كنت قد غيرت فوانيس عربيت يالامامية بفوانيس فيها عدسات اصلية ورينجات وليدات
فوانيس اصلي معدل من برة
وعشان مايبقاش ورا عادي جدا
حبيت اعدل ورا كمان
خاصة بعد ما عرفت واحد زميل لينا هنا في المنتدى عنده جروب لتعديل فوانيس السيارات على الفيس بوك
وانا حبيت اساعدة بما انه لسه ماشتغلش وخريج جامعي قولت فرصة ننمي هواية تبقي مهنة
كلمته واتفقت معاه بعد ما شوفت صور لشغلة ي الفوانيس الامامية فقط ما شوفتش شغل ليه في فوانيس خلفية
اديتله الفوانيس واديتة تصور مبدئي عن طلبي
قاللي لاء هايكون شكلها وحش وقاللي سيبلي اعملك حاجة احسن
اديتلة الفوانيس وكان ميعادنا قبل مقابلة فطار المنتدى بيوم وكان عندة وقت 3 ايام
استلمت الفوانيس وانا رايح للاعضاء نتيجة انه مواعيده اكثر من سيئة
الفوانيس تم صب وش خلفي ليها بعد تكسير الوش الاصلي وهي فوانيس اصلي
كانت فيها كسور بسيطة لكن كانت ملحومة باحتراف
كسر الاوشاش الاصلية للفانوس وبري الحرف بالصاورخ كمان وصب وش جديد
الوش الجديد في اعوجاج
وصبة الوش الجديد اللي م مظبوط عوجت شاسية الفانوس نفسه واصبح في فرق بينه وبين الرفرفر حوالي 2 مللي
رشه من برة كله اسود مط غطي كل شفافية الفانوس مابقاش متبقي غير القطع المعدلة
استلمت الاشارة اليمين وخط ليديات فاصل
وفي تعديل بيشتغل مع اللمبة العادية ال 2 بول
وتعديل تاني زود خطين ليد احمر
الليدات الحمرا ماشتغلتش نهائي
طلبت منه تعديل للكلام ده لان سيئ ومش عاجبنش الاسود اللي رش بيه الفانوس كله واثار استياء كل من شافوة في المقابلة
قعد يماطل في انه يقابلني ولما بعتة مع زميل ليا لانه ساكن في الهرم وكنا في رمضان وصعب اروحلة من النزهة للهرم
ووقت ما متفقين علي ميعاد يقابل فيه زميلي اللي تعبته معايا
اكلمة بيقولي انا في مصر الجديدة ؟؟
طب كان فين من الاول
المهم معندوش مسئولية للمواعيد
قولتلة شكرا لغاية كدة
وكان طالب مني في الفانوسين 600 بدل 900
مش قادر اقولكم ان انضف تعديل شوفتة واغلاه لفانوسين خلفي اتكلف 700 جنية وده كان شكلهم وهم فعلا
المهم خدت الفانوسين ووديتهم لشريف الفنجري في الحرفيين
ولومت نفسي اني ماوديتهمش قبل كدة عشان انا اعرف شريف من سنين
خد الفانوسين وقاللي فعلا ماينفعوش ولازم يتركنو
المهم اقنعتة يحاول يعدل
مش قادر اقولكم شال الاسود اللي بره بمجهود قد ايه
الاوشاش اللي اتصبت فيها عوجة عوجت جسم الفانوس اصلا مابقاش يبات مكانه صح وبارز لبرة شوية
حاول يظبط الكلام والمفاجئة انه موصل رجول الليدات الحمرا ببعض
يعني منطقيا مستحيل تشتغل نهائيا
الاسوء بقي الوش اللي عدلة
كان ساندة من ورا بحتت باغ كسرة لازقها بامير وقطن
منظر ما يتصدقش
هاتشوفو الصور وتحكمو بنفسكم

وطبعا ماقدرناش نعمل تعديل حلو عشان كنا مرتبطين بحاجات كتير هو عملها
ورشينا الفانوس من جوة مش من برة عشان يظهر الوش الشفاف
بجد شريف الفنجري وايهاب تسلم ايديكم شغل زي الفل
وبجد يا ريت ما ننخدعش بكل واحد يقول انا بعرف اعمل واعمل الا لما تشوف شغلة الاول

