برجاء الافاده بسرعه ارجوكم

[sherif_mohamed]

انا معايا حوالى 36 الف جنيه مش عارف حيران عاوز اجيب لانوس ولا اجين اكسنت 1500ccناس تقولى ابعد عن اللانوس عربيه كل شغلها كمبيوتر ومعقده شويه وناس تقولى الاكسنت عربيه هايله فى كل حاجه فى السحب والبنزين والشكل وكل حاجه ارجوكم افيدونى اجيب ايه مش عارف وخايف البس فى اى حاجه وخلاص ارجوككم افيدونى واسف على التطويل

اللون الاحمر مخصص للادارة

يرجى مراجعة قوانين المنتدى

مشرف عام الكورى و الماليزى

[zaza2002]

اللانوس عربيه محترمه بمعنى الكلمه وكل اللى عايزاه الاهتمام بالصيانه فقط وبجد عربيه اصيله جداجدا لكن انا لى سؤال لحضرتك انت كاتب فى بياناتك الشخصيه ان معاك لانوس واكسنت

[محمد الشامي]

اللانوس ناعمه عن الاكسنت , وكمان شغلها وصيانتها مش معقده ولا حاجه , بالاضافه الى انها اكبر من الأكسنت داخليا وخارجيا

الأكسنت عزمها اقوى وتجميعها على السرعات العاليه افضل , لكن الاتنين نفس السرعه القصوى , وده عن تجربه , انا والاكسنت كان اخرنا 170 كم/ ساعه على الصحراوي مع مراعاه ان الاكسنت كانت محمله 2 فرد , واللانوس كانت محمله 4 افراد

[falak]

من وجهة نظري الشخصية :
اللانوس : أكثر استقراراً / أوسع / مرتفعة عن الأرض أكثر من اللانوس
الأكسنت : التسارع أحسن ، أوفر في البنزين .

كلاهما : قطع الغيار متقاربة جدا وكلاهما يتميز بتوافر وعدم غلاء قطع غيارهما .

[acoount]

طبعا انا مش هقدر اتكلم بعد الاعضاء المحترمين بس ليه راى اخر
هو ان حضرتك تصرف نظر عن الشراء خالص لان اى واحد معاه عربيه بقى بيكره نفسه من زحمه الشوارع ومن صعوبه الركنه ومن رزاله المرور وربنا يوفقك للصالح

[محمد الشامي]

هو ان حضرتك تصرف نظر عن الشراء خالص لان اى واحد معاه عربيه بقى بيكره نفسه من زحمه الشوارع ومن صعوبه الركنه ومن رزاله المرور وربنا يوفقك للصالح

والله انا معاك جدا جدا جدا في رأيك :-) بس للاسف العربيه دلوقتي اصبحت اساسيات مش كماليات

[احمد المصرى]

والله انا معاك جدا جدا جدا في رأيك :-) بس للاسف العربيه دلوقتي اصبحت اساسيات مش كماليات

+111111111
انا كل ما اعدى من امام جامع الحصرى فى اكتوبر واشوف الزحمه ال هناك اقول الحمد لله الذى عافانا وانعم علينا بنعمه العربيه


الحمد لله بجد

[tito_1980]

خليك في الاكسنت احسن و بلاش من اللانوس

[محمد الشامي]

خليك في الاكسنت احسن و بلاش من اللانوس

طيب احنا كلنا بنقول خليك مع كذا عشان كذا وكذا :-) لكن حضرتك قولت الاكسنت بدون ذكر سبب واحد حتى !!!! :-) ياريت الاسباب عشان الصوره تكون اوضح والكل يستفيد :-)

[tito_1980]

طيب احنا كلنا بنقول خليك مع كذا عشان كذا وكذا :-) لكن حضرتك قولت الاكسنت بدون ذكر سبب واحد حتى !!!! :-) ياريت الاسباب عشان الصوره تكون اوضح والكل يستفيد :-)

حاضر يا باشا
اولا : الاكسنت كاربيراتير يعني صيانه اسهل و بنزين 80 هيقضي الغرض
ثانيا : قطع غيار الهيونداي الاصلي موجوده في كل مكان علي عكس الدايو
ثالثا : اللانوس بحساسات بتبوظ من نقطه ميه او شويه wd40
رابعا : عفشه اللانوس ضعيفه جدا

طبعا كلامي عن الاكسنت و اللانوس عن تجارب قياده فعليه
كان معانا 2 لانوس و 1 جوليت و ال 3 عربيات كان فيهم
المشاكل السابق ذكرها بالنسبه للاكسنت سوقتها قبل كده

[محمد الشامي]

اولا : الاكسنت كاربيراتير يعني صيانه اسهل و بنزين 80 هيقضي الغرض

حسب معلوماتي مش كل الاكسنت كاربيراتير ,, ولكن الحقن الإلكتروني افضل بالنسبه لتوفير البنزين والسحب والصيانه

ثانيا : قطع غيار الهيونداي الاصلي موجوده في كل مكان علي عكس الدايو

وقطع غيار الدايو الأصليه بردو موجوده عند محلات مشهوره ومعروفه بالإسم , وفي اي نوع من انواع العربيات في حاجات اصلي وفي حاجات مش اصلي , وكله بيتساوى في الاخر

ثالثا : اللانوس بحساسات بتبوظ من نقطه ميه او شويه wd40

طبعا معنى الكلام هنا انه ده بيكون عدم وعي من مستخدم السياره مش عيب في العربيه نفسها , وانا الحمد لله من خلال استخدامي للدايو لانوس لسنين طويله مقابلتش ولا مشكله مع اي حساس في العربيه والحمد لله , لاني فاهمها وبعرف اتعامل معاها (وعلى فكره بعمل صيانتها بإيدي احياناً)

وبردو هقول لحضرتك حاجه مهمه جدا , ان الحساسات الموجوده في العربيه بتديك مؤشرات لحاجات كتير بدل ما تتفاجئ بعطل سخيف على طريق سفر مثلا , و تقدر تعرف حاله حساسات العربيه كلها في خلال 10 دقائق عن طريق الاسكانر

رابعا : عفشه اللانوس ضعيفه جدا

انا معاك في النقطه دي , لكن كل شئ و ليه حل , لو صاحب العربيه امكانياته تسمح انه يركب مساعدين محترمه وسوست apex مثلا فـ وقتها هتكون عفشه اللانوس اقوى من عفشه الاكسنت مليون مره

لكن بردو حسب طبيعه الاستخدام لانها في الاول والاخر كلها عربيات ملاكي واستخدامها محدود على نطاق معين , وكل واحد حسب ظروف استخدامه وقيادته بيختار العربيه اللي تناسبه

اتمنى اكون وضحت وجهة نظري ورؤيتي للسيارتين , ومش معنى كلامي اني بعترض على كلام حضرتك طبعا , لكن الفكره من الكلام هو توضيح الايجابيات والسلبيات لكل سياره , والهدف النهائي هو ان يستفيد الزميل صاحب الموضوع ويقدر ياخد قرار صحيح لا يندم عليه في يوم من الايام

[tito_1980]

طبعا اسعدني النقاش معاك يا استاذ محمد
بس دي التجارب اللي مريت بيها في العربيتين
و ربنا يوفقنا جميعا

[Egy_fan]

السيارتين قريبين جدا من بعض . انا رأى اللانوس احسن