ياريس ولا سيريون

[أبو عبدالله]

يا جماعه مش مسألة تحييز ولا حاجه ولكن رد على كلام غير صحيح بالمره
انا شايف ان الأتنين مشتركين في حاجات كتير جدا وبعتبر الأتنين زي بعض ماعدا ان دي هاتشباك ودي سيدان
ولكن مسألة المطبات دي انا أؤكد لكل الأعضاء ان العربيه في كامل حمولتها اتحدى بها اي عربيه سيدان في اي مطب
واؤكد للكل ان العربيه السيريون ابعد من اي عربيه سيدان انها تحك يعني اخر واحده ممكن تفكر فيها في ذلك
والكلام ده عن تجربة لأني انا عالطول محمله ومفيش مطب حتى المطبات الجامده والله بعدي منها وانا محمل خمسه في العربيه
واخرها انا كطنت رايح القاهرة يوم الخميس ومعايا خمسه وله مطب من المنصورة الى القاهرة حكيت فيه مع ان في مطبات بعد كفر شكر فظيعه انا عن نفسي بخاف وبقول هحك واكتشف ان العربيه عدت عادي خالص
وبرضه انا في 6 اكتوبر ومحملها خمسه وله مطب في 6 اكتوبر حكيت فيه

فياريت اللي يقول رايه يقوله مفيش مشكله ولكن ليس بإثبات علشان كده مينفعشي

اما الثبات فممكن تسألوا اللي ركبوا العربيه .................... وعلى فكره انا بستغرب جدا من اللي بيقول الكلام ده
لأنه بيدل انه لم يسوق السياره اصلا على سرعات عاليه على الأقل
وهقولكم على حاجه اللي يعرف اللفات اللي على المحور وانت رايح على 6 اكتوبر بعد ما تعدي هايبر
الملفات دي انا اخدتها على 140 والعربيه محمله وجبت الملف من الشمال الي اليمين وانا في داخل الملف

اما عن الأختيار فده يرجع لأرتياحك الشخصي لأن انا من رايي ان العربيتين مثل بعض في كل شئ ولكن دي هاتشباك ودي سيدان
مع النظر ان السيريون اقل في السعر وفي منها 1500 سي سي بــ 90 الف جنيه
وشكرا

[Sharky]

ياريس لو عايز سيدان
سيريون لو عايز هاتشباك

[amrya]

ياريس طبعاً

[Ahmed Anwer]

مش فاهم هم الإثنين نفس الشاسية و ال عفشة الفرق بس في المحرك يبقى إزاي يختلفوا في الثبات

أنا قصدي يا أخ محمد إن الإثنين عربيات خفيفة و صغيرة Sub_compact مش عربيات سفر و سرعة و ثبات وكده

يعني الإثنين مش تقال علي الطريق دي أول فئة في السيارات العائلية الصغيرة عربيات للإستخدام داخل المدن أكثر

و قصدي إن السيريون اللي بتسعين ألف هيا اللي فيها أتوماتيك و abs , Air bag

[Heshaam]

السيريون... أو الجين تو

[goodwave]

لا ياريس ولا سيريون!

لا دي حلوة ولا دي أفضلهم مقارنة بالسعر إللي معاك 90000 جنية!
السيريون مع إحترامي لمحبيها ولعاشقيها عربية هاتش باك صغيرة ومهما قال العاشقون فيها فهي عربية هاتشباك صغيرة لا تقارن بعربية سيدان....... ولذلك نرجو من حضرتك تحديد متطلباتك سيارة سيدان او هاتش باك؟ لان الفرق جوهري وشاسع.

اما عن السيريون فلن أعلق لسببين:

1- أنا غير مقتنع بسعرها المبالغ فية جدا جدا وهي تناطح السيارات السيدان المحترمة بسعرها المبالغ فية... وعن نفسي لا يمكن أدفع في سيارة صغيرة مثل هذا السعر.
2- أنا كنت راكب بولو (ألماني) وبأكد على كلمة ألماني مش ياباني وعربية محترمة جدا جدا جدا ولكن لشاب وليس لرجل متزوج ولة أسرة. فلقد عانيت فعلا من الهاتش باك وصغر حجم الشنطة..... وياريت محدش يقول إتني الكنبة إللي ورا ..... يبقى حولتها تروسكل او نص نقل كبينة تساع إتنين وشنطة! مش كدة؟

فلذلك السيدان عملي أكتر

اما عن الياريس فهي تمتاز بشكل جميل (فضائي) ولكنها غير عملية وإركب العربية وشوف أبعادها عاملة إزاي وتقفيلها العادي جدا جدا .... وبلاش تحكم على ااغربية بالنظر وهي متلمعة!

