تجربة قيادة - ماذا تشتري لو كنت مكاني ؟

[Karim_Monir]

السلام عليكم ورحمه الله
بما اني نويت اغير سيارتي الريو الحالية (قرار بغير رجعة ان شاء الله) ليس لعيب فيها ولكن عايز عربية اكبر

قررت اني افاضل بين كذا سيارة ولقيتني استقريت علي الثلاث سيارات دول وطلعت عملتلهم تست درايف علي طريقتي عشان اختبر فيهم الحاجات اللي انا عايزها وطالب ترشحولي واحدة من التلاتة

كرولا 1300 2007
لانسر 1600 2007 هاف اسبورت
هيونداي النترا 2007 مانيوال (اقل كماليات) عشان دي الوحيدة مانيوال

نتائج التجربة
1-الكرولا تحفة -تسارع غير عادي(افضل من لانسر 1600) واسعة جدا-وضعية قيادة ممتازة-كراسي مريحة-ضمان 3 سنين او 100 الف كيلو(وكيل محترم)
العيوب خفيفة بعد 150 مسكت الدركسيون جامد وقلقت بس عديت بيها ال 170(صاحبها كان نزل في الدواسة من الخوف)-مفيهاش عداد RPM ودي حاجة سخيفة جدا بالنسبة لي ومش بحب اللي بيتركب لاني بحب شكل التبلوة سيمبل-فرامل ضعيفة نسبيا بالنسبة لحجم العربية.

2-لانسر 1600 عربية ممتازة فعلا ثبات عالي-ماتحسش انك شغلت التكييف زي الكرولا 1300 واسعة من جوة-ثبات خرافي علي الارض-قطع غيار رخيصة بالنسبة لكونها يابني وسهلة ميكانيكا-تمن منافس جدا(خليجي بضمان 3 سنين او 60 الف)-استهلا بنزين قليل بس مش زي الكرولا
العيوب شكل قديم نسبيا الجديد نازل كمان 4 شهور-منتشرة انتشار غريب جدا خاصة بعد نزول ال 1300 ووجود عربيات بدون ضمان نهائي ب 78 الف جنية
واطية شوية مع شوارعنا الجميلة-مفيش كماليات كتير في المانيوال.

3-النترا 2007-(اتاح لي تجربة قيادتها اخونا معتز سليم وكان غاية في الذوق والاحترام والتواضع جزاه الله كل خير)
عربية واسعة من جوة صاج معقول نسبيا شكل جديد (حاسة قريب قوي من الكرولا 2008)ثبات محترم قوي في الملفات والمنحيات الصعبة)
تسارع عالي جدا جدا زي الكرولا-موتور ناعم -تاثير التكييف خفيف جدا علي يكاد لا يذكر-احلي حاجة فيها الباور ستيرنج كهرباء-بجد خرافي مش معقول بيدك ثبات عالي جدا كل ما تزود السرعة وتحس انه كل ما تزوقة يزوقك مش عارف اوصلهالكم ازاي بس ماتحسهاش الا لما تسوق بنفسك بس اعلي من 100
الفرامل حساسة بطريق غير عادية-لمسة تحس انك هاتلزق في الازاز-فتيس كويس بس لسه ما وصلش للياباني في نعومتة-الشكل جديد وقدامة سنتين تلاتة علي ما يتغير
العيوب -سعر مرتفع نسبيا خاصة بالنسبة لجميع الكماليت-وكيل زي الزفت -قطع الغيار هاتكون مرتفعة برضة عشان شكل جديد مع عدم انتشارها حاليا
خسارة متوقعة عند البيع عشان كوري(عرف الشعب المصري-بعاني منه دلوقتي وانا ببيع عربيتي)-عمر افتارضي اقل بشوية من اليابني

ده كل اللي عندي يا ريت ما تبخلوش بردود مقنعة او عن تجربة

كريم منير

[M_ElSabaa]

