تيدا...شارك...ولا نيو رينو فلوانس؟!

[kikooooo]

السلام عليكم ورحمة الله,
انا بقالى اكتر من ستة شهور محتار فى العربية..وطلع بجد الموضوع متعب وصعب جدااااا..
بس انا حطيت فى دماغى شوية اوبشنز وعلى اساسها استثنيت عربيات كتير فى الفئة السعرية اللى بفكر فيها...
فحاليا استقريت على التلات عربيات دول:
نيسان تيدا ,,,, اعتمادية اقتصادية يابانية بالكامل ...توكيل معقول ومش هصرف عليها كتير فى الكام سنة اللى جايين..بس الشكل مش جذبنى زى باقى العربيات التانية ومش لاقى الوان حلوة فيها وخصوصا انا هجيب السيدان !!

متسوبشى شارك,,,اقتصادية برضه..بس فى حدود الفلوس اللى معايا هجيب اول فئة اوتوماتيك

رينو فلوونس الجديدة,,, شفتها مرتين..فخمة جدااا..وسحرتنى من اول نظرة ..وابشنز وسعر جميل..بس خايف من سمعة الرينو..وخصوصا عن تجربة من ناس قريبين منى..والعربية لسه جديدة وخايف اخاطر..زائد انى لسه هحجز واستنى

ولكم جزيل الشكر مقدما :)

[kikooooo]

ويهمنى بجد اعرف رأيكو ايه...عشان انا خلاص وصلت لمرحلة متأخرة من كتر التفكير .. وهصلى صلاة استخارة واللى هيرسى عليه الموضوع هنجز فيه بقـــــى ...

[Mohamed.Ramah]

رينو فيلونس طبعا مش محتاجة مقارنة العربية وهمية دا غير مالها سمعة الرينو افضل توكيل فى مصر كصيانة واسعار واهتمام بالعملاء سيبك من كلام الناس روح بنفسك مراكز الصيانة وشوف على الطبيعة دا غير تلافى كل عيوب اللى ظهرت وتم حلها فورا وانا اظن اللى بيظهر د مش عيب ولا حاجة الموديلات السابقة لرينو ميجان حتى لاتظهر فى الفلونس انا بنصح نشوف احتيجاتك اية من العربية وعلى الاساس دو تحدد وتنزل تشوف على الطيبيعة والانسب ليك اشترية

[kikooooo]

رينو فيلونس طبعا مش محتاجة مقارنة العربية وهمية دا غير مالها سمعة الرينو افضل توكيل فى مصر كصيانة واسعار واهتمام بالعملاء سيبك من كلام الناس روح بنفسك مراكز الصيانة وشوف على الطبيعة دا غير تلافى كل عيوب اللى ظهرت وتم حلها فورا وانا اظن اللى بيظهر د مش عيب ولا حاجة الموديلات السابقة لرينو ميجان حتى لاتظهر فى الفلونس انا بنصح نشوف احتيجاتك اية من العربية وعلى الاساس دو تحدد وتنزل تشوف على الطيبيعة والانسب ليك اشترية

الف شكر لحضرتك على الرد السريع :)
بس اخو واحد صاحبى كان عنده ميجان 2007 وغيرلها راديتاير مرتين وكومبيوتر يونت ب 5000 تلاف جنيه!! ممكن يكون سوء استخدام منه ..بس برضه موضوع يقلق...دا غير الكلام بقى اللى كلو بيقولو "ابعد عن الفرنساوى..دى عربيات دلوعة وسنيتن تلاتة وهتفتح بقها...واللى عنده رينو الله يعينو "
انا عاوز عربية تعيش معايا خمس ست سنين من غير ما اصرف عليها مبلغ بالكى كدا..انا المفروض شارى جديد برضه عشان ارتاح


* * * * * * *

مخالف لقواعد المنتدى
ممنوع كتابة اللغه العربيه بأحرف أجنبيه
يرجى مراجعة قوانين المنتدى

مشرف الساحه

[M.Mosaad]

العربيه هتفتح بقها بدري اكيد لو مهتمتشي بيها و العربيات اللي فيها اوبشنز كتير و سنسورز و معتمده علي الكمبيوتر هتفتح بقها اكيد اكتر لو مهتمتشي يعني لو ناوي ان شاء الله تهتم بعربيتك و تعمل صياناتك في مواعيدها و عند التوكيل العربيه هتعيش كويسة معاك ان شاء الله الا لو فيها عيب صناعه و دة بيبقي نادرا
الفلونس محدش جربها علشان يرشحها بقلب جامد بس اعتمادا علي سمعه الميجان اكيد الفلونس هتبقي حكايه ان شاء الله بس خد بالك منها و اكيد مصاريفها هتبقي ازيد شوية بسيطة عن غيرها لان فيها تكنولوجيا كتيرة و دة طبيعي علشان تستمتع بتكنولوجيا اكتر هتدفع ازيد شوية بس ماشاء الله وراك وكيل قوي سمعته كويسة و الشركه نفسها رينو محترمه جداااااااااااااا يعني لما بتبعت اميل ليهم او تحاول تتصل شكوتك بتوصل لبعيد و دي حاجة كويسة

