ميني فابيا و لا فيات جراند بونتو

[Samir Elshahawy]

السادة الاعضاء الكرام ...
أسعد الله أيامكم كلها بكل الخير و كل عام و حضراتكم جميعا بخير و صحة و سلامة بمناسبة بدء العام الهجري الجديد جعله الله عام سعادة و خير لنا و للامة الاسلامية كلها

موضوعي اليوم ليس بهدف المقارنة بين سيارتين (الميني فابيا - الجراند بونتو) بقدر ماهو أستشارة من حضراتكم لصديق لي سألني عن رأيي في أحدهما و رشحت أنا له السيارة الاخري

فأرجو من حضراتكم مقارنة عملية تراعي النقاط التالية :
- السعر و عملية أعادة البيع
- الاستهلاك و توافر قطع الغيار و الصيانة
- الصالون الداخلي من حيث الراحة و الاتساع
- الامكانيات و الكماليات ووسائل الامان

مع العلم ان من سيقود هذه السيارة سيدة و لأسرة صغيرة كما اود أن تفيدوني من أين يمكن شراء اي من السيارتين

و شكرا لكم علي حسن تعاونكم مقدما
و تفضلوا بقبول وافر تحياتي
م/ سمير الشهاوي

[CryptonX]

لو حنتكلم علي الفابيا ال 1600 مش ال 1400 ( ثتمنها فوق ال 100 الف )

يبقى الموضو شبه محسوم في راي للفابيا .

لو حنتلكم علي الفابيا ال 1400 و الجراند بونتو ال 1400 ممكن ننتناقش .

ببساطة نقاط الفابية الايجابية في راي الشخصي :

- تابلوه " كلاسيكي " و لكن جودة عالية جدا
- محرك مشهور جدا من فولكسفاجن ( او ان اعيب عليه قدرته الصغيرة 85 حصان بالنسبة لمحرك 16 صمام )

- الفابيا اوسع حاجة بسيطة في الكراسي الخلفية .


نقاطها السلبية :

- قطع غيارها مش متوفرة اوي علي عكس الجراند بونتو ( خارج التوكيل )
- منتشترش بصراحة زي الجيل الاسبق منها بعكس الجراند بونتو الي بقيت لازم كل يوم اشوف واحدة .
- اعتقد انها حتكون اغلى كقطع غيار وصيانة ( بس دي مش معلومة ده اعتقاد ) .

--

الجراند بونتو ,
نقاط ايجابية :
- انتشار
- قطع غيار خارج التوكيل و بكذا نوع و ماركة مختلفة الاسعار
- محرك موفر للبنزين جدا
- التابلوه الداخلي ممكن يكون اقل في جودة البناء او الخامان عن الفابيا ولكنها بدون نقاش اكثر شبابية .
- تصميم خارجي شبيه بالمازيراتي و شكل يليق يكون انوثي .

نقاط سلبية :
- محرك ضعيف نسبيا للفابيا ( 77 حصان بدل من 85 حصان )
- توكيل نايم شوية
- اضيق في الخلف و لكن علي حساب الشنطة ( مشكلة في كل سيارات فيات ) .
- شكل جديد نازل ليها خلال شهور بسيطة .

-----

بصراحة انا لو لي شخصيا مش حتررد للحظة للجراند بس مش علشان انا بحب فيات ولا اي حاجةخالص بس الفكرة اني لا اقبل شكل الفابيا الجديد نهائيا . لا داخليا و لا خارجيا .

[abou_ruqi]

بص المقارنة عبقرية شدتني بمجرد ما شوفت العنوان
حقولك وجهة نظري الشخصية جدا

الإتنين عربيات أوروبية محترمة من شركتين عريقتين وعناصر الآمان متوفرة فيهما

شكل الجراند أحلى بكتير (تصميم جيرجيتو جوجارو ) والتصميم الداخلي أفضل
الجراند منتشرة أكثر
الجلوس داخل الجراند أريح نفسيا وارجونوميك أكتر

العفشة معرفش مين أحلى
إعادة البيع أعتقد الأتنين مش بياعيين لإننا أصبحا محافظة كورية والسوق ما يعرفش غير الكوري دلوقتي للاسف

إنما

موتور الفابيا أحسن
توكيل الفابيا أحسن

استخير ربنا واتكل على الله , الاتنين حلال فيهم الفلوس وتذكر ان في ناس بتدفع نفس المبلغ في عربيات كوري , لا اير باجز ولا فرامل مانعة للإنغلاق ولا أي وسيلة آمان اللهم إلا الحزام ويقولك بس فيها فتحة سقف !!!

