رجاء المساعدة...معايا من 50 الى 60 الف اجيب ايه؟

[blueberry]

السلام عليكم
انا لسة عضوة جديدة من امبارح بس شوفت على عربية و انا ماشية اعلان الموقع لمل دخلته الصراحة لقيته حاجة جميلة جدا ما شاء الله فقولت اكيد هنا هلاقى اللى يخرجونى من حيرتى دى
الاول كنت بفكر اشترى عربية مستعملة زى الفيات سينا 2002 او الرينو كليو بس نصحونى كتير انى اجيب زيرو(مع العلم انى مبتدئة سواقة يعنى نقول هتعلم فيها) فلقيت ان حدود امكانياتى بين الماروتى_التو_بيكانتو_اتوس- سبارك-i10

اراء الناس اللى حواليا متضاربة جداااااااااااااااااا يعنى مستفدتش منهم بحاجة فياريت حد يفدنى من ناحية:
1- اللى تستحمل اتعلم فيها مع العلم انى مبحبش التغيير و عايزاها تعقد معايا اكتر من عشر سنين
2-قطع غيار تكون متوفرة و مش غالية اوى
3- من الاخر انا مش عايزة عربية تبهدلنى فى مشاوير الميكانيكية لانى مش هعرف اسلك معاهم لان خبرتى قليلة فى التعامل مع الناس
وجزاكم الله خيرا

[jisso82]

أولا أهلا بيكى فى المنتدى و شرف ليا إنى أكون أول حد يرد على مشاركتك

ثانيا أنا شايف ال I10 الأجمل شكلا و تقفيل كورى على ما أعتقد مش مصرى و طبعا قطع غيار الهيونداى متوفرة و رخيصة
و ممكن كمان تفكرى فى بروتون ساجا لو بتبصى للمستقبل شوية لأنها عربية سيدان حلوة ماشاء الله و إمكانياتها رائعة بس عيبها الأكبر غلو قطع الغيار لأنها لسة جديدة فى السوق و ده لينك لموضوع كامل عليها عشان تشوفيها بنفسك

http://www.nilemotors.net/Nile/132583-a.html

[ahmedhilmy]

اولا اهلا بيكي في المنتدي ثانيا انا مع الاسف مش بايد اني حد يكون لسه بيتعلم السوافة يجيب عربية زيرو يتعلم فيها لانها سريعا ما هتتبهدل و سريعا ما هتضطري تزوري الميكانيكي او التوكيل او السمكري طالما خبرتك مش تمتم في السواقة هاتي حاجة تعبانة شهر او اتنين اتعلمي فيها و بعدين بعيها لما تكوني حسيتي انك بقيتي فت علشان تحفظي علي فلوسك و في النهاية ان شاء الله تكوني موفقة في الاختيار و انا شخصيا ميال للبيكانتو عربية جميلة و كل اللي معاهم بيشكروا فيها و شكلها لطيف

[A_H_M_A_D]

أنا رأيي برضه بلاش عربية زيرو في الأول , لأنها فعلا هاتتبهدل بسرعه و هايصعب عليكي شكلها و هي ملحقتش تعد معاكي

فأنا شايف إنك تجيبي حاجه مستعملة الأول و لو لمدة ست شهور مثلا أو سنة لغاية ماتتعلمي عليها كويس و تتقني قوانين التعامل مع السيرك المصري المسمى بالشارع

بعد كده لما تحسي إنك بقيتي كويسة هاتي عربية زيرو تعد معاكي فترة طويلة إن شاء الله

[Amrrr]

انا معايا اتوس بقالها تلات سنين - عامل 108ألف كم !! بصراحة العربية زي الفل وتكييفها حلو وحجمها مناسب اوي في الركنة وملمومة هتلاقيها معاكي حلوة في الزحمة
بس كل العربيات اللي هتختاري منها ضعيفة ومش هتستحمل خبط كتير !!!!

اولا اهلا بيكي في المنتدي ثانيا انا مع الاسف مش بايد اني حد يكون لسه بيتعلم السوافة يجيب عربية زيرو يتعلم فيها لانها سريعا ما هتتبهدل و سريعا ما هتضطري تزوري الميكانيكي او التوكيل او السمكري طالما خبرتك مش تمتم في السواقة هاتي حاجة تعبانة شهر او اتنين اتعلمي فيها و بعدين بعيها لما تكوني حسيتي انك بقيتي فت علشان تحفظي علي فلوسك و في النهاية ان شاء الله تكوني موفقة في الاختيار و انا شخصيا ميال للبيكانتو عربية جميلة و كل اللي معاهم بيشكروا فيها و شكلها لطيف

أنا رأيي برضه بلاش عربية زيرو في الأول , لأنها فعلا هاتتبهدل بسرعه و هايصعب عليكي شكلها و هي ملحقتش تعد معاكي

فأنا شايف إنك تجيبي حاجه مستعملة الأول و لو لمدة ست شهور مثلا أو سنة لغاية ماتتعلمي عليها كويس و تتقني قوانين التعامل مع السيرك المصري المسمى بالشارع

بعد كده لما تحسي إنك بقيتي كويسة هاتي عربية زيرو تعد معاكي فترة طويلة إن شاء الله

انا رأيي كدة برضة

[blueberry]

ما شاء الله انا متخيلتش انى هلاقى ردود بسرعة كده دا انا قولت استنى على الناس شوية لحد لما يقروا و يردوا عليا
انا متشكرة جدا لكل اللى نصحنى و الصراحة انا اقتنعت بكلامكوا جدا....كنت هشترى 128 مستعملة بس اخويا معاه 131 و الصراحة صعب عليه اضيع فلوسى و اخسر فى شراء عربية و بعدين بيعها فعرض عليا اتعلم عليها لانها قديمة و كمان قطع غيارها رخيصة ..الحمد لله ربنا عالم بحالى
ان شاء الله لما اجى اجيب عربية لو حصل جديد اكيد برضه هستشركوا و شكرا مرة تانية

[Amrrr]

احسن تعليم سواقة على العربيات دي !!! لون عربيتك بس عشان نعمل حسابنا لما نشوفك