طب تعمل إية؟ بلاش تشتري! لأ ياعم لا سمح الله..........

فكر في اللانسر أو الصني أو الهوندا سيتي أو زود شوية وهات تويوتا كورولا مانيوال 2007

بالتوفيق

[أبو عبدالله]

1- أنا غير مقتنع بسعرها المبالغ فية جدا جدا وهي تناطح السيارات السيدان المحترمة بسعرها المبالغ فية... وعن نفسي لا يمكن أدفع في سيارة صغيرة مثل هذا السعر.

ممكن حضرتك تذكرلي اسباب التي دفعتك انك تقول ان سعرها مبالغ فيه حيث أنها ارخص سيارة 1300 سي سي ياباني هاتشباك في السوق
ومثيلاتها في الأوروبي اعلى سعرا منها

2- أنا كنت راكب بولو (ألماني) وبأكد على كلمة ألماني مش ياباني وعربية محترمة جدا جدا جدا ولكن لشاب وليس لرجل متزوج ولة أسرة. فلقد عانيت فعلا من الهاتش باك وصغر حجم الشنطة..... وياريت محدش يقول إتني الكنبة إللي ورا ..... يبقى حولتها تروسكل او نص نقل كبينة تساع إتنين وشنطة! مش كدة؟

ولذلك حضرتك لم تجرب السيريون لتعرف حجمها الداخلي لكي تحكم عليها بعربيتك البولو
حيث أنا أؤكدلك ان ركوبة السيرويون تفوق تصورك وتصور كل ناظر اليها من الخارج
والوسع الداخلي لها يفوق عربيات سيدان كثير جدا موجوده في السوق واعلى سعرا منها
وانا لست ادافع عن السيريون في اختيارات السائل ولكن اوضح بعض الكلام المفهوم بصورة خاطئة لعدم تجربة السياره ولتفوقها بصراحه على كثير من السيارات المثيله لها وبذلك تفوقها على تصورنا كمستهلكين للنظر للسياره من الخارج فقط

[goodwave]

:-) :-) :-) :-)

ااأخ أبو عبد الله

عارف انا بضحك لية؟

علشان كنت حاسس بل كنت متأكد إنك حترد و "تدافع" عن السيريون بس بصراحة لم أتوقع الرد بهذة السرعة.

يا أخي انا ركبت دي وركبت دي وشفت دي ماشية متحملة ناس وشفت دي وأظن أنا قلت إني بدور على عربية وبالتالي شوفت عربيات كتييير ومنها السيريون.

حتي لا أدخل في جدال...... حضرتك مقتنع بعربيتك وبتحبها وربنا يبارك لك فيها وانا أحييك على قناعتك لان الشخص القنوع هو اسعد الناس وأغناهم.... واتمنى تكون القناعة في كل حاجة مش العربية بس! المهم......
صاحب الموضوع سأل وإنت قلت رأيك وأنا قلت رأيئ فلماذا نتجادل على أراء بعض ولماذا التعليق على رأي وهو رأئ شخصي؟ ولماذا تأخد كل الاراء السلبية بالنسبة للسريون بمحمل شخصي؟؟؟؟؟؟؟؟ دي عربية زي أي عربية وحضرتك مالك ليها ولكنك لست الصانع وليست المناقشة فيها حجرا عليك او علي او على اي أحد!

يا أخ أبو عبد الله كنا نعيب على بعض مالكي الصيني لعدم تقبلهم النقض ودفاعهم المستميت عن هذة السيارات فأرجوا ألا يتحول كل أقسام المنتدي إلى أقسام صيني وتصبح خاوية على عروشها.

وشكرا

[أبو عبدالله]

صاحب الموضوع سأل وإنت قلت رأيك وأنا قلت رأيئ فلماذا نتجادل على أراء بعض ولماذا التعليق على رأي وهو رأئ شخصي؟ ولماذا تأخد كل الاراء السلبية بالنسبة للسريون بمحمل شخصي؟؟؟؟؟؟؟؟ دي عربية زي أي عربية وحضرتك مالك ليها ولكنك لست الصانع وليست المناقشة فيها حجرا عليك او علي او على اي أحد!

