بروتون ساجا اوتوماتيك - لوجان مانيوال - لانوس - فيفا

[kapci]

انا عاوز اشترى عربية فى حدود 70000ج وحتار بين التالى:
بروتون ساجا - 1300 سىسى - 94 حصان - اوتوماتيك - 69000ج - فول اوبشن
لوجان - 1600سىسى - 90 حصان - مانيوال - 68000ج - فول اوبشن
لانوس - 1500سىسى - 86 حصان - مانيوال - 70000ج - فول اوبشن
فيفا - 1500سىسى - مانيوال - 94 حصان - 67000ج - فول اوبشن
انا عاوز مساعدتكم وخبرتكم من اللى ركب العربيات دى او جربها فعليا من ناحية
1. عوامل الأمان والثبات على الطريق
2. قوة الموتور لأنى بسافر كتير
3. توفر قطع الغيار واسعارها
4. التقفيل ومشاكله
5. الإتساع خاصة وانا مليان شوية
6. سعر اعادة البيع
7. المشاكل الموجودة والمعروفة لكل واحدة
وشكرا ليكم

[zkralla]

عوامل امان والثبات على الطريق ....لوجان الافضل واقلهم الفيرنا

قوة الماتور .....فيفا الافضل واقلهم اللانوس

توفر قطع الغيار واسعارها .....فيفا ولانوس مؤقتا واللوجان والساجا قادمون جدد يتوقع انتشارهم انتشار كبير جدا بدأ باللوجان فعلا

التقفيل ومشاكله ......لوجان افضلهم لان كلهم فيهم مشاكل تقفيل بس توكيل رينو الاقوى بينهم واعتقد هتكون الساجا اسؤهم لسوء سمعه تقفيل برتون بصفه عامه رغم جوده سيارتها

الاتساع للصالون والشنطه ......اللوجان بفرق شاسع

سعر إعاده البيع....... الفيفا واللانوس مؤقتا لنفس اسباب الانتشار السابق ذكرها

المشاكل المعروفه...... مش ملم بكل مشاكل العربيات المذكوره لانها بتحتاج سؤال الى راكب العربية اللوجان - بما انها معايا مفيهاش اى مشاكل والى بتظهر عنده مشكله التوكيل بيحلها - أن شاء الله


الشكل الشبابى .......( مش تبع المقارنه الى حضرتك قلتها ) الساجا بشكلها الرياضى

توفير البنزين ......( برضه حضرتك مش حاططها فى المقارنه بس لعموم الفائده ) الساجا طبعا يليها اللوجان واسؤهم اللانوس


قطع الغيار المعمره ( ديه برضه زياده ) ..... اللوجان

[kapci]

شكرا اخى زكرالله

انا بعد متابعة اراء الناس اقتصرت المقارنة بالنسبالى على اللوجان الفول اوبشن والساجا الأوتوماتيك وانا شايف ان بالمقارنة الموضوعية بينهم ممكن نقول:
1. الساجا افضل لأنها اوتوماتيك (بالنسبالى ع الأقل)
2. فى قوة الموثور الساجا افضل 94حصان و1300 سىسى يعنى موفر فى البنزين (نظريا) عن موتور اللوجان 1600 سىسى 90 حصان
3. الوسع فى الإتنين كويس بالنسبالى
4. توفر قطع الغيار طبعا حاليا لصالح اللوجان لكن انا شايف ان البروتون ممكن مستقبلها يكون كويس
5. التقفيل فى الإتنين تقريبا مستواهم واحد انا شفتهم النهاردة
6. شكل الساجا افضل من اللوجان من ناحية الشبابية
7. التوكيل فى رينو افضل من عز العرب على حد قول الناس
8. الكماليات فى البروتون اكتر من اللوجان (بارك سنسور - باور هيدروليك)
لكن فى النهاية انا مقلق من الإتنين فى حتة الصيانة
ربنا يسهل

[Ayman_52]

انا بعد متابعة اراء الناس اقتصرت المقارنة بالنسبالى على اللوجان الفول اوبشن والساجا الأوتوماتيك وانا شايف ان بالمقارنة الموضوعية بينهم ممكن نقول:
1. الساجا افضل لأنها اوتوماتيك (بالنسبالى ع الأقل)
2. فى قوة الموثور الساجا افضل 94حصان و1300 سىسى يعنى موفر فى البنزين (نظريا) عن موتور اللوجان 1600 سىسى 90 حصان
3. الوسع فى الإتنين كويس بالنسبالى
4. توفر قطع الغيار طبعا حاليا لصالح اللوجان لكن انا شايف ان البروتون ممكن مستقبلها يكون كويس
5. التقفيل فى الإتنين تقريبا مستواهم واحد انا شفتهم النهاردة
6. شكل الساجا افضل من اللوجان من ناحية الشبابية
7. التوكيل فى رينو افضل من عز العرب على حد قول الناس
8. الكماليات فى البروتون اكتر من اللوجان (بارك سنسور - باور هيدروليك)
لكن فى النهاية انا مقلق من الإتنين فى حتة الصيانة
ربنا يسهل

لو حضرتك حابب تروح التوكيل تستفسر اكتر من المهندسيين ... تتكلم اكتر مع ملاك الساجا ... انا تحت امرك فى اى وقت ممكن اقابلك فى التوكيل واعرفك عالدنيا جوا

واهم حاجه استخير ربنا واللى ترتحلها اكتر توكل على الله فيهـــا

تحيـــــــــــــــاتـــى

[تامر.محمد]