الاخ العزيز كريم مبروك مقدما وانشاء الله ربنا يكفييك شرها ويباركلك فيها مهما كان اختيارك
انا ممكن اتكلم عن الانسر و التويوتا لتجربتى الاثنين اما الانترا مش هفتى فيها
ارشحلك الانسر لأنها كانت معايا بس للاسف اتسرقت .. المهم بغض النظر عن انتشارها هى فعلا عربية كويسة جدا انا جربت التويوتا وفضلت عنها الانسر لانها من الداخل احلى كتير(وجهة نظرى) وكمان بسعر الانسر هتاخد اوبشنز كتير مش موجودة فى التويوتاABS, Air Bags وكمان فرق سعة الموتور والتوكيل كويس بالمقارنة بتويوتا عشان كل اصحابى بيشتكوا منه فى المعاملة على سبيل المثال واحد صاحبى كان عاوز يروح يغير الاكصدام الامامى و رفرف نتيجة حادثة بسيطة مفيش حاجة فى الميكانيكا هو بس التغيير ده قالولوا تعالى بعد 3 اسابيع عشان الحجز مليان للمدة دى !!
وبالنسبة للشكل الجديد للانسر انا بعت لميتسوبيشى وقالوا ان الشكل الحالى هيفضل موجود 2 سنة كمان وممكن تشوف الايميل انا حطه فى قسم الميتسوبيشى الايميل ليميتسوبيشى

وربنا يوفقك

[Ahmed Hassan]

اولا:انا شخصيا اقولك خلي الهيونداي ره اللعبه.
ثانيا: متشتريش عربيه جديده من غير ايه بي اس و ايرباج.
ثالثا: حتى لو التويوتا ال 1300 فيها ايه بي اس و اير باج, الموتور ال 1600 الانسر يكسب, ده غير فرق الثبات اللي انته لاحظته.
رابعا: النتيجه لانسر 1600

ملاحظه: انا لا اكن اي شعور خاص للانسر و لم اوافق على شرائها مطلقا.
سؤال: مفكرتش في الواجا اللي بـ 103000؟؟؟ :twisted:

[Karim_Monir]

سؤال: مفكرتش في الواجا اللي بـ 103000؟؟؟ :twisted:

فكرت بس اولا لا اطيق الاتوماتيك
ثانيا اعادة البيع منهارة وشوفتها بنفسي ماشية 17 الف كيلو مطلوب فيها 73 وتخلص 70 وحالاتها ممتازة

[modux]

بصراحة هتكلم عن لانسر 1600 هاف سبور و كرولا 1300 كاملة
انا جربت الاتنيين

بصراحة مش عارف انتا ازاي بتقول ان الكرولا اقوي من اللانسر 1600

اصلا اللانسر دي وحش علي الطريق
موتووور جبااااااااااااااااااااااار
ثبات رهين
مناورة عجيبة
كماليات تحفة
عمر طووويل
اسعار منافسة
توكيا محترم

انا سوقتها كتير بتاعت واحد صاحبي !!!
هيا 1600 كنت حاسس ان تحت رجلي ديناصور
:]

اللنسر تكسب و لولا انها مش حلوة مش كانت انتشرت بالصورة دي

[د.أحمد سمير]

اللانسر افضلهم طبعاً .. لكن لو بتفكر تغير تاني قريب أنصحك بالكورولا لا تخسر أبداً تحت أي ظرف من الظروف .
المشكلة الوحيدة في اللانسر إن بعد فترة سعر الموديل كله بيبقى واحد تقريباً ولا يوجد أي فرق بين الاستعمال النظيف جداً ، والاستعمال السيء . خصوصاً إني عارف مدى حرصك على سياراتك .
تقبل خالص مودتي وحبي

[noon_eg]

الاستاذ كريم المحترم

انا لو مكانك حاختار الانسر بدون تردد وذلك لعده اسباب :