ربنا يوفقك

[أبو عبدالله]

الف شكر لحضرتك على الرد السريع :)
بس اخو واحد صاحبى كان عنده ميجان 2007 وغيرلها راديتاير مرتين وكومبيوتر يونت ب 5000 تلاف جنيه!! ممكن يكون سوء استخدام منه ..بس برضه موضوع يقلق...دا غير الكلام بقى اللى كلو بيقولو "ابعد عن الفرنساوى..دى عربيات دلوعة وسنيتن تلاتة وهتفتح بقها...واللى عنده رينو الله يعينو "
انا عاوز عربية تعيش معايا خمس ست سنين من غير ما اصرف عليها مبلغ بالكى كدا..انا المفروض شارى جديد برضه عشان ارتاح


* * * * * * *

مخالف لقواعد المنتدى
ممنوع كتابة اللغه العربيه بأحرف أجنبيه
يرجى مراجعة قوانين المنتدى

مشرف الساحه

انا رايي بما انك عاوز العربيه تقعد 5 سنين متفتحش بقها
يبقى خليك في التيدا او اللانسر افضل

[M.Osman]

دى عربيات دلوعة

اتصدق مش المصريين بس اللي بيقولوا على العربيات الفرنساوي كدا؟؟

بس الأغرب .. ان ال504 مكنتش دلوعة خالص!

[Ahmed.TV]

بصراحة الرينو فلونس تكسب مهالش حل ياجماعة ولو خايف من اسعا قطع الغيار والاسعار جوة التوكيل يبقا خاليك فى التيدا البديل الثانى على طولللللل

[bmw3m007]

لانسر شارك اكيد

[د.محمود صلاح]

رينو الهاتش باك ,, جميع كماليات الفلورانس وبسعر أقل 14 الف ج

[medo2o1o]

فيات ١٢٨ عربية حمالة اسية و صيانتها عند بلية ال مكانيكي و قطع غيارها في كل حتى و يوم ما تحب تبعها هتبعها
علطول


بهرج طبعاً
أنا رأي ال فلونس عربية محترمة و توكيل محترم دة أول إختيار
بعدها ال تيدا على أساس انها أكتر عربية مبيعاً في ال- عالم و ناس كتير مجرباها و بتشكر فيها
أما ال شارك ف هي عربية محترمة برضه بس شايف إن سعرها مستفز شوية

[DigitalMR1]

لانسر شارك الأفضل .... دلوائتي في تخفيض علي موديلات 2009

توكيل مصرية توكيل محترم ...

[kikooooo]

العربيه هتفتح بقها بدري اكيد لو مهتمتشي بيها و العربيات اللي فيها اوبشنز كتير و سنسورز و معتمده علي الكمبيوتر هتفتح بقها اكيد اكتر لو مهتمتشي يعني لو ناوي انشاء الله تهتم بعربيتك و تعمل صياناتك في مواعيدها و عند التوكيل العربيه هتعيش كويسة معاك انشاء الله الا لو فيها عيب صناعه و دة بيبقي نادرا

ناوى ان شاء الله اى عربية هجيبها ههتم بيها..وهعمل كل صيانتها فى التوكيل..دى هتبقى عربية العمر ان شاء الله...وانا اساسا سواقتى هادية واستعمالى خفيف اووى للعربية

الفلونس محدش جربها علشان يرشحها بقلب جامد بس اعتمادا علي سمعه الميجان اكيد الفلونس هتبقي حكايه انشاء الله

انا خايف من النقطة دى وبقول استنى لشهر تلاتة يكون الدفعة الاولى استلمو ويقولو رأيهم..بس خايف ساعتها يقولولى هتستلم على سبعة ان شاء الله..انا بايع العربية وقاعد من شهر 11...والف شكر لحضرتك على اهتمامك والرد

انا رايي بما انك عاوز العربيه تقعد 5 سنين متفتحش بقها
يبقى خليك في التيدا او اللانسر افضل

ماهى دى الحيرة بقى..بقارن بين الشياكة والفخامة..وبين راحة البال والمصاريف الاقل...تتجوز واحدة بنت ناس وحلوة ولا تتجوز بنت جدعة وتشيلك ^^..والف شكر لحضرتك على الرد