انا هاتكلم عن اللانوس بحكم ان هي اللي انا راكبها
و ان كنت شايف انها قدمت بقى على انها تتجاب زيرو , بس برده العربيات في نفس الفئة السعرية مش اعلى منها اوي للأسف (ده من وجهة نظري طبعا ) , لكنها مفروض ترخص شوية عن كده لأن في نفس فئتها السعرية فيه عربيات نزلت كماليات مش فيها خالص , و فعلا لو رخصت عن سعرها بتاع منصور ده هاتلاقيها في المقارنة بقوة

الموتور ... موتور اللانوس في التسارع كل الناس بتقول انه اقلهم , ده حقيقي بالنسبة للفيرنا , بس مش عارف مدى صحته بالنسبة للساجا و اللوجان , بس لو حكمنا بالقدرة الحصانية هو اقلهم فعلا , لكن مع ملحوظة انه معمر جدا بالمقارنة بموتور الفيرنا
و اذكر كمان مقارنة كان المهندس سبعاوي ذكر فيها ان تسارعه بيبان بعد 2500 rpm , و انه على السرعات العالية احسن من الفيرنا , بس طبعا ده على عهدة المهندس سبعاوي


التقفيل ومشاكله ...... انا ما اعرفش حد عنده مشاكل تقفيل في اللانوس , بس طبعا الكلام ده ايام الدايو , دلوقت مش عارف , بصفة عامة هي مشهورة برده انها حمالة أسية

المشاكل المعروفه...... أهمها الفرامل الضعيفة زي ما كل الناس بتقول , هما اخترعوا لها تعديل في قسم دايو , بس طبعا هو ما يزال تعديل في الأول و في الآخر


الشكل الشبابى ....... انا شايف اللانوس ما تزال احلاهم شكلا , و دي طبعا اذواق و آراء شخصية ( لو بتقول جين2 مثلا كنت قلت لك هي أحلى لكن الساجا لأ )

توفير البنزين ...... مش عارف انهي احسنهم او اسوأهم , عموما عربيتي لانوس 99 بتعمل جوة البلد حوالي 180 - 190 كيلو في الصفيحة , و اذكر اني مرة رحت التجمع الخامس من وسط البلد و المعادي رايح جاي يومين ورا بعض عملت حوالي 250 كيلو في الصفيحة , بس خد بالك ان دي أرقام تقريبية على عربية قديمة

قطع الغيار المعمره ..... ما اظنش حد هايعرف يفيدك في دي , ممكن تقارن اللانوس بالفيرنا , و تاخد بالك ان هايبقى فيه نسبة خطأ بسبب وجود قطع غيار صيني كتير اوي في العربيتين , لكن بالنسبة للوجان و الساجا مش هاتعرف تحكم لأن الاتنين لسه جداد

[د.محمود صلاح]

الموضوع محير بس من رأيي ترجيح كفة الأكثر سعراً في اعادة البيع

[powerofhelll]

انا هتكلم عن الساجا
عوامل الامان الي حد كبيره افضلهم و كمان فيها و ساده للسائق
الموتور محترم جدا جدا 1300 94 حصان 120 نيوتن
جيد جدا افضل من الانوس و اللوجان في التسارع
قطع الغيار مش هقدر اتكلم عنها حاليا بس اعتقد انها هتنتشر
بالنسبه للتقفيل حتي الان الحمد لله لم اجد مشاكل في التقفيل بصراحه ممتاز
من حيث الوسع جيده جدا انا مرتاح و الي بيقعد في الكنبه مرتاح
سعر اعاده البيع مش معروف بس الفئه السعريه دي افضل فئه بتمسك سعرها و مش بتخسر فيها كتير

[kapci]

انا شاكر لجميع الردرد وخاصة الأخ اللى اتكلم عن اللانوس tlrsiap والأخ الكريم اللى اتكلم عن الساجا powerofhelll ورأيى ان العربية اللانوس هى من افضل العربيات اللى فى الفئة دى لكن فقيرة جدا فى عوامل الأمان من صاج / فرامل/ ايرباجات / ....الخ كل ده مش موجود وزى مانت قلت لسه المنصور مصمم على سعرها الغالى وانا زى ما زكرت من البداية عندى عوامل الأمان فى المقام الأول وعشان كدة اللانوس برة المنافسة
بالنسبة للأخ powerofhelll مالك الساجا انا بتمنى من حضرتك تقوللى تجربتك مع الساجا من ساعة ما جيبتها - الصيانة الدورية اخبارها ايه؟؟ - التوكيل اخباره ايه؟؟ - اسعار قطع الغيار؟؟ - استهلاك البنزين جوة البلد وع السفر؟؟ الكماليات؟؟ التكييف؟؟ قوة الموتور على ال rpm المختلفة هل قوى ولا ضعيف؟؟ ياريت تقولنا تجربتك لأن انا شايف ان البروتون الساجا ممكن لو نجحت تكتسح كل الفئة السعرية دى لأنها اوتوماتيك وموتور كويس وواسعة واكيد موفرة فى البنزين 1300سىسى
وعن نفسى انا مش هبص لسعر اعادة البيع دلوقت لأن انا مش بياع عربيات انا العربية هخليها معايا مش اقل من 5 الى 6 سنين كتخطيط وساعتها الخسارة بتبقى على كل العربيات اللى من الفئة دى تقريبا قريبة من بعض لكن بصراحة انا مش عاوز ادفع فلوس كتير فى عربيات كورى هتهنج برضه بعد 4 الى 5 سنين زى الهيونداى الأكسنت - الإلنترا - الشيفروليه بأنواعه غاليين وبرضه هيهنجوا بعد شوية وسعرهم غالى (كلهم فوق 80000ج الأوتوماتيك) وبرضه فيهم مشاكل وعيوب وانعدام تام فى وسائل الأمان يكفيك انك تعرف ان الهيونداى الأكسنت الأوتوماتيك اللى الناس طالعة بيها القلعة ب 82000 ومفيهاش اى وسائل امان ولا ABS ولا ايرباجات