ساعدونى يا أهل الخبرة

[loayauc]

يا جماعة أنا ناويت أشترى عربية هاتش باك تكون كامله بكييف و باور. بس مش عارف أختار اية الأنسب فى حدود 30 ألف. انا كنت بفكر فى:
IBIZA
Opel corsa
POLO
بس خايف ان الألمانى يكون قطع غياره غالية و IBIZA الأسبانى يكون موتوره مش الى هوا و التكييف تعبان.
أنصحونى بأيه يا أهل الخبرة؟؟؟؟

تم النقل بواسطتى
26/4/2010
10:36
15 ب

[ehab_mansour]

الكورسا ما اعرفش عنها حاجه

البولو والابيزا الاتنين واحد في كل حاجه من 94 الي 99 الاتنين تقفيل أسباني و قطع غيارها كلها ألماني
البولو تتفوق علي الابيزا في الأتي :-
1- وزن أخف وبالتالي سحب أفضل بالنسبة للمحرك الأصلي سواء 1300 ل94 او 1000 سيسي في 98 و 99
2- علامة فولكس فاجن بتخليها مطلوبة أكثر وسعرها أعلي شوية

الابيزا تتفوق عن البولو في :-
1- أكثر اتساعا من الداخل والخارج (شاسيه أعرض وأطول قليلا من البولو ) وبالتالي أكثر ثباتا علي الطريق من البولو
2- بينزل فيها كماليات أكثر من البولو يعني تلاقي منالابيزا كتيييير كاملة (تكييف - باور - زجاج كهرباء كامل - مرايات كهرباء - سنتر أصلي ) لكن البولو كماليات أقل
الاتنين عربيات محترمة وممتازة كأداء وسحب واستهلاك بنزين بمحركها الأصلي واللي ترتاح فيها من الاتنين او الأفضل حالا توكل علي الله واشتري

واي سؤال تحت أمرك

[ehab_mansour]

نسيت أقلك ان المحرك والتكييف وكل المكونات في الأتنين واحد ما عدا الجسم الخارجي والتقفيل الداخلي

والاتنين قطع غيارهم معقولة مش غالية قوي ولكن بتعيش كتيييييير وطول ما انت محافظ علي العربية وبتعملها سيرفس صح هتشيلك وتريحك ولو اهملتها هتتعبك

30 الف ما تعرفش تجيب بيهم عربية حالتها كويسه سواء بولو او ابيزا ممكن من 32 او 34 لحد 37 عشان تجيب حاجه حالتها كويسه صح وكاملة لكن المبلغ ده ممكن تجيب واحده فاضية مافيش فيها كماليات 94 او 98
وربنا يوفقك

[loayauc]

طيب يا ايهاب باشا انا عاوزها حتى فيها تكييف كدة ممكن بكام لو حالتها حلوة??
معلش بردو اسألك ابيزا موديل كام اللى توصي بيها؟؟ و ايه هيا مواصفتها من ناحية الموتور و كده؟؟
معلش ازعجتك

[د.محمود صلاح]

المبلغ ده صعب تلاقي المواصفات دي ..
فكر في كيا برايد هاتش باك كوري وركب لها تكييف
أو هيونداي اكسيل هاتش باك هتلاقيها في الحدود دي وفيها مكيف وباور
أما البولو سعرها للحالات النظيفة هيعدي ال 30 الف

[loayauc]

لا المبلغ يجيب ايبيزا بس انا عاوز اعرف اية المواصفات الحلوة والموديل الافضل???

[loayauc]

يعنى ايه احسن فى الموديلات دى؟؟؟؟

[ehab_mansour]

الأفضل من وجهة نظري موديلات من 97 الي 99 وده علي حسب فلوسك للأسباب التالية :-
1- الحالة العامة أفضل (موديل أقرب 4 سنوات )
2-أقل في استهلاك البنزين محرك 1000 سيسي حقن الكتروني بنفس قدرة ال 1300 سيسي كاربيراتير
3- أقل في الضبط والأعطال بشرط المحافظة علي عمل سيرفس بانتظام للمحرك 1000 سيسي علي عكس ال 1300 كاربيراتير بيحتاج ضبط سلانسيه وبيكات وصيف وشتاء لكن الأخر لا يحتاج نهائيا لأي من ذلك
4- تكنولوجيا أفضل حقن الكتروني وعدادات ديجيتال وأيضا سحب وسرعة استجابة المحرك في 98 افضل من 94 لنفس الأسباب
5- شكل أفضل حيث معظم أصحاب موديل 94 بيعدلو الوش والاكصدامات الي 98

ومن رأيي تبحث علي عربية موديل 98 او 99 كاملة او نصف كماليات حالتها كويسة وتزود الفين او ثلاثة علي اللي معاك وربنا يوفقك وتعرف تخلص فيها

[loayauc]

متشكر اوى استاذ ايهاب و ربنا يكتر من خبرتك

[loayauc]

ايهاب باشا. معلش اسالك هيا الايبيزا "واطية على الارض"??
اصل عاينت واحدة و لاحظت انها كدة ممكن تتبهدل فى الطبات. ايه راى حضرتك???

[loayauc]

?????????????????

[ehab_mansour]

يا أفندم موضوع الارتفاع عن الأرض ده انا اتكلمت فيه قبل كده واحد الأعضاء قلي انت متحيز وكلام كده كتيييييييير دايقني بصراحة
اللي أقدر أقوله اني معايا ابيزا 98 محرك 1000 سيسي وارتفاعها عن الأرض كويس جدا وحتي مع التحميل يعني سافرت بيها كتيييييير كاملة العدد 5 أفراد بشنطهم ومش بتحك غير في المطبات العالية جدا اللي بتحك في اي عربية عادية ومحملة بس وشكرا
وعلي فكرة بتحك فقط لما باخد المطب عادي من غير وقوف عليه لكن لما باخده براحة وأقف عليه عمرها ما بتحك في اي مطب

عشان اكون صادق انا جربت عربيتين تانيين في نفس الظروف وهما دايو لانوس ونوبيرا والاتنين بيحكو في اي مطب مع بنفس الحمولة ونفس الظروف وحتي بعد تعلية عربية اخويا اللانوس برضه عندي أعلي منها بفضل الله

هذه تجربتي شخصيا وغير مسئول عن تجارب أخري مع عربيات ملعوب فيها او متغيرلها مساعدين او سوست ليست أصلية

والله علي ما اقول شهيد

[loayauc]

متشكر اوى اوى استاذ ايهاب