ماتريكس ولا صني ولا اي20

[dr.amr]

ايه رأيكم ياجماعه

عايز اشتري حاجه في حدود 100 الف

انهي احسن

هي لشاب معظم الوقت لوحده

ويفضل يعني لو حد يعرف العفشه الانعم لأني مجربتهمش

وهل لسه في عيوب تقفيل في الصني

[tito_1980]

الماتريكس : اختيار حلو بس لو شكلها حلو في نظرك
الصني : اختيار ممتاز و في شويه عيوب تقفيل بسيطه
الاي 20 : لسه جديده مش متجربه فبلاش المخاطره

[Islam_Shady]

انا شخصيا لسه شارى من شهر سوبر صالون و لما كنت باقارن كنت مستبعد كل الهيونداى علشان توكيلها و انا من النوع اللى لا يطيق التعامل مع اى صنايعى
برضه من الفتره اللى قعدتها فى الخليج , الكورى عمره ما يقارن مع اليابانى مع فرق السعر الكبير بينهم(الالنترا كانت ب 35 الف ريال و الصنى ب 44 الف و برضه ماحددش كان بيجيب الالنترا)
الصنى الى معايا حتى الان لم يكتشف بها اى عيوب تصنيع و حتى لو ظهر انا مطمئن ان التوكيل محترم و موش هايتعبنى.

[tarekmomo]

بص هى الصنى حلوة بس عفشتها نشفة شوية والكنبة الى وراء ضيقة شوية
الماتريكس اوسع

[mohamedfadel]

انا كان معي ماتريكس موديل 2007 من الزيرو عربية واسعة مثلما اشاروا الاخوة بس ضعيفة في السحب يعني لما كنت احتاج اشد فجأة كانت لا تسعفني و اخذت بها خبطة في الناحية الامامية في الاكصدام الايمن عربية مرسيدس دخلت فيه اتفاجأت ان باب السائق لا استطيع فتحه و الكبوت اتعوج لما كشفت اكتشفت ان الشاسيه حدث به اعوجاج بسيط رغم اني كنت مركب الديفندرات, و كانت العربية جديدة فمحبتش اني افك الموتور و اعمل زرجينة و علجت الموضوع علي قدر المستطاع, فمن ساعتها الصراحة كرهت العربية بخلاف التوكيل سيء جدا
لاجل ذلك بعتها و ربنا رزقني بالنيسان صني موتور شديد و عربية قوية و حمالة اسية و توكيلها منتهي الاحترام و الشياكة و بعد الصيانة بيطلعوا معي مهندس يجرب السيارة.

و اخيرا اقول لحضرتك استخير ربنا و ان شاء الله بالتوفيق

[adel1414]

انصح حضرتك بالصنى سوبر صالون عربية محترمة جدااا اما الاى20 ممكن تكون كويسة بس هى للحظة دى محدش مجربها فبلاش المغامرة

[mohamedkandel]

انصح حضرتك بالصنى سوبر صالون عربية محترمة جدااا اما الاى20 ممكن تكون كويسة بس هى للحظة دى محدش مجربها فبلاش المغامرة

+11111111111111

[amoromio]

أنصجك بالصني

[dr.amr]

شكرا لكل الردود يا جماعه

طيب بما ان في اجماع علي الصني

ايه الفرق بين العاديه والسوبر صالون

[SonaSteel]

السلام عليكم
اخي في الله
فعلا زي ما الاعضاء المحترمين قالولك فعلا ....... الصني عربية كحترمة جدا جدا جدا ماشاء الله لا قوة الا بالله
انا ركبت الماتريكس وربنا كرمني بالصني لسه شاريها من يومين (الحمد لله) بصراحة الصني فخمة جدا ماشاء الله وعاليه عن الارض والله والله مشفتش فيها تقفيل وحش خالص لغاية دلوقتي .... ربنا يتمها بالخير
الماتريكس التقفيل بتاعها مش عاجبني ... و مع انها عاليه لكنها واطيه علي الارض وكمان العتب اللي بتطلع عليه اوطي من العربية فبتخبط في المطبات ... بس طبعا واسعه جداااااا ماشاء الله .... بالنسبة للتغريز وكده ناس قالت مينفعش تغرز بيها علشان عاليه وبالنسبة للسحب مش عارف بصراحة علشان اللي ركبتها اوتوماتيك .
بالنسبة بقي لل(i20) .... شكلها تحفة حتي صاحب الماتريكس اللي بحكيلك عنها كان نفسه يشتريها بس خاف منها علشان مش كتير ولسه ميعرفوش عيوبها .... وهس فعلا مش منتشرة اوي
بالنسبة بقي للصني .... ماشاء الله حدث ولا حرج .... ربنا يبارك فيها وكفاية الانتشار الرهيب اليومين دول ... ماشاء فلوسك اللي هاتدفعها هتلاقيها وزياده كمان ومشهتندم ابدا ... وده مش كلامي ... ده كلام اعضاء نيسان صني ... وياريت تشرفنا هناك وتقرا مواضيع الاعضاء
بالنسبة بقي لاختلاف العادية(EX) عن (Super salon) .... اتفضل الموضوع ده