1- الكرولا غاليه على الفاضى - بمعنى اخر فرق السعر لن تاخذ به اى ميزه غير مجرد الاسم
2- الكرولا الثباات بتاعاها اقل بكتير فى الموديل الحالى
3- الكرولا خاليه من ِABS
4- االانسر جيده من جميع النواحى سعرمناسب - موتور قوى - اعاده بيع بسهوله -اوبشن عاليه - يابانى 100%

الخلاصه :
العربيات اليابانى كلهم واحد تقريبا الفرق الاساسى فى السعر مقابل المكانيات كده اللانسر تكسب وبكتير

[v2mody]

ازيا يا كريم عامل ايه
انا ياسيدي كنت بفكر برده ما بين اللنسر و الكورلا 1600 فول اوبشن "اللي فيهم فتحت سقف و كل حاجه"
بغض النظر عن فارق السعر الرهيب 114000 و 154000 في شهر 12 اللي فات لما كنت بجيب العربيه ...
لاقيت الاتي
1-ال لنسر احلي شكل بكتير
2-اكتر ثباتا
3-غلي الكورلا مبالغ فيه يعني ب 154000 في اختيارات كتير احس منها " اوكتافيا-فوكس-مازدا 3 السبورت" و غيره
4-اكتر انشارا و دي حاجه انا كنت متضايق منها في الاول بس دي ميزه كبيره جدا علشان انتشار قطع الغيار

المهم جبت لانسر ضمان الوكيل سبورت ب 114000 و لم اندم عليها اطلاقا بصراحه
-بالنسبه للتوكيل ال لانسر بالذات مش فارقه كتير لان ما دام كل حاجه موجده بره ايه اللي يخليتي اعملها في التوكيل و ادفع ضعف الفلوس
-بالنسبه للشكل الجديد انا كنت عارف شكله و حتي لو كان موجود ساعتها كنت حختار الشكل الحالي لتوفر قطع غياره-موتور اكبر-فرق ال 20000 الزياده علي الفاضي في راي لان الشكل الجديد مش جامد للدرجدي

لو في اي اسئله بخصوص ال لانسر ..انا تحت امرك و ربنا يوفقك في الاختيار

[hazem_khidr]

و الله يا استاذ كريم سؤال صعب بس اولا الكورولا و اللانسر موديلاتهم الجديده خلاص علي وشك تنزل حيبقي حرام انك تجيب عربيه منهم دلوقتي و كمان كام شهر تلاقي الموديل الجديد نزل حتبقي مش مبسوط.
انما لو مش حاطط دي في دماغك يبقي تفاضل بينهم علي اساسا النقط دي
1.الكورولا سعر اعاده البيع احسن حاجه في التلاته و قطع الغيار اكيد ارخص بس مشكلتها الحساسات اللي فيها(مع خالي و فيه حساس شكمان ما تعرفش بيعمل ايه باظ!!!)
2.اللانسر شكلها حلو بس منتشره فعلا معدش ليها بريق بس التابلوه بتاعها مريح جدا للعين و ثابته اوي و مفيهاش مشاكل كتير عن تجربه و ناعمه اوي اوي
3.الالنترا عربيه شكل لحو برضه و فيها من البي ام كتير بس التابلوه بتاعها م جوه مش لايق علي بعضه (تحس انك جايب حاجه تقليد )البلاستيك بتاعه مش جلو و غير كده جسمها صعب انه يتسمكر لا قدر الله لو في خبطه في رفرف ولا حاجه و لسه ما اتجربتش و محدشش عرف اذا كانت حلوه ولا لاء
عموما انا متهيالي تستني الكام شهر دول يمكن تلاقي عربيه تانيه تكون غايبه عن دماغك

[memo_hefnawy]

واضح إن أنا الوحيد اللى مؤيد للكرولا لكذا سبب :

