محتار بين الاونو والفيلشيا

[zamba]

اصدقائى الاعزاء اعضاء المنتدى
انا عندى مشكلة محيرانى ومش عارف اخد قرار ..انا بقالى حوالى 7 شهور بس باسوق والحمد لله اشتريت عربيتى الحالية اونو موديل 1994 ب 29000 جم وكان فيها بعض الشغل فى السمكرة والدوكو ..واتعلمت عليها السواقة وممفيش مشاكل منها الا المشاكل المعتادة وباروح للميكانيكى على طول اول ما احس ان فيه حاجة غلط ...المهم جيت اعمل السمكرة والدوكو والرتوش اللى فى السارة اكتشفت انها حتتكلف من 3 الى 4 الاف جنيه سمكرة ودوكو وفوانيش جديدة وتعديل الفرش والسروجى ... الى اخرةه

المهم واحد صاحبى عنده فيلشيا 97 عاملة 165 الف كم وعايز يبيعها ب 33 الف جنيه وشفتها حالتها مش وحشة وهو لسه مجددها بالكامل تقريباً
ونصحونى الزملاء ان اشترى الفيلشيا بدل ما اصرف على الاونو علماً باننى لا اسافر بالسيارة فهى مخصصة للانتقالات الداخلية واسرتى صغيرة وقمت بعرض الاون للبيع سمعت فيها 27 و 28 الف اقصى حاجة ...ودلوقتى انا محتار ابيعها واخلص واخد الفلشيا علشان صاحبى مستعجل ولا اصرف على الاونو واخليها معايا ...
انا عارف انها مشكلة شخصية جدا بص بصراحة مش هارف اوصل لقرار ياريت تساعدونى

[hazem_khidr]

اللي تعرفه احسن من اللي ما تعرفوش
يعني الاونو انت مربيها علي اديك و عارف فيها ايه .
انما الفليشيا لسه ما تعرفش حاجه عنها دي نقطه.
النقطه التانيه ان الاونو افضل من الفليشيا و قطع غيارها ارخص.
النقطه التالته ما تشتريش حاجه من صاحبك علشان النفوس ما تشيلش

[sab3aawy]

الأونو لو سليمة او متوضبة كويس هتبقى احسن من الفليشيا

الأونو فيها كل مميزات فيات، اداء جيد جدا، قطع غيار رخيصة ، كل ميكانيكية مصر بيفهموا فيها

لكن الفيليشيا ، برغم انها نظريا اكبر من الاونو، لكن سيارة مشاكلها كتير

انا رأيى تشد عربيتك احسن، ووقت ما تفكر تعلى تعلى لفئة اخرى اكبر(لانوس او لانسر كريستالة او كيا سيفيا مثلا)

[zamba]

شكراً يا حازم وشكراً يا سبعاوى ربنا يخليكم انا ماباحبش اعمل حاجة الا لما اسأل والحمد لله انتم طمنتونى ..انا حاتوكل على الله وحاشد الاونو والخيرة فى ما اختاره الله والف الف شكر يارب نفضل مع بعض كده على طول