فأحمد ربنا إنه هدى عقلك للخير والصواب سواء دي أو دي

من الأخر الاتنين يستاهلوا فلوسهم

والله أعلم

[Moh.Abdelbaset]

الفابيا ال 1400 مش هتنزل تاني للأسف
طبقاً للمشاركتين السابقتين
الجراند بونتو أفضل
من أسبوعين سألنا على سعر الفابيا 1600 الفول أوبشن كان 145 ألف

[kareemhisham]

الفابيا اسعارها رجعت ضربت فى السما ..

كدة الجراند بونتو طبعا

[SeiffoZ]

المقارنة دى زى كأنك بتقارن بى إم دبليو و مرسيدس ..

فالأثنين عربيات ممتازين ... أنا عن نفسى أعشق الجراند بونتو ..

و جاتلى تجربة قيادة الفابيا منذ فترة و السيارة لا غبار عليها و لكنى مش قابلها شكلا و لا موضوعا .

رأيى ... الجراند بونتو أفضل ... يعيبها فقط موتور ال8 صمام و القدرة الحصانية القليلة بعض الشئ و لكن توفير فى البنزين يفوق الوصف ... فالبونتو سيارة فى الأصل إقتصادية

[tota2002]

السلام عليكم ورحمة الله
انا ايضا عندى نفس المشكلة وواقعة فى حيرة
بس مش نفس المشكلة بالضبط
فانا كل الميزانية المتاحة حوالى 90000
مش اكتر وكل العربيات اللى شفتها فى الrangeده ما عجبتنيش والوحيدة اللى عجبتنى كانت
1- الGRABND PUNTO المانيوال طبعا علشان على قد الميزانية
2- الفابيا 1400 مانيوال برضة " بس خسارة عرفت انها مش هاتنزل تانى فى 2010"

وبكدة ينحصر الخيار فى ال GRAND PUNTO
وبصراحة انا معلوماتى عن انواع السيارات والفرق بينها تقريبا زيرو ومش عارفة ايه هى مميزات العربية دي وايه عيببها هل هى تستاهل المبلغ ده ولا لآ ؟

بس سمعت ان فى عيب فى الفيات بشكل عام وهى ان الاضاءة بتاعة فوانيسها مش قد كدة وكمان ان الهورس باور بتاعاها قليل بس كمان التوكيل والصينة ناس كويسين جدا

فارجو منكم الافادة والنصيحة

[Samir Elshahawy]

السادة الاعضاء الكرام ...

ألف شكر علي مشاركاتكم القيمة و التي أستفدت منها فعلا و تقريبا المقارنة تم حسمها بشكل تقريبي لصالح "الجراند بونتو" التي أميل أنا شخصيا لها منذ فترة و لكن أسمحوا لي أن أطمع و أطلب من السادة ملاك السيارتين مشاركتنا هنا للأفادة بمميزات و عيوب كل نوع علي حدة حتي نستفيد اكثر من تجربتهم

و شكرا لكم مرة أخري

[yoko]

س سمعت ان فى عيب فى الفيات بشكل عام وهى ان الاضاءة بتاعة فوانيسها مش قد كدة وكمان ان الهورس باور بتاعاها قليل بس كمان التوكيل والصينة ناس كويسين جدا

النور كويس جدا في الموديلات الجديدة والفيات عموما الهورس باور قليل لكن العزم عالي (وبتوفر في البنزين) ومعنى كده إن العربيه سحبها حلو جدا في السرعات القليلة لكن في السرعات العاليه تلاقي العربية بتموت
التوكيل والصيانة متوسطين مش الأسوء ومش الأحسن