1- أنعم من اللانســر (ماتور و عفشة و أتحدى من يثبت العكس)
2- إعادة بيع ضد الخسارة (كريم بيحب يغير عربيات كثير)
3- ثبات الراجل قال إنها ل 150 حلوة يبقى كفاية علية ال 150
-=-=-=-
اللانسر تتميز فى :
====
1- ثبات أفضل
2- شكل أحلى
3- كماليات أكثر + ABS
----------
الإلنترا خارج حساباتى للمغالاة فى السعر ....مع إحترامى قدام إتحطت مع اليابانى فاهقول إن فاتك اليابانى مش هاتعرف تركب حاجة تانى :)
-----------
لكن كريم هايجيب اللانسر إن شاء الله :) أنا عارف دماغه :mrgreen:

[sab3aawy]

اشترى لانسر يا كريم

انا ساعة لما كنت بشترى كنت بادى بحوالى 15 عربية فى المقارنة فضلت احذف عربية ورا عربية بناء على معاملات السعر والدعم الفنى ولإنتشار وتوافر قطع الغيار وسعر اعادة البيع ولم يتبق فى النهاية سوى اللانسر والصنى ، وفى النهاية انا اخترت الصنى ليس لأى قصور فى اللانسر ولكن لأسباب لها علاقة بالشكل أولا والسعر ثانيا لأنى معنديش تحفظات عامة تجاه التقفيل المحلى ولكن تحفظات تجاه مصانع بعينها، لكن لو شكل اللانسر كان شدنى اكثر من الصنى كنت هاخدها بلا تردد وانت طبعا سيد العارفين ان مسألة الشكل دى مسالة ذوق شخصى يعنى لا هى ميزة ولا عيب

لكن بالنسبة للانسر سعر ممتاز، اداء رائع، إعادة بيع مضمونة ،قطع غيار فى كل مكان، محرك كبير وقوى، صالون واسع،

الكورولا انا لا ارشحها لأنى شايف ان ادائها مش فارق عن اخواتها اليابانيات ومع ذلك سعرها مبالغ فيه بشدة، على اعتبار انك بتشترى علامة تويوتا ودى لها تمن لوحدها( يعنى لما تكون اللانسر 1300 -ضمان مصرية-ب88 الف والخليجى ب 78 الف والنيسان 1600 ب88 ألف ، بيقى كون التويوتا 1300 الفاضية اللى من غير حتى RPM تمنها 100 ألف فده انا شايف ان اسمه استهبال)

اما عن الإلانترا ، فبالرغم من انها تحمل احدث لمسات تكنولوجيا العصر ، الا اننى لا زلت متعلق بتجربه السيارات اللانسر والكورولا موديلات التسعينات اللى عاملة 150 الف قصاد السيفيا والإلانترا اللى عاملة 60-70 ألف، والفرق كان واضح لصالح السيارات اليابانية مما دعم لدى الإحساس بالتفوق الواضح للسيارات اليابانية فى مسألة العمر الإفتراضى، لذلك انا لازلت متحفظ على السيارات الكورية من وجهة نظر العمر الإفتراضى حتى تظهر لنا سيارة كورية تكسر لدى هذا الإعتقاد (مش عارف ليه حاسس ان الماتريكس هاتعملها وتغير نظرتى عن العمر الإفتراضى للعربيات الكورى، بس لسة عليها شوية)

[osstv]

عزيزى الاستاذ كريم منير
ليه مفكرتش فى الاوبترا . انا جربت المانيوال والله بدون مبالغة عربية فى منتهى الجمال والثبات
وفيها كل اللى انت عايزه