http://www.nilemotors.net/Nile/110198-ex-super.html

وده

http://www.nilemotors.net/Nile/74007-ex-salon-super-salon.html

[SonaSteel]

انا نسيت اقولك علي فرق تاني بين الماتريكس ولاصني (بما انا حصرنا المقارنة بينهم)
الماتريكس:
1-قوة المحرك: 104/5800 (حصان/لفة.دقيقة)
2-AirBag: لا يوجد
3-ABS & EBD: لايوجد
4-العزم الاقصي: 141/5400 (نيوتن.متر/د.د)
الصني:
1-قوة المحرك: 118/6000 (حصان/لفة.دقيقة)
2-AirBag: يوجد للسائق (موديلات EX) ويوجد للسائق والراكب جنب السائق (موديلات السوبر صالون)
3-ABS & EBD: يوجد في (موديلات EX) حسب الطلب .... وفي (موديلات السوبر صالون) اساسي او قياسي
4-العزم الاقصي: 161/4000 (نيوتن.متر/د.د)

وبالنسبة للمقارنة بين التوكيلات .... ممكن حضرتك تدخل منتدي هيونداي ونيسان وتسأل علي التوكيلات كل علي حده.
وأخيرا طبعا طبعا ........ متنساش الاستخارة في كل حاجة (العربية نفسها ولون العربية ونوع الغيار والمكان اللي هاتشتري منه) ممكن تصلي اساخارة لكل حاجة وربنا يهديك للخير ويسرلك امورك كلها بفضل الله
[/SIZE]

[dr.amr]

الف شكر يا استاذ sonasteel

بس لو دخلنا ال i30

مع السوبر صالون

انهي افضل ؟؟؟؟؟

الهيونداي اول فئه اوتوماتيك

[SonaSteel]

لا شكر علي واجب ..... انا اتعلمت واستفدت من المنتدي الجميل بطريقة لا تتخيلها وان شاء الله لو جربت المنتدي مشهاتسيبه وهاتحس بالكلام اللي قصدي عليه.
المهم احنا حصرنا المقارنة بين الماتريكس والصني اولا علشان رأي الاعضاء الكرام اللي ردوا عليك ان الi30 فعلا مش منتشرة و انا بصراحة مجربتهاش ولا قريت عنها ...... !!!
منتظر رد ملاكها ان شاء الله مع حضرتك .. وممكن حضرتك تعمل موضوع عنها مخصوص لمعرفة مميزاتها او عيوبها في منتدي هيونداي
وربنا ييسرلك الحال.......... لكن لو علي بيانتها زي المتريكس والصني :
I30 _Hundai:
1-قوة المحرك: 124/6200 (حصان/لفة.دقيقة)
2-AirBag: لا يوجد
3-ABS & EBD: لايوجد
4-العزم الاقصي: 157/4200 (نيوتن.متر/د.د)
وياريت لو حد من الاعضاء فعلا عنه الI30 ممكن يكلمنا عنها شويه ... ربنا يجزيه خير

[ahtaha2002]

بص انا كان معايا تيو اكسنت واتعاملت مع التوكيل بتاعهم زي الزفت فعلا وكرهني في الهيونداي
الحمد لله دلوقتي معايا صني بقالها ست شهور التوكيل محترمين جدا جدا
بص هي فيها شوية مشاكل بسيطة جدا هتبان معاك في اول 10 الاف كيلو وده طبعا بسبب التقفيل المصري بس التوكيل محترم جدا
راي الصني

[ahmed72247]

السلام عليكم ,ممكن حضرتك تراجع التقرير ده عن ال i20

http://www.nilemotors.net/Nile/193558-i-20-a.html