جراند تيريوس /كيا كارينز/رينو ديستر/نيسان ليفينا

[lighter]

يا ريت يا جماعة تفدونى بعمل مقارنة بين الاتى علشان اقدر اختار الافضل " يا ريت لو حد لية تجربة عملية"

1- جراند تيريوس
2- كيا كارينز
3-رينو ديستر
4- نيسان ليفينا

و شكرا على تعبكم

[KiNgMaX]

مبدئيا انا مجربتش ولا واحدة من دول
بس هحاول افكر معاك لو انا مكانك
1 - جراند تيريوس الى اعرفه عنها انها مش يابانى ومتصنعة خارج مصانع دايهاتسو كان فى مرة حد بيقو انها تقريبا بتتصنع فى مصنع بيردوا دا غير ان شكلها غير متناسق فى راى وموتوره اظنه هيكون ضعيف على حجمها وكذلك عدم انتشارها من الاخر مش بستريح لها
2 - نيسان ليفينا صينى تقريبا من مصانع نيسان الصين غير منتشرة مما يعنى انك ملزم بالوكيل ومعنديش اى معلومات كافية عنها وبرضه مش بستريح لها
3- باقى الكيا والداستر الاتنين نفس الوكيل وال 2 كويسين فى جدا فى راى
الكيا تتميز انها افخم وحاجتها ممكن تكون ارخص وسعر اعادة بيع عالى وستيبترونيك ومطلوبة وضمان اكتر ( 5 سنين )
الداستر فقرانة شوية بس احسها بتاعة شقا اكتر يعنى عربية بهدلة بالذات الفئة ال 4 * 4 وعربية شكلها ضخم وقوى
بس لوكيا انصحك باعلى فئة عشان الاير باجز
وبقولك تانى انا مجربتش ولا واحدة بس بحاول افكر معاك وإن شاء الله حد من الى جربو يفيدك اكتر وبالتوفيق

[lighter]

شكرا كتير يا KiNgMaX انت بس اللى عبرتنى مش عارف اهل الخبرة مردوش لحد دلوقت لية

[fineart607]

ان راى طبعا بعد لما تستخير الداستر ثم الكيا وربنا يوفقك ان شاء الله

[mohamedrabia]

انا ملاحظ حاجة غريبة مينفعش تعمل مقارنة بين 4*4 وعربية عادية وكمان فئة وفئة تانية خالص اعتقد هيبقي الموضوع اهواء بقا مش مقارنة خالص او ميول لفئة معينة وده يرجع ليك مش لحد تاني

[د.محمود صلاح]

الكيا كارينز ممكن يتحطلها كنبة وتبقى 3 صفوف وفي رأيي هي اختيار ناجح

[kdosoki]

بص يا فندم
لازم تتكلم شوية عن طبيعة استخدامك للعربية وطبيعة الطرق اللى بتستخدمها وكنت راكب ايه قبل سابق وممكن تصرف على العربية لأى حد
انا ركبت 2 من العربيات دى
الديهاتسو : اقتصادية فى البنزين وكيلها محترم بس قعدتها وحشه ( كأنك سايق عربية نقل ) وتفتقر الفخامة فى التصميم ( من وجهة نظرى )
الكيا : وكيل محترم ضمان 5 سنين او 100 الف العربية باعت كتير واسعة جدا من جوه بس سحبها ضعيف وبالذات الاتوماتيك
النيسان : مركبتهاش ومعرفش عنها اى حاجة
الرينو : الداستر عربية قوية والفتيس بتاعها من نيسان بس هى معمولة فى مصانع داتشيا والصالون بتعها زى اللوجان بالضبط ( فقير الى حد ما) قطع الغيار اتوقع انها تكون غاليه ومش هتعرف تعمل حاجة بره التوكيل وبرده انا مركبتهاش
يا رب اكون متوهتكش بس ده رأىى والزملاء اللى قابلى اتفقوا على كتيير منه

[Mahmud]

اعتقد النيسان احسنهم
وربنا يوفقك

[lighter]

شكرا ليكم على اهتمامكم و نصائحكم و اسف على التاخير فى الرد و كمان كل سنة و انتم طيبون
و للاحاطة
انا معاية بونتو و و كنت عايز اجيب عربية عائلية و بايل اكتر للهاتشباك الكبير زى العربيات اللى انا زكرها اعلى
و بالنسبة للسعر انا معاية حوالى 80 الف و ناوى اقسط اللى باقى و معنديش مشكلة فى موضوع التقسيط

و اختيارى للعربيات دية لاسباب اولها ان شكلها و حجمها مناسبنى ثانيا سعرها قريب من بعضة

يا ريت تسعدونى على الاختيار لانة اختيار صعب و كمان من خلال اللى قراتة على المنتدى ابتديت اقلك اكتر زى

1- كيا كارينز 1600 سى سى صغير عليها 126000 جنية
2- جراند تيريوس مش يابانى وبردة 1500 سى سى صغير عليها 150000
3- نيسان ليفينا تجميع صينى 115000
4- رينو داستر جديدة و مش متجربة 134000

[ezzatfox]

رأيى خليك فى الكارينز

[tito_1980]

جراند تيريوس

ثبات في الضياع بعد ال 100 عن تجربه قياده شخصيه ده غير عدم تناسب قوه المحرك ال 1500 مع وزن العربيه

كيا كارينز

العربيه لسه جديده بس انتشرت بسرعه و الكلام زي الفل عليها و التوكيل ممتاز

رينو ديستر

عربيه نيو في السوق المصري و لسه مش متجربه ده غير عاده الاوروبي ارتفاع اسعار الصيانه و قطع الغيار بس التوكيل ممتاز

نيسان ليفينا

بتتقفل في الصين علي ما اعتقد و غير منتشره بالمره فده هيأثر بالسلب علي توافر قطع الغيار و اسعارها داخل او خارج التوكيل