معلش محتاااااااااااار قوى ياريس ولا لانسر

[dr_mosab2081]

السلام عليكم
انا عضو جديد بهذا المنتدى الرائع
نفسى اشترى سيارة يابانى لكن للاسف المبلغ اللى معايا 75 الف مش هينفع اجيب جديد
لذلك محتار ما بين لانسر 1300 وتويوتا ياريس
محتااااااااااااار قوى وعاوز مساعدتكم
مين فيهم افضل ف الشكل وقطع الغيار واعادة البيع يعنى من مجاميعة
وبرضة السعر دة يجيبلى عربية مواصفاتها اية يعنى موديل كام والاوبشنز
متشكر ليكم قوى ومعلش استحملونى

[shooter123]

الاول كدا اهلا وسهلا بيك وسط اخواتك اخ جديد لنا كلنا
بما ان الاتنين ياباني يبقي نص المقارنة طارت يا دكتور
نتكلم بقي في النص التاني
بما انك دكتور تبقي مش من هواية الجري - يمكن في دكاترة اعرفهم اشقية جدا في السواقة - يبقي ياريس لان ثباتها مش اوي
ولو بصيت لسعر اعادة البيع اللانسر حتكسب مع كمان توافر قطع الغيار
يبقي خلينا بقي في اللانسر
ال 75 دول يجبولك 2006 سوبر اكشن كاملة طبعا وايرباج وabs وممكن تجيب 2008 بس حتزود الفلوس حاجة بسيطة وكأنك ركبت جنوط مثلا بعد ما اشتريتها
سعر اعادة البيع اللانسر تكسب
شكل الصالون من جوة اللانسر تكسب
شكل العربية من جوة اعتقدر برده اللانسر
والثباااااااااااااات ده مهم لو انت بتجري زي ما سبق وقلتلك
توكل علي الله وهي اللانسر
ربنا يوفقك لما فيه الخير

[dr_mosab2081]

الاخ شوتر السلام عليكم
شكرا قوى لمشاركتك المتميزة
فعلا انا مش بحب الجرى واستخدامى غالبا جوة المدينة وبصراحة انا بميل قوى للانسر
طيب لو انا حبيت ازود المبلغ شوية مثلا 80 الف يجيبولى لانسر 1600 مواصفاتها اية
لانى بعد كلامك فكرت ف اللانسر
وشكرا جدا على مشاركتك الرائعة

[shooter123]

عفوا يا باشا
هنا المكان الوحيد اللي تلاقي الف من يساعدك واشكرك علي كلماتك الجميلة
ممكن تجيب 1600 كاملة اوتوماتيك و2 ايرباج وABS وفتحة سقف موديل 2007 او 2008 ممكن تدخلي علي مواقع بيع وشراء السيارات وانصحك باتنين car100100 او كونتاكت
معلش مكتبتش اسامي المواقع لان ممكن يكون ممنوع

[dr_mosab2081]

جزاك اللة خيرا
انا ان شاء الله هدخل ع المواقع دى واشوف جزاك الله خيرا

[محمد محمد]

لو تعرف تزود الفلوس شوية وتجيب 1600لانسر يبقي احسن والياريس مش وحشة.

[Samir Elshahawy]

مساء الخير يادكتور ...

انا هاكلمك شوية عن الياريس و حضرتك قرر :

- الياريس ثابتة و اللي يقول غير كده يثبتي لي بالدليل القاطع أنها مش ثابته
أنا باسافر بالعربية كتير و سرعتي مش أقل من 120 كم/ساعة و الحمد لله ماقابلتش مشاكل في الثبات نهائيا

- بالنسبة للسرعة حضرتك مش فارقة معاك و مش من هواة السرعة يبقي الياريس زيها زي اللانسر ال 1300 و عموما الياريس المانيوال أكيد أفضل من الاوتوماتيك و لو أن برضه انا بأجيب بيها ال 170 كم/ساعة بسهولة و كمان بأعدي اللانسر

- داخل المدن الياريس أفضل طبعا لأنها عالية عن الارض خاصة مع شوارعنا ذات التضاريس و المطبات العالية حتي لو كانت محملة

- الياريس مطلوبة في السوق خاصة أنها مش متوافرة زي اللانسر لذا فهي ماسكة سعر يعني مش هاتخسر فيها كتير لو فكرت تبيعها بالاضافة لتوافر قطع غيارها

- توكيل الياريس مضمون أما لانسر فياعالم الموضوع هايرسي علي أيه

من الاخر هأقول لحضرتك علي حاجة كويسة ...
جرب تأجر العربيتين كل واحدة لمدة يوم و شوف انت هاترتاح في مين أكثر و بعد صلاة الاستخارة قرر و قولنا ناوي علي أيه و أن شاء الله هانكون معاك

مع خالص تحياتي
م/ سمير الشهاوي

[shooter123]

