سيتى أو sx4

[مجدى الصيرفى]

السلام عليكم ورحمه الله وبركاته على جميع أعضاء أحلى وأقوى منتدى للسيارات
أنا محتاج منكم خدمه صغيره أنا عايز أقارن بين عربيتين هما
1- سوزوكى sx4 كامله أوتوماتيك
2- هوندا سيتى كامله أوتوماتيك
انا محتاج أعرف كل حاجه عنهم ومش مهم بالنسبه لى سعر إعاده البيع بس كل حاجه بعد كده مهمه من كماليات وإعتماديه وتوفيرفى البنزين وقطع غيار وإتساع داخل الكابينه وأسعار وتوكيل ( انا عمرى ما هروح لميكانيكى ) وأنا من الأسكندريه علشان التوكيل كويس عندنا ولا لأ
وشكرآ لأجمد منتدى وأحلى أعضاء

[Ghost2]

كل النقط اللي حضرتك قلقان منها و بتسأل عليها .. السيتي تتفوق على ال sx4 ولكن اسعار قطع الغيار غاليه حاجات بسيطة في السيتي .. لكن الفطيم وكيل محترم .. ومفيهوش حد مش فاهم .. بجد السيتي عربية حكاية .. موتور تضربله تعظيم سلام

[ahmad--ezzat]

الهوندا افضل من السوزوكى

[Dr_Smart]

هكلمك عن الsx4 بس لأني ماجربتش السيتي

1- محرك 1600 أداؤه ممتاز واقتصادي في الوقود

2- واسعه ... الشنطه بحر ( أكبر شنطه في فئتها 515 لتر ) مع امكانية طي الكنبه الخلفيه بالكامل لزيادة مساحة التخزين

3- عاليه عالارض وانسى المطبات وعلى الرغم من كده ثبات ممتاز .. ده غير الرؤيه المميزه للطريق لانها عاليه تحس انك راكب جيب

4- وسائل الامان : airbagsاتنين , ABD , EBD , brake assist ومصفحه بالاسفل .

5- الكماليات : راديو سي دي mp3 , سنترلوك مع اتنين ريموت , جنوط 15 سبور , 4 زجاج كهربا , مرايات كهربا , طاره ملتي فانكشن مكسيه بالجلد الطبيعي مع امكانية تعديلها ( ترفعها وتنزلها ) , تحكم في ارتفاع مقعد السائق هيدروليك , فوج لايت امامي , امكانية التحكم في اضاءة التابلوه , شاشه لعرض درجة الحراره ومعدل استهلاك الوقود , طبعا باور وتكييف وفتح الشنطه والتانك من الداخل .

6- عيوب ( في رأيي ) ولكنها ناتجه عن مميزات اخرى : العفشه ناشفه شويه عشان عفشة رياضيه لثبات عالي , صوت المحرك مسموع لان الكاتينه جنزير .

7- عربيه ياباني 100% ... السيتي تقفيل تايلاند ... وعلى فكره السوزوكي sx4 اللي بتنزل مصر في التوكيل مواصفات خليجي .

8- قطع الغيار غاليه والهوندا أغلى

9- سعر اعادة البيع مش حلو والسيتي كذلك .

10 -فرق السعر لصالح الsx4 ( بتكلم عن السيدان طبعا حاليا ب107 بدلا من 113 ) .. لكن الشياكه والاسم لصالح الهوندا .

صلي استخاره وربنا يوفقك في الاختيار الأنسب

[مجدى الصيرفى]

شكرآ لكل الردود
لكن أنا عايز حد يفهمنى أكتر ويشرحلى لأنى قلقان جدآ وخايف أشترى حاجه تتطلع مش حلوه وياريت الكلام والمقارنه تكون على أساس الفهم والتجربه

[Ahmed.TV]

بص لو معاك تمن السيتى وتقدر على مصاريف قطع غيارها وميهمكش الكماليات الكتيرة يبقا توكل على الله وهات السيتى لان ماتورها رائع بجد ومعمر لسنيننننننننننننننننننن

اما لو عاوز عربية يابانى بردوا وفيها كماليات كتيرة زى ما الدكتور احمد مجدى ما قالك ( dr smart) وكفاية انها خليجى وبضمان الوكيل بتعها هنا يبقا توكل على الله وهات السوزوكى

والسوزوكى مفهاش عيب بصراحة ماتور محترم بردوا وكماليات كتيرة ويابانى وسعر معقول 107 الف ولكن قطع غيارها هى والسيتى غالية لان ده ضريبة اليابانى كله وده معروف ومتفكرش فى اعادة البيع ولو بتفتكر فى اعادة البيع ويهمك وهتبيع فى زمن قليل يبقا خليك فى الكورى لان الكورى مطلوب فى السوق اكتر

وفى النهاية الراى رايك وصلى صلاة استخارة
تقبل تحياتى

[Youssef.Awad]

مع كامل الاحترام للسوزوكى وكمالياتها
انا لو مكان حضرتك هاختار الهوندا سيتى عشان بجد عربية ثمنها فيها وموتورها معمر بطريقة لا تتخيلها