نبدأ اول حاجة بعيوب العربية :-
صجها خفيف شويه - استهلاك البنزين عالى شويه يمكن علشان انا لسه بلين - نشفة شويه فى المطبات من ورا
نيجى بقى للمميزات :-
صوت الموتور غير مسموع بالمرة - سحب العربية اكثر اكثر من ممتاز جدا !!!! الاوتوماتك رائع على عكس ما متوقع البعض ان الاوتوماتيك بتاعها مش حلو او هو هو بتاع النوبيرا-تكييف قوى جدا و فعال - عزل الكابينه الداخليه اكثر من ممتاز ممكن تنام جوه العربية و انت قافل الزجاج - التقفيل ممتاز - ثبات العربية رائع تحس انك راكب دبابة فى الثبات بس العربية عاليه من ورا و المساعدين اقويه جدا و ده اللى بيفسر انها ناشفة شويه فى المطبات من ورا - تقفيل الموتور ممتاز ز مش ببالغ لما تفتح الكبوت تحس بنظافه التقفيل على عكس الصنى مع الاححترام الكامل لاصحاب الصنى - العربية واسعة جدا من جوه
فى حاجة كنت عاوز اقولها بالنسبة للاوتوماتك بتاع الاوبترا : تسارع العربية من 0 الى 100 فى 11.5 ثانية و ده رقم ممتاز بالنسبة لعربية اوتوماتك فى نفس الفئة اللترية
مثال تسارع الجين 2 من 0 الى 100 للاوتوماتيك فى 13.5 ثانية
اه نسيت اقول حاجة ان الكاسيت بتاعها حاجبنى اوى هو الكاسيت الاصلى للعربية مش متركب فى مصر

[sh_masry]

بالنسبه للى بيتكلم عن الثبات يبقى ماجربش الألانترا .... ثبات الألانترا اشد واحده فيهم فى الثبات سواء الشكل الجديد او القديم , و ده عن تجربه لجميع العربيات المذذكوره من قبل ,,,,,,
و انا استبعد الكورولاغير ذلك انا لن ادخل فى مقارنه بين اللانسر و الألانترا لأنها مقارنه صعبه , ما عدا ان دى يابانى و التانيه كورى و لكن احلى من بعض ...............
بقوللك ايه بما ان احنا قريبين من بعض ممكن تجيب الانسر و تستعملها اسبوع و اسبوع تاخد الألانترا بتاعتى و تدينى الانسر و كده يبقى معانا الأتنين و اسبوع و اسبوع و تبقى الحياه حلوه ههههههههههههههه

a7'ook
Sherif

[Mo3taz Selim]

أخى الغالى جدا جدا ... كريم

أولا أنا بأشكر سيادتك على ذوقك العالى و كلامك الجميل فى حقى ... و فعلا أنا و سيارتى شرُفنا بلقائك و بتجربتك للقياده

ثانيا طبعا رأيى هايكون منحاز للألنترا و ده نتيجه لتجربتى معها التى ابتدأت منذ 28/12/2006 و حتى اليوم ... و الحمد لله مررت أنا و هى بالعديد من التجارب فى تلك الفتره ... و لله الحمد كل يوم يزداد إعجابى بها ...
لن أطيل على سيادتك ... لكن ما أريد أن أقوله هو أننى كنت فى نفس حيرتك بين اللانسر و الألنترا و لكن بفضل الله أخترت الألنترا و ذلك لعدة أسباب
1. الألنترا شكل حديث للغايه و لن يتغير قبل 3 أو 4 سنوات ... أما اللانسر فكلها كام شهر و الشكل الجديد ينزل
2. الألنترا موتور 1600CC & 121 HP سعر 92000 ... اللانسر 1600CC مش متذكر كام حصان سعر 98000 (ضمان مصريه)
3. الألنترا أوسع من الداخل و مساحة التخزين فى الشنطه أوسع فعلا .
4. التابلوه جديد و إضاءه مريحه جدا للعين.


أسف للأطاله و لكن أدعوا الله أن يوفقك لسياره تريحك و ترضيك

[Abdallah]

لانسر بلا منازع, ليس حبا فيها ولكن اسعار التويوتا والالنترا مبالغ فيهم بشكل غريب مقابل ان ثبات التويوتا الجديدة سىء تماما وسيبك من موضوع 150 دة, انت مجربتش تسوق على ارض زلقة وخد بالك موضوع ال ABS فعلا بيفرق فى المطر او الطرق الزلقة والله الموفق.