يا باشمهندس انت كدا حتخلي الدكتور يقلق ويرجع للتردد تاني
طبيعي انك تبقي متحيز للياريس عشان عربيتك وانا طبيعي اتحيز للانسر عشان عربيتي
كانت مع ابن خالتي ولقيته بيشتكي من ثباتها بيقولي بعد 140 العربية بتبقي ريشة في الهوا يمكن حضرتك مجنط بقي
تاني حاجة معروف ان قطع غيار التويوتا بصفة عامة غالية عن اللانسر يبقي ازاي؟
التوكيل
بص في الشارع حتلاقي موضوع الرواس ده مفرقش مع حد خاااااااااااالص والناس عادي بتركبها وقليل اوي بعتمد علي التوكيل لان اسعارهم نااااااار
بس احلي حاجة قلتها صلاة الاستخارة
فكرة تأجير العربية دي ممكن متنفعش لانه ممكن يأجر اي عربيه في الاتنين وتبقي حالتها وحشة ويحكم عليها حكم خاطئ
( الاختلاف في الرأي لا يفسد للود قضية )

[BLOODY_STONE]

لو استعمال جوة المدينة ... و مفيش شد و جري و كلام من ده .. الياريس حتكون ممتازة جدا
و السفر طبعا مريحة .. بس مفيش داعي تزود سرعتك اوي يعني.. يعني لحد 120 تمام اوي اوي
طبعا الياريس فيها ميزة .. قطع غيارها الاصلية (و ان كانت غالية شوية) فهي معمرة جدا ... عندك اقرب مثال تيل الفرامل .. ناس وصل معاهم لحد 60000 من غير تغيير
العربية لحد دلوقت مظهرش فيها مشاكل و الحمد لله ... محدش اشتكى تقريبا منها
العفشة الحمد لله تمام جدا .. و مش بتتفكك بسرعة .. كل 10000 ربط عليها و حتلاقيها لسة ماسكة كويس .. و طبعا الارتفاع عن الارض مفيد في الشوارع المكسرة
و صدقني .. كل جنيه حتدفعه عليها او التوكيل حتحس بقيمته ... و عموما التوكيلات كلها غالية مش تويوتا بس .. كفاية اسمه و سمعته
و كان عندي ملاحظة .. بلاش اللانسر 1300 لأن ناس كتير اشتكت منها و بص هنا في المنتدى و اقرا عنها.. لو حضرتك نويت على لانسر زود شوية معلش و هات ال1600
عموما .. من الاخر الياريس مصنوعة للراحة جوة المدينة .. لو ده اللي حضرتك عايزه يبقى توكل على الله و اوعي تنسى صلاة الاستخارة طبعا ..
اتمنى اني اكون افدتك

[Samir Elshahawy]

فكرة تأجير العربية دي ممكن متنفعش لانه ممكن يأجر اي عربيه في الاتنين وتبقي حالتها وحشة ويحكم عليها حكم خاطئ
( الاختلاف في الرأي لا يفسد للود قضية )

سيدي الفاضل ...

أنا غير متحيز للياريس و لا حاجة و علي فكرة انا كان معايا برضه لانسر 1300 أوتوماتيك قبل الياريس مباشرة
و بلاش فكرة الايجار ... الدكتور ممكن ييجي يجرب عربيتي و عربية حضرتك مثلا و يقارن و يشوف ايه اللي يناسبه
أيه رأيك بقي ؟؟

و أكيد أكيد الاختلاف مطلوب علشان يكون فيه مناقشة موضوعية نطلع منها بنتيجة مش تضييع وقت و جدل علي الفاضي و بالتأكيد أحنا كلنا في الاخر أخوة

مع خالص تحياتي
م/ سمير الشهاوي

[uthema]

ياريس طبعا

[shooter123]

وانا موافق علي اقتراحك ده
يجي يجرب عربيتي ويجرب عربيتك بعدها ويقارن بينهم
وله مطلق الحرية بعد كدا

[BLOODY_STONE]

ما شاء الله يا جماعة بجد .. دي اكتر حاجة بحبها في المنتدى ده .. كله بيساعد بعض

[Samir Elshahawy]

وانا موافق علي اقتراحك ده
يجي يجرب عربيتي ويجرب عربيتك بعدها ويقارن بينهم
وله مطلق الحرية بعد كدا

خلاص ... نتفق علي ميعاد و مكان و نتقابل
أيه رأيكوا في الرحاب ؟؟
مكان واسع و ممكن نلاقي طرق حواليها واسعة و نضيفة للتجارب بتاعة الدكتور

[mohamedkandel]

الرابط ده هيفيدك

http://www.nilemotors.net/Nile/10680-a.html

وانا ارشح الياريس اذا ما قورنت ب لانسر 1300 انما لو لانسر 1600 يبقي تتقارن بالياريس 1500