بس الأغرب .. ان ال504 مكنتش دلوعة خالص

هى فييييييين ايامها دى..هى العربيات دى هتيجى تانى..ايام ما كان الواحد بيختار بين عربيتين تلاتة بالكتير..وشكرا على الرد :)

بصراحة الرينو فلونس تكسب مهالش حل ياجماعة ولو خايف من اسعا قطع الغيار والاسعار جوة التوكيل يبقا خاليك فى التيدا البديل الثانى على طولللللل

شكرا لرد حضرتك يا استاذ على :)...بجد كان يهمنى اسمع رأيك عشان انا متابع ردودك -عشان خاطر الميكى ماوس دا-..وكنت على طول مطلع التيدا والفلوونس فى السما

لانسر شارك اكيد

شكرا لرد حضرتك...بس ياريت ممكن تقول شوية اسباب

رينو الهاتش باك ,, جميع كماليات الفلورانس وبسعر أقل 14 الف ج

شكرا لرد حضرتك يا دكتور...بس لما سألت على اسعار الهاتشباك فى المعرض كانت اغلى من الفلوونس 3 تلاف لنفس الفئة والمواصفات..
يعنى اسعار الفئات الاوتوماتيك من الفلوونس..125..135...141
واسعار الهاتشباك..128..138..144
هى الاسعار اتغيرت ولا ايه؟

[KHALED AYMAN]

اى عربيه هتجيبها ..
لازم تهتم بالصيانه بتاعها فى التوكيل بمواعيد مظبوطه ...
و تحافظ عليها فى مشيك بيها ..
انا كان معايا استرا عملت بيها 150 الف كم فى 3 سنين ...
كل الى عملته فيها ..
صيانه كل 10 الاف كم فى التوكيل ..
وغيرت مروحه ..
و سنتر باب التنك !!!
و بايعها مش لعيب فيها ..
بعتها عشان اجيب فيكترا !!
و الى اشتراها ..
كلمنى بعدها قالى انا عايز عربيه زى بتاعك لاخويه !!!
فكل الى اقصده ..
شوف انت مرتاح لايه فيهم و هاته ..
بس اهم حاجه ..
الصيانه و الاهتمام ..
و انا لو فى مكانك ...
مش هفكر !!!!
فلونس ..

[kikooooo]

فيات ١٢٨ عربية حمالة اسية و صيانتها عند بلية ال مكانيكي و قطع غيارها في كل حتى و يوم ما تحب تبعها هتبعها
علطول

طب مافييش قدامك واحدة ^^...والله مع صاحبى بركب معاه دلوقتى ورايحة جاية زى الفل وبنزين 80 وجوز الاشارات ب 10..وارخص من التكاتيك..بس تعمل ايه فى دماغنا المصرية :)

أنا رأي ال فلونس عربية محترمة و توكيل محترم دة أول إختيار
بعدها ال تيدا على أساس انها أكتر عربية مبيعاً في ال- عالم و ناس كتير مجرباها و بتشكر فيها
أما ال شارك ف هي عربية محترمة برضه بس شايف إن سعرها مستفز شوية

كلامك منطقى جدا يا دكتور..وكان دا بجد ترتيبى لما عملت تقييم لبتاع 12 عربية...بس كان فى قبل دول فى نظرى التويوتا لما رخصت ورحت دفعت عربونها وبعتونى 20 يوم وقالولى سعرها زاد 9 تلاف فقلت شكرا..وبعدين كانت اللينيا..بس لما اتكلت على الله وقلت هشتريها لاقيتها خلصت...فرحت جاى مصفى دماغى كدا وركزت على الفلوونس والتيدا....بس لما سمعت ان فى تخفيضات على الشارك 2009 قلت احطها هى كمان :)

لانسر شارك الأفضل .... دلوائتي في تخفيض علي موديلات 2009...وشكرا ليك على الرد يا دكتور

توكيل مصرية توكيل محترم ...

اكيد توكيل محترم..ابن خالى معاه البومة ما اشتكاش منها فى اى كلمة..والعربية ما شاء الله معاه مافيهاش غلطة..بس كل اللى قاللى لتجيب الشارك كاملة لاما بلاش ومش قادر اهضم الجزئية دى لغاية دلوقتى....وفعلا انا سمعت عن التخفيض دا وهو اللى خلانى افكر فى الشارك...والف شكر لحضرتك على اهتمامك :)

وبالمناسبة التلات عربيات دول اسعارهم كالاتى:
تيدا 114 و 127 تيدا بلس
فلوونس 113 مانيوال و 125 اوتوماتيك -اول فئة-
الشارك 114 خليجى..و 124 توكيل
والتلات عربيات توكيلهم محترم جدا