يا أخ أبو عبد الله كنا نعيب على بعض مالكي الصيني لعدم تقبلهم النقض ودفاعهم المستميت عن هذة السيارات فأرجوا ألا يتحول كل أقسام المنتدي إلى أقسام صيني وتصبح خاوية على عروشها.

وشكرا

أذا كنت ترى ان ردي على كلام خاطئ يقال عن سياره معينه ويكون انا مجربها بنفسي ومعي شخصيا
انا هذا رد مجادله وتحول الموضوع الى شخصنه فانا لم افعل هذا ولن افعله ان شاء الله
وبهذا اسمحلي ان لا اعلق او ادخل في حوار بمثل هذا الكلام
لأن انا لم اجادل بل استفسرت عن كلام اراه وانا معي السياره وبتجربه انه خاطئ
فهل ده جدال ام استفهام
وحضرتك رديت على بدل الاجابه بضحك ثم تحويل الحوار الى تشخيص في الكلام وانا المصنع والى ما ذلك

واشكرك اخيرا وارجو ان لا يفهم كلامي خطأ حيث انني استفسرت ولم اجادل بلا معنى

[goodwave]

أولا ضحكي للمزاح وليس للإستهزاء

ثانيا كلامي ليس خاطئ لأنة راي شخصي وإمتلاك حضرتك للسيارة لا يعطيك الحق لجعلي مخطأ لان الخطأ في الثوابت والرأي الشخصي في السيارة من حيث سعرها او شكلها او حجمها ليس من الثوابت وهو مجال للخلاف..... فانا لم أخطئ وأقول إنها سيدان وهي هاتش باك مثلا!

ثالثا .... إستفهام عن أسئلة تعرف ردها هو إستفهام لا يحتاج جواب!

رابعا.... تحويل الموضوع إلى شخصنة حضرتك إللي عملتة لأنك فعلا بتدافع عن العربية ولا تشرح عيوبها ومميزاتها بحيادية بما إنك راكبها وتسيب باقي الناس تقول رأيها. فأي رأي سلبي يقال عن العربية تعتبرة هجوم ولابد عليك أن تدافع عن هذة السيارة..... هذة حقيقة وممكن حضرتك تراجع مداخلاتك عن السيريون التي يتسم الكثير منها بالموضوعية ولكن يتحول لهجوم على كل من ضد هذة السيارة!

واشكرك اخيرا وارجو ان لا يفهم كلامي خطأ! لاني لم أقصد أن انتقد أحد ولكن حبيت رأي الشخصي في السيارة محل النقاش.

[أبو عبدالله]

وإمتلاك حضرتك للسيارة لا يعطيك الحق لجعلي مخطأ لان الخطأ في الثوابت والرأي الشخصي في السيارة من حيث سعرها او شكلها او حجمها ليس من الثوابت وهو مجال للخلاف.....

ما تنكره علي تفعله انت
تعترض عليا في كلامي عن سياراتي اللي هو راي شخصي لي ولا تتقبل اعتراض احد على كلامك اللي هو راي شخصي ايضا
مع العلم اني لم اعترض ولكن حاولت مناقشتك في رايك وليس مهاجمتك

لأنك فعلا بتدافع عن العربية ولا تشرح عيوبها ومميزاتها بحيادية بما إنك راكبها وتسيب باقي الناس تقول رأيها

انا سايب الناس تقول رايها بدليل ان حضرتك قولت اللي انت عاوزه بكل حريه ولم احجر عليك او افرض عليك اي شئ
انا بناقش حضرتك في كلام قولته ان السعر مغالى فيه
لم ترد علي وحولت الكلام الى كلام شخصي واني بحجر على الناس في كلامهم وهذا ليس من حقك انك تتكلم علي بمثل هذا الكلام لأني لم اتكلم عنك شخصيا ............ وبهذا ترى من يحول الكلام الى شخصنه فانا رديت على العربيه ولم ارد على شخصك

وشكرا لك

[محمدايهاب]

