كيا يرايد 97 ولا اونو 94

[ZALABANY]

ياشباب واحد قريبي عايز يجيب عربية صغيره
قدامة عربية كيا برايد 97 -مطلوب 26.50 فابريكه جوا
وعربيه تانيه برايد مكيفة بس مش تكييف اصلي 97 سعرها 29 فابريكه جوه
وعربية اونو 94 فابريكه بره وجوه سعرها 27 ماشيه 138
مين أحسن كعربية واداء وقطع غيار وتوافرها واخبار تكييف الاونو الأصلي إيه لو شغال تمام ياريت ملاك البرايد يفيدونا في الخلاصة وكذلك ملاك الأونو

[ZALABANY]

فين الناس ماحدش معاه برايد ولا اونو ولا ايه عايزين الإستشارة يا أهل الخبره

[أحمد الجندى]

أنا معايا كيا برايد 96 هاتش باك 1100 سى سى وبصراحة العربية كويسة قوى معايا حتى انى فكرت فى وقت من الاوقات لما اغير اجيب السيدان منها اللى هيا 1300 سى سى .
بالنسبة للبنزين العربية يادوب بتشم بنزين هى المفروض بتعمل من 5.5 إلى 6 لتر فى ال 100 كيلو لو ماشى طوالى وحوالى 7 لو ماشى فى المدينة ، ممكن تمشى العربية ببنزين 80 عادى خالص بس من حين لاخر ابقى حط 90 علشان تفوق العربية لان كتر ال 80 بيخليها تسقف وسحبها بيبقى زفت ، قطع الغيار رخيصة جدا يعنى لو اشتريت العربية وغيرت طقم السيرفس حاتصرفلك بتاع 200 جنيه أول عن اخر ويمكن أقل كمان كمثال سير الكاتينة ب 45 جنيه سير الدينامو ب 15 جنيه فلتر الهواء 20 البوجيهات 35 المساعدين صينى ب 290 والاصلى ب 400 تيل الفرامل القدمانى ب 45 طقم الدبرياج كله على بعضه يعمله بتاع 350 والطنابير بالبلى بالتيل الخلفى يعملوا بتاع 300 جنيه الفانوس الامامى أو الخلفى ب 70 جنيه وفانوس الاشارات ب 15 جنيه وعامة قطع الغيار متوفرة فى شارع دمشق عند الجندى وده احسنهم وعند حلمى سليمان فى التوفيقية ، العربية سهلة فى الميكيانيكا فمش محتاج حد مخصوص بس ماتعملش زيى وتروح لاى حد لانى اتلسعت فى الأول مع ميكانيكى مابيفهمش بهدلى الدنيا ولعبلى فى التاكيهات والكربراتير وخربلى الدنيا وكرهنى فى العربية حتى انى نزلت اعلانات لبيعها وحتلاقيها هنا بس ربنا كرمنى بواحد تانى رجع ظبطلى الدنيا كلها وساعتها حسيت بقيمة العربية .

العربية واسعة من قدام وورا يعنى أنا طويل شوية 183 وبرجع الكرسى لورا وعلى الرغم من كده اللى بيقعد ورا لو طوله عادى بيبقى مش محشور بل لو الكرسى اللى ورا راجع سنة ممكن واحد طويل يقعد ودى أنا جربتها بنفسى ولقيتنى قاعد مرتاح ورا ، العربية عريضة شوية عن الاونو فده بيديها ثبات احسن بس هى برضو ما تصنفش من الانواع الثابتة على الارض يعنى ماتتهورش وتزيد عن 100 العربية أنا جيبت بيها مرة 140 من قبيل التجربة وماكررتهاش تانى بس كتير كنت بامشى بيها على 120 ده ايام الشقاوة ، العربية عالية عن الارض وعمرى ماحكيت فى اعلاها مطب حتى لما كنت محمل العربية على اخرها وفيه تلاتة على الكنبة ورا برضو ما بحكش لان العربية عالية فعلا ، العفشة ناشفة شوية فأى هبد أو تكسير فى الأرض حاتحس بيه جوا ، ابعاد العربية كويسة جدا سواء من قدام أو ورا فسهل تحفظه بسرعة .

عيب العربية أولا مافيهش باور فبتعذب عذاب السنين فى الركن ومافيهاش تكييف فبتسلق جوا العربية ودى حاجة مرتبطة بفترة الصيف الصاج خفيف شوية العربية بوجه عام خفيفة يعنى لو ماشى على 80 أو 90 وجت من جنبك عربية ماشية على سرعة كبيرة أو نقل حجم كبير تحس ان الهوا بيهز العربية طبعا الشنطة مفيش علشان هاتش باك المرايات الجانبية ثابتة مابتتقفلش فاللى رايح واللى جاى بيلطش فيها بس هى والحق يقال ناشفة قوى كذا مرا تتخبط المرايات منى خبطات جامدة ولا كأن حاجة حصلت اصلا .

أنا جيبت العربية وهى عاملة 170000 الف كيلو وناس كتير حذرونى منها لان الموتور كده خلاص فى اواخره وكلام من ده بصراحة العربية كسفتهم كلهم وعمرها ما قلت بأصلها معايا ولا وقفت فى طريق وصوت موتورها لسه كويس على الرغم من عدد الكيلومترات الكتير بل وساعات بتجرى معايا جرى بابقى مستغربه من عربية 1100 وعلشان هيا مراعيانى أنا كمان براعيها قوى وبحس ان كل قرش بصرفه فيها مش خسارة .

[أحمد الجندى]

نسيت أقولك ان العربية بياعة يعنى وقت ما حتقول يا بيع حتلاقى بدل الواحد ميا ، اهم حاجة بس تجيب عربية حالتها كويسة وتبقى تراعيها وتحافظ عليها وربنا يوفقك للى فيه الخير

[heshamzaky]

زلبانى ازيك يا باشا الكيا برايد يا باشا من وجهت نظرى احسن و اكبر و تسارعها حلو سوقتها و جريت بيها كتير جدا جدا عجبتنى فى الجرى اية رأيك هههههههههه بقولك عجبتنى فى الجرى و السحب حلو

[ZALABANY]

almohake شكرا على تجربتك ومرورك الكريم على الموضوع
شكرا يا هشام باشا ربنا يباركلك

[ahmed_2009]

انا ارشحلك الكيا بس ياريت تكون سيدان عشان الهتشبتاك.شنطتها.صغيرة.جدا.
انا.معايا.اونو.٩٤.التكيف.لازم.يشتغل.كتير.والعربية. واقفة.عشان.تحس.بيه
قطع الغيار متوافرة و رخيصة

[cOrn]

كان معايا كيا برايد , والله عربية ممتازة , استهلاك بنزين معدوم , قطع غيار ببلاش , مشاكلها قليلة , و حاجة برده ميعرفهاش غير اللى معاهم برايد , انها واسعة اوى اوى اوى والله العظيم اصحايى كانوا بيركبوا ويستغربوا وواحد صاحبى معاة هيونداى النترا 2004 بيقولى ان الكنبة عندى اوسع بكتير مع العلم ان عربيتى كانت هاتش باك , الفتيس بتاعها خفيف , سحبها مش بطال خالص على 1100 , بس بتاعتى مكنتش مكيفة , و على فكرة شنطتها مش صغيرة اوى يعنى تقدر تقول معقولة

[i_Am_Legend]

الأونو أفضل بكتير_جرب تركب الأونو كدة وشوف فرق الخامات_جرب تجرى بال1.0 سى سى بتوع الأونو_مع الكيا برايد وتعالى احكيلنا.