إيه الحل دلوقتى أجيب عربية منين؟؟؟

[bakbakbak]

ياجماعة الخير أنا خلاص هافرقع من نفوخى الفلوس عمالة تضييع ومش عارف أجيب عربية محترمة بقالى كتير وأنا خلاص تعبت أعمل إيه مش لاقى لانسر بسعر معقول وتكون مفهاش نصب ولا نيسان صنى برضه ميكونش سعرها عالى وموثوق فيها يعنى أعمل أى بس ياناس عايز عربية تكون نظيفة ومحترمة وواسعة وقطع غيارها مش تكون غالية أووووى,فكرت فى الأوبل فيكترا 2002=2001 لكن عايز رأيكم فى العربية دى وياترى لو قدامى عربية مشيت 140 الف كيلو بس ناس قالو لى دى مش زى اليابانى دى أحسن من اليابانى ودول مش كتير ولا يبقى أفكنى منها أنا مش عايزها تفتح بقاها وياترى تعطونى لمحة عن أسعار قطع غيار العربية دى وهل هى أحسن ولا لانسر بومة 2004 أو نيسان صنى 2005؟

[MaZaGAngeE]

البومة أفضل في رأيي
لأن الصنايعية حفظوها , قطع الغيار موجودة في كل حتة
مشاكلها قليلة جدا
لما تيجي تبيعها تتباع بسهولة

بعدها تيجي الصني مع فرق بسيط لصالح البومة

[mrwho1982]

بص يا ابن الناس هات البروتون ويرا

قطع غيارها لانسر 98 وهيونداي اكسل

تكييف وباور وازاز كهرباء وبتجري

واللي يقوللك غير كده هاتو يواجهني

للعلم العربية دي موديل 2004 ب 40000

انت طلبت النصيحة وانا اديتهاللك وفي الخدمة

[bakbakbak]

معقولة يا اخ mrwho1982 أقولك يابانى وألمانى تقولى ماليزى ودى مش منظر عربية أركبها الصراحة وأنا مقدر مساعدتك
لكن اللانسر 92 برقبتها

[mrwho1982]

ههههههههه

ياسيدي انا غلطان روح هات لانسر واوبل

[mrwho1982]

معلش انت بتقول لانسر 92 برقبتها

ده علي اي اساس

لعلمك العربية دي اصلا رياضية وغياراتها ماقولكش

احرق علي 100 وانت علي 3

علي العموم انت طلبت النصيحة وانا قلتللك انت حر
وانا حر

[MaZaGAngeE]

لو عايز بطة 93 قولي أنا هكون موجود في مصر بعد 12 يوم

[د.محمود صلاح]

الانسر بومة والنيسان صني حلوين بس ابحث جيداً لأن سوق المستعمل مليان عربيات دايبة

[bakbakbak]

ياجماعة أنا بطلب النصيحة أنا مش واقع اوى عشان أروح أجيب لانسر بطة أنا بقول لانسر بومة بومة

[yaserbasha2000]

كورولا 2006
بوما
صني

[mrwho1982]

يعني اللي راكبين لانسر بطة جربانين يعني ولا مابيستحموش ولا عالم local

لو الناس ببيتحكم عليها بعربياتهم ماكانش حد غلب

نصيحة انقل موضوعك في قسم البيع والشراء هايفيدوك اكتر

[cyborg_ift]

بقولك يا أخ .... الناس هنا بتحاول تساعدك فبلاش تهكم واحترمهم زي ما بيحترموك ومتقعدش تتريق بدل ما ربنا ياخد منك القرشين اللي معاك وساعتهه مش هتقدر تجيب حتى موتوسيكل

[أبومعاذ]

لو تقدر تجيب كورولا الشكل القديم أحسن من البومة والصني لو مينفعش يبقى بومة

[bakbakbak]

أنا أصلا غلطان وأستهال ضرب الجزمة أنى دخلت هنا أنتم هاتجننونى ولا إيه هو أنا ناقص
ياخرب أسود ياخونا حرام عليكم "أنا مقلتش أن البطة وحشة ولا البروتون أنا بقول أن العربيات دى مش هاتنفعنى لأن أحنا خمس أشخاص عايزين عربية ذو عفشة شاقة مش أى عربية تنفع معانا
والكلام اللى أنتم بتقولوه ده مش عارف أسمه إيه ده أى ده بالظبط واحد يقولى هو أحنا جرابيع والتانى يقولى بدل ما فلوسك تروح منك إه الأخ الأخير ده معلش فى اللفظ زودها معايا أوى أنت المفروض تذكر كلمة طيبة أو لتصمت

[mrwho1982]

خلاص ياجماعة حصل خير

احنا في رمضان وكل سنة وانتم طيبين