تحياتي

[Donzi]

انا قريت موضوع عن تعديل فوانيس و فيه زميل نصحني بالشخص دا و دخلت عالجروب فعلا و اتكلمت معاه بس ماقتنعتش و ماكملتش

الحمد لله انك انقذت ما يمكن انقاذه و ربنا يباركلك في الفانوسين بس اعتقد المفروض تقول على اسم الشخص و الجروب دا عشان الناس تاخد بالها و هي بتتعامل معاه

تعيش و تاخد غيرها

[ahmedaglan]

الحمد الله انها جت علي اد كدا ياكريم باشا ومحدش بيتعلم ببلاش
وبالتوفيق

[MohssenRashed]

معلش ياكريم باشا.

الحاجات دي بتبقى ممارسه اكتر من فن, يعني اللي محترف تعديل شوف بيفك كام فانوس في اليوم و يقابله مشاكل اكيد هيفرق 100% عن المبتدىء حتى لو سعره اعلى.

ياريت تبقى ترفع الصور.

[kar!m]

الحمد لله انها بتييجى فى الحاجات دى.

[smsm_nabawy]

أستاذ كريم ،، مش قادر أقول ،، غير "ربنا يعوض عليك في فلوسك الي اتدفعت ،، و عله خير !! علشان حضرتك تنقلنا تجربتك دي !! :-|

,و المهم أن حضرتك دلوقتي فوانيسك الي ورا و الي قدام اتعدلوا الحمد لله !! :) ربنا يبارك لحضرتك فيهم !! و أعتبر الفلوس الي راحت ،، انها زاحت هم او بلاء !! :)
منتظرين الصور
و انا مش عارف هل ممكن حضرتك تقول اسم الشخص أو جروبه ولا لا !! بس أعتقد أن حضرتك ممكن تقولنا على أسمه ،، علشان الناس تاخد حذرها معاه في التعامل حتى !! أو تعمل حسابها على التأخير في المواعيد !! :))

[M.Elgergawy]

فعلا ياريت نعرف مين هوا او الجروب عشان منعاملش معاه

[man_66666661]

معلش يا باشا وربنا يعوض عليك

[ashouhdy]

اية يا كيمو رايح تعدل فى فانوس أصلى ... كنت جبت اتنين صبنى والعب فيهم براحتك .... المهم الف مبروك بس فين الصور

[ashouhdy]

اة رجاء خاص .... بلاش تفضح الواد ممكن يكون جة وحش المرة دى و يظبط معاة بعد كدة ... انا قصدى ممكن يحسن نفسة بعد التجربة دى
... بدل ما تقطع عيشة .... وكدة كدة شغلة هو اللى حيخلى الناس فيما بعد تحكم علية و حيسمع بأنة حلو او وحش

[ME5EMR]

هو من غير ما يتقال علي اسمه هو معروف
حتي كان لسه معموله اعلان من كام يوم
و الحمد لله انها جات لغاية كده

[king516]

يااستاذ كريم اسمحلى بس اقولك على غلطه كبيره المفروض ان شخصيه ممتازه زى حضرتك فى عالم السيارات متوقعش فيها وهى انك لما تحب تعدل متعدلش على الفانوس الأصلى
انزل اشترى فانوسين صينى وعدل عليهم تحسبا لفشل التجربه زى تجربه حضرتك ولو عجبك التعديل تركب الفانوسين الصينى وتحتفظ بالأصلى او تخليه يعدلك على الأصلى بعد ماتشوفه على الصينى لكن مش من اول تعديل تعدل على الفوانيس الأصليه بتاعه العربيه

[osama.m]

ربنا يعوض عليك يا استاذ كريم
انا شفت الاعلان و بصراحة حاجات كتير ما عجبتنيش
و فعلا بلاش تقول اسمة كفاية احنا عارفينة

[HeMa_LanCeR]

اخرب فانوسك علي قد فلوسك :-)

فاهمني ياحج أسماعيل d:

[mido]

اخرب فانوسك علي قد فلوسك :-)

فاهمني ياحج أسماعيل d:

حلوه منك :)