انا أكرر لو حضرتك بتقارن بين اليارس و السريون يبقى المقارنة مش منطقية
اليارس و السيريون متشابهين إلا حد كبير نعم
1- اليارس تويوتا و السيريون دايهتسو إلي هي ملك تويوتا حاليا
2-التويوتا بشكل عام هي الشركة الرابعة عالميا من ناحية الإعتمادية سنة2007 و دايهاتسو الخامسة
3-اليارس 1300سي سي كذلك السيريون
4- اليارس و السيريون ناعمين جدا بس أكيد اليارس أنعم (أنا ركبت السيريون و سقت اليارس ) اليارس ميزتها الأعظم هي النعومة نعم السيريون ناعمة بس اليارس أنعم و بكتيير
لكن ليه اليارس افضل
1- محرك اليارس أقوى 92 حصان أو 84 زي ما يقال أما السيريون 75 حصان
2- اليارس هي الأقل و أكرر الأقل ( على رأي goodwave) استهلاك بنزين في فئتها
3- توكيل اليارس أفضل و أكثر مبيعا و أكثر مركز صيانة و أكثر انتشار لقطع الغيار نعم توكيل السيريون ممتاز لكن في السعودية هنا في مصر لسة لم يضع قدمه في الطريق الصحيح
4- اليارس أوسع
5- اليارس سيدان في شنطة و السيريون لأ
6- عزم محرك اليارس أكبر
7-أمان اليارس أعلى
8-قاعدة عجلات أوسع
9-سعر غعادة بيع أفضل
10-تسارع أفضل
11-ثبات أفضل على الطريق ( عن تجربة)
12-مجال مرايات أوسع
13-خاصية تشغيل العربية بعد الضغط على الدبرياج ودي خاصية أمان
14-تابلوه أفخم و شكله أحسن ( أنا مش فاهم RPM بتاع السيريون شكله غبي جدا)
15-أماكن تخزين أكتر
و القائمة تطول معلش المقارنة بين اليارس و السيريون غير منطقية
الموضوع مش تعصب
أنا رأي إن اللانسر 1600 أحسن من اليارس و السيتي زي اليارس
و في واحد مرة سألني عن العربية و أنا كنت راكن قالي أنا أهم حاجة عندي الياباني ووالوسع قلتله يبقى ماتجبش يارس جيب سيتي

[mohaismail]

انا بتفق مع الاستاذ goodwave تماما الراجل بينصح الاخ اللى عاوز يشترى وكلامه صح جدا واختياراته كلها صح
انا بس عاوز اقول لاخونا اللى عاوز يشترى ان هوندا سيتى هى افضل اختيار ليك 1300 وهى تمنها 84900 وممكن تحط عليهم 1000 وتجيب نيسان صنى 1600 تمنها 87000 وبتخلص ب 86000 بس لو هتجيبها الحقها علشان الصنى هتغلى او لانسر بس اعتقد انها غليت وبصراحة انا مش برشحهالك اوى انا لو مكانك هجيب الهوندا وانا مغمض وربنا يوفقك ويريت محدش يشكر فى عربيته علشان الراجل كده هيتوه احنا نقوله افضل اختيارمتاح وبس علشان نساعده مش نتوهوه والله المستعان

[أبو عبدالله]

4- اليارس و السيريون ناعمين جدا بس أكيد اليارس أنعم (أنا ركبت السيريون و سقت اليارس ) اليارس ميزتها الأعظم هي النعومة نعم السيريون ناعمة بس اليارس أنعم و بكتيير

معاك في دي طبعا

1- محرك اليارس أقوى 92 حصان أو 84 زي ما يقال أما السيريون 75 حصان

6- عزم محرك اليارس أكبر

السيريون 87 حصان بالعربيه وليس 75 حصان
والماتور لوحده في مواصفاته على موقع دايهاتسو نفسه
الماتور 93 حصان وداخل العربيه 87 حصان
يبقى التسارع مش مظبوط
ودي مواصفات السياراتان

السيريون الياريس
Max torque (lb ft/rpm) 89/4200 89/3200

mph (secs)0-60 11.5 10.9

2- اليارس هي الأقل و أكرر الأقل ( على رأي goodwave) استهلاك بنزين في فئتها

السيريون اتوماتيك بتعمل 350 ك في الصفيحه على الطريق ولا تنسى الاتوماتيك


واخيرا انا لست افضل سياره على اخرى انما ابين الفرق
وفي النهايه الاختيار يرجع لصاحب الامر لأن العربيتين فيهم تشابه كبير مع اعتبار ان واحده سيدان واخرى هاتشباك واكيد دي معلومه صاحب الموضوع عارفها كويس وهو اللي بيسأل ومحدد
وانا رايي انه يركب الاتنين واللي يرتحلها يشتريها وتكون خير ان شاء الله وانصحك بكثرة الأستخارة علشان ربنا يرزقك الخير اين كان

[Ahmed Anwer]

في فرق مهم جدا انتم نسيتوه

فرق عشرتلاف جنيه ما بين الإثنين

مبلغ مش قليل برده في الفئة دى