[ahmedyehia515]

أنا معايا الفابيا القديمة الهاتش باك 1400 cc مانيوال، المفروض أنها أقل من المينى فابيا ال 1600 فى كل حاجة و كامان بينهم 9 سنين تكنولوجيا فأقوللك على اللى معايا بس المفروض إن الجديدة تكون احسن بكتير. أنا عامل بالعربية 295000 كم , عمرها ما عملت حركة ندالة معايا. بجرى و بشد مع حاجات تانية المفروض اجدد و أكبر منها و عمرها ما قالت لأه. أحسن حاجة أنها مفيش حاجة بتبوظ مرة واحدة, لازم تديك انذار قبليها بفترة و فى نظرى ده احسن حاجة فيها. معرفش ازى الناس بتقول على تةكيلها كويس بس ارتوك هو أوحش توكيل فى مصر, بالذات فى الصيانة. معاملة كأنك جاى تشحت, معظم قطع الغيار مش موجودة و أسعار مبالغ فيها و صنايعية مش فاهمة شغلها. انا ريحت دماغى و عرفت كام محل بيبيعوا قطع غيار اصلى و كام ميكانيكى و كهربائى عندهم ضمير و بروح أقولهم عايز أعمل كذا و الحياة ماشية زى الفل. بصراحة أحسن حاجة أنى بحس أنى راكب حاجة نادرة، يعنى أقل عربية موجودة فى مصر هى الأوكتافيا و أقل موديل هو الفابيا الهتش باك, بس من جوه قريبة اوى من الاوكتافيا و كتير أوى من قطع غيار البولو و الجولف و الجيتا بتمشى معاها.

انا بقول الفابيا احسن عشان انا معايا القديمة و مريحانى فمتهيألى الجديدة المفروض تكون احسن، معرفش البونتو نظامها إيه بس ده فيات يعنى حاجة تجبها و تنساها, عربية شغل. الاتنين يستاهلوا الفلوس بس لو الفابيا الفول أوبشن بقت ب 140000 يعنى ارخص حاجه بسيطة من السيفيك يبقى اكيد البونتو عشان الفابيا ماتنفاعش غير فول أوبشن. اتكل على الله و ربنا يكفيك شرها

[fouady]

مبدئيا أنا عاوز أقولك إنك معلم أول مرة أحس إن فعلا في حاجة اسمها مقارنة لأن بجد هي ده المقارنة مابين عربيتين أنا لو أدامي حشريهم وه هم في الخطة بس خلصت الكلام الا لا غبار عليهم بس أنا ارشح الجراند علشان أنا منحاز لها :-)

[Samir Elshahawy]

السادة الاعضاء الكرام ..

مش عارف أشكركم أزاي علي تفاعلكم و مشاركاتكم القيمة جدا دي , و عموما أنا هأنقل وجهة نظركم لصديقي و هو يختار السيارة اللي تعجبه و أن شاء الله هأبلغكم بقراره

[Tayer]

طيب قول لصحبك يستنى ابيرا 2010 نازله 1400 سى سى و 85 هورس باور و ألمانى تقفيل أسبانى و هيه تعتبر قائد الجناح الرياضى لمجموعه فولكس فاجن.
هيه خلاص هتنزل كمان أيام و لسه متحددلهاش سعر بس متوقع تكون فى الحدود المع صحبك

[CryptonX]

طيب قول لصحبك يستنى ابيرا 2010 نازله 1400 سى سى و 85 هورس باور و ألمانى تقفيل أسبانى و هيه تعتبر قائد الجناح الرياضى لمجموعه فولكس فاجن.
هيه خلاص هتنزل كمان أيام و لسه متحددلهاش سعر بس متوقع تكون فى الحدود المع صحبك

الابيزا الجديدة مش حتقل عن 110 - 120 الف حسب كلام التوكيل .

[alfbaa]

سؤال

يا جماعه هيا البونتو الاتوماتك بتاعها عادي ولا زي mmt في الكورولا يعني مانيوال من غير دبرياج؟