قارن بين سوبارو امبريزا وسكودا فانتازيا

[ahmedelkadi75]

عاوز اقارن بين سوبارو امبريزا وسكودا فانتازيا فى كل حاجة قبل ما اشترى
من ناحية مشاكل الناس قابلتها - خدمة التوكيل - قطع غيار - مشاكل فنية

[3ateef]

رأى السطحى....
السوبارو عربية سبور...
الاسكودا عربية عائلية...

[ahmedelkadi75]

معلش انا سالت السؤال عائم محتاج اللى عايز يدينى رايه انى اديله حاجة صغيرة من اللى جوة دماغى

(سوبارو امبريزا هاتش باك مانيوال) أو (سكودا فانتازية مانيوال(

اولا سوبارو

مزاياها انها ثابتة جدا + تكنولوجيا عالية جدا + احب الفكر العالى خطفت قلبى لما شوفتها الهاتش باك قدامى باللون الأبيض + حمالة قاسية + قطع غيارها معمرة
عيوبها شنطتها صغيرة + لو ركب فيها اكتر من اتنين بتبقى واطية من الأرض + لما تيجى تبيعها هاتقعد فترة علشان تبيعها + اللى انا محتاج حد مجربه هو قطع الغيار للناس اللى احتاجت قطع غيار كتيرة هل كلها موجودة فى التوكيل ولا بتتأخر عقبال ما تيجى

نيجى للسكودا

مميزاتها عالية عن الأرض + شنطتها كبيييييييرة جدا + ثابتة برده + سعرها للمستعمل ثابت مش بتفقد سعرها + اى حد بيشتغل فيها + زى اى المانى قطع غيارها معمرة
عيوبها اسعار قطع غيارها اغلى من السوبارو + سامع ان فيها مشاكل كتير (تكييف - فتيس لو اتوماتيك - بتجيب هواء من خارج العربية حتى لو انت قافل الهواية حاجات كده يعنى)
علشان كده محتار جدا جدا جدا ياريت حد يدلنى من اللى عنده خبرة علشان انا كنت حاطط برافو قدامى بس بصراحة حطيت اوكتافيا مكانها
وخصوصا الفرق بينهم حوالى 10000 جنيه
سوبارو مانيوال 140000
اوكتافيا مانيوال 150000

[د.محمود صلاح]

الفرق يندرج تحت :- الياباني ولا الاوروبي بكل ما يحويه هذا الملف لو اتفتح تاني

[ahmedelkadi75]

انا لسه سائل النهاردة على عيوب فانتازيا لقيت واحد رجع فانتازيا علشان فيه مشكلة من الحساسات اللى على الموتور حساسة جدا لأى حاجة واول اسبوع راح التوكيل علشان الموضوع ده والراجل اللى باعهالو قله انا قولتلك بلاش فانتازيا؟؟؟؟؟؟؟؟؟؟؟؟

[raheeb]

انا شايف فانتازيا اجمد من سوبارو من كل حاجة
ارشحلك فانتازيا

[ahmad--ezzat]

سوبارو طبعا....
دة ياراجل السوبارو موديلات التسعينات بتسحق عربيات احدث منها فى التسارع والثبات...خليك فى اليابانى...السوبارو تاريخ...وبصراحه الاسكودا من ساعه الفليشيا والعربيات العار دى وانا مش ببطيقها....العربيه الصح تبقى ماضى وحاضر ومستقبل زى السيفيك والبى ام والمرسيدس والنيسان و الاوبل و و و (راى شخصى بعض ناس بتحسسنى انى بتكلم فى عرض)

[raheeb]

خلينا نتكلم فعلى
ايه الفايدة اللى هاناخودها من سوبارو وايه الفايدة اللى هاناخودها من فانتازيا وخلى كلامنا عبارة عن مميزات وعيوب كل نوع

[ahmad--ezzat]

من رايى السوبارو...
1-التحكم في اللفات والثبات العالى .
2- التوفير في الوقود.
3-دفع رباعي على سياره صغيره.
4-شكل رياضى جميل
5-صناعة يابانية 100%

[raheeb]

جميل وفين رايك عن فانتازيا

[ahmad--ezzat]

الفانتازيا...اعتقد شبيها بالاوكتافيا...انا ركب اوكتافيا a5 بصراحه معجبتنيش خالص...عربيه تقيله فى كل حاجه..بابها تقيل بغباء مش سهل...صعب الفتح والقفل ...السحب لا يليق بها تماما...بصراحه مدخلتش دماغى

[raheeb]

هل سقت سوبارو

[raheeb]

معلش علشان بتأخر على الكتابة انا مش بتهكم على سوبارو على فكرة انا عملت عليها اختبار سواقة فى التوكيل فى اسكندرية

مميزات السوبارو زى ماقولت

ثبات فى الملفات وعلى الطريق علشان طبعا awd + تكنولوجيا يابانية 100% + قطع يابانى 100% ومعمرة

مميزات فانتازيا

ثابتة على الطريق ان مكانش علشان هى اوكتافيا المانى فيبقى علشان هى اتقل من السوبارو حوالى 1500 كيلو السوبارو حوالى 1300 + شنطتها واسعة خالص ممكن تنام فيها + عالية عن الأرض + قطع غيارها موجودة فى كل حتة ومعمرة لو جبتها اصلى + لو عايز تبعها هاتلاقى سعرها فى جيبك

عيوب فانتازيا

طلعتها بطيئة ودى علشان تقيلة + سمعت من ناس كانت معاها العربية دى بس مش متأكد منه فيها مشاكل فى حساسات الموتور انها حساسة جدا ضد المياه او المطبات الجامدة وبرده التكييف

عيوب السوبارو

بطئ فى الطالعة علشان awd + الشنطة أصغر بكتير من فانتازيا + واطية و واطية اكتر لما بتركب فيها حد معاك وده ميزة وعيب فى نفس الوقت علشان المقارنة دى عندنا فى مصر + قطع غيارها وكيل فقط يعنى لو مش موجودة هاتتعطل وهاتبقى تحت رحمتهم + سعرها لما تبيعها هاتاخد وقت طويل علشان السوق بتاعنا مش داخلة دماغه

[ahmad--ezzat]

ياباشا لولا اختلاف الاراء :)

[raheeb]

تمام مظبوط بس انا حبيت اشرح كل حاجة علشان يبقى بنتكلم على دراية